2 Nimania ida Jesus athi-ra vanaabariki vakadihojai jahariki avijavani.

Vaꞌoaniani oa vaabono vanofira adani ijaꞌari Jesus athi-ra vanaabariki.

Vanofivini arafiaki ida jiniro.

Avigahana-ra vara vavaniꞌaꞌbadaraki adani ijaꞌari.

Vakadihojaia vaabono vavaboraborahaki adani,

ni-hoariha kahojai-ra khai vaniꞌaki.

Onii jaharikia hoariha-ra vakanavaranihaki adani.

Ni-khai vaniꞌaki ida vagahinana hiꞌiki.

Ni-vakadiabiꞌi,

vakadiamia vaathi-ra vakamithaki.

Deus nahina hirina-ra vakahiki adani Jesus athi-ra vanaabariki.

3 Ni-vakadijaꞌari kaꞌoa-ra vanakaidivaki,

ni-ijaꞌari hoariha-ra vanakaidivaki jaboni.

Ni-vakavaꞌibodivaranipaꞌitxiki ida hoariha-ra vanaimaꞌbanavini.

Vanavaꞌiponiꞌimariniki ida hoariha.

Korijanahia vaꞌora avakaraganahaki adani vahoariha.

Ni-vaabono vanasohipaꞌitxiriha adani Jesus athi-ra vanaabariki.

Vaihamahiki adani ijaꞌari.

Hojai jahaki-ra vavajahariki adani.

4 Jesus athi-ra vanaabariki ahojaia vakadivaꞌahi-ra vanapohimajaki adani.

Ni-vakavaꞌibodivaraniki hida vanamonahaki kaimoni asohini asohirini.

Khai vaniꞌaki ida vaabono vavaboraborahavini.

Vakadivaꞌikhaiini-ra vanofivini mani ida Deua binofiki-ra vakaimajaharavini hija.

5 Bada vaniꞌavini kabaꞌi ida badani Deua bivajahaki,

vavaꞌi bodinia ni-vanofiki ada Deus,

vakajoniki ida Deus danona vavaꞌi binahonariahihivini.

Vakhanimanira adani ijaꞌari Jesu-ra vanofiriki Jesus joina amaakarini kamahini.

Akaraꞌoꞌa bana vakadiania.

6-7 Jesus kaijaꞌari vahararana vahojaki adani gamo Jesu-ra vanofiꞌbadaraki.

Jesus kania vaabono gahinai vanihaꞌbadaravini mani ida Deus vakadihojai asohiriki binaꞌbiraravini hija.

Vakadihojai ꞌboꞌda asia vakahojaiki adani gamo.

Vakadivaꞌinofinofi vavaꞌi biakanaraꞌbanahanakhamavini.

Vanofiki vanivaha ida Deus athi-ra vakaꞌojomoꞌivini.

Vakaꞌojomoꞌivini kabaꞌi,

ni-vanasohiki ida Deus athi kaꞌoa hini,

ni-avigaꞌiaki ida Deus binofiki vakadiania.

Hari.

Hiꞌadani gamo Jesus kaijaꞌari vihiꞌbadaraki vagorana aviꞌoioniki adani makhira ojomoꞌihi asohirikia vakavaranibakhiaki,

vaꞌora avakaꞌojomoꞌionira kaimoni.

Gamo-ra vavakaꞌdaꞌdivini-ra vanofiki adani.

8 Hari.

Moisés hokina kari vahojaki adani makhira viꞌbamiki Janes,

Jambres kohana.

Vakajoniki ida Moisés kohana athi.

Janes,

Jambres kohana khama fori vihiki adani makhira ojomoꞌihi asohirikia vakavaranibakhiaki.

Deus athi kaꞌoa hini-ra vakajoniki adani.

Ni-vakavaꞌibodivaranijahakiki.

Varagariꞌiki ida Cristo kaijaꞌari vihina.

9 Ni-aꞌoadaꞌiki ida ojomoꞌihi asohirikia vakavaranibakhiana.

Vahoariha vanokiki bana ida vakadihojai asohiriki,

avigamanihi ida vakadiꞌogahai asohiriki.

Vakhanimanira adani Janes,

Jambres kohana khama mahi ꞌboꞌdakari.

Jorakia vahoariha avigaki ida avigaharina.

10 Ivani Timóteo,

inaabaꞌiki ida kodiꞌojomoꞌihi athini.

Ikabanafoꞌiki jaboni ida kodihojai hiki.

Iogaki ida asia badani-ra onofivini-ra okavaꞌipahiniravini.

Ikabanafoꞌiki jaboni ida Deu-ra ovakaijokajahakivini.

Ni-ijaꞌari-ra vaꞌora oakaihamahijorakiki,

vaꞌora onokhamaniha vajaforia.

Iogaki ida ijaꞌari-ra vaꞌora onakaidivavini.

11 Iogaki ida ojaharihariꞌina kabaꞌi,

ni-Deua binofiki-ra okajoniki.

Kodihojaia ikahojaiki i jaboni.

Ikavaꞌihokiꞌiki ida mahi ꞌboꞌdakari oaꞌaadahaoniꞌina Antioquia,

Icônio,

Listra sidaji onikia,

ojahariharibakhiaꞌina,

hora vanaimaꞌbanakarahovini hiki.

Deus vani hora akavaꞌijoabakhiaja vasaꞌa kabodinia.

12 Deu-ra vanofiriki vaꞌora vanajahariharibakhiaki bana adani Jesus Cristo kaijaꞌari hahavi kidihojaia vakahojaina-ra vanofiki.

13 Aꞌbaꞌdiki bana ida ijaꞌari Jahari kahojaia vakahojaiki vakadihojai.

Aꞌbaꞌdiki jaboni bana ida Jesu-ra vanofiꞌbadaraki vakadiꞌojomoꞌihi athini asohiriki.

Vaꞌoaniaro vaꞌora vakorijanahaki adani vahoariha.

Korijanahi vihiꞌiki adani jaboni.

14 Timóteo,

inofihaꞌoadaha bana ida varani kaꞌoa hini ikaꞌojomoꞌiꞌiki.

Ivakaijoka ida ojomoꞌihi athini asohiki ira akaꞌojomoꞌiꞌboꞌdavini hiꞌiki,

Jesus kaijaꞌari vahoariha khama.

15 Idoroni hini vani ikaꞌojomoꞌiꞌia ida Deus athi papira hojaki.

Deus athi-ra iogavini mani ida ikajariꞌdaravini hija.

Aihotahi abono hina kavaranihi-ra ikajariꞌdaravini mani ida ira akavaꞌijoavini hija,

Ibavi Jaharikaꞌoakia iokharia kaimoni.

16 Deus Maꞌonahana Jahaki vaꞌora navaꞌisohijahakiꞌaha adani athi najirini vihiki.

Vanasohiki ida Deus athi vanajiriki.

Deus athi jiriki papira hojakia bivavaꞌisohihiki ida ojomoꞌihi athini asohiki.

Bikaabaniki ida ijaꞌari bada biniꞌajanaria kaimoni ida Deua bivajahariki.

Deus athi kapapirania binavaꞌisohiki ida ijaꞌari,

kidihojai-ra nasohikaꞌoaja kaimoni.

Deus athi ijaꞌari-ra kaꞌojomoꞌivini hiki ida hojai jahakia kahojaini.

17 Deus kaijaꞌaria biogahi ida athi papira hojaki,

binaabamanihi,

bikaabokahi ida badani hahavi jahaki Deua binofiki.