Deu-ra vakanikhariavini athini hida
3
Hari.
Onofiki ida Deu-ra avakhanikhariabakhiavini mahija haria kajoamoravini.
Onofiki ida Jesus monina okhaꞌokhaonijorakini ibavi hahavia.
Deu-ra vakanikharia bana mahija ijaꞌari vaipohiki ariathi-ra vakapoarijahakivini,
aꞌonifori vihira kaimoni.
2 Deu-ra vaniꞌa bana:
—Deus,
ni-ijaꞌari hahavia vavajahaki ida iathini.
Ijaꞌari vajaharikaꞌoaki Paulo-ra vanapohimajavini-ra vanofiki.
Vaꞌora akavaꞌijoa bana adani Paulo,
ijaꞌari vasaꞌa kabodinia vamakhanirara kaimoni adani Paulo — Deu-ra vakanikhariabakhia bana akadimoni.
3 Deua bada biniꞌaki ida bana athi hahavi vara haria niꞌavini hiꞌiki.
Deus aꞌonira noꞌaki bana aꞌoni danona,
aꞌonira akadavaꞌaki jaboni ada Deus,
Jahari aꞌonira napohimajaria kaimoni.
4 Ariabono aniꞌabakhiahi:
—Deus vaꞌora akadavaꞌaki adani kidijaꞌari Tessalônica sidajia vahojaki,
oniani ida ariathi-ra vanaabahahaꞌoadahavini hija.
Ni-vakavaꞌipahiniki ida bana vaꞌora anavaꞌisohivini hiꞌiki — akhaniki hari.
5 Anofiki ida akadikaꞌdaꞌdi aꞌonira bananivini,
Deus aꞌonira nakaidivavini-ra avarigavini aꞌbaꞌdini avijavani,
aꞌonira kakodiavini jaboni Cristo-ra avanokhahahaꞌoadahavinia.
Ijaꞌari vakajoniahaki varani vihina hida
6 Arigamina,
aꞌonira anavaꞌisohiki hari bana akadikaꞌdaꞌdi Jesus Cristo aꞌonira honariavini hikia.
Vahojaki adani Jesus kaijaꞌari vakajoniahaki avakadiania.
Hariꞌa vaꞌora vavaipohiha.
Ni-vanaabaki ida Cristo kavaranihi aꞌonira akaꞌojomoꞌiꞌboꞌdavini hiꞌiki.
7 Vakavaꞌibodivaraniꞌa ida akadihojai mahija harifori avihiꞌavini,
ni-akajoniaharihi.
8 Avakadiania arihojana ijaꞌari koꞌbai-ra arihahi;
anaabosihi.
Anofiki ida haria avakaijahitavini-ra anaabosivini.
Mahi oadani,
joma jararini bada akhaniki hari,
agathanija kaimoni ida akadiꞌbai abosini kaimoni jiniro.
Akadibadani hoariha hiki ida Deus athi aꞌonira akaꞌojomoꞌivini hiꞌiki.
9 Asohini kabaꞌi ida akadibadani-ra avanaabosivini,
ni-akanikhariaki ida avakadijiniro.
Anofiꞌiki ida bada akhanina-ra avanokivini,
harifori avihija kaimoni bada avakhanini.
10 Avakadiania arihojana kari vara akhanibakhiaꞌiki hari:
—Hariꞌa ꞌbaia vaꞌora vanoꞌa bana adani badani-ra vakajoniki.
11 Akamithaꞌiki ida varani avihini:
—Tessalônica sidajia Jesus Cristo kaijaꞌari vahararana vahojaki adani ijaꞌari vakajoniahaki.
Bada vakhanina-ra vanofipaꞌitxiriha adani.
Vahojana hiki ida mahi oadani vara vakhanina,
vahoariha vakadibadani,
vakadivarani,
vakadihojai hikia vakavaranina.
— Nimania ida varani avihini akamithaꞌiki.
12 Vara vaꞌora aniꞌaki bana adani vakajoniahaki avakadiania vahojaki.
Akadikaꞌdaꞌdi Jesus Cristo aꞌonira honariavini:
—Hariꞌa vahoariha-ra vakanavaranihajana.
Bada vakhanikaꞌoaꞌa afomaina mahija avaabononi avakaijahitavini.
Nimania ida Jesua binofiki avakadiania.
13 Arigamina hahavi,
hariꞌa avakaitapia bana ida vahoariha-ra avakajoamoravini.
14 Hojaki vahabini ida avaigamini ariathi kapapirani-ra kajoniki,
ni-binofiki ida ariathi-ra kapoarivini.
Hojaha o makhira ariathi-ra kapoaririki;
hariꞌa vavaipohiha bana.
Hariꞌa kidiania vahoja mahija kidihojai-ra kaipahiꞌavini,
ariathi-ra naabaꞌianara kaimoni jaboni.
15 Kajoniahaki-ra avavaipohiharavini kabaꞌi,
asia avaigamini hiki ada.
Vakaabani vajaforia bana.
Hariꞌa avaabononi vaakaihamahikhama kajoniahaki khama.
Pauloa binaꞌdiahiꞌiki ida athi kapapirani jirini
16 Hari.
Akadikaꞌdaꞌdi-ra vara aniꞌaꞌiki hari avakadimoni:
—Jesus,
ivani ihoarani inakamaꞌdaꞌia ida vaꞌi jahajahani avaꞌi bodinia.
Vaꞌora kajoamora bana adani arigamina Tessalônica sidajia vahojaki mahija vavaꞌi inajahajahavini.
Vakadiania hojahahaꞌoadaha bana — Deu-ra vara aniꞌavini akhanimaniꞌia.
17 Hovani Paulo onaꞌdiahiꞌia hida oathi kapapirani onajiriꞌiki.
Oathi kapapirani hahavi anokhominia onajiriki hida oonina.
Oathi kapapirani karajomini hida oonina hojaki.
18 Onofiki ida akadikaꞌdaꞌdi Jesus Cristo aꞌonira kajoamorahahavivini afohaꞌoadaha.
Hari ida vani oamani kodivarani.