Makhira jaharikaꞌoaki varani hina hida
2
Vara aꞌonira oniꞌavini hiki bana ida akadikaꞌdaꞌdi joina kamahini.
Joiki ada Jesus Cristo,
aajoronisiki bana hari kidiania arihojaja kaimoni.
2 Avakamithaꞌiki ida varani asohiriki vahabini.
Vakhanihaki adani ijaꞌari:
—Ada joiꞌaha Jesus.
Aꞌonira vakorijanahaki adani ijaꞌari.
Vakajariꞌda bana ida vakadivarani.
Jesus joina-ra avakavaꞌibodivaranivini,
hariꞌa aꞌonira kaꞌbarava hida ijaꞌari vakadivarani,
hariꞌa avakavaꞌisokoni.
Ni-joiriha kaho ada Jesus.
Ni-aogaki ida ijaꞌari hana hini Jesus joiꞌina-ra kahivini korijanahia.
Deus athi namoniva abono kavarani hirihi ida.
Nirihi ida ariathi papira anajiriꞌiki.
Akadivarani avavanihamania koda ida?
Akadivarani hirihi ida.
3 Vakajariꞌda bana ida vakadikorijanahi.
Vara avaniꞌaki bana ida namithaki kaimoni Jesus joina kamahini viahania.
Vajoroniki bana adani ijaꞌari Deu-ra vanofipaꞌitxiriki.
Deu-ra vakaathirimaniha hahavi binofikia.
Oniaroa jaboni abono-ra nanokiaki bana ada makhira jaharikaꞌoaki.
ꞌBoꞌdakari Deus abono-ra niꞌaha:
—Okaronaki bana ada makhira jaharikaꞌoaki Ibavi Jaharikaꞌoakia okhara kaimoni — niha ada Deus.
4 Kaikahiki bana ada makhira jaharikaꞌoaki.
Ni-vaꞌora vaꞌahaki adani ijaꞌari vakadideu-ra vakanamasivivini afojana.
Ovari,
Deus hina-ra nofivini mani ida bana Deus kaꞌoa hina-ra vakanamasivivini-ra vaꞌaharavini hija.
Biakabaiki ida deus hahavi ijaꞌaria vakanamasiviki.
Ovari ijaꞌari hahavi-ra vaꞌora niꞌaki bana ada:
—Hovani ohoarana Deus ho — vaꞌora niꞌaha ada makhira jaharikaꞌoaki,
Deus hirina kabaꞌi.
Okhajakosiki bana ada makhira judeus kaijaꞌari Deu-ra khai vaniꞌavini kagorania Jerusaléa hojaki.
Okhajakosiha,
vithiꞌaha,
vaꞌora korijanahaki bana adani vajoroniki:
—Hovani Deus ho.
Ni-hojaki ada Deus hoariha — korijanahia vaꞌora niꞌaki bana adani.
5 Hari.
Tessalônica sidajia ohojana kari makhira jaharikaꞌoaki varani hina aꞌonira vara oniꞌaꞌiki ho.
Avakavaꞌihokiria ida kodivarani?
6 Hojaki ida nahina makhira jaharikaꞌoaki kabadani-ra nadabaꞌiki.
Hojani oadani ni-abono-ra nanokiaki kaho ada makhira.
Avarigaki ida nahina hini kidibadani nadabani hiki.
Deua bikanamahiki ida mahi makhira jaharikaꞌoaki nokiana kamahini.
7 Nokiarini kabaꞌi ida kidibadani jaharikaꞌoani arafiaki,
kamaꞌdaꞌiki ida.
Kidibadani nadabani hiki akaraꞌoni kamahini vani abono-ra nanokiara bana ada makhira jaharikaꞌoaki.
Kidibadani nadabani hiki akaraꞌoni naothinia ni-ahojajanaki ida Jahari kabadani.
8 Makhira jaharikaꞌoaki Jahari kabadania kabadanina oadani,
joiki bana ada akadikaꞌdaꞌdi Jesus.
Jesua biakarafovini vani binaabiniꞌara bana ada makhira.
Vagaꞌoamanija bana ida Jesus joina,
oniani ida makhira jaharikaꞌoaki kabadani-ra nihimavini hija bana.
9 Hari.
Vara aꞌonira oniꞌaꞌianavini hiki ida makhira jaharikaꞌoaki kabadani abinina viahania.
Ovari abono-ra nanokiavini kamahini bivahojaki ida Jahari danona.
Bada biniꞌaki bana ida badani danoki ipohiki ijaꞌari-ra vaꞌora korijanahavini kaimoni.
Ijaꞌaria vakavaꞌibodivaraniꞌihi ida danona.
Deus kabadani danoki vavanihavini mani ida makhira jaharikaꞌoaki vaꞌora korijanahavini hija bana.
10 Bada biniꞌaki ida badani jaharikaꞌoaki hahavi,
vaꞌora korijanahara kaimoni adani ijaꞌari Deu-ra vanofiriki.
Ibavi Jaharikaꞌoakia vaꞌora arakhaki Deus athi-ra vakapoariravini.
Vakajoniki ida Deus athi,
ni-vaꞌora akavaꞌijoavini vanofiꞌiki,
oniani ida Deus kani-ra varagarivini hija bana.
11 Oniaroa,
Deua bikaronaki bana ida nahina vaꞌora korijanahaki okhani vakadiania.
Athi kaꞌoa hiriki-ra vanofivini mani ida korijanahi-ra vakajariꞌdaravini hija bana.
12 Oniaroa Deus vaꞌora karonaki bana adani athi kaꞌoa-ra vanofiriki imai ꞌbanani ibavinia avikhana,
hivaꞌoani korijanahi-ra vavajahaki,
hojai jaharikaꞌoaki-ra khai vaniꞌaki vaꞌoani jaboni.
Deus ijaꞌari-ra nagathogathoꞌiki kidijaꞌari hija kaimoni
13 Arigamina,
akadikaꞌdaꞌdi aꞌonira nakaidivaki aꞌoni.
Deu-ra khai aniꞌabakhiavini hiki aꞌonira nagathogathoꞌavini.
Deus ijaꞌari-ra namonahavini viahania aꞌonira nagathogathoꞌiki aꞌonira akavaꞌijoara kaimoni.
Binofiki ida vajaforia Maꞌonahai Jahaki avakadimahi-ra najahavini,
Deus jahana fori hija kaimoni ida avakadihojai jahani jaboni.
Deus athi-ra avakajariꞌdaravini mani ida aꞌonira akavaꞌijoavini hija.
14 Deua binofiꞌiki ida Jesus monina jahaki aꞌonira ananamithavini hiꞌiki.
Binofiꞌiki jaboni ida akadikaꞌdaꞌdi Jesus Cristo jahana,
vagana,
danona hiki nokiaꞌiki akadiania.
15 Vanofihahaꞌoadaha bana hida Deua binofiki avakadiania.
Kaꞌoa hiki ida akadiꞌojomoꞌihi athini aꞌonira ananamithaꞌboꞌdavini hiꞌiki.
Kaꞌoa hiki jaboni ida aꞌonira akaꞌojomoꞌivini kapapirani vada avaniꞌabakhiaꞌiki.
Vakavaꞌihokihaꞌoadaha hida ariathi aꞌonira akaꞌojomoꞌivini hiꞌiki mahija avanaabavini.
16 Akadikaꞌdaꞌdi Jesus Cristo,
Deus akadiabiꞌi khama haria vanakaidivaki hari.
Avaꞌi rogo inini kabaꞌi mahi hahavi Deus haria kajoamoraki hari,
kaaraja kaimoni ida avakaijokavini.
Haria kakodiavini hiki jaboni ida Jesus joina-ra anokhahahaꞌoadahavini.
17 Deu-ra akanikhariabakhiavini:
—Deus,
vaꞌora kakodia bana adani kadaijaꞌari Tessalônica sidajia vahojaki mahija vavaꞌi jahajahavini.
Vaꞌora kakodia mahija varani jahaki-ra vara vavaniꞌavini,
badani jahaki-ra bada vaniꞌara kaimoni jaboni afohaꞌoadaha.
— Nimania ida Deu-ra akanikhariabakhiavini athini avakadimoni.