2 Vara vaꞌora niꞌa bana adani makhira vaꞌoaniaro miroꞌa vavijavaki:

—Avavaꞌini ogairiva bana.

Vanajaha ida avakadihojai mahija vahoariha aꞌonira vavavaꞌihavini.

Avaabononi vanasohi bana.

Vavakaijokadanoki bana ida ojomoꞌihi asohiki.

Kaꞌoa hidorova bana ida vahoariha-ra vaꞌora avanakaidivavini.

Hariꞌa bana vakavaꞌipahini ida Deu-ra avakajariꞌdaravini — vaꞌora niꞌa bana adani makhira vaꞌoaniaro miroꞌa vavijavaki.

3 Onivani fori vaꞌora niha bana jaboni adani gamo vaꞌoaniaro miroꞌa vavijavaki.

Vaꞌora niꞌa bana:

—Hojai jahakaꞌoaki-ra vavahojahaꞌoadaha bana mahija vahoariha aꞌonira vavavaꞌihavini.

Hariꞌa bana vahoariha-ra vakanavaraniha varani jaharikia.

Hariꞌa vakahano bana.

4 Gamo vaꞌoaniaro miroꞌa vavijavaki-ra vaꞌora honaria bana gamo vajaꞌdinava-ra vaꞌora vakaꞌojomoꞌivini hojai jahaki-ra vakabanafora kaimoni.

Vaꞌora vakaꞌojomoꞌi mahija vakadimakhira,

vakadisai vihiki-ra vanakaidivavini-ra avigavini.

5 Vaꞌora vakaꞌojomoꞌi jaboni bana adani gamo vajaꞌdinava mahija vaabono vanasohivini-ra avigaꞌavini,

jahakaꞌoaja kaimoni ida vakadimahi,

vakadimakhira kaꞌoa-ra vanofivini.

Vaꞌora vakaꞌojomoꞌi bana vagorana-ra avakadavaꞌajahakivinia,

vakadimakhira vaathi-ra vanaabavinia jaboni.

Nimania hida gamo vaꞌoaniaro miroꞌa vavijavaki gamo vajaꞌdinava-ra vaꞌora vakaꞌojomoꞌivini varani hini.

Gamo vajaꞌdinava hojai jahakia vakahojaiꞌiki,

ni-vahoariha Deus athi jahaki-ra vakanavaranihaki varani jaharikia.

6 Onivani fori vaꞌora niha bana jaboni vaꞌora navaꞌisohi bana adani makhira vaagamojaꞌdiniꞌiki,

imakhinava vihiki vaabono vanasohira kaimoni.

7 Ivani Tito,

jakana vahoariha vanokiva ida kadahojai jahaki vakabanafoja kaimoni.

Vaꞌora ikaꞌojomoꞌivini vani,

inasohi bana ida ojomoꞌihi athini,

ivakaijokajahaki ida Deus athi.

8 Vara ivaniꞌa bana ida kadaꞌojomoꞌihi athini asohiki mahija vahoariha iathini asohirini-ra vakahiravini.

Haria vakanavaranihakia vakamithavini vanofiki ida varani asohiriki-ra vara ivaniꞌavini,

haria avanaathidanoararira kaimoni.

Kadavarani asohini-ra vakamithavini mani ida vakadivarani anavisonini hija,

oniani ida vavaꞌi anaipahihini hija.

9 Vaꞌora niꞌa bana adani kaꞌdaꞌdi kahonai abono:

—Bada vaniꞌa bana ida avakadikaꞌdaꞌdi afohanana aꞌonira vahonariafiahavini hiki,

khai vaꞌora avaniꞌara kaimoni afohanana.

Hariꞌa bana avakadikaꞌdaꞌdi vaathi-ra vanaꞌdamoꞌdamo bana.

10 Hariꞌa bana vaboꞌdia ida avakadikaꞌdaꞌdi kanahina.

Vaꞌora vananokiavinihi bana ida vaathi avanaabajahakivini.

Avakadihojai jahakia vaꞌora vananokia bana jaboni adani avakadikaꞌdaꞌdi,

oniani ida Deus akadiꞌakavaꞌijoahi abono hina-ra avigavini hija,

akadiꞌojomoꞌihi athini asohini-ra vakahivini hija jaboni — vaꞌora niꞌa bana adani kaꞌdaꞌdi kahonai abono.

11 Deua binofiki ida ijaꞌari hahavi-ra kajoamoravini,

oniani ida Jesus Cristo-ra karonavini hija vaꞌora akavaꞌijoara kaimoni.

12 Deus haria kajoamoravini vani haria kaꞌojomoꞌivini hiki ida hojai Deua bivajahariki-ra akavaꞌipahinikaꞌoavini,

nahina asohiriki kaipahivahakia Jahari haria kaborovini-ra akavaꞌinofinofijanaria kaimoni.

Haria kaꞌojomoꞌivini hiki jaboni ida ariabono anasohivini,

hojai asohikia akahojaihaꞌoadahana,

hojai Deus vaꞌi-ra khai niꞌaki arihokina oadani.

13 Haria kaꞌojomoꞌivini hiki jaboni ida arihokina oadani,

Cristo joina-ra anokhavini.

Khai niꞌavahaki ida mahi Cristo jahana danona nokiani kamahini.

Vagaki jaboni ida jahana.

AkadiDeus danoki ada Jesus Cristo,

akadiꞌakavaꞌijoahi abono.

14 Cristo abono-ra vaꞌahaꞌiki abiniꞌina akadimoni hina,

haria akavaꞌijoara kaimoni,

jaharikia arihojajanaria kaimoni.

Jesus haria namonahavini hiki akadimahi sohikaꞌoani kaimoni,

kidimoni kaꞌoa arihina,

kidibadani jahakia akabadanina-ra anofivini.

15 Tito,

vaꞌora bana kaꞌojomoꞌivinihi hida ira vara oniꞌavini hiꞌiki mahija iathini-ra vanaabavini-ra khai vaniꞌavini.

Vaꞌora kaabani bana adani iathini-ra vanaabariki.

Deus kahonai abono ihini mani ida Deus athi-ra vanaabavinia vaꞌora ihonariavini hija.

Hariꞌa bana Deus athi hirini vakahiva ida iathini.

Hariꞌa bana hoariha iathini-ra kaihiponiriva.