2 Hariꞌa bana hoariha-ra vakanavaraniha varani jaharikia.

Hariꞌa bana vakamadia.

Athii forakia vakavaraniꞌa bana vahoariha vakadiania.

Ijaꞌari hahavi-ra vanakaidiva bana afohaꞌoadaha — vaꞌora niꞌa bana adani Jesus kaijaꞌari.

3 Cristo-ra aogaravini kari arihojana ꞌboꞌda fori hiki ida Creta kaaraboni kaijaꞌarini vahojana.

Ni-avaꞌi bodini vara niki.

Amorobohariki fori arihiki hari.

Korijanahi arihina arihojaꞌiki hari.

Ni-akaabokaki ida akadihojai ꞌboꞌda ariabono akavaꞌijoavini.

Badani asohiriki kaipahivahaki-ra akavaꞌinofinofivini.

Nahina asohirini kabaꞌi,

khai akhaniꞌianahi.

Hoariha-ra anajahariharivini-ra anofivini.

Hoariha kanahina jahaki-ra akabaivini.

Vahoariha haria vakaimajahariꞌiki hari.

Harivani jaboni vaꞌora akaimajahariꞌiki adani mahi ꞌboꞌdakari.

Nimania ida Cristo-ra aogajoraravini kari-ra akavahojaivini.

4 Kabaꞌi,

Deus akadiꞌakavaꞌijoahi abono jahana-ra nanokiaꞌiki akadiania.

Binofiki ida aogavini haria nakaidivavini,

haria nofijahakivini jaboni,

5 oniani ida haria akavaꞌijoavini hija.

Oniaroa,

bada aniꞌavini kabaꞌi ida hojai bivajahariki,

haria akavaꞌijoaꞌaha.

Akadihojai asohini abosini hirihi ida haria akavaꞌijoavini.

Binofiki ida haria vaꞌadivini,

haria vaꞌadimaniꞌaha.

Deus akadihojai jaharikaꞌoaki-ra naꞌbiravini mani ida haria sokoki fori nihaja,

oniani ida akadimahi-ra anajaꞌdivini hija,

isai ꞌbanajaꞌdiniki fori haria nihaja.

Nimanija ida Maꞌonahai Jahaki kabadani akadiania.

6-7 Jesus Cristo haria akavaꞌijoavini mani ida Maꞌonahai Jahakia Deus haria noꞌavini hija.

Deus kagahinaijahakina-ra nofivini mani ida Maꞌonahai Jahaki-ra karonavini hija akadiania.

Haria kajoamoravini mani ida ajahakaꞌoana-ra kahivini hija.

Nimania hida kidibadani jahaki akadiania,

agathanija kaimoni ida haria kaibavijahahijoravini hiꞌiki,

oniani ida mahi jahaki anokhomiriki-ra anokhavini hija kidiania.

8 Kaꞌoa hiki hida ojomoꞌihi kavaranihi.

Tito,

onofiki hida varania vaꞌora ikaꞌojomoꞌijahakivini,

badani Deua bivajahaki-ra bada vaniꞌahahaꞌoadahara kaimoni adani Deu-ra vakajariꞌdariki.

Vakadihojai asohiki ijaꞌari hahavi-ra kajoamoraki.

9 Tito,

ijaꞌari vaabono avakanaathidanoararikhamavini oadani,

hariꞌa bana vakadivarani kania okhaꞌa.

Ijaꞌari kohana avikhananavaki vaonina ipohikia vakavaranina oadani,

hariꞌa bana vakadivarani kania okhaꞌa.

Hariꞌa bana vakamadiaki vakadiania oꞌoiꞌa.

Ijaꞌari judeus kaijaꞌari vakadivaꞌisohihi jirikia vakavaranina oadani,

hariꞌa bana vakadivarani kania okhaꞌa.

Ni-nahina kaimoni hini jahaki ida vakadivarani.

Ni-nahina asohikia haria kakodiaki ida vakadivarani.

10 Ikaabani bana ida ijaꞌari kidivarania vahoariha-ra narifirafiraki.

Kadakaabanahi-ra kamitharihi;

ikaabaniꞌiana bana.

Iathini-ra kamithariꞌianahi;

hariꞌa bana kidiania adahajana.

11 Iogaki ida ijaꞌari kadakaabanahi-ra nofiriki abononi anakamadavini Deus kahagihi-ra ragariꞌiki.

Hojai asohiriki-ra nofivini mani ida ijaꞌari abononi anakamadavini-ra iogavini hija.

12 Okaronaki bana ada oipohina hoarana kadania okhana.

Ártemas vahabini bana ada okaronara.

Tíquico vahabini bana ada okaronara.

Kaikahina kamahini kadania,

ivani Nicópolis sidaji onikia okhaꞌa bana mahija ariabono aakaragararikhamavini.

Okavaꞌibodivaraniki ida pahakari Nicópolis sidajia ohojana.

13 Kadania avikhaki bana adani Zenas,

Apolo khama.

Arabo kakaꞌdaꞌdini kavaꞌisohihi jiriki ogava abono ada Zenas.

Vaꞌora kajoamora bana adani makhira viꞌbamiki nahina ivahojakia mahija nahinaro-ra vakainamoravini vaadahana.

14 Jahaki ida akadijaꞌari badani jahaki amonahani-ra vakaꞌojomoꞌivini.

Vakaꞌojomoꞌivini jaboni ida nahina-ra vakainamoki-ra vakajoamoravini.

Nimania ida vakadihojai jahaki ijaꞌari-ra vakajoamoravini hini.

15 Hihadani ijaꞌari kodiania vahojaki ira vakaꞌivanitiki hadani.

Vaꞌora kaꞌivaniti bana adani Cristo kaijaꞌari kodimoni.

Akadivaꞌahi vihiki adani.

Onofiki ida Deus aꞌonira kajoamorahahavivini.

Hari ida vani oamani Paulo athi anokhomini.