Jahani arafiaki ida Deus haria akavaꞌijoavini
2
Deus kaisai vania bivavaꞌisohihijoraja ida moni akamithaꞌiki,
oniani ida moni-ra akavaꞌibodivaranivini-ra najahaja.
Moni-ra akavaꞌihokijanarihi;
kanava akarakoki fori arihihi.
2 Mahi ꞌboꞌdakari Deus ibavi kaijaꞌarini vaꞌora vakanamoniꞌiki adani akadijaꞌari avikhananavaki.
Kaꞌoa hiki ida vakadivarani.
Ijaꞌaria binaabavini bikajonihi;
bigathanihi ida athi-ra naabaravini abosini nahina jaharikia.
Asohiki ida nahina jahariki-ra gathanivini.
3 Hari.
Deus haria akavaꞌijoavini kavaranihi-ra akajonihi;
nihaniki vania koda ariabono anaihotaja bana?
Ni-akaabokaki ida ariabono anaihotavini,
agathaniria kaimoni ida athi-ra akajonivini abosini.
Jahakaꞌoaki ida Deus haria akavaꞌijoavini-ra nofivini.
Akadikaꞌdaꞌdi Jesus miroꞌa vara bivaniꞌaꞌiki ida.
Moni-ra vakamithaki haria vananokiahivini hiꞌiki ida varani kaꞌoa hini.
4 Deus vaꞌora kakodiavini hiki jaboni ida monina kaꞌoa vananokiavini.
Bada biniꞌabakhiaꞌiki ida kidibadani danoki,
ipohiki,
ijaꞌari-ra navaꞌibodivaraniki.
Bikaronaki afohanana jaboni ida ogahai danoki kidijaꞌari vakadiania,
vakaabokaja kaimoni ida Deus kabadani danoki.
Maꞌonahai Jahaki vaꞌora noꞌahananaꞌiki adani ogahai danoki binofikia.
Jesus Cristo akadiꞌakavaꞌijoahi abono
5 Hari.
Onajiriki ida Deus kamonahi ajaꞌdini kamahini,
ijaꞌari vakadihojai ajaꞌdini kamahini kavaranihi jaboni.
Ni-Deus vaꞌora honariaki bana adani ibavi kaijaꞌarini arabo ajaꞌdiki-ra vavakaꞌdaꞌdivini.
Ijaꞌari vani ida bana Deua bihonariaja.
6 Deus athi kapapirani pitania hojaki hida athi jiriki:
“Deus,
nahina ida ijaꞌari-ra ikavaꞌibodivaranivini hija?
Nahina mani ida ijaꞌari-ra
iakadavaꞌavini hija,
nahina vihirina kabaꞌi?
7 Deus,
araboa vahojana oadani adani ijaꞌari,
ni-ianarafiaki ida kaꞌdaꞌdi danona,
aagahai hiki-ra vavahojavini.
Iibavini kaijaꞌarini vani vakadiania ianarafiaja ida kaꞌdaꞌdi danona,
aagahai hiki.
Kabaꞌi,
ijaꞌari-ra inoꞌavini hiki ida afohanana danoi,
ogahai hiki kaꞌdaꞌdi hija kaimoni.
8 Vaꞌora ihonariaki adani
ijaꞌari kadamonahi
hahavi-ra vavakaꞌdaꞌdivini.”
Hari.
Papira athinia Deua bivavaꞌisohihijoraki ida kidiamonahi hahavi ijaꞌaria bivakaꞌdaꞌdivini.
Ni-nahina hoarani aaniki ijaꞌaria bivakaꞌdaꞌdiriki kaimoni.
Hari.
Hidakabaꞌi ni-anokiꞌiaki kaho ida ijaꞌari nahina hahavi-ra vavakaꞌdaꞌdivini.
9 Jesus vani ada anokiꞌara.
Araboa hojana oadani ni-arafiaki ida kaꞌdaꞌdi danona,
ogahai hiki-ra vahojavini.
Deus ibavi kaijaꞌarini kaꞌdaꞌdi danona,
ogahana hikia biaradamipaꞌitxiki ida Jesus danona,
aagahai hiki.
Badara ipohiriki nina vani hojara ada,
abono-ra vaꞌahara kaimoni abinina ijaꞌari hahavi vakadimoni hina.
Nimania ida Deus haria kajoamoravini-ra nofivini.
Naothinia Deua binoꞌaꞌianaha ada Jesus danoi,
ogahai arafiakia kidiania.
Abiniꞌina kamahini vani bikamithaꞌia ida imana ꞌbanani karaho,
ijaꞌari-ra vaꞌora kajoamorara kaimoni,
oniani ida Jesus kaꞌdaꞌdi ibavi jahaki-ra vahojavini-ra aogavini hija,
khai aniꞌaja kaimoni ida jahana.
10 Nahina hahavi hojaki Deus kaimoni.
Ovaria binakamaꞌdaꞌiki ida nahina hahavi hojaki,
bikahinanikaꞌiki ida jaboni.
Asohiki ida Deus Jesu-ra vaꞌahaꞌavini imana ꞌbanani karaho-ra kamithavini.
Imana ꞌbanani arafiani-ra vaꞌahavini mani ida akavaꞌijoahi abono jahakaꞌoaki nihana hija.
Deus vaꞌora nofiki adani ijaꞌari vaipohiki-ra nikhavini kidiania,
kidisai vihira kaimoni,
vavahojaja kaimoni ida Deus jahana,
vagana,
ogahana,
danona jaboni kidiania.
Jesus vani vaꞌora bananira adani,
vaꞌora akavaꞌijoara kaimoni.
11 Jesus vania bianija ida hojai Deua bivajahariki ijaꞌari vavaꞌi bodinia hojaki,
vajahakaꞌoara kaimoni.
Arigamina ada Jesus.
Haria najahakaꞌoaꞌiki ada.
Jesus khama akadiabiꞌi ada Deus,
oniani ida “oigamina” haria naonivini-ra kaipahiravini hija.
12 Deus athi kapapirania hojaki hida Jesus athi Deu-ra vara niꞌavini hiꞌiki afojora:
“Biꞌi,
vaꞌora onavaꞌisohivini hiki bana adani oigamina,
kadahojai niha nininia.
Moro kaathia khai oniꞌaki bana ida ijahani arafiaki
vavajoronibakhiaki ibavinia.”
13 Jesus kavarani hida jaboni:
“Ovakaijokaki bana ada Deus.”
Kidivarani hoariha:
“Hidavania ohojaja
oigamina Deus hora
noꞌavini vihiꞌiki vakadiania.”
Niha ada Jesus.
14 Hiꞌadani ijaꞌari Deus vaꞌora naonivini kodisai,
Jesus igamina adani.
Vaimaki adani ijaꞌari,
vajaroki adani jaboni,
oniania ijaꞌari ihiꞌara jaboni ada Jesus,
vaꞌoaniaro fori hira kaimoni.
Ijaꞌari hiꞌina vani abiniꞌina abono-ra vaꞌahaꞌara ada.
Abinina vani Jesua binihimakaꞌoaꞌihi ida Jahari danona.
Jaharia bikaabokaꞌiki ida ijaꞌari abinini.
15 Vahokina oadani adani ijaꞌari,
vifiniki ida vaabinina,
oniani ida vagathaki fori vaꞌora nihaja.
Jesus abiniꞌina vani vaꞌora akavaꞌijoaꞌara adani ijaꞌari abini-ra vifiniki,
vagathaki fori vihijanarara kaimoni.
16 Aogaki ida Jesus kabadani hirini hidiaja Deus ibavi kaijaꞌarini-ra vaꞌora kakodiavini.
Abraão kaijaꞌari vanamitharonisiagaki vani adani Jesus vaꞌora kakodiaꞌara.
Nimania ida athii Deus athi kapapirania hojaki.
17 Ijaꞌari ihiꞌiarina oadani ada Jesus,
ni-bikaabokaki ida haria akavaꞌijoavini,
oniani ida ijaꞌari nihana hiꞌia.
Igamina vakadimahi fori hija kaimoni ida kidimahi,
vaꞌoaniaro fori hiki ada.
Ijaꞌari hiꞌina vani bada biniꞌajahakija ida sasidotxi vakadikaꞌdaꞌdi kabadani Deus viaha.
Sasidotxi vakadikaꞌdaꞌdi kabadani hiki ida Deu-ra kanikhariabakhiavini,
Deus vaꞌora kajoamorara kaimoni adani igamina.
Jesua bivaꞌadiki ida ijaꞌari.
Deua bivakaijokavini hiꞌiki ada Jesus sasidotxi kabadani-ra bada niꞌajahakiꞌavini.
Sasidotxi vakadikaꞌdaꞌdi kabadania Jesus kabadaniꞌina mani ida ijaꞌari vakadihojai asohiriki-ra anivini hiꞌia.
18 Hari.
Jesua bikamithabakhiaki ida vaꞌi rogo inini kaborohirohi hina.
Bikajoniki ida hojai Deua bivajahariki,
oniani ida haria kakodiavini-ra kaabokavini hija,
akajonija kaimoni jaboni ida Jahari haria kaboroborovini.