Jesus kabadani Moisés kabadani-ra aradaki
3
Oigamina,
Jesus kaijaꞌari hari.
Deus aꞌonira kaboaꞌiꞌiki aꞌoni jaboni kidiania nama aokhana.
Vakavaꞌibodivaranijahaki ada Jesus.
Deua bikaronaꞌiki ada,
sasidotxi vakadikaꞌdaꞌdi hira kaimoni,
Deu-ra kanikhariaki ada akadimoni,
haria kakodiavini hiki jaboni ida Deus monina-ra akajariꞌdaravini-ra akahivini.
2 Deua bihonariaꞌaha ada Jesus vaꞌora akadavaꞌara kaimoni adani kidijaꞌari.
Bada biniꞌamanihi afohahavi,
ni-bikajonipaꞌitxiki ida Deus athi.
Moisés kohana jaboni bada biniꞌahahaviꞌiki ida badani Deua bihonariavini hiꞌiki,
vaꞌora akadavaꞌaꞌiki adani Deus kaijaꞌari.
3 Hari.
Ijaꞌaria vanakaidivaki ida gora,
vanakaidivavini arafiaki ada gora namonahava abono.
Gora namonahava abono fori hiki ada Jesus.
Gora fori hiki ada Moisés.
Jesus kabadani jahani arafiani-ra akahiva.
Jesus kabadani Moisés kabadani-ra aradaki.
4 Gora-ra anokihi;
aogahi ida ijaꞌari gora-ra namonahaki hojani.
Deus vania binamonahabiininija ida hahavi hojaki.
5 Moiséa bada biniꞌahahaꞌoadahaki ida Deua binofiki.
Deus kahonai abono ada.
Kidikaꞌdaꞌdi gorana bodinia bada niki fori hiki ada.
Moisés vaꞌora vara niꞌajoraꞌiki adani ijaꞌari Deua bivavaꞌisohihijoraki kavaranihia.
6 Hari.
Cristoa jaboni bada biniꞌahahaꞌoadahaki ida Deua binofiki,
vaꞌora akadavaꞌaki adani Deus kaijaꞌari.
Deus kaisai ada Cristo.
Kidiabiꞌi gorana bodinia bada niki ada.
Harivani Deus gorana hari.
Deu-ra akavaꞌipahiniravini vani avakaijokahaꞌoadahaha;
haria kaibavijahahivini hiki-ra anaviahanokhahi jaboni;
Deus gorana kaijaꞌarini arihihi.
Deua binaibavijahaki ida akoiri ibavini
7 Hari.
Mitha vaniꞌa bana hida Maꞌonahai Jahaki athi Deus athi kapapirania hojaki:
“Hidakabaꞌi mitha vaniꞌa bana hida Deus aꞌonira niꞌavini hiki.
8 Hariꞌa bana morobohariki fori vihiꞌa.
ꞌBoꞌdakari avakadijaꞌari
avikhananavakia
vakajoniꞌiki ida Deus athi.
Hariꞌa bana vaꞌoaniaro
fori vihiꞌa.
Amasia vaadahana kari ni-Deus vakadiania hojaki-ra vavakaijokaꞌiki.
Ni-vavakaijokaꞌiki jaboni ida vaꞌora akadavaꞌavini.
Nimania ida Deu-ra
vakaijoꞌavini.”
9 Hari.
Niha ada Deus:
“Amasia oathi-ra vakajonibakhiaki adani avakadijaꞌari avikhananavaki.
Hora vakaijoꞌavini hiki
avigaja kaimoni ida
vaꞌora okaihamahivini
vaꞌora okaihamahiravini.
40 badara ipohini vani vada vaniꞌabakhiaja ida kodibadani danoki bada
oniꞌaꞌiki vahararana,
kabaꞌi,
ni-hora vavakaijokaꞌiki.
10 Oniani ida vakadivaꞌibodivarani hora naihamahivini hija.
Oabono oniꞌahi:
Vakajoniki ida vakadikaꞌdaꞌdi ohina.
Vanaabarihi afobakhia ida vaꞌora ohonariavini hiki.
11 Hari.
Vaꞌora okaihamahiꞌaha.
Oabono oniꞌaꞌihi:
Deus kaꞌoa ohina mani ida
vaꞌora onavaꞌiponiꞌimariniravini hija bana.
Jokoa avikhariha adani
arabo vaꞌora onoꞌavini
hikia,
avakoirira kaimoni kodiania.”
Niha ada Deus.
12 Oigamina,
avaabononi avakavaꞌigairi afohanana bana.
Jahariꞌoamanija ida Deus athi kajonani.
Hariꞌa avavaꞌini bodinia Deu-ra vakajariꞌda mahija Deus hokiki-ra avakavaꞌipahiniravini.
13 Ni-nikia akahojaina jahaki.
Jahaki ida avaabononi avakakakodiakhamavini afobakhia Deu-ra avavakaijokavini.
Hariꞌa bana hojai asohiriki makhanirini-ra vakahi mahija morobohariki fori avihiravini.
Deus haria honariavini hiki ida hidakabaꞌi athi mitha aniꞌavini.
Asia hojaki hida athi “hidakabaꞌi” anaabaja kaimoni.
14 Ariabinirina oadani Cristo-ra avakaijokavini-ra akavaꞌipahinirihi,
Cristo-ra avakaijokabiininivini fori hini,
oniani ida Cristo ipohina haria nihaja bana.
15 Deus athi kapapirania hojaki hida athii:
“Hidakabaꞌi mitha vaniꞌa bana hida Deus aꞌonira niꞌavini hiki.
Hariꞌa bana morobohariki fori vihiꞌa.
ꞌBoꞌdakari avakadijaꞌari
avikhananavakia
vakajoniꞌiki ida Deus athi.
Hariꞌa bana vaꞌoaniaro
fori vihiꞌa.”
Niki ida Deus athi.
16 Ijaꞌari hahavi Moisés vaꞌora bananiꞌiki avikhaonaniꞌina Egito kaarabonia,
vakamithabakhiaꞌiki ida Deus athi.
Kabaꞌi,
vakajonibakhiaha ada Deus.
17 Hari.
40 badara ipohini Deus vaꞌora kaihamahiki adani ijaꞌari hojai Deua bivajaharikia vakahojaibakhiaꞌiki,
Deu-ra vavakaijokaravini,
oniani ida vaꞌora nihimavini hija vahoarahanana amasia.
18 Deus vara vaꞌora vaniꞌaꞌiki adani athi kajonini vihiꞌiki:
—Deus kaꞌoa ohina mani ida vaꞌora onavaꞌiponiꞌimariniravini hija bana.
Jokoa avikhariha adani Canaã kaaraboni vaꞌora onoꞌavini hikia,
avakoirira kaimoni kodiania — niha ada Deus.
19 Hari.
Oniaroa.
Aogaki ida namithaꞌiki vakadiania.
Deu-ra vavakaijokaravini mani ida arabo Deus vaꞌora noꞌavini hikia avikhana-ra vakaabokaravini hija.