Vakaikahiki bana adani ijaꞌari Deu-ra vavakaijokaki akoiri ibavinia
4
Asia mani hojaja ida Deus kavaꞌiponahi.
Asia vara bivaniꞌaki ida akoiri ibavini kavaranihi kidijaꞌari vakadimoni.
Akadimoni jaboni ida.
Ariabono akavaꞌigairiva bana mahija Deus haria anakoirivini-ra aragariravini.
2 Akamithaꞌiki ida moni jahaki,
akadijaꞌari avikhananavakia vakamithavini fori hiki amasia mahi ꞌboꞌdakari.
Vakamithavini kabaꞌi ida akoiri ibavini kavaranihi,
vakamithaꞌimariniki ida.
Ni-vavakaijokaki ida Deus athi,
oniani ida athi vaꞌora kakodiaravini hija.
3 Harivani,
Deus athi-ra akajariꞌdarihi,
akaikahiki bana hari akoiri ibavini Deua vara bivaniꞌaꞌikia.
Vaꞌoaniaro ni-vakaikahiꞌiki.
Deus vaꞌora vara vaniꞌaꞌiki adani:
“Vajariꞌdana hora naihamahiꞌiki,
oniani ida vaꞌora
onavaꞌiponivini hija:
Kaꞌoa hiki hida oathi.
Jokoa avikhariha adani
arabo vaꞌora onoꞌavini
hikia,
avakoirira kaimoni
kodiania.”
Niha ada Deus.
Deus hahavi-ra namonahavini vani bikavaꞌibodivaranijoraꞌia ida akoiri ibavini vakadimoni.
Binamonahaꞌavini kabaꞌi,
vakaikahirina Deus vaꞌora kahiki.
4 Hari.
Deus athi kapapirani pitania hojaki hida akoiri kamahini kavaranihi:
“Mahi hoarani akoiriꞌaha ada Deus 6 mahi ipohini
nahina hahavi amonahani aꞌdiahini naothinia.”
Niki hida athii.
Kidibadani aꞌdiahini mani ida Deu-ra anakoirija.
5 Hojaki hida athii hoariha onivani fori hiki:
“Jokoa avikhariha adani arabo vaꞌora onoꞌavini hiki avakoirina ibavini kodiania.”
Niha ada Deus.
6 Hiꞌadani ijaꞌaria vakamithabiininiꞌiki ida moni jahaki,
ni-vakaikahiki akoiri ibavini Deus vara bivaniꞌaꞌiki kania.
Vavakaijokaravini mani ida vaꞌora nakaikahirija.
Asia vahojaki adani ijaꞌari vahoariha Deus vakaikahina vaꞌora vaꞌahaki bana.
7 Deus asia vara bivaniꞌaꞌianaki ida akoiri ibavini,
oniani ida bana vahoariha vakaikahina-ra aogavini hija.
Deua vara bivaniꞌaki ida mahi hoariha,
binaonivini ida mahi “hidakabaꞌi”.
Badara ipohiki radahani naothinia Davi kohana maina vara bivaniꞌaki ida Deus athi.
Nimania hida Davi kohana athi Deus athi kapapirania hojaꞌboꞌdaꞌiki:
“Hidakabaꞌi mitha vaniꞌa bana hida Deus aꞌonira niꞌavini hiki.
Hariꞌa bana morobohariki fori vihiꞌa.”
8 Hari.
Ni-Josué kohana vaꞌora anakoiriki adani akadijaꞌari avikhananavaki Deus vaꞌora navaꞌisohijoravini hiꞌikia.
Vaꞌora anakoirira vaha;
badara ipohiki radahani naothinia ni-Deua vara bivaniꞌaꞌianaki vaha ida mahi hoariha ijaꞌari vahoariha avakoirina.
9 Kodivarani hiki ida asia hojani Deus kaijaꞌari vakadiꞌakoiri ibavini kaimoni.
Kidiamonahi hahavi aꞌdiahini naothinia Deus akoiriꞌina fori arihina-ra akaabokahi.
10 Hahavi amonahaꞌihi,
akoiriꞌaha ada Deus.
Onivani fori hija ida akoiri Deua vara bivaniꞌaꞌiki ijaꞌaria vagathanivini.
Ijaꞌari kabadani aꞌdiahini naothinia akoiriꞌihi Deus akoirina vani fori hini.
11 Hari.
Hariꞌa nahina haria nadabavini-ra avaꞌahava mahija akoiri ibavinia akaikahina-ra aragariravini.
Akadijaꞌari avikhananavaki Deus athi-ra vakajariꞌdavini mani ida akoiri ibavinia vaꞌora nakaikahirija.
Ni-jahaki ida ijaꞌari hoarani akadiania hojaki akoiri-ra ragarivini.
Deus athi tarasara sajoki fori hiki
12 Vara niki ada Deus.
Namithaki ida biniꞌaki.
Hokiki fori hiki ida athii Deua vara bivaniꞌaꞌiki.
Sajoki fori hiki ida.
Athii sajoki Deua vara bivaniꞌakia biaradamiki ida tarasara akasajohaninikhamaki.
Aꞌdaimaki ida tarasara kasiivihi,
bikaitoniaki ida jaroi akarahani,
jaroi amosini hiki.
Deus athi vara bivaniꞌakia bikaitoniaki ida ijaꞌari abononi,
maꞌonahani hiki hojani,
binanokiaja kaimoni ida bikavaꞌinofinofiki.
Aꞌdaimani arafiaki ida ibavi Deus athia bikaitoniaki,
oniani ida ijaꞌari vaꞌini bodini vara nini hahavi Deua biogavini hija,
asohini asohirini bikahija kaimoni ida nahina ijaꞌaria bikavaꞌinofinofiki vaꞌini bodinia.
13 Ni-ijaꞌaria bikaabokaki ida nahina-ra anahojavini Deua biogaria kaimoni.
Deus viaha arabikhajahaki,
karahobariki ida nahina hahavi kidiamonahi hararania.
Binokihahaviki ida hojaki.
Harivani afohahavi Deus viaha arihojaki hari bana afohanana,
anamonija kaimoni ida akadibadani,
akadivarani,
akadihojai hiki niha ninini.
Sasidotxi vakadikaꞌdaꞌdi danoki kaꞌoa ada Jesus
14 Hari.
Oniaroa,
hojaha ada sasidotxi vakadikaꞌdaꞌdi jahaki akadimoni hina.
Deus viaha bodi pania okhaꞌaha ada akadikaꞌdaꞌdi Jesus,
Deus kaisai,
sasidotxi hiki.
Ovari Deu-ra kanikhariabakhiaki afojahaki akadimoni.
Avakaijokava ada Jesus.
Akavaꞌipahinirihi ida athi akajariꞌdaravini.
15 Jesus,
sasidotxi kakaꞌdaꞌdi hina Deus viaha haria kanikhariaki.
Jesua bikamithaki ida akavaꞌirogoꞌini vaꞌi bodinia.
Kaborohirohi arihina vani fori hira ada Jesus jaboni ꞌboꞌdakari kaborohirohi hiꞌina,
hojai asohiriki hahavia kabadanira kaimoni.
Ni-Jesua hoaranija bada biniꞌaꞌiki ida hojai Deua bivajahariki.
16 Aipahihirina vani Deu-ra anamaakariva kidivithi ibavinia.
Haria nakaidivaki ada Deus.
Amaakarihi;
haria vaꞌadiha.
Haria kajoamoraki ada.
Deus kania aajahamisina;
haria anajahamisiki ada Jesus.