Sasidotxi vakadikaꞌdaꞌdi kabadani varani hini hida
5
Hari.
Oniaroa,
Deus vani makhira-ra nagathogathoꞌia sasidotxi vahararana,
sasidotxi vakadikaꞌdaꞌdi hira kaimoni.
Sasidotxi kabadani hiki ida Deu-ra kanikhariabakhiavini ijaꞌari-ra vaꞌora kajoamoravini.
Sasidotxi kabadani jaboni ida igitha-ra naabinivini,
bianahaꞌdivini jaboni ida igitha abononi,
Deu-ra anariakara kaimoni.
Ijaꞌari Deu-ra vanoꞌavini hiki ida igitha.
Vakadihojai asohiriki abosini ida igitha abinini,
amani ahovariꞌini,
Deus bianija kaimoni ida hojai bivajaharikia vakabadaniꞌina.
Sasidotxi Deu-ra noꞌavini hiki ida nahina hoariha ijaꞌari Deu-ra kavikhavini.
2 Sasidotxi vaꞌi bodinia bikamithaki ida vaꞌi rogo inini ijaꞌari hojai asohiki-ra varagaribakhiaki.
Ovari jaboni vaꞌoaniaro fori hiꞌiki hojai asohiki-ra ragariꞌavini.
Athii forakia vajaforia vaꞌora navaꞌisohiki adani ijaꞌari hojai asohiki-ra varagaribakhiaki,
vaꞌora kakodiaki jaboni adani ijaꞌari hojai Deua binofiki-ra avigariki.
3 Sasidotxi jabonia biragarihi ida Deus kahonari.
Kidihojai asohiriki abosini ida igitha Deu-ra kaabinihivini hiki.
Ijaꞌari vahoariha vakadihojai asohiriki abosini jaboni ida igitha sasidotxi Deu-ra kaabinihivini hiki.
4 Hari.
Ni-ovani oa abono-ra nagathogathoki ada makhira sasidotxi vakadikaꞌdaꞌdi kaimoni hina,
vahoariha sasidotxi kabadanihi jahaki khai vaniꞌara kaimoni.
Deus vani ada makhira-ra nagathogathora sasidotxi vakadikaꞌdaꞌdi hira kaimoni.
Nini vani namithaja ida Arão kohana kania.
Mahi ꞌboꞌdakari Deua binagathogathoꞌiki ada Arão.
5 Nimania ida namithaꞌiki jaboni Cristo kania.
Ni-ovari kaꞌoa abono-ra nagathogathovini hiki ida sasidotxi vakadikaꞌdaꞌdi kabadani,
ijaꞌari kidihojai asohiki khai vaniꞌara kaimoni.
Deus vania biniꞌaꞌara ada Cristo:
“Ivani kodisai i.
Hidakabaꞌi kadabiꞌi ohina-ra okahiki ho.”
6 Deus athi jiriki hoariha papira hoariha hojakia:
“Mahi anokhomirikia
sasidotxi ihihaꞌoadahaki bana i.
Ijaꞌari okhananavaki Mikisidi oniki kabadani fori
hiki ida sasidotxi kabadania ikabadanini.
Mikisidi naothi ajaꞌdini i.”
Niha ada Deus.
7 Hari.
Oniaroa,
araboa hojana oadani ada Jesus,
Deu-ra vara niꞌabakhiaki ada.
Athii ꞌbarakia bikanikhariaꞌaha,
asaraꞌaha Deus viaha.
Deua bivaꞌadivini-ra kanikhariaꞌaha.
Deua bikaabokaki ida Jesu-ra akavaꞌijoavini abinirara kaimoni.
Hari.
Jesua bivaꞌahaꞌiki ida Deua binofiki namithani kidiania,
oniani ida Jesus athi Deua binaabavini hija.
8 Deus kaisai hina kabaꞌi,
Jesus vaꞌi rogo iniki,
imana ꞌbanaꞌini abono-ra vaꞌahavini hiki,
abono-ra kaꞌojomoꞌira kaimoni Deus athi-ra naabavinia.
9 Ni-hoaranija Jesua biragariki ida hojai jahakaꞌoaki Deua bivajahaki,
binaꞌdiahihahaviki ida badani Deua binofiki,
oniani ida ijaꞌari akavaꞌijoava abono Jesu-ra nihaꞌia.
Jesus vania binakamaꞌdaja ida ijaꞌari athi naabani vihiki-ra akavaꞌijoavini,
vaꞌora noꞌavini hiki jaboni ida vakadimahi jaꞌdini jahaki anokhomiriki Deus kania.
10 Oniania Deua biniꞌaha ada Jesus:
—Ivani Mikisidi naothi ajaꞌdini i.
Ovari sasidotxi vakadikaꞌdaꞌdi ada.
Onivani fori hija jaboni ida kadabadani hora ikanikhariabakhiavini ijaꞌari-ra okajoamoravinia.
Isai avigahaꞌiariki fori avihiki aꞌoni
11 Oigamina.
Hojaki ida Mikisidi varani hina oadaki aꞌonira onavaꞌisohivini hiki kaimoni.
Mitha avaniꞌajahakirihi,
oniani ida oathi-ra avarigajorakiravini hija.
12 Masiko ipohikia Jesus kaijaꞌari avihiꞌini kabaꞌi,
ni-avarigaꞌiaki kaho ida vahoariha-ra vaꞌora avakaꞌojomoꞌivini.
Asia avanokhaki ida ijaꞌari aꞌonira vakaꞌojomoꞌiꞌianavini Deus varani hina kamaꞌdania.
Ijaꞌari Cristo-ra nofijaꞌdiniki kaimoni ida varani kamaꞌdani.
Isai paꞌitxi akajohohaahabakhiaki fori avihiki aꞌoni.
Ni-ijaꞌari karaho ꞌbai kaꞌoa-ra havini fori avihiꞌiaki kaho.
13 Asia isai joho kaaꞌbani-ra kanofiki fori avihiki aꞌoni.
Isai paꞌitxi ni-biogaki kaho ida hojai hana hini asohiki,
hojai hana hini asohiriki.
Ni-ogahaꞌiaki kaho.
14 Ijaꞌari karaho vani ida abononi kaꞌojomoꞌija.
Bikavaꞌibodivaranibakhiaki ida hojai,
biogaja kaimoni ida hana hini jahaki,
hana hini jahariki.
ꞌBai kaꞌoa havahani fori hiki ida biogavini.