Ariabono akaꞌojomoꞌiva ojomoꞌihi kavaranihi aogaꞌiarikia
6
Hari.
Hariꞌa vanajoijoirarahana ida ojomoꞌihi kavaranihi avakamithabiininiꞌiki.
Cristo-ra nofijaꞌdiniki kaimoni ida varani kamaꞌdani.
Ariabono akaꞌojomoꞌiva ojomoꞌihi kavaranihi aogaꞌiarikia.
Ijaꞌari Cristo-ra avigavini avijavaꞌiki kaimoni ida Cristo varani hina avakaꞌojomoꞌiꞌiariki.
Hariꞌa vara avaniꞌabakhiajanava hida ojomoꞌihi kavaranihi kamaꞌdani.
Aꞌonira onavaꞌisohivini hiki bana hida varani kamaꞌdani nahina nini.
Ojomoꞌihi kavaranihi kamaꞌdani hida haria navaꞌisohivini hiki akavaꞌipahinija kaimoni ida kaaji.
Ni-ijaꞌari-ra kakodiaki.
Ojomoꞌihi kavaranihi hoariha hida Deu-ra avakaijokavini niha ninini haria akavaꞌijoara kaimoni.
2 Ojomoꞌihi kavaranihi hoariha hida kanai karajomihi.
Ojomoꞌihi kavaranihi hoariha hida Deu-ra vakanikhariavini nahina kaimoni ijaꞌari vasaꞌa-ra vakanaibavivini vahoariha vaꞌdaꞌdi aꞌania.
Ojomoꞌihi kavaranihi hoariha hida Deus ijaꞌari abiniꞌiki-ra anahokivini niha ninini,
Deus ijaꞌari kahojai-ra naabosivini niha ninini jaboni,
vahoariha vahojahahaꞌoadahaki kaimoni Ibavi Jahakaꞌoakia,
vahoariha vahojahahaꞌoadahaki jaboni Ibavi Jaharikaꞌoakia.
Nimania hida ojomoꞌihi kavaranihi kamaꞌdani.
3 Jahaki ida ijaꞌari jariꞌdarini avijavahaꞌoadahaki arihina.
Deua bivaꞌahahi ida Cristo varani hina hoariha aꞌonira akaꞌojomoꞌivini;
aꞌonira akaꞌojomoꞌivini hihi ida varani avarigaꞌiariki.
4 Hari.
Ijaꞌari Cristo-ra vakaijokavini-ra kavaꞌipahinikaꞌoahi;
ni-bikaabokajanaki ida abononi kaꞌdaꞌdigariavini,
Deu-ra vakaijokaꞌianaja kaimoni.
Deua binavagaꞌiki hida ijaꞌari kavaꞌibodivarani Deu-ra ogaja kaimoni.
Bigathaniꞌiki jaboni ida Deua binoꞌavini hiꞌiki.
Bigathaniꞌiki jaboni ada Maꞌonahai Jahaki vaꞌini bodinia vahoariha fori hini.
5 Bikamithaꞌiki jaboni ida Deus athi vaꞌini bodinia,
bivajahaꞌiki ida athi.
Bikamithaꞌiki jaboni ida Deus danona Deus kidijaꞌari-ra nanokiahivini hiki bana.
6 Oniaro naothinia ijaꞌari Cristo-ra vakaijokavini-ra kavaꞌipahinihi;
ni-bikaabokaꞌianaki ida abononi kaꞌdaꞌdigariavini,
Deua biakariakaꞌianaja kaimoni.
Cristo-ra kavaꞌipahinikia biakaꞌitapoamisiꞌianaki fori hiki ada Cristo ava akasanakhamakia,
Cristo-ra ogarahavini kaimoni vahoariha vaviaha.
7 Hari.
Oigamina.
Siroi bahia bikapahabakhiaki fori arihiki hari.
Movajahakiki ida rakhajahi ꞌbaꞌdani nami jahaki imani bodinia.
Siroihi abono kaimoni ida rakhajahi joꞌdoni,
bononi hiki.
Siroi jahaki fori hihi ida akadimahi;
Deus haria kajoamorajahakihi.
8 Hari.
Siroi kahogoiki kajaroiki fori arihihi;
ni-siroihi abono haria vaꞌadiki.
Ni-nahina havahaki kaimoni hojaki,
oniani ida siroihi abono varani jaharikia kidisiroi-ra kanavaranihavini hija,
oniani ida bianahaꞌdivini hija jaboni.
Siroi kahogoini fori arihihi;
Deus haria nahokahihi Ibavi Jaharikaꞌoakia siho kabodinia.
9 Kodivaꞌahi,
siroi kahogoiki,
siroi kahogoiriki hikia okavaranina kabaꞌi,
ni-aꞌonira oakavaꞌisokoniki.
Aꞌonira okavaꞌibodivaranivini hiki siroi jahaki kahogoiriki fori avihini,
Deus kani-ra avaranikhahavini,
aꞌonira akavaꞌijoara kaimoni,
aꞌonira kajoamorabakhiaki jaboni ada.
10 Sohikaꞌoaki ada Deus.
Ni-biakavaꞌiꞌbiriniki bana ida badani bada avaniꞌaꞌiki kidimoni.
Bikavaꞌihokiki jaboni bana ida kidijaꞌari vaꞌora avakajoamorabakhiavini,
asia vaꞌora avakajoamoraha adani avaigamini.
Deu-ra avanofijahakivini mani ida vaꞌora avakajoamoravini hija.
11 Onofijahakiki ida Cristo-ra avakavaꞌinofinofihaꞌoadahavini kidiania avakaikahirini oadani,
avagathanija kaimoni ida nahina hahavi anokhaki Deus haria kaibavijahahivini hiki.
12 Ni-onofiki ida Deu-ra avaranikhavini-ra avarakaitapiavini.
Vaꞌora vakabanafo bana adani ijaꞌari Deus vaꞌora kaibavijahahivini-ra vagathaniꞌiki.
Vanokhavini oadani,
ni-Deu-ra vakavaꞌipahiniki,
Deu-ra vavakaijokahaꞌoadahaꞌiki adani.
Kaꞌoa hiki ida Deus ijaꞌari-ra navaꞌiponivini hiki
13 Hari.
ꞌBoꞌdakari Deua binavaꞌiponiꞌiki ada Abraão.
Binavaꞌisohijoravini hiꞌiki ida nahina binoꞌavini hiki kaimoni.
Deua biniꞌaha:
—Abraão,
Deus kaꞌoa ohina mani ida ira onavaꞌiponiꞌimariniravini hija bana.
Oonina-ra odionivini hiki iogaja kaimoni ida ira okorijanaharavini — niha ada Deus.
Hari.
Ni-hojaki ada deus hoariha onina Deua bidioniki kaimoni,
oniani ida onina-ra dionivini hiꞌia.
14 Deua biniꞌaꞌaha:
“Abraão,
ira onavaꞌisohijoravini hiki bana ida ira okajoamorabakhiavini.
Vaꞌora oanaipohiki bana adani kadaisai kahanodi vanamitharonisiagaki.”
Niki vania Abraão-ra navaꞌiponira ada Deus.
15 Abraãoa ni-bikavaꞌipahiniki ida Deus athi namithaki-ra nokhavini,
oniani ida nahina Deua vara bivaniꞌajoraki-ra gathanivini hiꞌia.
16 Hari.
Ijaꞌari ijaꞌari hoariha-ra navaꞌiponivini kamahini Deus onina-ra dionihi:
—Deua biogaki ida kodivarani kaꞌoa hini ira onavaꞌisohivini hiꞌiki — nihi ida ijaꞌari,
oniani ida varani kaꞌoa hini-ra avigaꞌbamakhamavini hija.
17 Hari.
Deua binofiki ida athi kaꞌoa hini ijaꞌaria avigavini.
Binofiki ida athi-ra nahoariharavini avigavini jaboni.
Deua bada biniꞌaꞌoamanija ida nahina vaꞌora navaꞌiponivini hiꞌiki,
oniani ida vaꞌora niꞌavini hiꞌia:
“Deus kaꞌoa ohina mani ida aꞌonira onavaꞌiponiꞌimariniravini hija bana.”
Niha.
18 Deua bivavaꞌisohihiki ida ijaꞌari-ra kajoamoravini.
Bivavaꞌisohihiki jaboni ida kidivaꞌiponahi-ra nahoariharavini.
Deua bikaabokarihi ida ijaꞌari-ra korijanahavini,
oniani ida vaꞌisohihi ꞌbamiki-ra anaꞌboꞌdavini hija.
Aogajahakiki ida kidivaꞌisohihi ꞌbamiki-ra nanamithavini bana,
oniani ida avaꞌi-ra khai niꞌaja.
Anokhavini oadani,
khai haria niꞌajahakiki hida vaꞌisohihi asohiki kaaraki,
agathanija kaimoni ida kidikajoamorahi haria niꞌavini hiꞌiki.
19 Hari.
Sasidotxi vakadikaꞌdaꞌdi okhajakosiha Ibavi Katokini Jahaki bodinia,
makari katokini kaꞌoahafiakia aradahajakosiꞌaha Ibavi Katokini Jahakaꞌoaki bodinia,
ijaꞌari-ra kajoamorara kaimoni Deus viaha.
Onivani fori hija ida Jesus kabadani akadimoni hini Deus kania nama.
Abiniꞌina,
okhajakosiꞌaha ada Jesus Deus gorana,
aradahajakosiꞌaha Ibavi Katokini Jahakaꞌoaki bodinia haria kajoamorara kaimoni Deus viaha.
Hari.
Âncora arokhojahakia biakanaahosagaꞌafoki ida kanava kakaraho akarakoria kaimoni.
Onivani fori hija hida Deus haria navaꞌiponivini hiꞌiki-ra anokhavini.
Ibavi Katokini Jahakaꞌoakia arokhojahaki ida âncora fori hiki.
Âncora ahosagaki fori arihina.
Arakoki fori arihirihi,
anokhahahaꞌoadahahi ida haria navaꞌiponivini hiki namithani akadiania.
20 Akadimoni hina ovari miroꞌa okhajakosiꞌaha ada Jesus,
haria kajoamorara kaimoni akaikahina viahania.
Mahi anokhomirikia sasidotxi vakadikaꞌdaꞌdi hiki ada Jesus,
Mikisidi naothi ajaꞌdina ada.