Hari.

ꞌBoꞌdakari Abraão kohana kidijaꞌari khama vaꞌora vidafiaꞌaha adani 4 arabo hiki kakaꞌdaꞌdini,

vakadijaꞌari vihiki.

Vaꞌora vidavini naothinia vajoiꞌaha adani Abraão.

Mikisidi vaꞌora karagarariꞌaha adani Abraão vajoiꞌina.

Bikaragarariꞌaha,

Deu-ra kanikhariaꞌaha Abraão-ra kajoamorara kaimoni.

2 Abraãoa binapitahatahaꞌihi ida vaꞌora vidaꞌiki vakadinahina sorara visaariꞌiki,

saꞌai koꞌbamihani himanihi pitahatahaꞌini.

Abraãoa binoꞌaꞌaha ada Mikisidi pitani hoarania.

Hari.

Mikisidi onina ariathia Kaꞌdaꞌdi Sohikaꞌoaki.

Bivakaꞌdaꞌdiki ida Salém sidaji oniki.

Salém onini ariathia Vaꞌi Jahajahani,

oniani ida Mikisidi onina hoariha-ra Vaꞌi Jahajahani Vakaꞌdaꞌdiva nihana hija.

3 Ni-nahina biogaki ida Mikisidi kaamia kohana onini,

kidiabiꞌi kohana onina,

kidiꞌarahoda avikhananavaki vaonina hiki.

Ni-papira kania hojaki ida vaonina.

Ni-hojaki jaboni ida Mikisidia bivaꞌbanaki kamahini,

bivaabiniki kamahini jaboni Deus athi kapapirania.

Kamaꞌdariki fori hiki ida kidimahi,

anokhomiriki fori hiki jaboni ida.

Deus kaisai fori hiki ada Mikisidi mahi anokhomirikia sasidotxi hina,

ijaꞌari-ra vaꞌora kanikhariavini Deus kania.

4 Hari.

Danoꞌoamanija ida Mikisidi kaꞌdaꞌdi hina.

Vakavaꞌibodivarani bana ada akadikaꞌdaꞌdi okhananavaki Abraão oniki.

Kaꞌdaꞌdi danoki hina kabaꞌi,

abono-ra navaꞌisohiꞌiki ada:

—Mikisidi kaꞌdaꞌdi hina danona biaradamiki hida odanona,

oniani ida pitani hoarani kodisorara khama asaariꞌikia onoꞌavini hija bana — niha ada Abraão.

5 Hari.

Badara ipohiki radahani naothinia Deus Moisé-ra vaꞌora navaꞌisohivini hiꞌiki ida kidivaꞌisohihi kapapirani.

Vaꞌora navaꞌisohivini hiꞌiki adani Levi kahanodi vanamitharonisiagaki sasidotxi vihiꞌina,

vagathanija kaimoni ida ijaꞌari kanahina pitahani hoarahanana.

Saꞌai koꞌbamihani himaniꞌihi ida ijaꞌari vakadibadani abosini,

vakadirakhajahi abani,

vakadigitha hiki.

Ijaꞌaria vavahojaki ida 9 hiki pitahani afohanana.

Pitani hoarani vani ida sasidotxi vakadiania avarakhaja.

Nimania ida Deus kavaꞌisohihi jiriki.

Abraão kahanodi vanamitharonisiagaki hahavi adani Israel kohana kaijaꞌari.

Levi kohana kaijaꞌari-ra vaꞌora vanoꞌaꞌiki adani pitahania.

Abraão kahanodi vanamitharonisiagaki hahavi jaboni adani Levi kohana kaijaꞌari pitahania vagahinaꞌiki.

6 Hari.

Levi kahanodi namitharonisiagaki hirina kabaꞌi ada Mikisidi,

ovaria bigathaniki ida pitani hoarani Abraão kohana binoꞌavini hiꞌiki.

Mikisidi Abraão-ra kajoamoraꞌiki jaboni.

Abraão vani ada Deua binavaꞌiponiꞌara.

7 Mikisidi Abraão-ra kajoamoravini mani ida Abraão-ra aradavini-ra aogavini hija.

Aogaki ida ijaꞌari hoariha-ra kajoamoraki kidikajoamorahi kajoamorana hiki-ra aradavini.

8 Sasidotxi ijaꞌari vakadinahina pitahania vagahinaki ni-hidiaja vahojahahaꞌoadahaki.

Vaabinihananaꞌiki adani.

Mikisidi vani ada hokihahaꞌoadahara.

Ni-abinina-ra kahiki Deus athi kapapirania.

Ovari jaboni nahina pitania gahinaꞌiki.

9-10 Mikisidi Abraão-ra karagararivini kari ni-namithaꞌiaki kaho ada Levi.

Abraãoa bikajahabodihaki fori hiki ada Levi.

Abraão kidinahina pitani paꞌitxia binoꞌavini kari Levi hojaꞌiki fori hiki Abraão jaha bodinia.

Abraão Mikisidi-ra noꞌavini vani Levia binoꞌaki fori hira jaboni ada Mikisidi pitani paꞌitxia.

Hari.

Badara ipohiki radahani naothinia Levi,

kidihanodi vanamitharonisiagaki vihiki vagahinabakhiana hiꞌiki ijaꞌari vakadinahina pitahani paꞌitxia afohanana.

11 Hari.

Badara ipohiki radahani naothinia Deus Moisé-ra navaꞌisohivini hiꞌihi ida kidivaꞌisohihi jiriki.

Oniaro kari Deus vaꞌora nagathogathoꞌaha adani Arão,

kidisai,

vakadihanodi vanamitharonisiagaki sasidotxi vihira kaimoni.

Arão kaꞌarahoda okhananavaki ada Levi.

Hari.

Ni-sasidotxia bada vaniꞌajahakiki ida sasidotxi kabadani Deus binofiki niha ninini.

Bada vaniꞌaja vaha;

ni-Deus sasidotxi hoariha jaꞌdi-ra nagathogathoki vaha.

Levi kahanodi vanamitharonisiagaki vakadibadani Arão-ra navaꞌisohivini hiꞌiki.

Sasidotxi jaꞌdi kabadani fori hirihi ida.

Sasidotxi jaꞌdi kabadani fori hiki ida Mikisidi kabadani.

12 Deus sasidotxi jaꞌdi-ra nagathogathovini vani bianahoarihaja ida sasidotxi kavaranihi,

sasidotxi kabadani hiki kidivaꞌisohihi jiriki hojakia.

13-14 Sasidotxi kavaranihi jaꞌdini Deua vara bivaniꞌaki ada akadikaꞌdaꞌdi Jesus,

sasidotxi hira kaimoni.

Sasidotxi kavaranihi ꞌboꞌda Moiséa bivavaꞌisohihivini kari vaꞌora honariaki adani Levi kahanodi vanamitharonisiagaki sasidotxi vihira kaimoni.

Levi kahanodi namitharonisiagaki hiriha ada akadikaꞌdaꞌdi Jesus.

Aogaki ada kidiꞌarahoda okhananavaki Judá oniki.

Judá kahanodi vanamitharonisiagakia ni-bada vaniꞌaki ida sasidotxi kabadani.

Moisés sasidotxi kavaranihia kavaranibakhiaki,

ni-vara bivaniꞌaki ada Judá kahanodi namitharonisiagaki sasidotxi hira kaimoni.

15 Hari.

Sasidotxi kavaranihia aꞌonira onavaꞌisohiꞌavini mani ida avarigajahakivini hija.

Namithaꞌiki ada sasidotxi jaꞌdi Mikisidi fori hiki.

16 Sasidotxi vihiriha adani Jesus kaijaꞌari avikhananavaki,

oniani ida vaꞌisohihi jiriki Jesus sasidotxi hina-ra honariaravini hija.

Ni-ijaꞌari hoariha bihonariaki sasidotxi hina.

Jesua bikaabokaki ida kidimahi anokhomirini.

Abinirina hojahahaꞌoadahana mani ida sasidotxi nihana hija.

17 Deus athi kapapirania hojaki hida athii:

18 Deua bikavaꞌipahiniꞌiki ida kidivaꞌisohihi ꞌboꞌda,

sasidotxi kabadani hini bihonariaꞌiki.

Sasidotxi kabadania ni-bikaabokaki ida ijaꞌari-ra akavaꞌijoavini.

Ni-nahina kaimoni hiki afojana.

19 Deus kavaꞌisohihi jirikia ni-bikaabokaki ida ijaꞌari kahojai-ra nasohikaꞌoavini.

Oniaroa,

Deua binajahavini arafiaki ida nahina anaviahanokhaki,

akaabokaja kaimoni ida Deu-ra anamaakarivini.

20 Hojaki hida anaviahanokhaki.

Hojaki jaboni ida Deus athi Jesu-ra navaꞌiponiꞌimariniravini-ra kahivini.

Ni-Deus vaꞌora navaꞌiponiki adani Levi kohana kahanodi vanamitharonisiagaki afohanana,

sasidotxi vihira kaimoni.

21 Jesus vani ada Deua binavaꞌiponiꞌara sasidotxi hiꞌina.

Deua biniꞌaha:

22 Deus Jesu-ra navaꞌiponiꞌimariniravini-ra kahivini mani ida vaꞌiponahi jaꞌdini aꞌboꞌdaki jahani-ra anarafiaja.

Jesus vania binakamaꞌdaja ida,

binaꞌdiahihahaviki ida vaꞌiponahi jaꞌdini aꞌboꞌdaki akadimoni hini.

23 Vaꞌiponahi jaꞌdini fori hirihi ida vaꞌisohihi ꞌboꞌda.

Vaipohiki adani sasidotxi vihiki bada vaniꞌaki ida vaꞌisohihi ꞌboꞌda.

Sasidotxi abiniꞌina makhira hoariha sasidotxi-ra anajaꞌdibakhiaki,

oniani ida sasidotxi hiki-ra anaipohija afohanana.

Vahokihahaꞌoadahariha adani.

24 Jesus vani ada hokihahaꞌoadahaꞌara.

Oniani ida ijaꞌari hoariha sasidotxi kabadani Jesua bada biniꞌaꞌiki-ra gathaniravini hija.

25 Jesua bikaabokaki ida afohaꞌoadaha vaꞌora akavaꞌijoajahakivini adani ijaꞌari Deu-ra vanamaakarivini-ra vanofiki.

Hokihahaꞌoadahaki ada Jesus,

oniani ida Deu-ra kanikhariahaꞌoadahavini hija,

vaꞌora kajoamorara kaimoni.

26 Hari.

Oniaroa.

Jesus vania bikaabokaja ida haria kajoamoravini afojahaki,

sasidotxi vakadikaꞌdaꞌdi kabadania kabadanina.

Jahakaꞌoaki ada.

Ni-hoaranija bada biniꞌaki ida hojai Deua bivajahariki.

Sohikaꞌoaki ada.

Deua bianakaraꞌoha ada Jesus ijaꞌari hojai asohiriki-ra vanamonahaki vahararana,

bikaboaꞌiꞌaha kidiania nama hojana.

27 Sasidotxi vahoariha fori hiriha ada Jesus.

Mahi hahavi sasidotxia binaabiniki ida igitha,

amani biahoarija kaimoni,

imani bianahaꞌdiki Deu-ra noꞌara kaimoni.

Sasidotxia bada biniꞌaꞌimidiahi ida kidibadani,

Deua bianija kaimoni ida kidihojai asohiriki.

Naothinia vaꞌora naabinihananaha adani igitha ijaꞌari Deu-ra vanoꞌavini vihiki,

Deua bianija kaimoni ida vakadihojai asohiriki afohanana.

Sasidotxi Deu-ra kanikhariavini jaboni vaꞌora kajoamorara kaimoni.

Ni-nikia kabadaniki ada Jesus.

Hojai asohiriki-ra bada niꞌaravini mani ida igitha abinini-ra nofiravini hija kidimoni.

Ovari abono-ra vaꞌahaꞌiki abiniꞌina Deus viaha igitha abiniꞌiki fori hiꞌina.

Hoaranija abinina-ra vaꞌahavini,

bianikaꞌoaja kaimoni ida ijaꞌari vakadihojai asohiriki.

28 Hari.

Deus kavaꞌisohihi jiriki Moisé-ra noꞌavini hiꞌikia bivavaꞌisohihiki sasidotxi vakadikaꞌdaꞌdi gathogathona niha ninini.

Sasidotxi vakadikaꞌdaꞌdi hina kabaꞌi,

ovari jaboni hojai sohikaꞌoaki-ra ragariki.

Hari.

Ni-niki ida Deus kavaꞌiponahi jaꞌdini.

Deus kavaꞌiponahi jiriki oniaro miroꞌa hojaꞌboꞌdaꞌiki.

Naothinia Deua bivavaꞌisohihiki ida kidivaꞌiponahi jaꞌdini aꞌboꞌdaki.

Kidisai-ra niꞌaha:

Deus oamani ho.

Jokoa ira onavaꞌiponiꞌimarinirihi.

Vaꞌiponahi jaꞌdini aꞌboꞌdaki athinia Deua binavaꞌisohiha ada kidisai sasidotxi vakadikaꞌdaꞌdi hira kaimoni.

Jahakaꞌoaki ada afohaꞌoadaha kidisai.

Ovaria bada biniꞌajahakiki ida sasidotxi kabadani hahavi niha ninini Deua binofiki.