Sasidotxi vakadikaꞌdaꞌdi ada Jesus
8
Aꞌonira onavaꞌisohivini hiki ida nahina kaimoni sasidotxi kavaranihia okavaranina.
Deus pitana aniaja nama hojaha ada Jesus.
Kaꞌdaꞌdi danoki kavithi ibavinia vithiꞌaha.
Bada biniꞌaki ida sasidotxi vakadikaꞌdaꞌdi kabadani,
haria kajoamorara kaimoni.
Deu-ra kanikhariabakhiavini akadimoni.
Deua bikaabokaki ida hahavi binofiki.
2 Deus kania hojaki ada Jesus.
Ibavi Katokini Jahakaꞌoakia Deus khai niꞌana kagorani kaꞌoa bodinia hojaki ada.
Ni-ijaꞌaria binamonahaki ida gora.
Deus vania binamonahaja ida.
Ibavi Katokini Jahakaꞌoaki kania sasidotxi kabadania kabadaniki ada Jesus.
Deu-ra kanikhariaki akadimoni.
3 Hari.
Ijaꞌari vahararana Deua binagathogathoꞌaha ada sasidotxi vakadikaꞌdaꞌdi,
sasidotxia bikanavaꞌigara kaimoni ada Deus,
igitha,
nahina hoariha hikia ijaꞌari Deu-ra kavikhavini hikia.
Jesus jaboni nama hojana sasidotxi vakadikaꞌdaꞌdi hina bivahojaki ida nahina Deu-ra noꞌavini hiꞌiki.
4 Araboa hojara vaha;
ni-sasidotxi hiki vaha.
Vahojaki adani sasidotxi vahoariha araboa Deu-ra vanoꞌavini hiki kaimoni ida igitha abononi ahaꞌdiki,
nahina hoariha hiki.
Deus kavaꞌisohihi jiriki vaꞌora navaꞌisohivini hiki ida nahina vavikhaki kaimoni.
5 Rajomi fori hiki ida sasidotxi araboa vahojaki vakadibadani.
Vakabanafoki ida sasidotxi kabadani kaꞌoa nama.
ꞌBoꞌdakari Moiséa binamonahaꞌiki ida makari kagorahi,
tenda oniki,
ijaꞌari Deu-ra khai vaniꞌavini ibavini kaimoni.
Binamonahavini viahania Deua biniꞌaha:
—Moisés,
arabo namahikia ihojaꞌini oadani,
ira onanokiahivini hiꞌiki ida ogorana kaꞌoa oibavia hojaki.
Inamonaha bana ida makari kagorahi oibavia hojaki nokiani onivani fori hiki arabo namania — niha ada Deus.
6 Cristo vania bigathaniꞌia ida sasidotxi kabadani Deus kania.
Sasidotxi kabadani jahani Jesua bada biniꞌakia biaradaki ida badani sasidotxi araboa vahojaki bada vaniꞌaki.
Hari.
Jesua binakamaꞌdaꞌihi ida vaꞌiponahi jaꞌdini aꞌboꞌdaki Deus kidijaꞌari-ra vaꞌora navaꞌiponivini hiꞌiki.
Jahani arafiaki ida Deus kavaꞌiponahi jaꞌdini.
Biaradaki ida Deus kavaꞌisohihi hoariha Moisé-ra navaꞌisohiꞌboꞌdavini hiꞌiki.
Deus kavaꞌiponahi jaꞌdini jahani arafiaki,
oniani ida Jesus kakajoamorahi-ra anarafiaja.
7 Jahani kabaꞌi ida vaꞌisohihi oniaro miroꞌa,
ni-bikaabokaki ida ijaꞌari kamahi-ra najahakaꞌoavini Deus viaha.
Arajomaja vaha;
ni-Deua bivavaꞌisohihiꞌianaki vaha ida vaꞌiponahi jaꞌdini hoariha.
8 Deus vaꞌora anaathidanoarariꞌaha adani kidijaꞌari,
kidivaꞌisohihi oniaro miroꞌa naabapaꞌitxini vihiriki,
oniani ida anarajomarini hija.
Oniania niha ada Deus:
“Khaki bana ida mahi Deus vaꞌiponahi jaꞌdini-ra
namonahavini kamahini,
vaꞌora onavaꞌisohira
kaimoni adani Israel
kaijaꞌari vanamitharonisiagaki,
Judá kaijaꞌari vanamitharonisiagaki vihiki.
9 Kodivaꞌiponahi jaꞌdini fori hirihi bana ida kodivaꞌiponahi ꞌboꞌda,
vakadijaꞌari avikhananavaki-ra vaꞌora onavaꞌisohivini hiꞌiki.
Egito kaarabonia vahojana kari vasaꞌa oagathiki fori vihina,
vaꞌora oavikhaonaniha,
vaꞌora obananiꞌaha,
vaꞌora onavaꞌisohiꞌaha kodivaꞌiponahi oniaro
miroꞌa.
Vakajoniꞌihi ida oathi vakadiDeus hoarana ohina.
Vakavaꞌinofinofiki ida deus amovana ipohiki.
Kodivaꞌiponahi oniaro
miroꞌa-ra vakajonivini mani ida
nahina vanofikia
vaꞌora ovaꞌahavini hiꞌia.
10 Oniaroa.
Aꞌonira onavaꞌisohijoravini hiki hida
kodivaꞌiponahi jaꞌdini
aꞌboꞌdaki vaꞌora onavaꞌisohiki
bana adani Israel
kaijaꞌari.”
Niha ada Deus.
“Onaibaviki bana hida kodivaꞌisohihi vavaꞌi bodinia.
Onajiriki fori hiki ida vaꞌisohihi vavaꞌi nakaabanahahani hiki kaimoni.
Hovani vakadiDeus kaꞌoa bana ho.
Vaꞌoaniaro kodijaꞌari vihiki bana adani.
11 Kodivaꞌiponahi jaꞌdini namithani kamahini
kodijaꞌari hahavi hora
avigaki bana vakadikaꞌdaꞌdi ohina.
Ijaꞌari nahina vihiriki,
ijaꞌari nahina vihiki jaboni afohanana hora avigaki bana adani vakadiDeus ohina,
oniani ida ipohina hora ogavinia ijaꞌaria bikaꞌojomoꞌijanaravini hija bana.
Ni-ijaꞌari vaꞌora kaꞌojomoꞌivini hiki jaboni adani kidiarabo kaijaꞌarini hora avigara kaimoni.
12 Onaꞌbiraki bana ida
vakadihojai asohiriki
vanamonahaꞌiki.
Vaꞌora oakariakaki bana adani.
Ni-okavaꞌihokijanaki bana ida hojai jaharikia vakabadanina.”
Nihi ida Deus athi papira hojaꞌboꞌdaꞌiki.
13 Deua vara bivaniꞌahi ida kidivaꞌiponahi jaꞌdini,
oniani ida kidivaꞌiponahi oniaro miroꞌa okhananavaki-ra ꞌboꞌda naonivini hija.
Hojaki ida nahina ꞌboꞌda,
jorakia ihimiki bana ida.