Deu-ra akanamasivikaꞌoavini-ra nofivini niha ninini
9
Hari.
Deus kidivaꞌiponahi oniaro miroꞌa-ra nanamithavini kari vaꞌora navaꞌisohiki adani ijaꞌari Deu-ra vakanamasivivini niha ninini binofikia.
Bivavaꞌisohihiki jaboni ida makari kagorahi ijaꞌaria vanamonahaki kaimoni.
Ibavi Katokini Jahakaꞌoaki oniki ida Deu-ra khai vaniꞌavini ibavini.
2 Oniaro kari vanamonahaꞌiki ida makari kagorahi.
Kaꞌoahafiaki ida gora makari katokihia.
Gora pitani hidiaja onini Ibavi Katokini Jahaki.
Ibavi Katokini Jahaki bodinia vanaibaviꞌiki ida lamparina.
Atira kania hojaki 7 hiki ida haꞌdini ipohini.
Vakanaibaviki jaboni ida mesa.
Mesa kanamania kahojaki ida pão sasidotxi Deu-ra vanoꞌavini.
3 Makari katokihi pitani oniaja Ibavi Katokini Jahakaꞌoakia oniki ida.
4 Gora pitani Ibavi Katokini Jahakaꞌoaki bodinia hojaki ida altar,
arca kihiki.
Altar oniki ida mesa kanamahiki sasidotxi incenso-ra avanahaꞌdibakhiavini ibavini.
Ajava mitxana fori hiki ida incenso.
Altar namania ravisohani hiki ida ouro.
Onivani fori kihija ida caixa arca kaoniki ouroa karavisohani.
Arca karajomiki ida Deus kavaꞌiponahi oniaro miroꞌa.
Arca kabodinia hojaki ida ouro kabavihi maná bavini hiki.
Arca kabodinia hojaki ida jaboni Arão kohana kaava moamananiꞌiki.
Hojaki jaboni ida jaꞌdi txapatxapaki jiriki ꞌbamiki.
Jaꞌdi namania hojaki ida Deus kahonari jiriki saꞌai koꞌbamihani hiki ipohini.
5 Arca kanamania vahojaki adani ijaꞌari fori vihiki viꞌbamiki avaamoana.
Amovai viꞌbamiki vahojakia vakarajomiki ida Deus hojana arca kania.
Vabihi nokhoni vakadasahararikhamaki.
Vabihi aaviramiki vakarahobaki fori hiki ida arca katapani namani.
Ijaꞌari kahojai asohiriki aniani ibavini ida arca katapani namani.
Hari.
Ni-onofiki ida kodivarani-ra onaꞌoadavini hidakabaꞌi,
rajomi ipohiki kavaranihia aꞌonira onavaꞌisohihahavivinia.
6 Hari.
Aꞌdiahiꞌihi ida Deu-ra khai vaniꞌavini kagorani bodinia bada vaniꞌaki.
Oniaroa,
kamaꞌdaꞌihi ida sasidotxi kabadani.
Mahi hahavi avikhajakosiki adani sasidotxi makari kagorahi pitani Ibavi Katokini Jahaki onikia Deu-ra vakanamasivira kaimoni,
bada vaniꞌaki ida sasidotxi kabadani Deus athi vaꞌora honariavini hiki.
7 Sasidotxi vakadikaꞌdaꞌdi vani ada makari kagorahi pitani Ibavi Katokini Jahakaꞌoakia onikia oꞌoiꞌara.
Ovari hoarana badara hoarahanana hoaranija okhajakosiki.
Biavikhajakosiki ida igitha amani.
Kidimoni ida afoꞌimidia ama biahoariꞌiki Deua binaꞌbiraja kaimoni ida hojai asohiriki-ra bada niꞌavini,
biogaravini kabaꞌi ida hojai asohiriki.
Oniaroa,
kidijaꞌari hahavi vakadimoni ida ama biakanaꞌdiriꞌdirikhamaꞌiki,
Deua binaꞌbiraja kaimoni ida hojai asohiriki bada vaniꞌaki,
avigaravini kabaꞌi ida hojai asohiriki.
8 Maꞌonahai Jahaki haria kaꞌojomoꞌijahakivini makari kagorahi sasidotxi bada vakhanina kavaranihia.
Deus khai niꞌana kagorani Ibavi Katokini Jahaki hojani oadani,
ni-kamaꞌdaꞌiaki kaho ida ijaꞌari Deu-ra vanamaakarivini,
ni-arabikhajahaki kaho ida Ibavi Katokini Jahakaꞌoaki.
9 Makari kagorahi varani hinia biarajoꞌinanavaki fori hiki ida namithaꞌiki hidakabaꞌi akadiania.
Ijaꞌari Deu-ra kanamasivikia bivikhavini kabaꞌi ida igitha,
nahina hoariha hiki,
ni-igitha amani ijaꞌari vaꞌini bodini-ra najahakaꞌoaki Deus viaha.
10 Deus kavaꞌisohihi jiriki athini ijaꞌari-ra honariaki ꞌbai havahaki havahariki kaimoni,
nahina avahariki aavahaki kaimoni,
kaaji ipohikia hoariha-ra navaꞌisohivini.
Ijaꞌari kaajiriki abononi sokovini niha ninini jahaꞌianaja kaimoni Deus viaha.
Deua binofiki hida kaaji ijaꞌaria vanaabavini,
bianajaꞌdiravini oadani ida hahavi vaꞌiponahi oniaro miroꞌa bivavaꞌisohihiki.
11 Hari.
Khaꞌaha ada Cristo.
Sasidotxi vakadikaꞌdaꞌdi hiꞌina binakamaꞌdaꞌihi ida nahina jahaki jaꞌdini namithaꞌiki akadiania.
Hari.
Oꞌoiꞌiki ada Cristo Deus khai niꞌana kagorani kaꞌoa nama hojakia,
bada biniꞌaja kaimoni ida Deua binofiki.
Ni-ijaꞌaria vanamonaharihi ida Deus khai niꞌana kagorani kaꞌoa.
Jahakaꞌoaki ida.
Ni-araboa hojaki Deus kamonahi hararania.
Deus khai niꞌana kagorani kaꞌoa nama hojaki jahani makari kagorahi jahani araboa hojaki-ra aradaki.
12 Deus khai niꞌana kagorani kaꞌoa nama Deus kania oꞌoiꞌaha ada Cristo.
Okhajakosiꞌaha hoaranija gora pitani Ibavi Katokini Jahakaꞌoaki onikia.
Ni-biavikhajakosiki ida boji,
ꞌdaama kahidari hiki vaamana,
ijaꞌari kahojai asohiriki abosini kaimoni hini.
Amana kaꞌoa vani ida biavikhajakosiꞌia,
akadihojai asohiriki abosini kaimoni,
oniani ida mahi anokhomirikia haria akavaꞌijoavini hija afohaꞌoadaha.
13 Hari.
Judeus kaijaꞌari vavahojaki ida kaaji ipohiki Deus kavaꞌisohihi jiriki vaꞌora navaꞌisohivini hiꞌiki.
Ijaꞌaria bivakaajirihi ida nahina kaaji hiki;
Deus viaha asafini namani sokoariki fori hihi ida ijaꞌari.
Hari.
Sasidotxia biakanaꞌdiriꞌdirikhamavini hiki ida igitha amani ijaꞌari asafini namania,
binajahaꞌianaja kaimoni ida ijaꞌari Deus viaha.
Arajomaꞌiki ida boji amana,
ꞌdaama kahidari amana akaꞌdiriꞌdirikhamaki.
Arajomaki jaboni ida ꞌdaama kahidari dorona akhomana kapahaki akaꞌdiriꞌdirikhamaki.
14 Igitha amani danonia bikaabokaki ida ijaꞌari-ra najahavini Deus viaha nahina-ra vakaajiravini naothinia.
Cristo amana danoni jahani igitha amani-ra aradaki.
Ijaꞌari vaꞌini bodini-ra najahakaꞌoavini-ra kaabokaki ida.
Maꞌonahai Jahaki Cristo vaꞌi-ra nahonariahihivini vani abiniꞌina-ra vaꞌahaꞌara ada Cristo Deus viaha akadimoni hina.
Igitha abononia ijaꞌari Deu-ra noꞌavini fori hiki ida Cristo abono-ra arakhaꞌavini Deus kania.
Deus viaha jahakaꞌoaki ada Cristo.
Cristo amana binajahaki ida akadivaꞌibodivarani,
akadimahi hiki,
bianiꞌiki ida nahina haria osaniki,
oniani ida kaaji haria akavaꞌijoariki-ra anofijanaravini hija.
Anofiki ida badani Deus hokikia binofiki bada aniꞌavini.
Deus kavaꞌiponahi jaꞌdini aꞌboꞌdaki varani hini
15 Hari.
Oniaroa.
Cristo vania binakamaꞌdaja ida Deus kavaꞌiponahi jaꞌdini.
Hiꞌadani ijaꞌari Deus vaꞌora kaboaꞌiki vakadimoni ida vaꞌiponahi jaꞌdini.
Mahi anokhomirikia vagathaniki ida Deus kakajoamorahi vaꞌora navaꞌiponijoravini hiꞌiki.
Hari.
Deus kavaꞌiponahi oniaro miroꞌa hojani oadani,
ijaꞌaria varagariki ida Deus vaꞌora honariavini hiki.
Cristo abiniꞌina vakadimoni hina mani ida vaꞌora akavaꞌijoavini bikaabokavini hija,
vagathaniria kaimoni ida vaꞌiponahi-ra varagarivini abosini.
16 Hari.
Akadihojai hiki ida ijaꞌari hokini oadani nahina bivahojakia vaꞌora navaꞌiponivini adani vahokiki vagathanija kaimoni.
Papira hojaki ida kidivaꞌiponahi athini jiriki.
Abinirini oadani ni-vagathaniki.
Avigahi ida abiniꞌini,
bona vagathaniꞌihi afohanana ida vaꞌiponahi-ra namonahaki kanahina.
17 Hokini oadani ni-nahina kaimoni hiki ida vaꞌiponahi athini kapapirani.
Abiniꞌini vani vagathanija ida.
Nimania ida akadihojai.
18 Akadihojai kavaranihi haria navaꞌisohivini hiki ida Deus kavaꞌiponahi oniaro miroꞌa.
Nahina abinirini,
ama ahovaririni oadani,
ni-kamaꞌdaki kaho ida vaꞌiponahi oniaro miroꞌa.
19 Oniaroa,
Moisés kohana vaꞌora navaꞌisohiꞌimidiaki adani ijaꞌari avikhananavaki honari ipohiki athinia Deus kavaꞌisohihi jiriki kania hojaki,
vanaabaja kaimoni.
Vaꞌora navaꞌisohivini naothinia binabiiniꞌihi ida ama bavini.
Bodinia hojaki ida ꞌdaama kahidari amana,
boji amana,
paha kabodiki.
Binabiiniꞌihi jaboni ida ava vadini paꞌitxi hisopo oniki,
ovilia savina nadarakia odabohamisiki.
Dasa biniꞌafarihi ida savina nadaraki ama bavini bodinia,
biakanaꞌdiriꞌdirikhamaja kaimoni ida ama Deus kavaꞌisohihi jiriki kapapirani namania.
Ama-ra akanaꞌdiriꞌdirikhamaꞌaha ijaꞌari hahavi vajoroniki vanamana jaboni.
20 Moisés vaꞌora niꞌaꞌaha:
“Deus haria noꞌavini hiki ida vaꞌiponahi jiriki
hidakabaꞌi.
Igitha amani ahovarini
Deus kavaꞌiponahi-ra
nakamaꞌdaki.
Deus aꞌonira honariavini hiki hida vaꞌiponahi
jiriki athini-ra
avanaabavini,
avagathanija kaimoni ida aꞌonira navaꞌiponivini
hiꞌiki.”
Niha ada Moisés.
21 Onivani fori hija ida jaboni Moiséa biakanaꞌdiriꞌdirikhamaꞌavini ida ama Deus khai niꞌana kagorani namania.
Biakanaꞌdiriꞌdirikhamaꞌihi jaboni mesa,
lamparina,
arca nahina hahavi hoariha namania sasidotxia bada vaniꞌaki makari kagorahi bodinia hojaki.
22 Deus kavaꞌisohihi jirikia bivavaꞌisohihijoraki ida ama ahovariki nahina ipohiki-ra najahavini Deus viaha.
Nahina ipohiriki ni-nikia binajahaki.
Ama ahovaririni oadani,
ni-Deua binaꞌbiraki kaho ida hojai asohiriki.
Ni-biakariakaki kaho ida ijaꞌari.
Cristo abiniꞌina vani bianija ida hojai asohiriki
23 Hari.
Deus kania nama hojaki ida Deus khai niꞌana kagorani kaꞌoa.
Deus khai niꞌana kagorani nama hojaki amovani ida araboa hojaja.
Moiséa binaibaviki ida igitha amani makari kagorahi araboa hojaki namania.
Binaibaviki jaboni ida ama nahina hahavi makari kagorahi bodinia hojaki namania,
binajahaja kaimoni Deus viaha.
Hari.
Ni-arajomaki ida igitha amani,
binajahaja kaimoni ida nahina nama hojaki.
Ama hoariha jahani arafiaki vani ida jahaja,
oniani ida Cristo abiniꞌina abono-ra vaꞌahavini hija.
24 Ni-Cristo oꞌoiki Ibavi Katokini Jahakaꞌoaki ijaꞌaria vanamonahaꞌikia.
Deus gorana amovani ida gora araboa hojaki.
Ibavi Katokini Jahakaꞌoaki nama hojakia oꞌoiꞌiki ada Cristo.
Deus viaha maakarinia hojaꞌaha,
Deu-ra kanikhariaha akadimoni.
25 Ni-amana-ra aviꞌoibakhiaki,
binaabosija kaimoni ida akadihojai asohiriki Deus viaha.
Hoaranija arajomaki ida amana-ra aviꞌoivini.
Judeus kaijaꞌari vakadisasidotxi vakadikaꞌdaꞌdi vani ada igitha amani-ra aviꞌoibakhiara Ibavi Katokini Jahakaꞌoaki araboa hojakia.
Badara hoarahanana hoaranija oꞌoiki ada sasidotxi.
Ni-nikia kabadaniki ada Cristo.
26 Cristo akadihojai asohiriki-ra naabosibakhiara vaha;
Deus hahavi-ra namonahavini naothinia abinibinibakhiana abono-ra vaꞌahamaniha vaha.
Ni-abinibakhiaki.
Hoaranija khaꞌaha ada Cristo mahi anokhomini amaakarini.
Cristo-ra rakhaki abinina abono-ra vaꞌahavini,
hojai asohiriki-ra anivini ijaꞌari vaꞌini bodinia.
27 Ijaꞌari hahavi hoaranija abiniki hida araboa.
Abinini naothinia Deua binavaꞌisohinanaki ida ijaꞌari hana hini sohikaꞌoaki viaha,
ijaꞌari hana hini hojai asohiriki abosini-ra gathaniki kaimoni.
28 Onivani fori hira ada hoaranija abiniꞌina Cristo.
Hoaranija abiniꞌina-ra vaꞌahavini hiki ijaꞌari vaipohiki vakadihojai asohiriki-ra naꞌbirara kaimoni.
Khaꞌianaki bana ada.
Hojai asohiriki-ra naꞌbiravini kaimoni hijanarihi ida Cristo-ra rakhaꞌianaja.
Cristo-ra rakhaki bana vaꞌora akavaꞌijoahavini adani nokhana vihiki.