Igitha amania ni-bianiki hida hojai asohiriki
10
Rajomi fori hiki ida vaꞌisohihi jiriki judeus kaijaꞌaria vavahojaki.
Rajomi nokiani maꞌonahanahaki fori hiki ida.
Ni-bianamovajahakiki ida nahina kaꞌoa hini nama hojaki.
Rajomi maꞌonahanahaki nokiani haria navaꞌisohijoravini hiki paꞌitxi ida nahina jahaki Deus haria kaibavijahahivini hiki nama.
Hari.
Hidiaja badara oadani sasidotxia avahoaribakhiaki ida igitha amani afohanana Deus viaha.
Vakhanina vani badara hahavi bada vaniꞌaja ida vakadibadani Deus viaha vaꞌisohihi jiriki vaꞌora navaꞌisohivini hiꞌiki.
Kabaꞌi,
ni-ijaꞌari Deu-ra vanofiki vakadimahi-ra najahakaꞌoaki ida igitha amani.
Ni-binajahaki ida vakadihojai.
2 Ijaꞌari Deu-ra vakanamasiviki vakadihojai asohiriki aniaja vaha;
ni-vavaꞌi kaabanahahani vaꞌora osanijanaki vaha;
ni-ijaꞌari igitha amani-ra avahoarijanaki vaha,
Deua bianija kaimoni ida hojai asohiriki.
3 Ni-aniaki ida hojai asohiriki vakadiania.
Igitha amani-ra avahoaribakhiavini badara hahavi vaꞌora navaꞌihokiki adani ijaꞌari vakadihojai asohiriki asia hojania.
4 ꞌDaama kahidari amana,
boji amana hikia ni-bikaabokaki ida hojai asohiriki aniani ijaꞌari vakadiania,
5 oniani ida Cristo,
ijaꞌari vakadiania khaꞌina viahania,
Deu-ra niꞌavini hija:
“Inofirihi ida igitha amani ahovarini afobakhia
iviahania,
oniani ida
makhira ohina-ra inamonahavini hija bana,
ojarona,
oasafi,
oimana hikia hora
inoꞌavini hija bana.
6 Ni-khai ira niꞌaki ida igitha abononi ahaꞌdiki altar
namania iviahania.
Ni-khai ira niꞌaki ida igitha abinini,
amani ahovarini,
binaabosija kaimoni ida
ijaꞌari kahojai asohiriki.
7 Oniaroa Deu-ra oniꞌahi:
Deus,
hidavania ohojaja,
bada oniꞌaja kaimoni ida badani inofiki.
Hojaki ida varani ohina afojora kadavaꞌisohihi jiriki kapapirani kania.
Nini vani bana bada oniꞌaja ida.”
Niki ida Cristo athi afojora Deus athi kapapirania hojaki.
8 Hari.
Cristoa biniꞌaꞌimidiaha:
“Ni-inofiki,
ni-khai iniꞌaki
jaboni ida igitha abiniki,
igitha amani ahovariki,
nahina hoariha ahaꞌdiki hiki.
Ni-igitha abononi ahaꞌdiki-ra khai iniꞌaki,
ijaꞌaria binaabosija
kaimoni ida kidihojai
asohiriki.
Ni-niki-ra inofiki.”
Cristoa biniꞌavini kabaꞌi hida athi,
nikia vakabadanina Deus kavaꞌisohihi jiriki ijaꞌari-ra honariaki.
9 Oniaro naothinia Cristoa biniꞌaha:
“Deus,
hidavania ohojaja,
bada oniꞌaja kaimoni ida badani inofiki.”
Niha.
Nina vani Cristoa binihimaꞌia ida igitha abinibakhiani,
amani ahovaribakhiani hiki.
Bianabosiki ida hojai ꞌboꞌda kidibadania.
10 Ovari hoaranija abiniꞌina abono-ra vaꞌahaꞌiki.
Ni-abinijanaki.
Nini vani Cristoa bada biniꞌaꞌia ida Deua binofiki,
oniani ida akadihojai asohiriki-ra naꞌbiravini hija,
akadimahi-ra najahakaꞌoavini hija jaboni.
11 Hari.
Judeus kaijaꞌari vakadisasidotxia gaabakhiana,
bada biniꞌabakhiaki ida mahi hahavi badani,
Deus vaꞌora kajoamorara kaimoni adani ijaꞌari.
Binaabiniki ida igitha,
biahoariꞌihi ida amani,
bianahaꞌdiki ida imani.
Igitha hoariha onivani fori binihaꞌianaki afobakhia.
Nikia kabadanina kabaꞌi,
ni-aniaki ida hojai asohiriki ijaꞌari vavaꞌi bodinia.
12 Cristo vani ada hoaranija abono-ra vaꞌahaꞌara abiniꞌina ijaꞌari kahojai asohiriki abosini kaimoni hiꞌina.
Arajomahaꞌoadahaki ida abiniꞌina hoaranija.
Kidibadani aꞌdiahini naothinia vithirariꞌaha Deus pitana aniaja.
13 Asia vithina vaꞌora nokhaki adani bana Cristo-ra vavajahariki ꞌdama kanaboꞌania Deus vaꞌora obaira kaimoni.
Vakhanina vani nahina-ra vakaabokajanariha adani.
14 Cristo hoaranija abiniꞌina abono-ra vaꞌahaꞌavini vaꞌora najahahaꞌoadahaki adani ijaꞌari,
vakadihojai asohiriki aniaꞌiki.
Deus viaha vajahakaꞌoaꞌiki adani.
15 Maꞌonahai Jahaki vani haria nanokiahivini hija hida varani kaꞌoa hini.
Deus athi kapapirania hojaki ida Maꞌonahai Jahaki athi jirikia:
16 “Hida vani hihida
kodivaꞌiponahi jaꞌdini vaꞌora onavaꞌisohivini hiꞌiki.
Niha ada Deus.
Onaibaviki bana hida kodivaꞌisohihi vavaꞌi bodinia.
Onajiriki fori hiki ida vaꞌisohihi vavaꞌi nakaabanahahani hiki kaimoni.”
17 Naothinia nihaꞌaha ada Deus:
“Ni-okavaꞌihokijanaki bana ida vakadihojai asohiriki,
vakadibadani asohiriki hiki afojana.”
18 Hari.
Deus hojai jahariki-ra anivini naothinia,
ni-nahina kaimoni igitha amani ahovarijanaki hojai asohiriki aniaja kaimoni.
Jahaki ida Deu-ra anamaakarivini
19 Hari ida vani oamani,
oigamina.
Jesus amana ahovariꞌiki akadimoni hini,
oniani ida Ibavi Katokini Jahakaꞌoaki Deus kania aofinirina aokhajakosina-ra akaabokavini hija.
20 Abiniꞌina vani khiorariꞌia ida makari katokihi araboja hojaki Ibavi Katokini Jahakaꞌoaki kaꞌoahafiani hiki.
Abiniꞌina,
ahokiꞌina vani Jesua biakarabikhaija ida bakatha fori kihiki kajaꞌdini Deus kaniaja,
aokhajakosina-ra akaabokavini Deu-ra anamaakarija kaimoni.
21 Hojaki ada sasidotxi kakaꞌdaꞌdi akadimoni hina.
Ovari vaꞌora akadavaꞌaki adani Deus gorana kaijaꞌarini nama.
22 Deu-ra anofikaꞌoavini,
avakaijokavini vani anamaakariva ada Deus.
Avaꞌi bodini-ra najahakaꞌoavini,
ni-akadivaꞌikaabanahi haria osanijanarihi.
Paha jahakia ariabono asokoki fori arihina vani jaboni Deu-ra anamaakariva.
23 Avakaijokadanokiva ida Deus haria kajoamoravini kavaranihi.
Aofinirina vani vara avaniꞌava ida haria navaꞌiponivini hiki kavaranihi vahoariha vaviaha.
Akajariꞌdariki ida Deus haria navaꞌiponiꞌimariniravini.
24 Ariabono aakajoamorakhamava.
Ariabono akanavaꞌisohikhamavini hiva jaboni ida hoariha-ra anakaidivavini,
hoariha-ra aakodiavini niha aniꞌaꞌavini jahani.
25 Hariꞌa akavaꞌipahiniꞌava ida ajoronibakhiana Cristo-ra khai aniꞌaja kaimoni.
Ijaꞌari vahoarahanana vakavaꞌipahiniꞌiki ida.
Khai akhanibakhiava akajoronikosoana.
Avarigaki ida Deus ijaꞌari kahojai-ra naabosivini kamahini amaakariꞌini.
26 Hari.
Akajonihi ida Deus athi kaꞌoa hini,
akapoarivini naothinia,
anofiꞌianaki ida hojai Deua bivajaharikia akahojaiꞌianana,
ni-hojaki akadimoni hini ida ama ahovariki,
bianija kaimoni ida akadihojai asohiriki Deus viaha.
27 Deus haria akavaꞌijoavini-ra akajonihi;
harivani kaꞌoa akadihojai Deua bivajahariki abosini-ra agathanihi.
Jahaki ida haria napohimajavini afinivini.
Deus ijaꞌari-ra nasohivini kamahini ijaꞌari nikia kahojaikia bikamithaki ida imani ꞌbanani karaho afohaꞌoadaha siho kakhororoki kakaraho kabodinia.
28 Mahi ꞌboꞌdakari judeus kaijaꞌaria vanaabiniꞌiki ida ijaꞌari Moisés athi-ra kajoniki.
Ijaꞌari viꞌbamiki ijaꞌari avahoarabakosikia vara vaniꞌaha ada vakadikaꞌdaꞌdi:
—Anokiꞌiki hida hihida ijaꞌari Deus kavaꞌisohihi jiriki-ra naabaravini.
Bikajoniki ida binaabavini — vaniꞌaha.
Kaꞌoa hihi ida vakadivarani,
abinina vakadikaꞌdaꞌdia bivahonariahiha ada vaꞌisohihi jiriki-ra kajoniki.
Ni-vavaꞌadiki ida ijaꞌari Moisés athi-ra kajoniki.
29 Nahina bana ida namithaja ijaꞌari Deus kaisai-ra kajoniki kania?
Hiꞌida ijaꞌari Jesus amana-ra nakaidivariki.
Varani jaharikia bikanavaranihaki jaboni ada Maꞌonahai Jahaki.
Jesus abiniꞌina,
amana ahovariꞌini-ra vaꞌahaꞌavini,
binakamaꞌdaja kaimoni ida Deus kavaꞌiponahi jaꞌdini,
binajahakaꞌoaja jaboni ida vakaijokana hiki.
Hari.
Abinini vavahonariahiki ida ijaꞌari Moisés athi-ra kajoniki.
Ijaꞌari Deus kaisai athi-ra kajonihi;
kidihojai asohiriki abosini arafiahi.
30 Aogaki hida varani Deua biniꞌaꞌboꞌdaꞌiki:
“Hovani,
onaꞌdaꞌdiabosiki bana ida.
Onaabosiki ida hojai asohiriki nahina jaharikia.”
Niki jaboni ida Deus athi kapapirani hoariha:
“Hovani,
Deus,
vaꞌora onaabosiki bana adani kodijaꞌari.
Nahina jahariki-ra vanamonahaha;
nahina jahariki-ra
vagathaniha.”
Niha ada Deus.
31 Jaharini arafiaki ida namithaki ijaꞌari Deu-ra naihamahiki kania,
bigathaniki bana ida kidihojai asohiriki abosini.
Hokiki ada Deus.
Bikaabokaki ida hojai asohiriki-ra naabosivini.
32 Hari.
Oigamina.
Vakavaꞌihoki bana ida Cristo-ra avavakaijokabiininivini kari,
niha ninini ida avakadimahi.
Deu-ra avarigabiininivini vani vahoariha aꞌonira vanajaharihariꞌia.
Avajahariharini kabaꞌi,
ni-vanadabaki ida avajariꞌdarini afodanoki.
33 Vahoariha vada aꞌonira vaniꞌavini,
varani jaharikia aꞌonira vakanavaranihavini,
aꞌonira vanajahariharivini jaboni.
Aꞌonivani avahoarahanana avanofija ida avaipohini vajaharihariki-ra vaꞌora avakajoamoravini,
oniani ida aꞌonira vanajahariharivini hija jaboni.
34 Vaꞌora avakajoamoraꞌiki adani cadeia vahojaꞌiki,
vaꞌora avavaimaꞌbanaꞌiki adani.
Ijaꞌari avakadinahina-ra visaarihahavivini kari,
khai avakhanimanihi,
ni-avakavaꞌibodikarahoki ida avakadinahina sarahi hini.
Avarigaki ida avakadinahina kaidivaki arafiaki asia hojani Deus kania.
Ni-visaarivini vakaabokaki ida Deus aꞌonira kajoamoravini hiki kidiania aꞌboꞌdaꞌiki.
35 Hariꞌa bana vakavaꞌipahini ida Deu-ra avavakaijokavini,
aꞌonira vanajahariharivini kabaꞌi.
Avakavaꞌipahinirihi;
Deus kidinahina jahakia aꞌonira naabosivini-ra avagathanihi.
36 Anokhavini oadani,
hariꞌa vakavaꞌipahini bana ida avavakaijokavini mahija nahina Deua binofikia avakabadanivini,
oniani ida Deus aꞌonira navaꞌiponivini hiki-ra avagathanivini hija bana.
37 Deus athi kapapirania hojaki hida athi:
“Ipohijanarihi ida mahi
bivajoiki kaimoni.
Ni-agathinahajanariha
ada joina.
38 Deua bikapoariki ida ijaꞌari vakaijokana hiki,
kidimahi sohikaꞌoani
bikahiki ida,
oniani ida kidimahi
anokhomiriki-ra
vahojavini hija.
Kodijaꞌari vahoariha vani adani vajoiribanira hora vakavaꞌipahinivini,
ni-khai vaꞌora oniꞌaki.”
Nihi ida Deus athi.
39 Ni-aajoiribanirihi,
oniani ida haria anakamadarija Deus kania.
Harivani,
Deu-ra avakaijokavini,
oniani ida haria akavaꞌijoavini hija bana.