3 Deus athi-ra dionivini vani nahina hahavi-ra namonahaꞌara ada.

Deu-ra avakaijokavini mani ida hahavi-ra namonahavini-ra aogavini hija.

Deua binamonahaki ida nahina nokiariki,

binamonahaja kaimoni ida hahavi nokiaki.

4 Hari.

Abel Deu-ra vakaijokavini mani ida igitha abononi ahaꞌdikia Deu-ra noꞌavini hija.

Abea bivakaijokavini mani ida nahina binoꞌavini hiki jahani-ra anarafiaja.

Nini vani Deua bivajahaja ida hojana hiki.

Ni-jahani arafiaki ida nahina kidiꞌaajo,

Caim oniki,

Deu-ra noꞌavini hiki.

Abea bivakaijokavini mani ida Deu-ra khai niꞌaja,

oniani ida makhira sohikaꞌoaki hina Deua bikahivini hija.

Abiniꞌboꞌdaꞌina kabaꞌi ada Abel,

Deu-ra vakaijokavini kavaranihi asia hojaki mitha aniꞌaki kaimoni.

5 Hari.

Enoque jaboni Deu-ra vakaijokaki,

oniani ida Deus biavikhavini hiꞌia kidiania.

Abinirina vani Deua biavikhaꞌara ada.

Ijaꞌaria vanakoꞌdiha,

ni-vakaragaꞌiki.

Avisonina viahania Deus athi kapapirania bivavaꞌisohihiki ada Enoque.

Vakaijokana hina mani ida Deua khai biniꞌavini hija.

6 Aogaki ida Deu-ra avakaijokaravini oadani,

ni-akaabokaki ida Deus vaꞌi-ra khai aniꞌavini.

Deua bihonariaki ida ijaꞌari kidiania maakarini-ra nofiki Deus hokiki-ra kajariꞌdaravini.

Deua bihonariaki ida ijaꞌari nofina hiki nakoꞌdina hina Deua binaabosivini-ra kajariꞌdaravini.

7 Hari.

Noé jaboni Deu-ra vakaijokaki,

oniani ida Deus kakaabanahi-ra kamithajahakivini hija.

Deua binavaꞌisohijoravini hihi ida nahina Noéa binokiꞌiariki namithaki kaimoni.

Hari.

Deus athi-ra kamithaha,

binaabahi,

avaꞌdoro-ra kanamonahaꞌaha.

Deus vaꞌora akavaꞌijoaꞌaha adani Noé,

kidigamo,

kidisai,

vakadiꞌaboni vihiki avaꞌdoro kabodinia vahojana.

Deu-ra vakaijokavini mani ida Deu-ra vanofiriki vahararana abono-ra anivini hiꞌia.

Deus athi-ra naabavini mani ida Noé Deu-ra vanofiriki vajaharina-ra nanokiavini hiꞌia.

Noé Deu-ra vakaijokavini mani ida makhira sohikaꞌoaki hina bikahivini hija.

8 Hari.

Abraão Deu-ra vakaijokavini mani jaboni ida athi binaabavini hija.

Deua bibaranahaha ada Abraão arabo hoariha okhana.

Deua binavaꞌiponiki ada arabo binoꞌavini hiki kaimonia.

Oniaroa,

biogaravini kabaꞌi ida arabo bianikhahaki kaimoni,

arabo bivahojaki kania ajihiꞌaha ada Abraão.

9 Hari.

Okhaꞌaha,

akhanoꞌaha,

hojaꞌaha.

Ni-jorakia Deua binoꞌaki araboa.

Kidiarabo fori hirihi ida arabo.

Kabaꞌi,

Deu-ra vakaijokaha.

Makari kagorahi bodinia ibaviꞌaha.

Kidisai Isaque,

kidihanodi Jacó jaboni vaibaviki makari kagorahi bodinia.

Deus vaꞌora navaꞌiponivini hiki jaboni hida hihida arabo vakadimoni hini.

Ni-vagathaniꞌiaki kaho.

10 Asia Abraãoa bivakaijokaha,

binaviahanokhahahaꞌoadahahi ida akhanona sidaji aꞌboꞌdaki Deua binamonahaꞌikia.

Hojahahaꞌoadahaki bana ida sidaji Abraãoa bianikhaki.

11 Abraãoa bivakaijokavini mani ida Sara-ra vaisaꞌavini-ra kaabokavini hija.

Kidigamoa ni-bikaabokaki ida isai-ra namonahavini.

Naꞌarihavi vihina kabaꞌi,

bikajariꞌdarihi ida Deus kavaꞌiponahi namithani vakadiania,

oniani ida isai-ra vanamonahavini hiꞌia.

12 Abinihana amaakariꞌini kabaꞌi ada Abraão,

kidiania vanamitharonisiagaki adani ijaꞌari vâipohiki.

Boviri ipohina fori vihiki adani.

Kaasi ꞌbaꞌdani ipohini fori vihiki adani.

Ni-ijaꞌaria biogaki ida nihafori vihina vaipohina.

13 Hari.

Vavakaijokavini oadani vaabinihananaꞌaha adani ijaꞌari vaꞌora vara ovaniꞌaꞌiki.

Vaabiniꞌina kabaꞌi,

ni-vagathaniꞌiaki kaho ida hahavi Deus vaꞌora navaꞌiponivini hiꞌiki.

Vavaꞌi bodinia napaja fori hikia avanokiꞌihi ida Deus vaꞌora navaꞌiponivini hiꞌiki,

khai vaniꞌahi ida nahina vanokiꞌiki.

Vaabinirina oadani vakhaniha:

—Anokhava ida arabo akaikahina Deus haria kaibavijahahijoravini hiꞌiki.

Akadiarabo kaꞌoa hirihi hida hihida arabo.

Ijaꞌari kaaraboriki fori arihiki hari hidiaja — vakhaniha.

14 Ijaꞌari nikia vakavaraniki haria vanavaꞌisohijahakiki arabo vakadimoni kaꞌoa-ra vanakoꞌdihavini.

15 Ni-vakavaꞌibodivaranibakhiaki afojana ida arabo vanahojahaꞌiki vajoiribanira kaimoni.

Arabo vanahojahaꞌiki-ra vanofiꞌianara vaha;

vajoina-ra vakaabokamaniha vaha.

16 Vahokina oadani vanofiꞌiki ida arabo jahani arafiaki nama Deus kania vavahojaki kaimoni.

Ni-Deua bikaipahiki ida ijaꞌari nikia vakavaraniki,

vakadiDeus hina vakahivini,

oniani ida sidajia vaꞌora kaibavijahahivini hija.

17-18 Hari.

Abraão Deu-ra vakaijokavini mani ida kidisaia Deu-ra kanavaꞌigakamarivini hija.

Oniaro kari Deua bikaijoꞌaki ada Abraão.

Deus Abraão-ra navaꞌiponivini hiki kidisai Isaque kania vanamitharonisiagaki adani Abraão kahanodi.

Deua biniꞌaꞌboꞌdaꞌaha:

—Abraão,

vaꞌora oanaipohiki bana adani Isaque kahanodi vanamitharonisiagaki,

kadaijaꞌari vihira kaimoni — Abraão-ra navaꞌiponiꞌaha.

Deua binavaꞌiponivini kabaꞌi ada Abraão,

kidisai hoarana-ra vaꞌahavini hiki igitha abiniki fori hina.

Ijaꞌari igitha Deu-ra noꞌavini vani fori hija ida Abraão kidisai-ra naabinikamarivini.

19 Abraão abono-ra niꞌaha:

—Deua bikaabokaki ida kodisai Isaque-ra anahokivini onaabinivini naothinia — niha.

Nini vani namithaja ida kidiania.

Abraãoa bigathaniꞌaha ada kidisai hokina.

Abiniꞌiki fori hiki ada.

20 Hari.

Isaque jaboni Deu-ra vakaijokaki,

oniani ida varani jahakia kidisai Jacó,

Esaú vihiki-ra vaꞌora vara niꞌavini hija,

vaꞌora navaꞌisohijoravini hihi ida nahina jahaki Deua binanamithaki kaimoni vakadiania.

21 Hari.

Jacó jaboni Deu-ra vakaijokaki,

oniani ida abinihana amaakarini viahania varani jahakia José kaisai viꞌbamiki-ra vaꞌora niꞌavini hija,

Deus vaꞌora kajoamoraꞌbamakhamara kaimoni.

Deu-ra kanamasiviꞌaha ada Jacó kididadahi ava abono-ra nadadavini-ra gathiꞌaha.

22 Hari.

José jaboni Deu-ra vakaijokaki,

oniani ida namithaki kaimoni-ra vara vaniꞌajoravini hija.

Kidivarani ida Egito kaarabonia Israel kaijaꞌari vanamitharonisiagaki vikhaonanina kamahini.

Abinina amaakarini viahania Joséa bivahonariahijoraki ida vikhaonanina kamahini jarona vavikhaonanivini jaboni.

23 Hari.

Moisés kaabiꞌi,

kaamia vihiki Deu-ra vavakaijokaki jaboni,

oniani ida Moisés ꞌbanana naothinia masiko ahoarabakosikia avanahojavini hija.

Oniaro kari Faraóa bivahonariahiꞌiki ida makhira isani vaitxanava vaabinihahavina.

Moisés kaabiꞌia vanokiki ida vakadisai nokiana jahani.

Ni-vifiniki ida Faraó athi-ra vakajonivini.

Vavakaijokaki ida Faraó Moisé-ra naabinivini Deua bivaꞌaharavini.

24 Hari.

Moisés jaboni Deu-ra vakaijokaki,

oniani ida karahoꞌina Faraó kaisai isanini hina ijaꞌaria vakahivini-ra kajonivini hija.

25 Binofiki ida jahariharina Deus kaijaꞌari vakadiania.

Ni-binofiki ida hojai asohiriki-ra khai niꞌavini hokina oadani.

26 Moiséa bikavaꞌibodivaraniki ida jahaki kidimoni ogarahi hina,

Cristo ogarahi hina fori hina bana.

Ni-binofiki jaboni ida nahina hahavi kaidivani arafiaki Egito kaarabonia hojaki-ra vahojavini.

Bikavaꞌibodivaranibakhiaki ida kidihojai asohiki abosini,

nama Deua bikaibavijahahijoravini hiki.

27 Moiséa bivakaijokavini mani ida Egito kaarabonia ai nihana hiꞌia.

Ni-bifiniki ida arabo kakaꞌdaꞌdinia bikaihamahivini.

Moiséa binokiki fori hiki ada Deus nokiariki,

oniani ida Egito kaarabonia joiribanina-ra nofiravini hija.

28 Deu-ra vakaijokavini mani ida Moisés Páscoa kaihinikani biinini-ra nakamaꞌdavini hija.

Vaꞌora honariaha adani Israel kaijaꞌari vagorana kaathania baniniaja ovilia amana-ra varavisorarivini,

maꞌonahai ijaꞌari-ra naabiniki vaꞌora naabinirara kaimoni adani ijaꞌari vakadisai ahivajaꞌi makhira isani.

29 Hari.

Deu-ra vakaijokavini mani ida Moisés ꞌDako Nadaraki onikia avikafianina Israel kaijaꞌari vaꞌora honariavini hija.

Avikafianiꞌaha arabo foraki namania vaadahaꞌina.

Egito kaaraboni kasorarani vaꞌora avanajoikahifianivini vaꞌora vakaijoꞌaha.

Jiꞌbinijorakiꞌihi ida paha,

avahidanahahaviꞌaha.

30 Hari.

Israel kaijaꞌari Deu-ra vavakaijokavini mani ida 7 mahi ipohini mahi hoarahanana Jericó sidajia vaꞌora naadaharibanaonija,

oniani ida sidaji kavasiribanini kajaꞌdini naꞌbahaki-ra anaadarinaija.

31 Oniaro kari Raabe jaboni Deu-ra vakaijokaki,

oniani ida Deu-ra vakajoniki vaabiniꞌina Raabe-ra anaaniꞌia.

Makhira-ra odoradoraoniki ida Raabe.

Deu-ra vakaijokaꞌavini mani ida arabo anavanavanahaoniva abono viꞌbamiki-ra vaꞌora gathanijahakivini hija,

oniani ida avaꞌaihotana vaꞌora kakodiavini hija.

32 Hari.

Vahojaki adani ijaꞌari vahoariha Deu-ra vavakaijokaki.

Onofirihi hida oathi-ra onaꞌoadavini,

oniani ida Gideão,

Baraque,

Sansão,

Jefté,

Davi,

Samuel,

Deus athi namoniva abono vahoariha varani vihina-ra vara ovaniꞌaravini hija.

33 Ijaꞌari vahoariha mahi ꞌboꞌdakari Deu-ra vavakaijokakia bada vaniꞌaki ida badani danoki ipohiki.

Deu-ra vavakaijokavini mani ida arabo hoariha kaijaꞌarini-ra vaꞌora vidafiavini hija,

vakadiarabo avanahoroavini.

Deu-ra vavakaijokavini vani bada vaniꞌaja ida binofiki,

vagathaniki jaboni ida Deus vaꞌora navaꞌiponivini hiꞌiki.

Vahoariha Deu-ra vavakaijokavini vani tapoꞌija vabodi-ra vanaꞌboꞌara adani.

34 Vahoariha vakanamokhiki jaboni ida siho kakhororoki kakaraho.

Deu-ra vavakaijokavini mani ida vaꞌora anaihotaja tarasara fori hikia sakahi vihina.

Vahoariha vadanoriki Deu-ra vavakaijokavini mani ida vaꞌora nadanoja.

Sorara vadanoki vihiꞌina vani vaꞌora vanihimaꞌara adani arabo hoariha kasorarani.

35 Gamo jaboni Deu-ra vavakaijokavini mani ida vakadijaꞌari vaabiniꞌina naothinia avahokiꞌina-ra vaꞌora vagathanivini hija.

Hari.

Vahoariha Deu-ra vavakaijokahaꞌoadahavini kabaꞌi vajaharihariꞌaha.

Deu-ra vakavaꞌipahinira vaha;

avaihotamaniha.

Vanofirihi ida avaihotana,

oniani ida dafi vihina vaꞌora naabiniꞌia.

Deu-ra vavakaijokaꞌoamanira adani.

Avigaki ida Deus vaꞌora anahokivini,

vavahojaja kaimoni ida vakadimahi jahaki kidiania.

36 Ijaꞌari vaꞌora avigarahabakhiaki adani Deu-ra vavakaijokaki,

vaꞌora vidabakhiaki adani,

vaꞌora vidabohavini correntea,

vaꞌora avibaiꞌaha cadeia.

37 Deu-ra vanofiriki vaꞌora vanagahaha adani Deu-ra vavakaijokaki jaꞌdia.

Vaꞌora avakoꞌdanikhamaki adani vahoariha serrotea.

Vaꞌora vakavasaꞌaiki adani Deu-ra vavakaijokaki vahoariha.

Deus kaijaꞌari vahoariha avaadahaoniki.

Vakanahinarina mani ida ovilia asafi,

boji asafi hiki-ra vakaimahavini hija.

Vajaharihariꞌaha.

Deu-ra vanofiriki vaꞌora vanaimaꞌbanakarahoki adani.

38 Vakaaraboriki fori vihina avaadahaoniꞌimajaniki adani amasia,

arabo namahiki hikia.

Vagorana ida jaꞌdi kahodijamaꞌoki bodini,

arabo khorahaki bodini hiki.

Vajahana arafiani mani ida Deu-ra vanofiriki vaꞌora vakaimajahajanaravini hija vahararana vahojana.

39 Hari.

Deu-ra vavakaijokavini mani ida varani jahakia Deus vaꞌora vara vaniꞌavini hiꞌia.

Jiriki ida varani vihina.

Kabaꞌi,

ni-vagathaniꞌiaki kaho ida Deus vaꞌora navaꞌiponivini hiꞌiki.

40 Deus vaꞌora nokhaki adani ijaꞌari vanamitharonisiagaki vakaijokana vihira kaimoni.

Avakaijokavini-ra nokhaki jaboni ada.

Deua bikavaꞌibodivaranijoraki ida nahina jahani arafiaki agathaniki kaimoni.

Ni-binofiki ida vaꞌoaniaro miroꞌa vagathanivini.

Binofiki ida vaꞌoaniaro,

harivani hahavi haria najahakaꞌoajabanavini,

hojai binofikia akahojaija kaimoni.