Deus akadiabiꞌi varani hina
12
Hari.
Hivaꞌoani ijaꞌari vaipohiki vaꞌora vara ovaniꞌaꞌiki vaꞌoani Deu-ra vavakaijokaꞌboꞌdaꞌiki adani.
Ariꞌoaria vahojaribanaoniki fori vihiki adani vada haria vaniꞌaribanaoniki.
Haria vahonariavini Deu-ra avakaijokavini,
akiꞌdarahaki fori arihina.
Hari.
Ijaꞌari kiꞌdarahaki fori arihiki hari,
akadimahi Deu-ra avakaijokavinia.
Anahojava ida nahina hahavi akiꞌdarahana-ra nadabaki fori hiki.
Akavaꞌipahinikaꞌoava ida hojai asohiriki,
nahina akiꞌdarahana-ra anagithiki fori hiki.
Akiꞌdarahajorakiki fori arihiva hagihi aviaha hojaki-ra anikhahavini.
Akaikahirina oadani,
jokoa akavaꞌipahinirihi ida akiꞌdarahana,
ariabono aniꞌava.
2 Akavaꞌibodivaranibakhiava bana ada Jesus.
Ovaria binakamaꞌdaꞌiki ida Deu-ra avakaijokavini.
Binakaraki jaboni ida Deu-ra avakaijokahaꞌoadahavini akaikahirina oadani kidiania.
Ava akasanakhamakia Jesu-ra avakaꞌitapoamisahanavini kabaꞌi,
ni-bikavaꞌipahiniki ida Deu-ra vakaijokavini.
Bianokinanavaki fori hiki ida abinina naothinia vaꞌi khaii nini karaho hojaki Deus kania kidimoni hini,
oniani ida ava akasanakhamakia abinina-ra kavaꞌibodiravini hija.
Vaꞌi-ra anaipahihikarahoki ida ijaꞌari nikia abiniki.
Oniaro naothinia vithiꞌaha ada Jesus Deus pitana aniaja kaꞌdaꞌdi danoki kavithi ibavinia.
3 Vakavaꞌibodivarani bana ida namithaꞌiki Jesus kania.
Hojai asohirikia vakahojaibakhiakia vanofipaꞌitxiriha ada Jesus,
avigarahaꞌaha,
vanaimaꞌbanaꞌaha,
kabaꞌi ihamahirina bikapoariꞌihi.
Hariꞌa khai aꞌonira niꞌariva ida nahina jahariki namithani avakadiania.
Hariꞌa bana Deu-ra avavakaijokavini-ra vakavaꞌipahini.
4 Cristo hojai asohiriki-ra kajonivini mani ida hojai asohirikia vakahojaibakhiakia vanaabinivini hija.
Hojai asohiriki-ra avakajonivini,
ni-niki namithaꞌiaki kaho avakadiania.
5 Hari.
Deus haria niꞌavini hiki varani jahaki avaꞌi-ra khaii niꞌaja kaimoni.
Isai kaabiꞌi kidisai-ra navaꞌisohivini kavaranihi fori hiki ida Deus kavarani.
Avarakavaꞌiꞌbirinimanija koda ida?
Nihi ida athii:
“Kodisai,
ikavaꞌibodivarani afojahaki bana ida Deus ira navaꞌisohivini hiki,
kadahojai asohirini-ra
kahiha.
Hariꞌa khai ira niꞌariva bana ida Deus ira
kaabanivini athini.
6 Deua binasohihahaviki ida ijaꞌari-ra nakaidivavini kahojaihi.
Vaꞌora kapatahahaviki fori vihiki jaboni adani ijaꞌari
hahavi vaꞌora kanaisaihaki.”
Nihi ida athii.
7 Isai kaabiꞌi kidisai-ra kapatavini fori hiki ida avaimani ꞌbanani,
avavaꞌini rogo inini hiki.
Hariꞌa vakajoni bana ida aꞌonira kapataki fori hina.
Isai kaabiꞌi kidisai-ra kaꞌojomoꞌivini vani fori hija ida Deus aꞌonira kaꞌojomoꞌivini.
Nini vani avaimani ꞌbanania aꞌonira nanokiahira ada kidisai avihini.
Ni-hojaki ida isai kidiabiꞌia bikapatariki.
8 Deus vaꞌora kapataki fori vihiki adani kidisai hahavi.
Aꞌonira kapatariha;
ni-kidisai kaꞌoa avihiki.
Isai kaabiꞌiriki fori avihihi.
9 Akadiabiꞌi araboa vahojaki haria vakapatabakhiaki,
hojai vavajahariki-ra akavaꞌipahinija kaimoni.
Haria vakapatavini mani ida vaꞌora afinivini hija.
Jahaki ida akadiabiꞌi-ra afinivini.
Jahani arafiaki ida akadiabiꞌi nama hojaki-ra afinivini,
akaꞌojomoꞌija kaimoni ida akadimahi jahaki-ra avahojavini.
10 Badara ipohiriki isai arihina oadani,
akadiabiꞌi haria vakapatabakhiahi.
Haria vakapatavini-ra vanofiha;
haria vakapatamaniha.
Deus haria kapataki fori arihiki hari akadihojai jahani avijavaja kaimoni,
Deus kahojai jahakia akahojaija kaimoni.
11 Ni-avajahaki ida kapatahi arihina.
Avaꞌi-ra namokaraki ida.
Ni-khai aniꞌaki.
Naothinia khai aniꞌaki ida haria vakapatavinia haria vakaꞌojomoꞌivini akadihojai asohikaꞌoakia akahojaina,
avaꞌi jahajahani jaboni.
Vaꞌisohihi kaꞌoa hini hida
12 Hariꞌa avajaroni fajafajahaki fori vihi.
Hariꞌa vakavaꞌipahini bana ida Deus kahagihia avaadahaki fori avihini.
Avarikhani khai avaabononi vaniꞌa.
13 Hojai Deua bivajahakia avakahojaihi;
hagihia avaadahaki fori avihihi.
Vaadahahaꞌoadaha bana Deus kahagihi sohikia mahija avakadiadahai-ra avanadanovini.
Oniani ida avaꞌdamani-ra kanatonorohaki fori kanihajanarija.
14 Avaabononi vakanavaꞌijahajahakhama bana vahoariha khama.
Hojai Deua binofikia vakahojai bana mahija avakadimahi kidimoni hivini.
Nirihi ida avakadimahi;
ni-Deu-ra avanokiki bana.
15 Avaabononi avakavaꞌigairi bana mahija Deus aꞌonira kajoamoravini-ra avakavaꞌipahiniravini.
Avaabononi avakavaꞌigairi afohanana bana jaboni mahija hoarani kapahasa fori hiravini.
Hariꞌa vavaꞌaha bana ida kapahasa fori hiki avijavani avakadiania.
Hojahi ida kapahasa fori hiki avakadiania;
ijaꞌari vaipohiki-ra najaharihi.
16 Avaabononi avakavaꞌigairi bana mahija Esaú fori avihiravini.
Ovari gamo-ra odoraoniki ada.
Ni-binakaidivaki jaboni ida Deua binoꞌavini hiꞌiki.
Esaúa bianaabosiki ida kidiabiꞌi kanahina bivahojaki pitani karaho ꞌbai bavi hoarani binajiꞌbinikia.
Isai ahivajaꞌi gahinana kaimoni ida kidiabiꞌi kanahina pitani karaho.
17 Avarigaki ida Esaú varani hina.
Kidiabiꞌi kanahina-ra anaabosiꞌavini naothinia binofiꞌianahi ida gahinaꞌianana.
Ni-bikaragaki ida abosini joiribanini niha ninini.
Asarana abono-ra kaꞌdaꞌdigariavini kabaꞌi,
ni-bikaabokaki ida gahinaꞌianana.
Israel kaijaꞌari avikhananavaki Deu-ra vanamaakariꞌiki
18 Hari.
Oigamina,
Israel kaijaꞌari avikhananavaki fori avihirihi.
Vaꞌoaniaroa vanamaakariꞌiki ida nahina nokiaki,
kamithavahaki,
kaabadavahaki.
Vanamaakariki ida monte Sinai.
Vakanokiki ida siho kakaraho kakhororoki arabo namahiki namanija.
Vanokiki jaboni ida bakibakini karaho,
bahi banabanahaki hiki.
Vakamithaꞌiki ada bahi katararahi.
19-20 Vakamithaki jaboni ida trombeta ithoni ꞌbaraki,
Deus vara nina hiki jaboni.
Athia vaꞌora honariaha:
“Kaaji hiki hida arabo
namahiki.
Ni-ovaꞌahaki ida ijaꞌari,
igitha hiki ogaimorini.
Bikadasahi;
jaꞌdia vanagahavinia abinini ovahonariahihi.”
Niha ada Deus.
Vaimahidana,
ni-vanofiki ida Deus kahonari-ra vakapoarivini.
Deus vara nina-ra vakamithaꞌikia,
vaniꞌadanokiꞌaha:
—Ni-anofipaꞌitxiki ida Deus vara nina-ra akamithaꞌianavini — vakhaniha vaimahidakarahoꞌina.
21 Vaꞌora naimahidakarahoꞌihi ida vanokiꞌiki,
oniani ida Moisés abono-ra niꞌavini hija:
—Ojarona tharararaki ho oimahidakarahoꞌina — niha.
22 Hari.
Vaꞌoaniaro fori arihirihi.
Harivani Deu-ra anamaakarihi;
ni-anokiki ida vaꞌora naimahidaꞌiki.
Harivani anamaakarija ida arabo namahiki monte Sião oniki Deus kania nama hojaki.
Anamaakariki jaboni ida sidaji.
Deus ijaꞌari-ra nahokiki kasidaji ida.
Jerusalém kaꞌoa hini nama hojaki ida.
Oniaja vaibaviki adani Deus ibavi kaijaꞌarini vâipohiki.
Ni-rajomavahaki ida vâipohina.
23 Vaꞌora anamaakariꞌiki jaboni adani Deus kaisai vajoroniki.
Khai vakhaniꞌahapikiki adani.
Deus kaisai ahivajaꞌi hahavi adani.
Vaonina jiriki hojaki nama Deus kania.
Anamaakariki jaboni ada Deus.
Ovari ijaꞌari hahavi nasohiva abono ada.
Vaꞌora anamaakariki jaboni adani ijaꞌari vajahaki vaabiniꞌiki,
avahokiꞌina Deus vaꞌora najahakaꞌoaꞌiki.
24 Anamaakariki jaboni ada Jesus.
Ovaria binakamaꞌdaꞌiki ida Deus kavaꞌiponahi jaꞌdini.
Ahovariꞌiki ida amana haria najahaja kaimoni Deus viaha.
Abel abiniꞌina fori hirihi ida Jesus abiniꞌina amana.
Jesus abiniꞌina ni-bikanikhariaki ida Deua binaꞌdaꞌdiabosivini.
Bikanikhariaki ida Deus haria vaꞌadivini.
Deua binahoꞌdohoꞌdoki bana ida arabo, nama hiki
25 Avaabononi avakavaꞌigairi bana mahija Deus vara nina-ra avakamithavini-ra avakajoniravini.
Ijaꞌari araboa vahojana vakamithaꞌboꞌdaꞌiki ida Deus athi Moisés vaꞌora navaꞌisohivini hiꞌiki.
Ni-avaihotaki adani athi kajonina vihiki.
Vagathaniꞌiki ida morobohariki fori vihina abosini,
vaabiniꞌina.
Harivani,
Cristo nama vara haria niꞌavini-ra akajonihi;
ni-aaꞌaihotapaꞌitxirihi,
agathanivini arafiaki bana ida morobohariki fori arihina abosini.
26 Oniaro kari Deus athia binahoꞌdohoꞌdoꞌiki ida arabo.
Bivavaꞌisohihijoraꞌihi:
“Onahoꞌdohoꞌdoꞌianaki bana hida arabo hoaranija
afoꞌiana.
Onahoꞌdohoꞌdoki jaboni bana ida nama.”
Niha.
27 Hari.
“Hoaranija Deua binahoꞌdohoꞌdoꞌianavini afoꞌiana” bikahivini,
oniani ida nahina namithaki kaimoni-ra aogajahakivini hija.
Deua binahoꞌdohoꞌdoki bana ida kidiamonahi hahavi,
bianiꞌihi ibavinia.
Aaniki bana ida nahina nahoꞌdohoꞌdovahariki.
28 Khai aniꞌava bana ada Deus.
Haria noꞌavini hiki ida ibavi kaꞌdaꞌdi arihija kaimoni kidiania.
Nahoꞌdohoꞌdovaharihi ida ibavi,
kaꞌdaꞌdi arihina ibavini.
Vara avaniꞌava ida Deus jahana niha ninini haria kajoamoravini.
Deu-ra akanamasiviva niha ninini bivajahakia.
Jahaki ida Deu-ra afinivini,
avavaꞌihavini.
29 Siho nahina hahavi-ra kanihimakaꞌoaki.
Onivani fori hira ada akadiDeus nahina hahavi asohiriki-ra nihimakaꞌoavini.