3 Vaꞌora vakajoamora bana adani cadeia vahojaki,

vakadiania avahojaki fori avihihi.

Vaꞌora vakajoamora bana jaboni adani ijaꞌari vajaharihariki,

avajaharihariki fori avihini,

vaꞌora avavaimaꞌbanavini.

4 Ijaꞌari hahavia vakavaꞌibodivaraniva ida jahaki makhira kidigamo khama vaabono vakavahojakhamavini afohaꞌoadaha,

vaabono vakanofikhamajahakivini.

Hariꞌa bana vaviꞌoma ida hoariha kagamo hoariha kamakhira.

Deua bikaronaki bana ida nahina jahariki makhira kidigamo hiriki vaabono vakaviꞌomakhamaki vakadimoni.

5 Hariꞌa avavaꞌini-ra nahonariahihivini arafiava bana ida jiniro-ra avakavaꞌinofinofivini.

Avavaꞌinia arajomava bana ida nahina avavahojaꞌiki.

Nihi ida Deus athi:

7 Vaꞌora vakavaꞌibodivarani bana adani avakadikaꞌdaꞌdi kohana Deus athia aꞌonira vanavaꞌisohiꞌboꞌdaꞌiki.

Vakavaꞌibodivarani bana ida vakadimahi vahokina oadani Deu-ra vavakaijokaꞌavini.

Vaabiniꞌina asia vavakaijokaki ada.

Vaꞌora vakavaꞌibodivarani bana mahija Jesu-ra vavakaijokavini avakabanafovini.

8 Ni-hoarihapaꞌitxiki ida Jesus Cristo kahojai.

Kidihojai bivahojaꞌboꞌdaꞌiki asia bivahojaki.

Mahi anokhomiriki ida bivahojaja.

9 Vakajariꞌda bana ida ojomoꞌihi kavaranihi asohiriki Cristo vara bivaniꞌariki mahija Deus kahagihi-ra avaragariravini.

Deus haria kajoamoravini-ra avaꞌahahi;

ovaria binadanohi ida avakaijokavini avaꞌi bodinia.

ꞌBai kaaji hiki ni-ijaꞌari vaꞌini bodini-ra nadanoki.

Ijaꞌaria vanaabavini kabaꞌi ida kaaji kavaranihi,

ni-ijaꞌari-ra kakodiaki.

10 Hari.

Sasidotxia bada vaniꞌaki ida vakadibadani judeus kaijaꞌari Deu-ra khai vaniꞌavini kagorani banininia.

Nimanija ida Deu-ra vakanamasivivini.

Ni-nikia Deu-ra akanamasiviki.

Sasidotxi igitha amani-ra vavakaijokavini oadani,

ni-vakaabokaki ida Deu-ra vakanamasivivini akadiania harifori vihina.

11 Judeus kaijaꞌari vakadisasidotxi vakaꞌdaꞌdiva biavikhajakosiki ida igitha amani Ibavi Katokini Jahakaꞌoaki kania,

Deus viaha biakanaꞌdiriꞌdirikhamaja kaimoni ida ama,

ijaꞌari vakadihojai asohiriki aniaja kaimoni.

Igitha abononi vani ida ahaꞌdihahavija ijaꞌari vagorana napaja ninia.

12 Onivani fori hira jaboni ada Jesus.

Ovari abiniꞌiki sidaji banininija,

bianija kaimoni ida ijaꞌari vakadihojai asohiriki amana ahovarikia.

13 Hari.

Jesu-ra anamaakariki fori arihiva sidaji banininija.

Jesus vaꞌi-ra anaipahihivini.

Jakaho avaꞌi aipahihiva jaboni kidiania.

14 Araboa arihojana oadani ni-hojaki ida sidaji aꞌboꞌdaki akadimoni hini.

Anaviahanokhaki ida sidaji hojahahaꞌoadahaki.

Ni-hojaꞌiaki kaho ida sidaji.

15 Jesus haria kakodiavini vani Deu-ra anamaakarivini-ra akaabokaja,

akanamasivira kaimoni.

Ni-Deu-ra akavikhaki igitha abononia.

Deus jahana kaꞌoa kavaranihi vani ida avikhaja.

Deu-ra aniꞌaki hari:

—Ivani,

ijahakaꞌoaki i.

Avajahaki ida haria ikajoamorabakhiavini.

Ivani kaꞌoa akadikaꞌdaꞌdi i.

— Nikia akavaranihi,

Deu-ra akanavaꞌigaki fori arihihi akadikhaiinia.

16 Vakavaꞌihoki bana ida badani jahakia avakabadanini vahoariha vakadiania,

avaabononi avakakakodiakhamavini hiki.

Nikia avakahojaihi;

Deu-ra avakanavaꞌigaki fori avihihi.

Khai biniꞌaki bana ida avakadihojai jahaki.

Igitha imani ahaꞌdiki fori hiki ida.

17 Hari.

Vanaabaꞌa bana ida aꞌonira vanavaꞌisohiva abono vaathi.

Bada vaniꞌa bana ida aꞌonira vahonariavini hiki.

Aꞌonira avakadavaꞌahahaꞌoadahaki adani.

Deu-ra vakanamonivini hiki bana ida vakadibadani niha vaniꞌaꞌaki aꞌonira avakadavaꞌavini.

Vaathi avanaabahi;

khai vaniꞌahi ida aꞌonira avakadavaꞌavini.

Vaathi avanaabarihi;

vavaꞌi avanamokaraha,

aꞌonira avakadavaꞌavini oadani.

Ni-niki jahaki avakadimoni.

18 Asia haria vakanikhariahaꞌoadaha bana Deus kania.

Aogaki ida nahina asohiriki hojarini avaꞌi kaabanahahani kania.

Anofiki ida badani asohiki-ra anamonahahaꞌoadahavini.

19 Aꞌonira okanikhariadanokivini hiki ida Deu-ra vara avaniꞌabakhiavini kodimoni.

Vakanikharia bana mahija Deus hora karonajorakivini oajoiꞌianana avakadiania.

20-21 Deu-ra vara oniꞌaki ho.

Ovari haria noꞌavini hiki ida avaꞌi jahajahani.

Deus vania bianahokiꞌara ada akadikaꞌdaꞌdi Jesus,

abiniꞌina naothinia.

Jesus ovilia akadavaꞌava abono jahaki fori hiki ada.

Abiniꞌina abono-ra vaꞌahaꞌiki ada,

haria akavaꞌijoara kaimoni.

Kidiꞌovilia fori arihiki hari.

Abiniꞌina vani Jesua binakamaꞌdaꞌiki ida Deus kavaꞌiponahi jaꞌdini aꞌboꞌdaki,

oniani ida avakainamokia aꞌonira noꞌavini Deu-ra okanikhariavini hija,

bada avaniꞌaja kaimoni ida hahavi Deua bivajahaki.

Onofiki jaboni ida avaꞌi bodinia badani binofiki-ra bada niꞌavini.

Jesus Cristo vania bada biniꞌaja ida.

Khai aniꞌahahaꞌoadahava bana ida Cristo jahana,

vagana,

danona,

ogahana hiki.

Hari ida vani oamani.

22 Oigamina,

aꞌonira okanikhariavini hiki hida oathi-ra mitha avaniꞌajahakivini.

Ni-onofiki ida kodivarani avavaꞌini-ra kajokovini.

Oathi oadariki-ra onajiriꞌiki ho aꞌonira khai niꞌaki kaimoni.

23 Aꞌonira okanamonivini hiki ada arigamina Timóteo cadeia avarakhaonaniꞌiki.

Ai ohina viahania kaikahiꞌiki ada Timóteo kodiania,

oavikhaki bana ada aꞌonira onavanavanahavini.

24 Vaꞌora vakaꞌivaniti bana adani aꞌonira vanavaꞌisohiva abono,

Cristo kaijaꞌari vahoariha vihiki avakadiania vahojaki.

Aꞌonira vakaꞌivanitiki hadani Cristo igamina.

Itália kaaraboni kaijaꞌarini hadani.

25 Onofiki ida Deus aꞌonira kajoamorahahavivini.

Hari ida vani oamani athi anokhomini.