Vakadivarani-ra bana avakavaꞌigairiva adani Cristo kaijaꞌari
3
Oigamina,
kodivarani vihiki adani Jesus Cristo kaijaꞌari-ra vaꞌora vakaꞌojomoꞌiki Deus athia.
Harivani,
vaꞌora akaꞌojomoꞌira adani jaboni.
Ni-jahaki ida ijaꞌari vaipohiki avakadiania vahojana,
vahoariha-ra vakaꞌojomoꞌivini-ra vanofivini.
Avarigaki ida namithaki bana akadiania.
Ijaꞌari kaꞌojomoꞌiva abono arihina,
hojai asohiriki-ra anamonahahi;
Deus haria kapataki fori arihihi,
haria nasohira kaimoni.
Ni-vaꞌora nasohivini arafiaki adani ijaꞌari kaꞌojomoꞌiva abono vihiriki.
2 Harivani hahavi aragaribakhiaki ida hojai asohiki.
Ijaꞌaria vara bivaniꞌahaꞌoadahaki ida varani asohiki,
kaꞌoa hini,
sohikaꞌoahi ida kidimahi.
Bikaabokaki ida abononi niha nini hahavi-ra vakaꞌdaꞌdivini.
3 Vara ovaniꞌaki hida rajomi kavaranihi.
Anaibaviki ida nahina paꞌitxi cavalo bodia akaꞌdarisafiani haria vaadahavini sohira kaimoni.
Nini vani akaabokaja hida cavalo adahana hanaja okhana anofivini ibavinia.
4 Vara ovaniꞌaki ida rajomi kavaranihi hoariha.
Sirisiriki danokia biakaabokavini kabaꞌi ida kanava kakaraho-ra aakarojavini,
kanava kanasohiva abonoa bikaabokaki ida kanava-ra kanasohivini jakoma kapaꞌitxia,
kaadahaja kaimoni hanaja aakhani bikanofivini hiki kania.
5 Hari.
Oniaroa,
ijaꞌari abanini maina-ra vara ovaniꞌaki ho bana.
Ijaꞌari abononi niha nini paꞌitxi ida abanini.
Kabaꞌi,
abanini vania ijaꞌaria binamonahaja ida athii masini karaho.
Ijaꞌari abanini siho kakhororoni kapaꞌitxi fori hiki ida.
Vakavaꞌibodivarani bana,
siho kakhororoni paꞌitxia biakaabokaki ida ava naꞌbahaki-ra jama bodinia anahaꞌdivini.
6 Sihoa bikaabokaki ida nahina-ra nihimavini,
onivani fori hija ida jaboni ijaꞌari kavarani nahina-ra nihimavini-ra kaabokavini.
Kaꞌdaꞌdi jaharikaꞌoaki kidijaꞌari-ra vaꞌora vakaꞌdaꞌdivini vani fori hija ida ijaꞌari abanini ijaꞌari abononi vakaꞌdaꞌdivini.
Binajahariki ida ijaꞌari abononi hahavi.
Siho kakhororoki nahina amonahaki hahavi-ra nihimavini vani fori hija ida ijaꞌari kavarani jahariki kidimahi nihimani hini.
Siho kakhororoki,
Ibavi Jaharikaꞌoaki bodinia kakhaonaniki fori hiki ida ijaꞌari kavarani jahariki.
7 Hari.
Ijaꞌaria vakaabokaki ida igitha hahavi-ra avanaathivini.
Vaꞌora avanaathibakhiaꞌiki adani tapoꞌija,
igitha raboki,
igitha hoariha,
jovana,
koronaro,
abaisana hiki.
8 Ni-ijaꞌaria bikaabokaꞌiaki ida ijaꞌari abanini-ra anaathiki fori hini,
varani asohikaꞌoakia kavaranija kaimoni.
Jahariꞌoamanija ida ijaꞌari abaninia bidioniki.
Adahaꞌimajaniki fori hiki ida kidivarani.
Makha ꞌbanana ijaꞌari-ra naabinivini fori hiki ida jaboni.
9 Ariabani vania vara akhanina khai aniꞌabakhiara ada Deus akadiabiꞌi.
Ariabani vania varani jaharikia vaꞌora akanavaranihara jaboni adani ijaꞌari vahoariha.
Hivaꞌoani ijaꞌari Deus vaꞌora namonahavini,
ovari nokiana fori vihina.
10 Ijaꞌari hoarania vara bivaniꞌaki ida varani jahaki Deu-ra khai niꞌavini,
vara bivaniꞌaki jaboni ida varani jahariki hoariha-ra kanavaranihavini.
Oigamina,
ni-jahapaꞌitxiki ida hojai niki.
11 Vara ovaniꞌaki hida rajomi kavaranihi hoariha.
Ni-nihanikia khaonaniki ida kajoa kapahana hoarani kania,
paha jahaki,
paha arapaki hiki.
Paha arapakia binarapaki ida paha hahavi.
Onivani fori hija ida ijaꞌari kavarani jahariki.
12 Oigamina,
rajomi hoariha okavaraniki bana ho.
Figo-ra orakhaihi,
azeitona vania koda bonoja ida?
Iniani.
Uva-ra orakhaihi,
figo vania koda bonoja ida?
Iniani.
Onivani fori hija jaboni ida kajoa kapahana kajokiraki kania,
ni-khaonaniki ida paha txinaki.
Ogahai jahaki, ogahai jahariki varani hini
13 Avahararania hojaki vahabini ida ijaꞌari ogahania abononi kavaꞌibodivaraniki.
Binanokiava bana ida kidimahi asohiki mahija hoariha kidiꞌogahai kaꞌoa hini biogavini.
Bivaꞌahava bana ida Deus athi kidimahi nasohibakhiani hini.
Binanokiava jaboni ida kidiꞌogahai badani jahakia kabadanini.
14 Avavaꞌini bodinia vahabini avarakabajahaki aꞌoni,
avavaꞌini joko inini jaboni.
Aꞌonivani kaꞌoa vahabini avaabononi avakavaꞌibodivaraniki aꞌoni.
Nikia avakahojaihi;
hariꞌa ogahai abono avihinia korijanahia avaabononi vavaboraboraha bana!
15 Deus kania kamaꞌdarihi ida ogahai niki.
Deu-ra avigarikia vanakamaꞌdaki ida ogahai niki.
Ijaꞌari hojai ꞌboꞌda kahojaiki vanakamaꞌdaki ida jaboni.
Jahari kahonai abono vanokiariki vakadiꞌogahai niki jaboni.
16 Ijaꞌari avakabajahaki,
vaꞌoaniani oa vaabono vakavaꞌibodivaraniki jaboni,
vaabono vanarifirafiraki,
oniani ida hojai asohiriki hahavia vaꞌora kanahojaija.
17 Hari.
Nimania bana hida ogahai Deua bikavanoꞌaiki.
Sohikaꞌoaki ida Cristo kaijaꞌari vakadimahi,
Deus kaꞌogahai-ra vavahojaki.
Vavaꞌi jahajahaki adani.
Vaꞌora vanakaidivaki adani vahoariha.
Vaꞌora vakaathiforaki adani vahoariha.
Vaꞌora vavaꞌadiki adani vahoariha.
Vaꞌora vakajoamorabakhiaki adani vahoariha.
Ni-vakaihimoraki ida hoariha.
Ni-vahoariha vavaꞌi-ra vavajahaꞌimariniki.
18 Vavaꞌi jahajahaki adani Cristo kaijaꞌari,
ogahai sohikaꞌoaki-ra vavahojaki.
Hoariha kania avajahamisiki adani,
vaꞌora avanaariakaki adani vaihamahiki,
vavaꞌi jahajahaꞌianara kaimoni.