Hojai asohiriki avavaꞌini bodinia hojaki
4
Hari.
Avahararania vahojaki adani ijaꞌari vahoariha vaihamahiki-ra avanaariakariki,
oniani ida avaabononi avarakanaathidanoararikhamavini hija.
Vakamadiaki jaboni adani.
Nahina mani ida avakadihojai-ra nakamaꞌdaja?
Avaabononi kaꞌoa khai avaniꞌavini-ra avakavaꞌinofinofivini mani ida avavaꞌini bodinia avaabononi avanadanodanovini hija.
2 Avagathanirihi ida nahina avakavaꞌinofinofiki,
oniani ida ijaꞌari-ra avanaabinivini-ra avanofivini hija.
Vahoariha vakadinahina-ra avarakabaibakhiaki aꞌoni.
Avakamadiaki aꞌoni,
oniani ida avaabononi avarakanaathidanoararikhamabakhiavini hija,
oniani ida vahoariha-ra vaꞌora avanigafanibakhiavini hija jaboni.
Deus kania avakanikhariaravini mani ida nahina avanofiki-ra avavahojaravini hija.
3 Deu-ra avakanikhariaki vahabini aꞌoni avanofikia,
ni-avagathaniki.
Nahina asohiriki-ra avanofivini mani ida avakanikhariaki-ra avagathaniravini hija.
Avakaꞌdomaki ida avakavaꞌinofinofiki avaabononi kaꞌoa khai avaniꞌaja kaimoni.
4 Hari.
Deu-ra avavakaijokapaꞌitxiriki aꞌoni.
Ijaꞌaria asia bivajahahi ida kidihojai jahariki,
binofiki ida hojai Deua bikaimajahariki,
oniani ida Deu-ra kaimajaharavini hija.
Avavajahaki ida nahina Deua bikaimajahariki,
oniani ida Deu-ra avakaimajaharavini hija.
5 Hari.
Nimania hida athi Deus athi kapapirania hojaki:
“Deua biobaiꞌiki ada Maꞌonahai Jahaki avaꞌi bodinia.
Ovaria biakabaiki fori hiki,
binofiki ida kidimoni
arihikaꞌoana.”
Hariꞌa hihida varani hojaꞌimariniki vavaniha bana.
6 Danoni kabaꞌi ida avakadivaꞌinofinofi asohiriki,
danoni arafiaki ida Deus aꞌonira kajoamoravini.
Oniania,
Deus athi kapapirania hojaki hida athii hoariha:
“Deua biakodiaki ida
ijaꞌari abononi
vaboraborahariki.
Ijaꞌari abononi vaboraborahaki vani ida Deus
vaꞌi-ra fai aniꞌaja.”
Niki ida athii.
7 Avaabononi vavaꞌaha bana Deus aꞌonira honariavini avakadikaꞌdaꞌdi hina.
Jahari-ra vakaabani bana,
vakanasaꞌairi bana mahija akaraꞌovini avakadiania.
8 Vamaakari bana Deus kania.
Oniania,
maakariki ada Deus avakadiania.
Vakavaꞌipahinikaꞌoa bana ida hojai asohiriki mahija ijaꞌari saꞌani kosokoaꞌiki fori avihivini.
Ijaꞌari vajahaꞌbadaraki aꞌoni.
Vanofidoro bana ida hojai asohiki kaꞌoa.
9 Avakadihojai asohiriki avaabononi avakaꞌdaꞌdigariavini vani avavaꞌini-ra namokarava bana!
Vaasara bana!
Hariꞌa vahahani,
vaasara bana!
Hariꞌa khai vakhani!
Avavaꞌini mokara niva bana mahija avakadihojai asohiriki-ra avakavaꞌipahinikaꞌoavinia Deu-ra avananokiahivini.
10 Vaniꞌa bana ada Deus:
—Bada oniꞌaꞌiki hida hojai ivajahariki.
Ojaharina kabaꞌi,
hora vaꞌadi bana!
— vakhani bana.
Oniani ida Deus aꞌonira vaꞌadivini hija.
Aꞌonira ragaamananiꞌianaki fori hiki ada.
Aꞌonira niꞌaki jaboni ada:
—Aꞌonira onakaidivakarahoki ho.
Jahariki ida Cristo kaijaꞌari igamini-ra kanavaranihavini
11 Oigamina,
hariꞌa avaabononi vakanavaranihakhama bana varani asohirikia!
Deus kavaꞌisohihi haria kaabanivini hiki ida arigamina-ra akanavaraniharavini.
Iigamini-ra ikanavaranihavini,
kidihojai ivajaharavini ikahivini vani,
inaabarija ida Deus kavaꞌisohihi jaboni.
Ivani ijaꞌari nasohiva abono iabono ivanihamanija?
Ikajonihi ida Deus kavaꞌisohihi;
ni-inaabaki.
Asohipaꞌitxirihi ida vaꞌisohihi nasohiva abono iabono inihavini.
Ivaꞌaha bana ida Deus kavaꞌisohihi ira nasohivini.
12 Deus hoarana kaꞌoa binamonahaꞌiki ida kidivaꞌisohihi jiriki.
Ovari hoarana kaꞌoa biogajahakiki ida ijaꞌaria kidivaꞌisohihi jiriki binaabavini binaabaravini.
Ovari hoarana bikaabokaki ida ijaꞌari-ra akavaꞌijoavini,
bikaronavini Ibavi Jahakaꞌoaki kania okhani.
Ovari hoarana jaboni bikaronaki ida ijaꞌari hoariha Ibavi Jaharikaꞌoaki kania okhani.
Ivani,
ijaꞌari nasohiva abono ihirihi.
Ni-asohiki ida iigamini kahojai-ra ikanavaranihavini ivajaharavini-ra ikahivini.
Ni-aogaki ida afokajoma namithaki kaimoni
13 Avahararania vahojaki adani ijaꞌari nikia vakavaranibakhiaki:
—Hidakabaꞌi,
afokajoma vahabini okavaꞌibodivaraniki ida sidaji hoariha ookhana.
Badara hoarani ohojaki bana ho.
Onofiki ida kodijiniro-ra oanaꞌbaꞌdivini,
inisika-ra okapavakarija kaimoni,
pavakari onihaja kaimoni ida inisika — nikia ikavaranihi,
mitha iniꞌa bana hida oathi:
14 Avarigarihi ida afokajoma nahina namithaki kaimoni avakadiania.
Maro kaꞌojiꞌojina fori kihiki ida avakadimahi.
Jorakia nokiahi,
jorakia avisoniki ida.
15 Nimania bana hida varani asohikia avakavaranina kaimoni:
—Deus ariabinirina-ra vaꞌahahi;
badani nikia akabadanihi — vakhani bana.
16 Hari.
Avaabononi avavakaijokaki bana aꞌoni,
avaabononi avavaboraborahaki bana jaboni aꞌoni,
badania avakabadanija kaimoni.
Nikia avakahojaihi;
ni-asohiki ida avakadihojai.
17 Hari.
Oniaroa,
ijaꞌaria biogahi ida nahina asohiki jahaki bada biniꞌaki kaimoni.
Bada biniꞌarihi,
ni-asohiki ida kidihojai.