Deus athi namoniva abono ꞌbadara varani hina
2
Hari.
Mahi ꞌboꞌdakari ijaꞌari vahararana vahojaꞌiki adani Deus athi namoniva abono vihina-ra vakahiꞌbadaraki.
Nini vani namithaja bana ida avakadiania jaboni.
Vakaikahiki bana adani Deus athi vakaꞌojomoꞌiva abono vihina-ra vakahiꞌbadaraki.
Avakadiꞌojomoꞌihi abono vahararana vahojaki adani hiꞌadani makhira.
Aꞌonira vakaꞌojomoꞌivini hiki ida varani asohiriki.
Vanihimavini vanofiki bana ida avakadimahi jaꞌdini.
Jesus Cristo vaꞌora akavaꞌijoaꞌavini kabaꞌi,
vakajoniki ida Jesus Cristo vaꞌora vakaꞌdaꞌdivini.
Vakhanina vani vaabono vanapohimajajorakira bana adani.
2 Hari.
Jesus kaijaꞌari vahoariha vakabanafoki bana jaboni ida hihadani makhira vakadihojai kaipahivahaki.
Cristo kaijaꞌari vihiriki vakadihojai asohiriki-ra vanokiha,
oniani ida varani jaharikia Cristo-ra vakanavaranihavini hija bana.
3 Hari.
Hiꞌadani Deus athi kaꞌojomoꞌiva abono ꞌbadara jiniro-ra vanofikarahoki adani.
Vanamonahaꞌimariniki ida varani kaꞌoa hiriki aꞌonira vakaꞌojomoꞌivini kaimoni.
Vanofiki ida avakadijiniroa vaꞌora avanoꞌavini vakadivarani ꞌbadara abosini kaimoni.
Hari.
Mahi ꞌboꞌdakari Deua bivavaꞌisohihiki hida varani vihina:
“Ijaꞌari nasohiva abono ho,
ovaꞌi ogairiki afohaꞌoadaha.
Vaꞌora onapohimajaki bana adani oathi kaꞌojomoꞌiva abono ꞌbadara.
Ibavi Jaharikaꞌoakia vaꞌora okaronaki bana adani.”
Niha.
4 Hari.
Vakavaꞌihoki bana ida nahina namithaꞌiki Deus ibavi kaijaꞌarini vaipohiriki vakadiania ꞌboꞌdakari.
Hojai Deua bivajaharikia vakahojaina mani ida Ibavi Jaharikaꞌoakia Deus vaꞌora karonavini hiꞌia.
Hodi bihiani arafiaki aꞌdaimaki,
ibavi bakibakiki kania vaꞌora nahojaja.
Vidabohahaꞌoadahaki adani.
Vanaviahanokhaki bana ida mahi Deus ijaꞌari hahavi kahojai-ra naabosivini kamahini.
5 Hari.
Vaꞌora vakavaꞌihoki bana jaboni adani ijaꞌari ꞌboꞌdakari vahokiꞌiki nahina namithaꞌiki vakadiania.
Deus kahojai-ra vanofiriki adani.
Deua bikaronaꞌiki ida paha karaho.
Kapahaꞌiki ida arabo hahavi.
Avahidananahahaviꞌiki adani.
Oniaro kari,
hojaꞌiki ada makhira hoarana kaꞌoa hojai Deua binofikia kahojaiki.
Noé kohana ada.
Vaꞌora kanamonibakhiavini hiꞌiki ida Deus kavarani,
ijaꞌari vanaabakaꞌoaja kaimoni.
Deus Noé-ra vaꞌora akavaꞌijoaꞌaha kidigamo,
vakadisai,
vakadiꞌaboni vihiki.
7 vihiki adani Noé vaipohina vaꞌora akavaꞌijoaꞌiki.
6 Vaꞌora vakavaꞌihoki bana jaboni adani Sodoma sidaji,
Gomorra sidaji hiki kaijaꞌarini,
nahina namithaꞌiki vakadiania.
Mahi ꞌboꞌdakari hojai asohirini arafiakia vakahojaiꞌiki adani,
oniani ida hojai asohiriki abosini-ra vagathanivini Deus bikahivini hiꞌia.
Biakaronaꞌiki ida siho kahaꞌdini vaꞌora kanihimahahaviꞌiki.
Akaaniꞌihi ida siho kaꞌofoni kaꞌoa.
Vapohimajana akavaꞌibodivaranihi;
aogahi ida ijaꞌari asia hojai Deua bivajaharikia vakahojaiki vapohimajana bana jaboni,
vaꞌoaniaro fori vihiki bana adani.
7 Oniaro kari,
hojaꞌiki ada Ló kohana.
Deua biakavaꞌijoaꞌiki ada.
Makhira hojai asohikia kahojaiki ada Ló.
Binokibakhiaꞌiki ida Sodoma sidaji kaijaꞌarini vakadihojai asohiriki kaipahivahaki.
Vakadihojai Ló vaꞌi-ra rogo aniꞌabakhiaꞌiki.
8 Sodoma sidaji kaijaꞌarini vahararana vania ibavira ada Ló.
Asohiki ida kidihojai.
Mahi hahavi binokiꞌiki ida sidaji kaijaꞌarini vakadihojai jaharikaꞌoaki.
Bikamithaꞌiki ida vakadivarani Deua bivajahariki jaboni,
oniani ida vaꞌi rogo aniꞌakarahoni hija.
9 Hari.
Oniaroa,
Deua biogaki ida kidijaꞌari kidihojai kaꞌoa nofina vihiki-ra vaꞌora akavaꞌijoavini niha biniꞌaꞌavini,
vavaꞌi rogo iniꞌahapikiria kaimoni.
Deua biogaki jaboni ida ijaꞌari vahoariha hojai asohirikia vakahojaiki-ra vaꞌora nahojavini niha vaꞌora niꞌaniꞌavini.
Ibavi Jaharikaꞌoakia avikharina oadani adani hiꞌadani ijaꞌari vaabiniꞌiki,
vaꞌi rogo inini ibavinia vahojaki adani afohaꞌoadaha.
Deua binaviahanokhaki ida mahi ijaꞌari hahavi kahojai abosini kamahini.
10 Hari.
Deus vaꞌora napohimajavini arafiaki adani ijaꞌari hojai asohiriki kaipahivahaki-ra vakavaꞌipahiniriki.
Vavaꞌahaki ida hojai jahariki arafiaki vavaꞌi nahonariahihini hini afobakhia.
Ni-vanofipaꞌitxiki ida Deus vaꞌora vakaꞌdaꞌdivini.
Hiꞌadani makhira Deus athi kaꞌojomoꞌiva abono ꞌbadara,
vaꞌdamoꞌdamoki adani,
vaabono vavaboraborahaki adani.
Ni-vaꞌora vavavaꞌihaki adani ijaꞌari vanokiariki vadanoki nama vahojaki.
Varani jaharikia vaꞌora vakanavaranihaki adani.
11 Hari.
Vadanoki adani Deus ibavi kaijaꞌarini.
Vakadibadani danoki jaboni.
Vadanona biaradaki ida Deus athi kaꞌojomoꞌiva abono ꞌbadara vadanona.
Kabaꞌi,
Deus ibavi kaijaꞌarini Deus viaha vahojana ni-vaꞌora vakanavaranihaki adani ijaꞌari vanokiariki nama vahojaki varani jaharikia,
ni-vaꞌora avanaathidanoarariki jaboni.
12 Hari.
Tapoꞌija vaꞌini bodini vara nirini,
ni-nahina-ra ogaki,
onivani fori vihira adani hiꞌadani makhira.
Varani jaharikia vakanavaranihaki ida nahina hahavi avigariki.
Tapoꞌija namithaki ijaꞌaria binakaꞌirivini hiki binaabinija kaimoni.
Tapoꞌija abinini vani fori vihira bana adani hiꞌadani makhira vaabinina.
13 Makhira ꞌbadara vaꞌora vanaimaꞌbanaꞌiki adani vahoariha,
oniani ida Deus makhira ꞌbadara-ra vaꞌora naimaꞌbanavini hija bana.
Mahi kabaꞌi vakadihojai asohiriki kaipahivahakia vakahojaibakhiaki adani.
Vakadivaꞌikhaiini ida vakadibadani,
ni-vakaipahipaꞌitxiki.
Hari.
Aꞌonivani Cristo kaijaꞌari avajoronini kamahini aviꞌbaijabanaki aꞌoni.
Avakadiania vajoroniki jaboni adani makhira ꞌbadara.
Vakoꞌbainofiki adani.
Vaakavinofiki adani jaboni.
Avavaꞌini-ra vavajahaki adani hiꞌadani makhira ꞌbadara.
14 Vavaꞌi bodinia vanofikarahoki ida vakadihojai asohiriki kaipahivahaki.
Vanokihi ida gamo,
vakadigamo hirini kabaꞌi,
vanofiki ida vaviꞌomavini.
Vaꞌora vakaboroborobakhiaki adani ijaꞌari Cristo-ra vavakaijokajahakiriki,
hojai jaharikia vakahojaira kaimoni.
Vakavaꞌibodivaranihaꞌoadahaki ida jiniro.
Deus vaꞌora napohimajaki bana adani,
binaabosija kaimoni ida vakadihojai jaharini arafiaki.
15 Hari.
Cristo kania hagihi okhakia vaadaharina mani ida akamadaki fori vaꞌora nihaja.
ꞌBoꞌdakari hojaki ada Balaão kohana.
Beor kaisai ada.
Balaão kahojai fori hiki ida hiꞌadani makhira ꞌbadara vakadihojai.
Balaão jiniro-ra nofikarahovini mani ida hojai Deua bivajahariki-ra bada niꞌavini hiꞌia.
Oniani ida hagihi asohikia naadahajanarina hija.
16 Deus athi namoniva abono hina kabaꞌi ada Balaão kohana,
ni-binaabaꞌiki ida Deus athi,
oniani ida Deus Balaão-ra kaabanivini hiꞌia.
Deua bihonariahi ida Balaão kaigitha Balaão-ra vaadahaki varavarani.
Ijaꞌari athini fori hiki ida igitha athini.
Nini vani Deua binadabaja ida Balaão kabadani asohiriki bada biniꞌajanaria kaimoni.
Vaꞌihariki fori hiki ada Balaão kohana.
17 Hari.
Ni-nahina kaimoni jahaki ida makhira ꞌbadara vakadimahi.
Hodi khorahaki kapahariki fori vihiki adani.
Bahi sirisirikia bivaadahaki fori vihiki adani jaboni.
Deus vaꞌora kaibavijahahivini hiki ida Ibavi Jaharikaꞌoaki.
Ibavi bakibakini arafiaki kania vaꞌora nahokahiki adani bana.
18 Ijaꞌari vaꞌihariki fori hiki kavarani ida hiꞌadani makhira vakadivarani.
Vakadivarania vaabono vavaboraborahaki adani.
Hari.
Avahararania vahojaki adani Cristo-ra vanofijaꞌdiniki.
Vakavaꞌipahinivini vanofiki ida vakadihojai ꞌboꞌda.
Deus athi kaꞌojomoꞌiva abono ꞌbadara vaꞌora vakaboroborobakhiaki adani Cristo-ra vanofijaꞌdiniki hojai ꞌboꞌda kaipahivahaki vakavaꞌinofinofiꞌiki vakahojaiꞌianara kaimoni.
19 Cristo kaijaꞌari-ra vaꞌora vaniꞌaꞌbadaraki adani:
—Aꞌonira akajoamoraki hari,
avagathaki fori avihijanaria kaimoni — nimania ida Cristo kaijaꞌari-ra vaꞌora vakorijanahavini athini.
Vaꞌoaniaro vagathaki fori vihiki adani.
Vakadihojai asohiriki kaipahivahaki vaꞌora gathiki adani.
Hari.
Hojai asohiriki ijaꞌari vaꞌini-ra nahonariahihihi;
hojai asohiriki kahonai abono gathaki fori hihi.
20 Hari.
Ijaꞌari Jesus Cristo kania vaabono gahinai vanihavini vani vaꞌora akavaꞌijoaꞌara adani,
oniani ida vakadihojai asohiriki vavaꞌi binahonariahihijanaravini hija.
Ni-vaꞌora gathijanaki ida hojai asohiriki vaꞌora napohimajaki kaimoni.
Hari.
Oniaroa,
vajoiribaniꞌiki vahabini adani,
vakadikaꞌdaꞌdi-ra vakavaꞌipahinikaꞌoaꞌavini.
Vakadihojai asohiriki vaꞌora gathiꞌianaha.
Ni-vakaabokaki ida hojai asohiriki-ra vakavaꞌipahiniꞌianavini.
Cristo-ra avigavini viahania jahariki ida vakadimahi.
Cristo-ra vakavaꞌipahinivini naothinia jaharini arafiaki ida vakadimahi.
21 Deus kahojai asohikaꞌoaki-ra avigajoraravini;
ni-arafiaki ida vakadihojai asohiriki abosini.
Vakapoariꞌimidiahi,
naothinia vajoiribaniꞌaha,
oniani ida Deus vaꞌora napohimajavini bianarafiavini hija.
22 Vakadiania namithaki ida athi kaꞌoa haria vakaꞌojomoꞌivini hiki.
Nimania hida athii Deus athi kapapirani pitania hojaki.
“Joiribaniki ida jomahi bivaꞌbiaki kania,
bihaꞌianaja kaimoni ida kidiaꞌbi.”
Niki ida athi hoariha jaboni:
“Ijaꞌari hirari-ra sokovini
kabaꞌi,
joiribaniki ida hirari
kaꞌbakaꞌbaki kania,
roaroahaꞌianaja kaimoni.”
Niki ida athii.
Vakhanimanira adani Cristo kaijaꞌari Cristo-ra vakavaꞌipahiniꞌiki.