Jesus Cristo joina varani hini hida
3
Oigamina,
aꞌonira onakaidivaki aꞌoni.
Aꞌonira okajirihivini hiki ida oathi papira ꞌbamikia.
Onofiki ida aꞌonira onavaꞌihokivini varani kaꞌoa hinia,
avakavaꞌibodivaranihaꞌoadahaja kaimoni ida hojai asohikaꞌoaki.
2 Vakavaꞌihoki bana ida varani Deus athi namoniva abono kaꞌoa vihikia vara vavaniꞌaꞌboꞌdaꞌiki.
Vakavaꞌihoki bana jaboni ida akadikaꞌdaꞌdi,
akadiꞌaihotahi abono aꞌonira honariavini hiki.
Cristo athi avaadahaoniva abonoa vavikhaꞌiki ida athi avakadiania.
3 Oigamina,
onofiki ida aꞌonira onavaꞌisohivini bana afoꞌimidia namithaki kaimonia Cristo joina kamahini viahania.
Avakadiania vahojaki bana adani makhira ꞌbadara,
hojai asohiriki kaipahivahaki-ra vakavaꞌinofinofihaꞌoadahaki.
Ogarahi abono aꞌonira vakanahahanihaki bana aꞌoni.
4 Nimania ida vakadivarani ꞌbadara:
— Cristo aꞌonira navaꞌiponivini hiꞌiki ida joina avakadiania.
Ada hana hojaha?
Ni-joiki.
Radahaꞌiki ida badara îpohiki.
Vaabiniꞌboꞌdaꞌiki adani akadiabiꞌi kohana,
ni-namithaꞌiki ida Cristo varani hina.
Aꞌonira navaꞌiponiꞌimarinivini hiki ida joina,
binahoarihaja kaimoni ida ijaꞌari kamahi.
Ijaꞌari vakadimahi Deus vaꞌora namonahavini kari asia onivani fori hija ida vakadimahi,
ni-hoarihaki — vakhaniꞌbadaraki adani.
5-6 Ogarahi abono adani hiꞌadani makhira.
Ni-vakavaꞌihokivini vanofiki ida niha ninini hoaranija mahi ꞌboꞌdakari Deus hahavi-ra nahoarihavini.
Kamaꞌdani kari Deus hahavi-ra namonahaꞌavini vani vara niꞌara ada Deus,
binanamithaꞌiki ida nama,
arabo hiki.
Paha kaꞌoa vani ida hojaja.
Ni-vakavaꞌihokivini vanofiki jaboni ida Deus paha-ra,
arabo anihavini niha ninini.
Amoroꞌihi ida paha,
nokiaꞌihi ida arabo.
Paha vania jaboni Deua binihimahahaviꞌia ida kidiamonahi.
Bihonariaꞌavini ida paha karaho,
avahidahahaviꞌaha adani ijaꞌari,
igitha vihiki.
7 Hari.
Deus athi vania biakadavaꞌaja hida kidiamonahi hahavi hidakabaꞌi hojaki.
Deua bivavaꞌisohihiꞌboꞌdaꞌiki ida arabo,
nama hiki-ra nihimavini bana sihoa.
Deua binokhaki ida mahi abono-ra navaꞌisohijoravini hiꞌiki kidiamonahi-ra nihimavini.
Binokhaki ida mahi ijaꞌari Deu-ra vakajoniki vakadihojai abosini kamahini.
Vaꞌora nihimaki bana adani.
8 Oigamina,
aꞌonira onakaidivaki ho.
Onofiki ida aꞌonira onavaꞌihokivini hihida varania.
Deus akadikaꞌdaꞌdia ni-bikavaꞌibodivaraniki ida mahi ipohini ipohirini,
akavaꞌibodivaranivini vani fori hini.
Kidimoni hini mahi hoarani,
badara mil ipohini fori hiki ida.
Kidimoni hini jaboni badara um mil ipohini,
mahi hoarani fori hiki ida.
9 Ijaꞌari ipohirikia vakavaꞌibodivaraniki ida namithajorakirini Deus haria navaꞌiponivini hiki.
Deus vaꞌi vidavidaharini aꞌonira naviahanokhaki ada,
oniani ida aꞌonira napohimajavini-ra nofiravini hija.
Binofiki ida ijaꞌari hahavi vakadihojai asohiriki-ra vakavaꞌipahinikaꞌoavini.
Binofiki ida vaabono gahinai vanihavini kidiania,
vaꞌora akavaꞌijoara kaimoni.
10 Hari.
Boꞌdi abono jorakia nokiana ijaꞌari vaꞌini-ra kadi hiki.
Onivani fori hija jaboni ida akadikaꞌdaꞌdi kaꞌoa joina kamahini,
jorakia nokiaki ada.
Oniaroa,
namithaki bana ida saani karaho,
avisoniki bana ida nama.
Ahaꞌdiki bana ida nahina hahavi nama,
arabo hikia hojaki.
Siho kakarahoa binihimaki bana ida.
Avisoniki bana ida arabo,
nahina hahavi araboa hojaki.
11 Oniaroa,
aogaki ida nahina hahavi hojaki ihimini bana.
Avakhanini vani,
hojai jahakaꞌoakia vakahojaiꞌa bana.
Vavaꞌaha bana ida Deus aꞌonira vakaꞌdaꞌdivini.
12 Hari.
Vanaviahanokhahahaꞌoadaha bana ida mahi Deus ijaꞌari hahavi vakadihojai-ra naabosivini kamahini.
Cristo monina vahoariha-ra vaꞌora vananamithabakhia bana,
avananamithajorakija kaimoni ida akadikaꞌdaꞌdi kaꞌoa joina kamahini.
Oniaroa,
sihoa bianahaꞌdiki bana ida nama,
ihimihahaviki bana ida hahavi nama hojaki.
Binasasaki bana ida nahina hahavi araboa hojaki.
13 Ni-avaꞌi-ra soko aniꞌaki ida namithaki kaimoni.
Harivani,
anaviahanokhaki ida Deus haria navaꞌiponivini hiki namithani.
Binamonahaki bana ida nama jaꞌdini,
arabo jaꞌdini hiki.
Ni-hojajanaki bana ida nahina Deua bivajahariki,
kidiamonahi jaꞌdini hararania.
14 Oigamina,
aꞌonira onakaidivaki aꞌoni.
Avanaviahanokhahahaꞌoadahavini oadani ida nahina Deus haria navaꞌiponivini hiki namithani kamahini,
vaabono vanadano bana mahija hojai asohikaꞌoakia avakahojaivini Deus viaha.
Kidiania avajahamisi bana jaboni afohaꞌoadaha.
15 Vakhaniha bana:
—Akadikaꞌdaꞌdia binofiki ida asia ijaꞌari vaipohiki-ra vaꞌora akavaꞌijoavini bana,
oniani ida najoiꞌiarina hija — vakhani bana.
Hariꞌa bana varagari ida aꞌonira akavaꞌijoavini.
Nimania ida arigamina Paulo aꞌonira kajirihivini.
Anakaidivaki ada.
Deus Paulo-ra noꞌavini hiki ogahai aꞌonira navaꞌisohira kaimoni Deus athia.
16 Oniaroa,
Paulo haria navaꞌisohivini hiki kidipapira athini hahavi nahina namithaki kaimoni Cristo joina kamahini.
Ni-ijaꞌaria avigajorakiki ida Paulo kavarani hahavi nahina hini.
Deu-ra vavakaijokajahakirikia ni-avigajahakiki ida Paulo athi,
oniani ida papira athini-ra avanahoarihavini hija.
Avanahoarihaki jaboni ida Deus athi kapapirani hoariha,
asohiria kaimoni.
Vaabono vakahidaki bana adani.
17 Oigamina,
aꞌonivani avarigajahakiꞌia hida varani.
Avavaꞌini ogairiva bana mahija ijaꞌari hojai asohirikia vakahojaiki aꞌonira vakaborobororavini.
Cristo kania avasohimisihaꞌoadaha bana mahija Deus kania avakaikahini-ra avaragariravini.
18 Hari.
Vavaꞌaha bana ida Deu-ra avavakaijokavini avijavani.
Vavaꞌaha bana jaboni ida Jesus Cristo-ra avarigavini avijavani.
Akadiꞌaihotahi abono ada.
Akadikaꞌdaꞌdi kaꞌoa ada jaboni.
Vara avaniꞌabakhiava hida jahana,
danona,
vagana arafiaki afohaꞌoadaha.
Nimania ida binofiki.
Hari ida vani oamani Pedro athi anokhomiꞌini.