Maꞌonahai kaꞌoa hiriki varani hina
4
Kodivaꞌahi,
aꞌonira onakaidivaki ho.
Avaadahaoniki adani ijaꞌari vaipohiki Deus athi namoniva abono vihina-ra vakahiꞌbadaraki.
Ni-ijaꞌari hahavia vavahojaki ada Maꞌonahai Jahaki vavaꞌi bodinia.
Aꞌonivani,
vakaijoꞌa bana ida maꞌonahai ijaꞌari hoariha kania hojaki mahija Deua bikaronavini Deua bikaronaravini avarigavini.
Avakaijoꞌaravini oadani vakajariꞌda bana ida ijaꞌari kavarani,
Maꞌonahai Jahaki kidiania hojana-ra kahivini.
2 Aꞌonira onavaꞌisohiki bana ho maꞌonahai-ra avakaijoꞌavini niha ninini,
avarigaja kaimoni Deus Maꞌonahana hina Deus Maꞌonahana hirina.
Maꞌonahaia vaꞌini binahonariahihivini oadani,
vananaꞌdohi bana ida ijaꞌari Jesus ijaꞌari hiꞌina ijaꞌari hirina.
Nihi ida ijaꞌari:
—Khaꞌaha ada Jesus Cristo,
ijaꞌari hiꞌina hidiaja.
— Nihi ida ijaꞌari athini,
avarigahi ida kidiania hojana Maꞌonahai Jahaki Deus kania khaꞌina.
3 Ijaꞌaria makhira hirina bikahiha ada Jesus;
ni-maꞌonahai Deua bikaronaki hiki ada kidiania hojaki.
Maꞌonahai Cristo-ra napohimajavini-ra nofiki vani ada hojara kidiania.
Avakamithajoraꞌiki ida maꞌonahai Cristo-ra napohimajavini-ra nofiki khana kavaranihi.
Hari.
Khaꞌaha ada maꞌonahai Cristo-ra napohimajavini-ra nofiki ijaꞌari vakadiania.
4 Kodisai aꞌoni.
Deus kaijaꞌari aꞌoni.
Avanihimakaꞌoaꞌihi ida Deus athi namoniva abono ꞌbadara vakadivarani asohiriki.
Maꞌonahai Jahaki aagahai Jahari aagahai-ra aradaki.
Maꞌonahai Jahaki avavaꞌini-ra nahonariahihihi.
Jahari vavaꞌi binahonariahihiha adani Cristo-ra vanofiriki.
5 Deus athi namoniva abono ꞌbadara ni-vara vavaniꞌaki hida Deus varani hina.
Cristo-ra nofiriki kavarani hiki ida vakadivarani ijaꞌari vakadiania.
Cristo-ra vanofirikia mitha vaniꞌaki ida vakadivarani.
Vaipohina vihina mani ida vakadivarani vakapoarivini hija.
6 Harivani,
vaipohina arihirihi.
Deus kaijaꞌari hari.
Deus kaijaꞌaria mitha biniꞌahi ida akadivarani.
Deus kaijaꞌari hiriki ni-ariathi-ra mitha niꞌaki.
Vakhanina vani vaꞌora aogara adani ijaꞌari hana vihina Maꞌonahai Jahaki kaꞌoa hina-ra vavahojaki,
ijaꞌari hana vihina maꞌonahai hoariha kaꞌoa hiriki-ra vavahojaki.
Deua binakaidivaki ida ijaꞌari
7 Kodivaꞌahi aꞌoni,
ariabono akanakaidivakhamava.
Deus haria kakodiavini hiki ijaꞌari-ra anakaidivajahakivini.
Deus kaisai ida ijaꞌari Deu-ra nakaidivaki,
hoariha-ra nakaidivaki jaboni.
Biogajahakiki ada Deus.
8 Ijaꞌari hoariha-ra nakaidivariki,
ni-Deu-ra ogaki.
Ni-Deus kahojaia kahojaiki.
Deus kahojai ida ijaꞌari-ra nakaidivavini afohaꞌoadaha.
9 Nimania hida Deus ijaꞌari-ra nakaidivavini-ra nanokiaꞌavini.
Hoarana ada Deus kaisai.
Deua bikaronaꞌiki ada kidisai ijaꞌari vakadiania vaꞌora akavaꞌijoara kaimoni,
vavahojaja kaimoni ida vakadimahi jaꞌdini anokhomiriki kidiania.
10 Deus haria nakaidivaꞌoamanija.
Nimania hida haria nakaidivakarahovini:
ꞌBoꞌdakari Deu-ra anakaidivaravini kabaꞌi,
Deus vani ada haria nakaidivaꞌboꞌdaꞌara.
Bikaronaꞌaha ada kidisai ijaꞌari vakadiania.
Jesus abono-ra vaꞌahaꞌiki abiniꞌina akadimoni hina,
binaꞌbiraja kaimoni ida hojai asohiriki akadihojai hibakhiaꞌiki.
Bigathaniꞌihi ida akadibadani jaharikaꞌoaki abosini akadimoni hini.
11 Oigamina,
nimania hida Deus haria nakaidivavini arafiani,
oniani ida ariabono akanakaidivakhamavini-ra honariavini hija.
12 Ni-ijaꞌaria binokiꞌiaki ada Deus,
akadiania hojana kabaꞌi.
Ariabono akanakaidivakhamahi;
Deus akadiania akaramisiha,
oniani ida ijaꞌari-ra anakaidivajahakivinia haria kakodiavini hija.
13 Aꞌonira onavaꞌisohiꞌianavini hiki hida Deus kania aakaramisina-ra aogavini.
Deus Maꞌonahai Jahaki-ra karonaꞌavini avaꞌi bodinia hojara kaimoni,
oniani ida Deus akadiania akaramisina-ra aogavini hija.
Aogaki ida Deus kania aakaramisina jaboni.
14 Hari.
Oniaroa,
ijaꞌari-ra akanamonivini hiꞌiki ida anokiꞌiki.
Akadivarani hiki ida Deus akadiabiꞌi kidisai-ra karonaꞌavini ijaꞌari vakadiania,
ijaꞌari hahavi akavaꞌijoava abono hiꞌara kaimoni.
15 Ijaꞌaria Deus kaisai hina bikahiha ada Jesus;
Deus kania akaramisihi.
Kidiania jaboni akaramisiki ada Deus.
16 Harivani,
aogaki ida Deus haria nakaidivavini.
Avakaijokaki ida haria nakaidivavini.
Deus kahojai ida ijaꞌari-ra nakaidivavini.
Ijaꞌari kahojai ida hoariha-ra nakaidivavini;
akaramisiki ada Deus kidiania.
Deus kania akaramisihi jaboni ida ijaꞌari.
17 Oniaroa,
avaꞌi bodinia avijavaki ida Deus kahojai ijaꞌari-ra nakaidivavini,
oniani ida akadimahi-ra araboja Cristo kamahi fori nihaja.
Oniaroa,
ni-ariabono akaipahiki bana Deus ijaꞌari kahojai-ra naabosivini kamahini.
18 Ijaꞌaria ni-bifiniki ida nakaidivani hiki.
Avakaijokajahakihi ida Deus haria nakaidivavini;
ni-akaabokaki ida Deu-ra afinivini.
Akaraꞌoki fori hiki ida aofinina.
Ijaꞌari ofinihahaꞌoadahahi,
vaꞌini bodinia ni-hihaviki kaho ida Deua binakaidivavini-ra vakaijokavini.
Asia biakavaꞌisokonihi ida kidihojai asohiriki abosini-ra gathanivini.
19 Deus miroꞌa haria nakaidivavini,
oniani ida harimaina Deu-ra anakaidivavini hija.
20 Korijanahi abono ida ijaꞌari igamini-ra kaimajaharavini kabaꞌi,
Deu-ra nakaidivavini-ra kahiki.
Ni-Deu-ra nokiki ida ijaꞌari.
Igamini vani ida binokija.
Binakaidivaravini oadani ida igamini binokibakhiaki,
ni-bikaabokaki ida Deu-ra nakaidivavini.
21 Nimania hida honari Cristo haria navaꞌisohivini hiꞌiki:
Deu-ra anakaidivahi;
vaꞌora vanakaidiva bana adani vahoariha.