Deus kaisai hari
3
Vakavaꞌibodivaraniꞌa bana ida Deus haria nakaidivavini arafiani niha ninini.
Karahoki ida haria nakaidivavini arafiani,
oniani ida kidisaia haria naonivini hija.
Kidisai kaꞌoa arihina.
Ijaꞌari Jaharia bivakaꞌdaꞌdikia ni-avigaki ida Deus kaisai arihina.
Deu-ra avigaravini mani ida Deus kaisai arihina-ra avigaravini hija jaboni.
2 Kodivaꞌahi,
aꞌonira onakaidivaki ho.
Hari.
Deus kaisai hari.
Ni-aogaꞌiaki kaho ida akadimahi niha ninini Deus kania.
Aogajahakiki ida namithaki kaimoni.
Cristo nokiaꞌianana kamahini,
anokiki bana ida kidimahi kaꞌoa niha ninini,
oniani ida akadimahi-ra Cristo kamahi fori nihaja.
3 Asohikaꞌoaki ida Cristo kamahi afohaꞌoadaha.
Nimania jaboni ida ijaꞌari hahavi Cristo-ra vakaijokaki kamahi.
Ijaꞌari Cristo nokiana-ra naviahanokhahahaꞌoadahakia binofiki ida hojai asohiki kaꞌoa kahojaini.
4 Ijaꞌari Deus kavaꞌisohihi jiriki-ra naabaravini mani ida hojai Deua bivajaharikia kanahojaini hija.
Athi binaabaravini mani ida ijaꞌari-ra osanija.
5 Avarigaki ada Cristo khaꞌina ijaꞌari vakadiania,
bianija kaimoni ida hojai asohiriki vavaꞌi bodinia.
Ovaria ni-bada biniꞌaki ida hojai asohiriki.
6 Ijaꞌari Cristo kania akaramisikia ni-bada biniꞌabakhiaki ida hojai asohiriki.
Hojai asohiriki-ra kavaꞌipahiniriki vani ida ni-Cristo-ra nokiꞌiaki kaho,
ni-Cristo-ra ogaꞌiaki kaho jaboni.
7 Kodisai,
hariꞌa vavaꞌaha bana ida ijaꞌari aꞌonira vakorijanahavini.
Ni-jahakaꞌoaki ida ijaꞌari hojai Deua bivajahariki-ra kavaꞌipahiniriki.
Sohikaꞌoaki ida ijaꞌari hojai jahakia kahojaiki.
Cristo sohikaꞌoana fori hiki ida ijaꞌari.
8 Hahavi amonahani kamaꞌdani kari Jaharia bada biniꞌahahaꞌoadahaki ida kidihojai asohiriki.
Jahari kaijaꞌari hiki ida ijaꞌari hojai asohiriki-ra kavaꞌipahiniꞌiariki.
Asia bivajahaki ida Jahari kabadani.
Deus kaisai-ra rakhaki ijaꞌari vakadiania Jahari kahojai-ra nihimahara kaimoni.
9 Ni-hojai asohirikia kahojaijanaki ida ijaꞌari Deus kaisai hiꞌiki.
Hojaki ada Deus Maꞌonahana vaꞌini bodinia.
Ijaꞌari Deus kaisai hiꞌini mani ida hojai asohirikia kahojaibakhiani-ra kaabokajanaravini hija.
10 Nimania ida ijaꞌari kamahi Deus kaisai hini aogaki,
Jahari kaisai hini aogaki jaboni.
Jahari kaisai oamani ida ijaꞌari Jahari kahojaia kahojaiki.
Deus kaisai hirihi ida ijaꞌari hojai sohikia kahojairiki.
Deus kaisai hirihi jaboni ida ijaꞌari igamini-ra nakaidivariki.
Ijaꞌari abononi kanakaidivakhamavini varani hini hida
11 Hihida varani hida vani avakamithabiininiꞌiki:
Hai,
jakaho ariabono akanakaidivakhamava.
12 Ni-jahapaꞌitxiki ida Caim kohana fori arihina.
Jaharia binavaꞌihonariahihiki ada.
Ovaria binaabiniꞌiki ada igamina Abel oniki kohana.
Nahina mani ida Caim kidikajoꞌo-ra naabinivini hija?
Hojai jahariki-ra bada niꞌabakhiaki ada Caim.
Abel vani ada hojai jahaki-ra bada niꞌabakhiara.
13 Oigamina,
hariꞌa avavaꞌini-ra fai aniꞌava bana ida ijaꞌari Deu-ra vanofiriki aꞌonira vakaimajaharavini.
14 Aogaki ida abaꞌoki fori arihijanarina.
Avahojaꞌiki ida mahi jaꞌdini anokhomiriki Deus haria noꞌavini hiꞌiki.
Radahaꞌiki ida abaꞌoi fori arihina,
kamaꞌdaꞌiki ida arihokikaꞌoaꞌina.
Arigamina-ra anakaidivavini mani ida ahokikaꞌoana kamaꞌdaꞌini-ra aogavini hija.
Asia abaꞌoki fori hiki ida ijaꞌari igamini-ra nakaidivariki.
15 Kaabiniki ida ijaꞌari igamini-ra nofipaꞌitxiriki.
Avarigaki ida kaabiniki mahi jaꞌdini anokhomiriki-ra vahojaravini.
16 Nimania hida ijaꞌari hoariha-ra nakaidivavini niha ninini-ra aogavini.
Cristo abono-ra vaꞌahaꞌiki abiniꞌina akadimoni hina.
Harivani jaboni,
arigamina-ra anakaidivahi;
ariabono avaꞌahahi jaboni ariabinina vakadimoni.
17 Ijaꞌari kanahinakia biogaki ida igamini kidinahina-ra kainamovini,
igamini-ra kaathirihi,
ni-nahina kaimoni Deu-ra nofijahakivini-ra kahiki.
Ni-asohiki ida kidivarani.
18 Kodisai,
ni-arajomaki ida akadivarani arigamina-ra anakaidivavini-ra akahivini.
Hai oamani,
arigamina-ra akajoamorava mahija akadivarani vara avaniꞌaki kaꞌoa-ra ananokiavini.
Ijaꞌari ipahihiriki Deus viaha varani hini hida
19 Ijaꞌari-ra anakaidivavini vani aogaja ida Deus kaijaꞌari kaꞌoa arihina.
Akhanina vani avaꞌi jahajahani Deus saꞌa kabodinia arihojana-ra aogaja.
20 Avaꞌi kaabanahahani haria kaabanivini kabaꞌi,
aogaki ida Deus kaꞌogahai akadiꞌogahai-ra aradavini.
Deua biogahahaviki ida akadivaꞌibodivarani,
kabaꞌi,
haria nakaidivaki ada.
21 Kodivaꞌahi aꞌoni.
Deus viaha arihojana avaꞌi kaabanahaharihi;
ni-avaꞌi aipahihiki.
22 Akadikanikhari-ra agathanihahavivini hiki kidihonari anaabavini,
nahina binofikia akabadanina jaboni.
23 Nimania hida Deua bihonariaꞌiki:
Bihonariaki ida kidisai Jesus Cristo-ra avakaijokavini.
Bihonariaki jaboni ida ariabono akanakaidivakhamavini Cristo haria honariavini vani fori hini.
24 Ijaꞌari Deus kahonari-ra naabajahakihi;
Deus kania akaramisihi.
Ijaꞌari kania akaramisiha jaboni ada Deus.
Akadiania Maꞌonahai Jahaki-ra karonavini mani ida kidiania aakaramisina-ra aogavini hija.