Kajoamorahi abono ada Cristo
2
Oigamina,
kodisai fori avihiki aꞌoni.
Onajiriki hida oathi bada avaniꞌajanaria kaimoni ida hojai asohiriki Deua bivajahariki.
Bada aniꞌahi ida hojai asohiriki,
Jesus Cristo vania vara biniꞌara ada kidiabiꞌi akadimoni hina haria akariakara kaimoni.
Akadikakodiahi abono ada.
Sohikaꞌoaki hida Jesus Cristo kabadani.
2 Cristo abono-ra vaꞌahaꞌiki abiniꞌina akadimoni hina,
oniani ida Deus akadihojai asohiriki-ra naꞌbiravini hija.
Cristo abono-ra vaꞌahaꞌiki abiniꞌina ijaꞌari hahavi vakadimoni hina,
oniani ida vakadihojai asohiriki Deua binaꞌbiravini hija jaboni.
3 Deus haria honariavini hiki-ra anaabahi;
aogajahakihi ida Deu-ra aogavini.
4 Deus kahonari-ra naabaravini kabaꞌi ida ijaꞌari,
Deu-ra ogavini-ra kahihi;
korijanahi abono hihi.
Ni-kaꞌoa hiki ida kidivaꞌibodivarani.
5 Ijaꞌari Deus athi-ra naabahi;
Deu-ra nakaidivavini aꞌbaꞌdini-ra nanokiahi,
hihavija kaimoni ida Deu-ra kavaꞌinofinofivini.
Nimania hida Deus kania aakaramisina-ra aogajahakivini.
6 Ijaꞌari Deus kania akaramisini-ra kahihi,
Jesus Cristo kahojai kaꞌoa kahojaiva bana.
Honari jaꞌdini fori hiki hida ariabono akanakaidivakhamavini
7 Kodivaꞌahi,
aꞌonira onakaidivaki ho.
Hihida honari jaꞌdini hirihi hida aꞌonira okajirihivini hiki.
Jesus varani hina-ra avakamithabiininivini vani avakapoariꞌia hida honari.
ꞌBoꞌda oamani hida honari avakamithaꞌiki.
8 Hojaꞌboꞌdani kabaꞌi ida honari,
jaꞌdini fori hiki hida honari aꞌonira okajirihivini hiꞌiki.
Cristoa binanokiaꞌiki ida honari ꞌboꞌda Deua binofiki-ra anaabavini niha ninikaꞌoani,
oniani ida honari jaꞌdinia ariabono akanakaidivakhamavini-ra onaonivini hija.
Aꞌonivani jaboni avananokiaki ida honari nihi ninikaꞌoani Deua binofiki-ra anaabavini.
Radahani kamaꞌdaꞌiki ida bakibakini,
vagani kaꞌoa nokiani kamaꞌdaꞌiki.
9 Igamini-ra nofipaꞌitxiravini oadani ida ijaꞌari,
vagania hojani-ra kahihi;
ni-vagania hojaki,
asia bakibakinia hojaki ida ijaꞌari.
10 Ijaꞌari igamini-ra nofijahakihi;
vagani kania hojahi.
Ni-hoariha kahojaia vaꞌini bikaboroboroki,
ni-hoariha-ra naadariki fori hiki.
11 Ijaꞌari igamini-ra nofipaꞌitxiriki,
bakibakinia hojaki.
Bakibakinia adahaki fori hiki ida.
Ibavinia okhani-ra ogaravini hiki bakibakinia bikanamaodorohaki fori hini.
12 Kodisai,
aꞌonira okajirihiki ho.
Cristo aꞌonira kajoamoraꞌavini mani ida avakadihojai asohiriki-ra naꞌbiraꞌia.
13 Aꞌonivani makhira,
gamo avihiki.
Avarigaki ada ovari hahavi kamaꞌdani viahania hojaꞌiki,
oniani ida aꞌonira okajirihivini hija.
Imakhinava,
imaꞌinavi avihiki,
aꞌonira okajirihivini hiki jaboni.
Deus danona avakadiania hojani mani ida Jahari-ra avakanaboꞌahavini hija.
14 Kodisai,
Deus avakadiabiꞌi-ra avarigavini mani ida aꞌonira okajirihivini hija.
Aꞌonivani makhira,
gamo avihiki,
avarigaki ada ovari hahavi kamaꞌdani viahania hojaꞌiki,
oniani ida aꞌonira okajirihivini hija.
Imakhinava,
imaꞌinavi avihiki,
aꞌonira okajirihivini hiki jaboni.
Avavaꞌahaki ida Deus athi avavaꞌini-ra nahonariahihivini.
Deus danona avakadiania hojani mani ida Jahari-ra avakanaboꞌahavini hija.
15 Hariꞌa vanofi ida hojai ijaꞌari Deu-ra vanofiriki vakadihojai hiki.
Hariꞌa vanofi ida nahina Jaharia bivakaꞌdaꞌdiki.
Nahina Jaharia bivakaꞌdaꞌdiki-ra avanofihi;
ni-avanofiki ada Deus akadiabiꞌi.
16 Ni-Deua binakamaꞌdarihi ida nahina Jaharia bivakaꞌdaꞌdiki.
Ijaꞌari kidimahi ꞌboꞌda-ra vahojakia bikavaꞌinofinofiki ida hojai asohiriki.
Bivahojavini binofivini arafiaki jaboni ida nahina binokiki.
Abononi vaboraborahavini hiki jaboni ida kidibadani,
kidinahina hiki.
Jahari vania binakamaꞌdaja ida nahina hahavi Deua bivajahariki.
17 Ihimini kamaꞌdaki ida hahavi Deu-ra vanofirikia vavajahaki.
Ihimini kamaꞌdaki jaboni ida hahavi ijaꞌaria vavahojavini vanofiki.
Ni-ihimiki bana ida Deus athi-ra vanaabaki vakadimahi.
Vaꞌoaniaroa vavahojaꞌiki ida vakadimahi jaꞌdini anokhomiriki Deus kania.
Makhira Cristo-ra napohimajavini-ra nofiki varani hina hida
18 Kodisai,
aꞌonira onavaꞌisohiki ho.
Amaakariki bana ida mahi anokhomini.
Vahoariha aꞌonira vanavaꞌisohijoravini hiꞌiki ada ovari Cristo-ra napohimajavini-ra nofiki khana bana.
Vikhaꞌiki adani ijaꞌari Cristo-ra vakaimajahapaꞌitxiriki vaipohiki,
oniani ida mahi anokhomini amaakarini-ra aogavini hija.
19 Hivaꞌoani ijaꞌari,
akadijoroni kania vajoronijabanaꞌiki,
ni-vakadivaꞌibodivarani akadivaꞌibodivarani fori hiki,
oniani ida haria vakavaꞌipahinivini hiꞌia.
Aripohina avajahamisikaꞌoaki vihira vaha;
akadiania vahojaronimaniha vaha.
Aripohina vihirina vaꞌora aogajahakivini hiki haria vanahojahaꞌavini.
20 Hari.
Oniaroa,
Cristo vania bikaronaꞌara ada Maꞌonahai Jahaki aꞌonira aviꞌonanira kaimoni,
oniani ida aꞌonivani afohahavi nahina kaꞌoa hini-ra avarigavini hija.
21 Deus kaꞌoa hina-ra avarigavini mani ida aꞌonira okajirihivini hija.
Avarigaki ada Jesus Cristo kaꞌoa hina.
Avarigaki jaboni ida korijanahi kavaranihi Deus kaꞌoa kania kharini.
22 Hari.
Aꞌonira onavaꞌisohivini hiki ada korijanahi abono hana hina.
Ijaꞌari aihotahi abono hirina bikahiki ada Jesus,
oniani ida ijaꞌari-ra korijanahi abono nihaja.
Cristo-ra kaimajahapaꞌitxiriki ida ijaꞌari.
Bikajariꞌdaki ada Deus Jesus kaabiꞌi hina.
Bikajariꞌdaki jaboni ada Jesus Deus kaisai hina.
23 Ijaꞌaria bikajariꞌdaki ada Deus kaisai,
bikajariꞌdaki jaboni ada Jesus kaabiꞌi.
Ijaꞌaria bikapoariha ada Deus kaisai,
bikapoariha jaboni ada kidiabiꞌi.
24 Vanaibavijahahaꞌoadaha bana ida Cristo monina avakamithabiininiꞌiki avavaꞌini bodinia.
Cristo monina hojahahaꞌoadahahi avavaꞌini bodinia;
Jesus,
kidiabiꞌi khama vakadiania avarakaramisihi afohaꞌoadaha.
25 Cristo vania bivavaꞌisohihijoraja ida mahi jaꞌdini anokhomiriki haria noꞌavini hiꞌiki Deus kania.
26 Hari.
Aꞌonira okajirihivini hiki,
avarigaja kaimoni ida ijaꞌari aꞌonira vakorijanahavini-ra vanofiki kavaranihi.
27 Cristoa bikaronaꞌiki ada Maꞌonahai Jahaki aꞌonira aviꞌonanira kaimoni.
Maꞌonahai Jahaki ibavina oadani avavaꞌini bodinia,
ni-avakainamoki ada aꞌonira kaꞌojomoꞌiki kaimoni.
Maꞌonahai Jahaki aꞌonira kaꞌojomoꞌivini hiki ida hahavi.
Kaꞌoa hiki ida athi,
ni-korijanahia kavaraniriha ada.
Oniaroa,
vanaabaꞌa bana ida Maꞌonahai Jahaki aꞌonira kaꞌojomoꞌivini hiꞌiki mahija Cristo kania avarakaramisivini afohaꞌoadaha.
28 Hai oamani,
kodisai,
Cristo kania avaakaramisihaꞌoadaha bana mahija nokiana kamahini avavaꞌini khaii nini avaofinirini.
Avakhanini vani Cristo joina kamahini ni-avaabononi avaranahojaki avaipahihirini.
29 Avarigaki ida Cristo jahakaꞌoana.
Jahaki ida avarigavini ijaꞌari hojai sohikaꞌoakia kahojaiki Deus kaisai hini.