JUDAS
Juda bikaronaki ida athi kapapirani
Juda bikaronaꞌiki ida athi kapapirani
1
Hovani Judas ooniki ho.
Jesus Cristo kahonai abono ho.
Tiago kakajoꞌo ho jaboni.
Onajiriki hida oathi kapapirani avakadimoni.
Deus aꞌonira nagathogathoꞌiki aꞌoni kidijaꞌari avihija kaimoni.
Deus akadiabiꞌi aꞌonira nofijahakiki aꞌoni.
Jesus Cristo aꞌonira akadavaꞌaki aꞌoni.
2 Onofiki ida Deus aꞌonira vaꞌadihaꞌoadahavini.
Aꞌonira noꞌahaꞌoadahavini vaꞌi jahajahania.
Arigamina,
Deus aꞌonira nofijahakiki aꞌoni.
3-4 Arigamina,
aꞌonira onakaidivaki ho.
Onofiꞌoamanija ida Deus haria akavaꞌijoavini kavaranihia aꞌonira okajirihivini,
ni-niki-ra onajiriki kaho avakadimoni.
Kodivarani vihiki adani makhira Cristo kaijaꞌari vihiꞌbadaraki.
Deu-ra vakajoniki adani.
Vanahoarihaki ida Deus haria kajoamoravini kavaranihi.
Okaronaki hida oathi kapapirani avakadimoni.
Aꞌonira onavaꞌisohivini avanadabaja kaimoni ida Deus athi-ra vanahoarihavini.
Deua bivavaꞌisohihiꞌboꞌdaꞌiki ida hojai binofiki kidijaꞌari vakahojaina,
Deu-ra vavakaijokavini niha ninini.
Arajomaki ida hoaranija navaꞌisohivahani.
Ni-Deua binahoarihaki ida athi.
Hari.
Avahararania vahojaki adani makhira Cristo kaijaꞌari vihina-ra vakahiꞌbadaraki.
Ni-avakavaꞌibodiki ida avakadiania vahojana.
Vanahoarihaꞌiki ida Deus ijaꞌari-ra kajoamoravini kavaranihi,
vakavaꞌipahiniria kaimoni ida vakadihojai kaipahivahaki.
Ni-vakavaꞌipahinivini vanofiki,
oniani ida vakadihojai makhanirini-ra vakahivini hija.
Vakajoniki jaboni ada akadikaꞌdaꞌdi Jesus Cristo.
Akadiꞌojomoꞌihi abono ada.
ꞌBoꞌdakari Deus athi kapapirania bivavaꞌisohihijoraki hida varani vihina:
Deus vaꞌora karonaki bana adani nikia vakahojaiki Ibavi Jaharikaꞌoakia avikhana.
Deus kaijaꞌari vihina-ra vakahiꞌbadaraki varani vihina hida
5 Avarigavini kabaꞌi hida Israel kaijaꞌari varani vihina,
onofiki ida aꞌonira onavaꞌihokivini.
Deus vaꞌora akavaꞌijoaꞌiki adani kidijaꞌari,
Egito kaarabonia vaꞌora aniꞌavini.
Vaꞌora akavaꞌijoavini kabaꞌi,
Israel kaijaꞌari vaipohiki ni-Deu-ra vavakaijokaꞌiki,
oniani ida Deus vaꞌora nihimavini hija.
6 Hari.
Vakavaꞌihoki bana jaboni ida nahina namithaꞌiki Deus ibavi kaijaꞌarini vaipohiriki vakadiania ꞌboꞌdakari.
Deus athi-ra vanaabariki adani.
Ni-vanofiki ida Deus vaꞌora vakaꞌdaꞌdivini.
Deus ibavi-ra avakakaraꞌoꞌiki adani.
Deus vaꞌora nahokahiꞌaha hodi bihiani arafiaki aꞌdaimaki ibavi bakibakiki kania.
Vidabohahaꞌoadahaki adani correntea.
Ni-vikhaonanina-ra vakaabokajanariha adani.
Deus ijaꞌari hahavi-ra nasohivini kamahini Deus vaꞌora karonaki bana adani ibavi kaijaꞌarini athi naabani vihiriki Ibavi Jaharikaꞌoaki kania avikhana,
vagathanija kaimoni ida vakadihojai asohiriki abosini.
7 Hari.
Vaꞌora vakavaꞌihoki bana jaboni adani Sodoma sidaji kaijaꞌarini,
Gomorra sidaji kaijaꞌarini vihiki varani vihina.
Sidaji hoariha kaijaꞌarini jaboni Sodoma sidaji kaꞌdihararikhamaki.
Mahi ꞌboꞌdakari badani jahariki arafiaki kaipahivahakia vakabadanibakhiaki adani.
Vakadihojai ida hiꞌadani Deus ibavi kaijaꞌarini vajahariki vakadihojai fori hiki.
Vakadihojai asohiriki hoariha ida makhira vakadigamo vihiriki-ra vakaviꞌomakhamavini.
Makhira hoariha vakaviꞌomakhamavini jaboni.
Deus vaꞌora napohimajaꞌiki adani ijaꞌari nikia vakahojaiki.
Ni-vakaabokaki ida avaihotaꞌina.
Ibavi Jaharikaꞌoaki kania Deus vaꞌora karonaꞌiki adani.
Deus ijaꞌari-ra nanamithavini hiki ida vapohimajana niha vakhanikhanina,
akabanaforia kaimoni ida vakadihojai jahariki arafiaki kaipahivahaki,
agathaniria kaimoni ida vakadihojai abosini jaboni siho kahaꞌdini kaihimiriki kania.
8 Hiꞌadani makhira Cristo kaijaꞌari vihiꞌbadaraki vakadivadami fori hikia vanokiki ida hojai asohiriki kaipahivahaki,
oniani ida bada vaniꞌabakhiavini hija.
Makhira nikia kabadaniki ovani oa abono-ra najahariki.
Vakajoniki ida Deus vaꞌora vakaꞌdaꞌdivini,
ni-vanaabaꞌiki ida athi.
Varani jaharikia vaꞌora vakanavaranihaki adani Deus ibavi kaijaꞌarini.
9 Ni-nikia kavaraniki ada Deus ibavi kaijaꞌarini vakadikaꞌdaꞌdi,
Miguel oniki.
Danoki ada.
ꞌBoꞌdakari Miguel Jahari khama vaabono avakanaathidanoararikhamavini hiki ida Moisés abaꞌona,
hana hina bivahojavini.
Danona kabaꞌi ada Miguel,
ni-varani jaharikia vara biniꞌaki ada Jahari.
Miguel kavarani kaꞌoa niki:
—Jahari,
asohiriki ida kadabadani,
Deus ira kaabaniki bana i!
10 Hiꞌadani makhira Cristo kaijaꞌari vihiꞌbadaraki,
varani jaharikia vakanavaranihaki ida nahina hahavi avigariki.
Igitha vaꞌini bodini vara nirini,
ni-nahina-ra ogaki.
Onivani fori vihira adani hiꞌadani makhira,
oniani ida vakadihojai jahariki vaꞌora nihimavini hija.
11 Jahariki bana ida vakadimoni.
Deus vaꞌora napohimajaki bana adani.
Caim kohana kahojai fori hiki ida hiꞌadani makhira vakadihojai asohirini.
Nahina jahariki bikavaꞌibodivaraniki,
bada biniꞌaki.
ꞌBoꞌdakari hojaꞌiki jaboni ada Balaão kohana.
Balaãoa bikavaꞌibodivaranihaꞌoadahaki ida jiniro.
Jiniro-ra nofikarahovini mani ida badani Deua bivajaharikia kanabadanina hija.
Balaão kahojai fori hiki ida jaboni hiꞌadani makhira vakadihojai.
ꞌBoꞌdakari hojaꞌiki jaboni ada Coré oniki kohana.
Coréa bikajoniꞌiki ada Moisés kidikaꞌdaꞌdi hina,
oniani ida Deua binihimavini hiꞌia.
Nimania jaboni bana ida namithaki hiꞌadani makhira Cristo kaijaꞌari vihiꞌbadaraki vakadiania.
12 Hari.
Aꞌonivani Jesus kaijaꞌari,
avajoronini kamahini,
aviꞌbaijabanaki aꞌoni,
avakadiania vajoroniki jaboni hiꞌadani makhira.
Jaharini arafiaki ida vakadihojai.
Ni-vavaꞌi anaipahihini hiki ida vakadihojai jahariki.
Vakoꞌbainofiki adani.
Vaakavinofiki adani jaboni.
Vaꞌoaniani kaꞌoa vaabono vakavaꞌibodivaraniki adani.
Ni-nahina jahaki kaimoni hiki ida vakadimahi.
Bahi pororoki kharaririki sirisirikia bivaadahaki ijaꞌari-ra navaꞌiponiꞌimarinivini.
Onivani fori hija ida hiꞌadani makhira vakadihojai.
Ihiꞌai avani bononi kamasikoni abonoriki ijaꞌari-ra navaꞌiponiꞌimarinivini vani fori vihira adani jaboni.
Ava rasohamananiki araꞌokhokaꞌoaꞌiki fori vihiki adani jaboni.
13 Komini kanaꞌbahaki fori vihiki adani,
karadahahi ida komini,
saboro oavani hida aaniꞌihi.
Onivani fori hija ida vakadihojai jaboni.
Hanaja varadahaha,
vakadihojai asohiriki kaipahivahaki kaꞌoa hojaroniki.
Hari.
Adahaki ada boviri ipohiriki nama,
ni-hana okhana ogavahaki.
Onivani fori vihira adani jaboni hiꞌadani makhira.
Ni-nahina jahaki kaimoni hiki ida hiꞌadani makhira vakadihojai.
Deus vaꞌora kaibavijahahivini hiki ida ibavi bakibakikaꞌoaki vakadimoni hini.
Ni-vikhaonanina-ra vakaabokajanaki ibavi bakibakini arafiakia.
14 ꞌBoꞌdakari hojaꞌiki ada Enoque oniki kohana.
Adão kahanodi hanodina hanodiꞌianana namitharonisiagaki ada Enoque.
ꞌBoꞌdakari Enoque kohana vara vaꞌora vaniꞌajoraꞌiki adani ijaꞌari Deu-ra vanofiꞌbadaraki,
niha:
“Ijaꞌari vakadiania khaki bana ada kaꞌdaꞌdi kaꞌoa.
Deus ibavi kaijaꞌarini vâipohina varajomana
ogavaharikia vavaipohihaki bana ada.
15 Ijaꞌari Deu-ra vakajoniki
hahavi-ra naabosiki bana ada.
Deus vaꞌora navaꞌisohivini hiki bana ida vakadihojai asohiriki afohahavi.
Jahariki ida Deu-ra
vakajariꞌdavini,
vavakaijokaravini.
Deu-ra vakanavaranihavini varani jaharikia jaboni.
Hari.
Jaharikia vaꞌora arakhaki bana adani,
vakadihojai asohiriki
afohahavi abosinia.”
Nihaki ada Enoque kohana afojora.
16 Hiꞌadani makhira Cristo kaijaꞌari vihiꞌbadaraki vahoariha-ra vakanavaranihavini vaamorimorihaꞌoadahaki adani.
Vahoariha-ra vaꞌora avanaathidanoararibakhiavini.
Ni-vakavaꞌibodivaraniki ida vakadihojai asohiriki kaipahivahaki vakavaꞌinofinofiki.
Vaabono vavaboraborahabakhiaki adani.
Vanofiki ida vahoariha vaꞌora khai vaniꞌavini,
vagathanija kaimoni ida vahoariha vakadijiniro.
Judas vaꞌora navaꞌisohiki adani Jesus Cristo kaijaꞌari
17 Arigamina,
aꞌonira onakaidivaki ho.
Vakavaꞌihoki bana ida Jesus Cristo athi avavaadahaoniva abono haria vanavaꞌisohijoravini hiꞌiki.
18 Niki ida vakadivarani:
“Amaakariki bana hida mahi nahina hahavi Deua biananokhomivini kamahini.
Oniaroa,
avakadiania avikhaki bana adani makhira Cristo kaijaꞌari vihina-ra vakahiꞌbadaraki.
Deu-ra vakajariꞌdaki adani,
oniani ida aꞌonira avigarahavini hija bana.
Nahina jahariki-ra vakavaꞌibodivaraniha;
bada vaniꞌahi.
Vakavaꞌinofinofiki ida
vakadihojai asohiriki
kaipahivahaki.”
Nimania ida Jesus Cristo athi avavaadahaoniva abono haria vanavaꞌisohivini hiꞌiki.
19 Hiꞌadani makhira vavajahaki ida ijaꞌari-ra vakanapitakhamavini vaabono avakanaathidanoararikhamara kaimoni.
Nahina jahariki-ra vakavaꞌibodivaraniha;
bada vaniꞌahi.
Ni-Maꞌonahai Jahaki vaꞌora navaꞌihonariahihiriha adani.
20 Arigamina,
aꞌonira onakaidivaki ho.
Avanaꞌbaꞌdi bana ida Deus kahojai asohiki avavaꞌini bodinia.
Vanadano bana ida Deu-ra avavakaijokavini jaboni bana.
Jahakaꞌoaki ida Deu-ra avakaijokahaꞌoadahavini.
Maꞌonahai Jahaki aꞌonira navaꞌihonariahihihaꞌoadahavini vani Deu-ra vakanikhariahaꞌoadaha bana.
21 Deus aꞌonira nofijahakiki aꞌoni,
oniani ida kidiania avarajahamisini-ra najahaja.
Vanaviahanokhahahaꞌoadahaꞌa bana ida akadikaꞌdaꞌdi Jesus Cristo joina.
Haria nakaidivavini mani ida akadimahi anokhomiriki Deus kania haria noꞌavini hija bana.
22 Avahararania vahojaki adani arigamina Deus kahojai-ra avigajahakiriki.
Vavaꞌi kosakhamani hiki ida.
Vaꞌora vanakaidiva bana adani hiꞌadani arigamina.
Vaꞌora vakajoamora bana.
23 Siho kakhororoki kania vahojaki fori vihiki adani hiꞌadani arigamina.
Aꞌonivani jorakia vaꞌora vaaniꞌa bana.
Vaꞌora avakavaꞌijoa bana.
Vaꞌora vanakaidiva jaboni bana adani vahoariha Cristo kaijaꞌari vihiꞌbadaraki.
Vaꞌora avakajoamoravini kabaꞌi,
avaabononi avakavaꞌigairi bana jaboni.
Hariꞌa avavaꞌini akaborohava bana.
Makari ꞌboꞌda ꞌbaxani ijaꞌaria binahokahivini fori hiki ida vakadihojai jahariki vanofibakhiaki.
Onivani fori hija ida vakadihojai asohiriki.
Vakaimajahari bana ida vakadihojai.
Deu-ra khai aniꞌava
24 Khai aniꞌaki ada Deus,
haria kajoamoraki ada.
Danoki,
vagaki ada.
Deua bikaabokaki ida haria nadadavini,
ariadariki fori arihiria kaimoni Jahari kakaborohirohi kania.
Deua bikaabokaki jaboni ida haria bananivini akaikahina kidiania,
ajahakaꞌoana,
khai akhanina arafiani arihojana viaha haria gathanira kaimoni.
Oniaroa,
anokiki bana ida Deus jahana,
vagana arafiaki.
25 Khai aniꞌaki ada Deus haria kajoamoraki.
Ni-hojaki ada hoariha ovari fori hiki.
Jahaki ida vahoariha vaviaha Deu-ra khai aniꞌavini.
Bikaronaꞌiki ada akadikaꞌdaꞌdi Jesus Cristo,
haria akavaꞌijoaꞌiki ada.
Jahaki,
vagaki,
danona arafiaki ada Deus.
Bikaabokaki ida nahina hahavi binofiki.
Hahavi-ra vakaꞌdaꞌdiki ada.
Hari.
Nimania ida kidihojai mahi kamaꞌdani kari,
mahi anokhomiꞌini kabaꞌi,
asia nimania ida kidihojai bana.
Mahi anokhomiꞌini naothinia asia niki ida kidihojai bana.
Hari ida vani oamani Judas athi anokhomiꞌini.