Hari.

Oniaroa,

Cristoa bikaronaꞌaha ada Deus ibavi kaijaꞌarini hora navaꞌisohijorara kaimoni.

Oniaroa,

onajiriꞌihi ida hahavi Jesus Cristo hora nanokiahijoravini hiꞌiki.

Aꞌonira onanamithavini hiki ida namithaꞌiariki,

avarigaja kaimoni ida Deus varani hina.

Kaꞌoa hida varani.

3 Deus vaꞌora kajoamoraki adani ijaꞌari hihida papira athini-ra vara vavaniꞌaki vahoariha vakamithaja kaimoni.

Deus vaꞌora kajoamoraki adani ijaꞌari hihida papira athini Deua bivavaꞌisohihijoraki-ra vakamithaki,

vanaabaki vihiki jaboni.

Kamahini ipohijanarihi hida namithaki kaimoni.

4 Hovani João onajirija hida papira.

Okaronaki hida athi papira Jesus Cristo kaijaꞌari Ásia kaarabonia vahojaki vakadimoni.

7 hiki ida sidaji Jesus Cristo kaijaꞌaria vavajoronibakhiaki Ásia kaarabonia,

avakadimoni hida moni.

Anofiki mahi hahavi aꞌonira kajoamoravini ada Deus.

Aꞌonira noꞌahaꞌoadahavini vaꞌi jahajahania.

Nahina hojarini kari hojaki ada Deus ovari miroꞌa.

Asia hojaki ada Deus,

ni-hoarihapaꞌitxiki ida hojana.

Khaki bana ada.

Onofiki mahi hahavi aꞌonira kajoamoravini ada Maꞌonahai Jahaki aꞌonira noꞌahaꞌoadahavini vaꞌi jahajahania.

Deus kavithi ibavini viahania hojaki ada Maꞌonahai Jahaki.

7 hiki ipohini ida Maꞌonahai Jahaki kahojai danoki.

5 Onofiki mahi hahavi aꞌonira kajoamoravini ada Jesus Cristo.

Aꞌonira noꞌahaꞌoadahavini vaꞌi jahajahania.

Ovaria binanamithajahakiki ida nahina Deua binofiki.

Kaꞌoa hiki ida Deus monina Cristoa vara bivaniꞌaꞌiki.

Ovari abiniꞌaha ovari miroꞌa ahokiꞌaha.

Jesus Cristo vaꞌora vakaꞌdaꞌdiki adani arabo hahavi vakaꞌdaꞌdiva.

Haria nakaidivaꞌoamanira ada.

Ava akasanakhamakia abiniꞌina vani ahovariꞌia ida amana akadimoni,

binaꞌbiraja kaimoni ida akadihojai asohiriki,

haria gathiki fori hijanaria kaimoni.

6 Sasidotxi haria nihaꞌiki ada Jesus Cristo,

ijaꞌari-ra vaꞌora avakaꞌdaꞌdija kaimoni kidiania.

Sasidotxi kabadani hiki ida Deu-ra kanikhariavini hoariha-ra kajoamorara kaimoni.

Akhanina vani,

Deus kabadani abono arihija,

bada aniꞌaja kaimoni afohaꞌoadaha ida Deua binofiki.

Jesus kaabiꞌi ada Deus,

oniani ida Jesus Cristo-ra aniꞌavini hija:

—Ivani ijahaꞌoamanija,

ivagaki i,

idanoki i.

Nimania ida anofiki.

7 Vada vaniꞌa o Jesus,

bahi vaforiki hararana joirarina.

Ijaꞌari hahavia vanokiki bana ada.

Hivaꞌoani Jesu-ra avakaꞌitapoamisahanaꞌiki ava akasanakhamakia jaboni vanokiki ada ovari.

Vabarariariaki adani arabo hahavi kaijaꞌarini.

Kaꞌoa oamani bana hida.

Nimania ida Deua binofiki.

8 Jesus Cristoa biniꞌaha:

—Hovani kaꞌdaꞌdi kaꞌoa ho.

Okaabokaki ida hahavi onofiki.

Kanahinaꞌiarini kari ohojahahaꞌoadahaki ho.

Hahavi ihimini naothinia asia ohojaki bana ho,

ni-ihimiki ida kodimahi.

Hovani onakamaꞌdaꞌiki ida hahavi hojaki.

Hovani oananokhomiki ida jaboni.

Nahina hojarini kari ohojahahaꞌoadahaki ho homiroꞌa.

Asia ohojaki ho.

Ni-hoarihapaꞌitxiki ida ohojana.

Ojoiki bana ho ijaꞌari vakadiania.

9 Hovani avaigamini João ho.

Aakaramisiki hari Jesus kania.

Aꞌonira vanajahariharivini fori ohiki ho jaboni.

Jesus haria vakaꞌdaꞌdivini mani ida haria vanajahariharivini hija.

Haria vanajahariharivini kabaꞌi,

ni-Cristo haria akavaꞌijoavini-ra akavaꞌipahiniki.

Deus athi-ra onamonibakhiaꞌiki ho,

vara ovaniꞌabakhiaꞌiki jaboni ida varani kaꞌoa hini Jesus haria navaꞌisohivini hiꞌiki,

oniani ida hora vagathivini hija,

hora avisavini hija kajoviri Patmos kaoniki kania.

10 Hari.

Domingo vani,

Maꞌonahai Jahaki ovaꞌi-ra nahonariahihiꞌihi.

Omathaja okamithaꞌiki ida athii ꞌbaraki trombeta ithoni fori hiki.

11 Athii ꞌbarakia hora niꞌaha:

—Inajiri bana hida ira onanokiahivini hiki papira.

Inajirivini naothinia,

ikarona bana hida papira Jesus Cristo kaijaꞌari Ásia kaarabonia vahojaki vakadiania vakamithaja kaimoni.

7 hiki ida sidaji onini Éfeso,

Esmirna,

Pérgamo,

Tiatira,

Sardes,

Filadélfia,

Laodicéia hiki.

12 Oroiribaniꞌihi,

onokija kaimoni ida hana hina hora navaravaraki.

Oniania,

onokiꞌihi ida 7 hiki lamparina fori hiki kaathiraki,

ouroa amonahaki ida.

13 Lamparina kaathiraki kahararakhamania hojaki ada makhira nokiana fori hiki.

Oadaki ida makari bikaimahaki.

Bikaimahaki ida ouro kacinturãohi makhoꞌinia.

14 Kavaforiki ida kaꞌdaꞌdi kaafani,

ovilia saavini vaforini fori hiki,

pati bihi vaforini fori hiki jaboni ida.

Vagaki ida nokho ꞌbaꞌdani,

siho kahaꞌdini fori hiki ida.

15 Kavagaki ida ꞌdama,

bronze giniginiꞌiki vagani nokiani fori kihiki ida.

ꞌBaraki ida athi,

paha karaho gororofoniki ithoni fori hiki ida athii ꞌbarani.

Nimania ida okamithaꞌiki.

16 Bigathiki 7 boviri ipohina saꞌa aniaja.

Bodia khaonanihi ida kidisaꞌai tarasara fori hiki.

Akasajohaninikhamaki ida kidisaꞌai.

Vagaki jaboni ida nokho,

safini sohirarina vagana fori hiki ida.

17 Hari.

Oniaroa,

onokivini vani oimahidakarahoꞌihi.

Viaha oadariꞌihi,

oꞌbisoniꞌihi,

abiniki fori ohiꞌihi.

Ovari hora kadasaꞌaha saꞌa aniaja,

hora niꞌaha:

—Hariꞌa imahida!

Hovani ookhananavaki ho.

Hovani okasiagaki ho.

18 Ohokihahaꞌoadahaꞌoamanija.

Mitha iniꞌa!

Oabiniꞌiki ho,

oahokiꞌiki ho.

Ohokihahaꞌoadahaki ho.

Ohonariafiahaki ida ijaꞌari abinini kamahini,

vaꞌora ohonariafiahaki jaboni adani ijaꞌari kohana vaibavia vahojaki.

19 Ivani João,

inajiri bana ida inokiki.

Ira onanokiahivini hiki ida nahina namithaki,

nahina namithaki kaimoni hiki — hora niꞌaha.

20 Asia vara hora niꞌaki ada:

—Osaꞌa aniaja inokiꞌiki hada 7 boviri.

Inokiꞌiki jaboni hida 7 lamparina fori hiki kaathiraki,

ouroa amonahaki ida.

Ni-ijaꞌaria avigaki kaho ada 7 boviri,

7 lamparina fori hiki kaathiraki nahina hini.

Ira onanamithaki bana ho nahina hinia.

7 boviri fori vihiki adani Jesus Cristo kaijaꞌari-ra vaꞌora vakaꞌdaꞌdiki Ásia kaarabonia vahojaki.

7 lamparina kaathiraki fori hiki ida 7 sidaji Jesus Cristo kaijaꞌaria vavajoronibakhiaꞌiki — hora niꞌaha.