Jesus Cristo kaijaꞌari Éfeso sidajia vahojaki vakadimoni ida papira athini
2
Jesus Cristo kaijaꞌari Éfeso sidajia vahojaki vakadimoni hida papira athini.
Jesus hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus vaꞌora niꞌaha:
—Hovani ogathira ada 7 boviri ipohina osaꞌa aniaja.
7 lamparina fori hiki kaathiraki ouro amonahaki kahararakhamania oadahaki ho.
2 Aꞌonira oogaꞌoamanija,
jahaki ida avakadibadani,
karahoki ida.
Nahina jahariki namithani kabaꞌi avakadiania,
ni-hora avakavaꞌipahiniꞌiki.
Ni-vaꞌora avavaꞌahaki adani ijaꞌari hojai jaharikia vakahojaibakhiaki avakadiania vahojana.
Deus athi avikhava abono vihina-ra vakahiꞌbadaraki adani.
Aꞌonivani avakaijoꞌaki ida vakadivarani,
oniani ida korijanahi abono vihina vaꞌora avarigavini hija.
3 Kodijaꞌari avihini mani ida vahoariha aꞌonira vanajahariharivini hija,
kabaꞌi ni-hora avakavaꞌipahiniꞌiki,
hora avavakaijokabakhiaꞌiki aꞌoni.
4 Jahani kabaꞌi ida avakadihojai vara ovaniꞌaꞌiki,
ni-ovajahaki ida avakadihojai hoariha.
Oogaki ida hora avanofijahakijanaravini.
Kodiania avaabononi gahinai avanihavini vani hora avanofironijahakija.
Ni-hora avanofibiininivini fori avihijanaki.
5 Vakavaꞌihoki bana ida mahi ꞌboꞌdakari hora avanofijahakiꞌavini.
Oniaro kari kodiania avarajahamisijahakiki aꞌoni.
Avaabononi vakaꞌdaꞌdigaria bana!
Vakavaꞌipahinikaꞌoa bana ida avakadihojai asohiriki mahija kodiania avarajahamisiꞌianavini.
Hojai asohiriki-ra avakavaꞌipahinikaꞌoarihi;
avakadiania okhahi,
oanija kaimoni ida avakadilamparina fori hiki,
oniani ida kodijaꞌari aꞌonira nihajanarija.
6 Avakadihojai hoariha ovajahaki.
Avakaramonaki ida Nicolao kaijaꞌari vakadihojai.
Hovani jaboni okaramonaki ida.
7 Avamorobohahi;
mitha vaniꞌajahaki bana ida Maꞌonahai Jahaki kodijaꞌari-ra navaꞌisohivini hiki.
Jesus Cristo vaꞌora niꞌaha adani kidijaꞌari:
—Ijaꞌari Jahari athi-ra kajoniki,
ni-hora kavaꞌipahinipaꞌitxiki,
oniani ida Deus kania arakhani hija bana.
Oniani ida ihiꞌai jahaki Deus karakhajahi kania hojaki-ra havini ovaꞌahavini hija bana.
Ijaꞌari-ra nahokihahaꞌoadahaki hida ihiꞌai avani bononi — niha ada Jesus.
Jesus Cristo kaijaꞌari Esmirna sidajia vahojaki vakadimoni ida papira athini
8 Jesus Cristo kaijaꞌari Esmirna sidajia vahojaki vakadimoni hida papira athini.
Jesus Cristo hora honariavini vaꞌora vakaꞌdaꞌdiki okajirihivini vaꞌora navaꞌisohira kaimoni hihida athia.
Jesus vaꞌora niꞌaha:
—Hovani okhananavaki ho.
Hovani okasiagaki ho.
Oabiniꞌina naothinia oahokiꞌiki ho.
9 Oogaki ida vahoariha aꞌonira vanajahariharivini.
Oogaki jaboni ida avakanahinaꞌahapikirini.
Hovani aꞌonira onavaꞌisohivini hiki ipohiki ida Deus kanahina avavahojaki.
Oogaki ida jaboni ijaꞌari avakadiania vahojaki aꞌonira vakanavaranihavini varani jaharikia.
Vaabono vaniꞌaꞌbadaravini judeus kaijaꞌari vihina.
Judeus kaijaꞌari vihiriha adani.
Hora vanofiravini mani ida Jahari kaijaꞌaria vaꞌora onaonivini hija.
10 Hariꞌa vifini bana ida avaimani ꞌbanani.
Jahari vaꞌora honariaki bana adani vahoariha aꞌonira vanajahariharivini,
cadeia aꞌonira avibaivini,
aꞌonira vakaijoꞌara kaimoni.
Mahi saꞌai koꞌbamihani hiki avahojaki bana aꞌoni cadeia.
Ni-avarahihaviki cadeia avariꞌoini.
Aꞌonira vanaabinivini kabaꞌi,
hariꞌa oipohina avihini-ra vakavaꞌipahini bana!
Deus aꞌonira akadavaꞌaki bana aꞌoni.
Deus ibavia avarikhaki bana aꞌoni.
Aꞌonira onoꞌaki bana ho kajamari kajahakia.
Mahi anokhomiriki-ra kananamithaki hida kajamari avagahinani kihiki bana.
11 Avamorobohahi;
mitha vaniꞌajahaki ida Maꞌonahai Jahaki kodijaꞌari-ra vaꞌora navaꞌisohivini hiki.
Ijaꞌari Jahari athi-ra kajoniki,
ni-hora kavaꞌipahinipaꞌitxiki,
Deus kania kidimahi anokhomiriki-ra vahojahi.
Ni-abinijanaki ida ijaꞌari.
Jesus Cristo kaijaꞌari Pérgamo sidajia vahojaki vakadimoni ida papira athini
12 Jesus Cristo kaijaꞌari Pérgamo sidaji vahojaki vakadimoni hida papira athini.
Jesus Cristo hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus vaꞌora niꞌaha:
—Ovahojaki hida kodisaꞌai tarasara fori hiki akasajohaninikhamaki.
13 Oogaki ida avaibavini.
Avavahojaki kasidajinia hojaki ida Jahari kavithi ibavini vaꞌora vakaꞌdaꞌdiki kaimoni adani ijaꞌari.
Hora avavakaijokahaꞌoadahaki aꞌoni.
Ni-hora avakavaꞌipahiniki.
Avakadiania hojaꞌiki ada Antipas kohana oniki.
Kodipohi ada.
Omonina aꞌonira kanamonibakhiaꞌiki ada.
Hora kavaꞌipahiniravini mani ida vanaabinivini hiꞌia.
Jahari ibavi ida Antipas bivaabiniꞌiki kasidajini.
Abinina avanokivini kabaꞌi,
ni-hora avakavaꞌipahiniꞌiki.
14 Jahani kabaꞌi ida avakadihojai vara ovaniꞌaꞌiki,
ni-ovajahaki ida avakadihojai hoariha.
Avahararania vahojaki adani ijaꞌari vaipohiriki Balaão kohana kaꞌojomoꞌihi athini-ra vanaabaki.
Balaãoa binavaꞌisohiꞌboꞌdaha ada Balaque kohana hojai Deua bivajaharikia kahojaina.
Balaque korijanahia vaꞌora vara niꞌaꞌbadaraki adani Israel kaijaꞌari:
“Ni-makhaniki ida ꞌbai deus amovana kanavaꞌigani hini naothinia havahani.
Ni-makhaniki ida makhira kidigamo hiriki khama vaabono vakaviꞌomakhamavini.”
Nimania ida Balaque,
Balaão khama vakadiꞌojomoꞌihi kavaranihi asohiriki.
15 Avakadiania vahojaki jaboni adani Nicolao vaipohina.
Aꞌonira vakaꞌojomoꞌivini hiki vakadihojai jaharikia avakahojaija kaimoni jaboni.
16 Avaabononi vakaꞌdaꞌdigaria bana!
Vakavaꞌipahinikaꞌoa bana ida avakadihojai jahariki.
Avakavaꞌipahinirihi;
jorakia avakadiania okhahi,
vaꞌora onihimara kaimoni adani ojomoꞌihi kavaranihi asohiriki-ra vanaabaki.
Kodisaꞌai hiki ida tarasara fori hiki obodia khaonaniki.
17 Avamorobohahi;
mitha vaniꞌajahaki ida Maꞌonahai Jahaki kodijaꞌari-ra vaꞌora navaꞌisohivini hiki!
Hari.
Asia Jesus Cristo vaꞌora niꞌaha adani kidijaꞌari:
—Ijaꞌari Jahari athi-ra vakajoniki,
ni-hora vakavaꞌipahinipaꞌitxiki vagahinaki bana maná ahojakia.
Deus ibavi nama koꞌbaini ida maná vaꞌora onoꞌavini hiki.
Vaꞌora onoꞌahananaki jaboni adani jaꞌdi jahaki vaforikia.
Jaꞌdi namania hojaki ida onii jaꞌdini jiriki.
Ijaꞌari hana hinia bigathanihi ida jaꞌdi vaforiki,
biogahi ida onii jaꞌdini hini afohanana.
Vahoariha ni-avigaki ida onii jiriki.
Jesus Cristo kaijaꞌari Tiatira sidajia vahojaki vakadimoni ida papira athini
18 Jesus Cristo kaijaꞌari Tiatira sidajia vahojaki vakadimoni hida papira athini.
Jesus hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus vaꞌora niꞌaha:
—Hovani Deus kaisai ho.
Siho kahaꞌdini kavagani fori hiki hida onokho ꞌbaꞌdani.
Kavagaki hida oꞌdama,
bronze giniginiꞌiki vagani nokiani fori kihiki hida.
19 Oogaki ida avakadibadani bada avaniꞌaꞌiki.
Oogaki jaboni ida avaabononi avakanakaidivakhamavini.
Oogaki jaboni ida hora avakavaꞌipahiniravini,
avaabononi avakakakodiakhamavini jaboni.
Oogaki jaboni ida avajahariharini kabaꞌi,
avaraihamahirini.
Oogaki jaboni ida avakadihojai jahaki aꞌbaꞌdiꞌini.
20 Jahani kabaꞌi ida avakadihojai vara ovaniꞌaꞌiki,
ni-ovajahaki ida avakadihojai hoariha.
Kidihojai jaharini kabaꞌi ida gamo Jezabel oniki,
avavaꞌahahi avakadiania hojani.
Deus athi namoniva abono hini-ra kahiꞌbadaraki ida.
Vaꞌora kaboroborobakhiaki adani kodijaꞌari kidiꞌojomoꞌihi athinia.
Vaꞌora kaꞌojomoꞌiki adani hojai asohirikia vakahojaira kaimoni.
Vaꞌora niꞌaꞌihi:
“Ni-makhaniki ida makhira kidigamo hiriki khama vaabono vakaviꞌomakhamavini.
Ni-makhaniki ida ꞌbai deus amovana kanavaꞌigana hini naothinia havahani.”
Nimania ida Jezabel athini asohiriki.
21 Mahi ipohikia onokhahahaꞌoadahaki ida Jezabel kidihojai asohiriki-ra kavaꞌipahinivini,
ni-binofiki ida makhira-ra odoraonivinia kahojaini-ra kavaꞌipahinivini.
22 Oniani bana ida gamo-ra onakavamonikarahovini hija.
Bikamithaki bana ida imani ꞌbanani karaho.
Hiꞌadani makhira-ra vaꞌora avidoraonikia vakamithaki jaboni bana ida vaimana ꞌbanani karaho oniaro kania.
Jorakia vakadihojai jaharini arafiaki-ra vakavaꞌipahinikaꞌoaha;
ni-vaꞌora onaimaꞌbanaki.
Vakavaꞌipahinirihi;
jorakia vaꞌora onaimaꞌbanakarahoha.
23 Vaꞌora onaabiniki bana adani Jezabel kaisai fori vihiki,
hiꞌadani kidiꞌojomoꞌihi athini naabani vihiki.
Oniania kodijaꞌari ibavi hahavia vajoronikia avigaki ida ijaꞌari hahavi kavaꞌibodivarani-ra ogavini.
Oogaki jaboni ida nahina vavaꞌi bodinia vavajahaki,
vanofiki hiki.
Aꞌonira onoꞌananaki ho avakadibadani abosinia.
Onaabosiki bana ida avakadihojai jahaki nahina jahakia.
Onaabosiki bana jaboni ida avakadihojai jahariki afohanana nahina jaharikia.
24 Avakadiania vahojaki adani kodijaꞌari vahoariha Tiatira sidajia,
vaꞌoaniaroa ni-vanaabaki ida gamo kaꞌojomoꞌihi athini.
Ni-avaabononi avakaꞌojomoꞌivini hiꞌiki ida varani vahoariha vanaonivini Jahari athi ahojakia.
Ni-nahina hoariha aꞌonira ohonariafiahaki ojoirina oadani.
25 Hora avakavaꞌipahiniravini vani hojai jahakia bana vakahojai!
26-28 Ijaꞌari Jahari athi-ra kajoniki,
ni-hora kavaꞌipahinipaꞌitxiki,
biakavaꞌidadadahaꞌoadahaki ida badani onofiki.
Oathi-ra naabavini mani ida odanona onoꞌavini hija bana bikaabokaja kaimoni ida ijaꞌari-ra vakaꞌdaꞌdivini.
Kodiabiꞌi hora honariavini ijaꞌari-ra ovakaꞌdaꞌdivini.
Onivani fori hija bana ida oathi-ra naabaki ohonariavini ijaꞌari vahoariha-ra vakaꞌdaꞌdivini jaboni.
Ohonariafiahaki bana ida ijaꞌari oathi-ra naabaki arabo hahavi kaijaꞌarini-ra vakaꞌdaꞌdivini.
Ni-vaꞌora vaꞌahaki adani arabo hahavi kaijaꞌarini kidihonari vakajonivini.
Makhira hoariha-ra najarajarahavini fori hiki ava khanakia.
Makhira bavi-ra naꞌboroꞌborovini vani fori hija jaboni ida kodijaꞌari Deu-ra vanofiriki-ra vaꞌora vakaꞌdaꞌdivini saꞌai kakhanamisikia.
Vaꞌora onoꞌaki bana adani oathi-ra vanaabaki boviri karaho jahaki vagavagani nokiakia.
29 Avamorobohahi;
mitha vaniꞌajahaki ida Maꞌonahai Jahaki kodijaꞌari-ra vaꞌora navaꞌisohivini hiki — vaꞌora niꞌaha ada Jesus.