Jesus Cristo kaijaꞌari Sardes sidajia vahojaki vakadimoni ida papira athini
3
Jesus Cristo kaijaꞌari Sardes sidajia vahojaki vakadimoni hida papira athini.
Jesus hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus vaꞌora niꞌaha:
—Kodiania hojaki ada Deus Maꞌonahana.
7 hiki ida Maꞌonahai Jahaki kahojai danoki.
Hovani ovahojaki ada 7 boviri ipohina.
Oogaki ida avakadihojai.
Jahaki avavanihaki ida avakadimahi.
Avahokini kabaꞌi aꞌonira onokivini abaꞌoki fori avihiki aꞌoni,
abiniki ida avamaꞌonahani.
2 Avavadiki fori avihiki aꞌoni.
Avanokhoni aforaꞌava bana.
Asia hojai jahaki ipohirikia avakahojaiki aꞌoni.
Vanaabajahaki bana ida oathi mahija avakadihojai jahaki ipohiriki-ra avaranaipohiꞌianavini.
Oathi-ra avanaabajahakirihi;
ihimikaꞌoahi ida avakadihojai jahaki ipohiriki avavahojaki.
Aꞌonira oogaki ho,
ni-arajomaki ida avakadihojai Deus viaha.
3 Vaꞌora vakavaꞌihoki bana adani aꞌonira vakaꞌojomoꞌibiininiki.
Vakavaꞌibodivarani bana ida vakadiꞌojomoꞌihi athini avakamithaꞌiki.
Vanaabajahaki bana ida vaathi.
Vakavaꞌipahinikaꞌoa bana ida avakadihojai jahariki.
Avavadiki fori avihiki aꞌoni.
Avanokhoni aforarihi;
jorakia avakadiania okhahi.
Boꞌdi abono ijaꞌari vaꞌini-ra kadi hivini fori hiki bana ida okhana avakadiania.
Ni-avarigaki bana ida okaikahina kamahini.
4 Hari.
Avahararania Sardes sidajia vahojaki adani kodijaꞌari vaipohiriki oathi-ra vanaabajahakiki.
Aꞌonivani,
oathi-ra avanaabavini mani ida avakadimakari avakaimahaki-ra avanamakamakaravini fori aꞌonira nihaja.
Kodiania avarajahamisihahaꞌoadahani mani ida jahakia aꞌonira onaabosivini hija.
Makari jahaki vaforiki-ra avakaimahavini vani kodiania avaadahaki bana aꞌoni.
5 Ijaꞌari Jahari athi-ra kajoniki,
ni-hora kavaꞌipahinipaꞌitxiki,
oanaragarahihi makari vaforikia.
Ni-oaniki ida onini Deua binajiriꞌiki ijaꞌari kamahi anokhomirikia gahinaki vaonina kapapirania.
Kodiabiꞌi viaha hojani kamahini ida ijaꞌari,
vaꞌora onavaꞌisohiki bana adani kodiabiꞌi,
ibavi kaijaꞌarini vihiki:
“Kodijaꞌari hida hihida ijaꞌari.”
6 Avamorobohahi;
mitha vaniꞌajahaki ida Maꞌonahai Jahaki kodijaꞌari-ra vaꞌora navaꞌisohivini hiki — vaꞌora niꞌaha ada Jesus.
Jesus Cristo kaijaꞌari Filadélfia sidajia vahojaki vakadimoni ida papira athini
7 Jesus Cristo kaijaꞌari Filadélfia sidajia vahojaki vakadimoni hida papira athini.
Jesus hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus Cristo vaꞌora niꞌaha:
—Ojahakaꞌoaki ho,
kaꞌoahihahaviki hida oathi.
Hovani Davi kohana kahanodi namitharonisiagaki ho.
Davi kohana ꞌboꞌdakari ijaꞌari-ra vaꞌora vakaꞌdaꞌdivini vani fori ohija,
ijaꞌari hahavi-ra vaꞌora ovakaꞌdaꞌdivini jaboni.
Nahina-ra onofihi;
ohonariahi.
Ni-nahina bikaabokaki ida hora nadabavini.
Ni-ovaꞌahaki ida ijaꞌari oathi-ra kajonivini.
8 Aꞌonira oogaꞌoamanija,
jahaki ida avakadibadani.
Avadanoni ahapirini kabaꞌi,
avanaabajahakiki ida oathi,
hora avakavaꞌipahinipaꞌitxirihi.
Okavarajomiki ida kodibadania avakabadanini bakatha fori hini.
Oakarabikhaiki bana ida bakatha avariꞌoija kaimoni,
ni-nahina hoariha bikanaꞌbovini biakaabokaki ida bakatha.
9 Mitha vaniꞌa!
Avakadisidajia vahojaki adani Jahari kaijaꞌari.
Judeus kaijaꞌari vihina-ra vakahiki adani,
korijanahi ida vakadivarani.
Judeus kaijaꞌari kaꞌoa vihiriha adani.
Vaꞌora ohonariaki bana adani avakadiania vikhana,
avaviahania vakajoꞌathararina,
avajahani-ra vakahivini,
avigahahavija kaimoni ida aꞌonira onakaidivavini.
10 Vahoariha aꞌonira vanajahariharivini kabaꞌi,
ni-hora avakavaꞌipahiniki,
ni-vaꞌora avarakaihamahiki.
Nini vani avanaabaꞌia ida aꞌonira ohonariavini hiki.
Oathi-ra avanaabajahakivini mani ida aꞌonira oakadavaꞌavini hija bana.
Deua bikaronaki bana ida mahi jahariki ijaꞌari hahavi vakadiania,
ijaꞌari vaꞌini-ra ami aniꞌakarahoki vaꞌora vakaijoꞌara kaimoni.
Vaꞌi ami inini karaho kamahini vani,
aꞌonira oakadavaꞌajahakija bana.
11 Mahi ipohiriki ojoiki bana ho.
Jahari athi-ra avakajonihi;
ni-hora avakavaꞌipahinipaꞌitxiki.
Deus aꞌonira naabosihi kidinahina jahakia.
Avakadavaꞌajahaki bana ida aꞌonira onoꞌavini hiꞌiki mahija Jaharia bisaariravini.
12 Ijaꞌari Jahari athi-ra kajoniki,
ni-hora kavaꞌipahinipaꞌitxiki,
onaibaviki bana ida ijaꞌari Deu-ra khai vaniꞌavini kagorani bodinia.
Gora avani kaaraki fori hiki ida ijaꞌari.
Mahi anokhomirikia Deu-ra khai vaniꞌavini kania hojaki ida bana.
Okarajomiki bana hida ijaꞌari hora kavaꞌipahinipaꞌitxiriki kodiDeus onina.
Okarajomiki bana jaboni hida ijaꞌari hora kavaꞌipahinipaꞌitxiriki kodiDeus kasidaji oninia.
Deus ibavi nama gariki bana ida sidaji jaꞌdini Jerusalém oniki.
Onajiriki bana jaboni ida oonina jaꞌdini ijaꞌari hora kavaꞌipahinipaꞌitxiriki kania.
13 Avamorobohahi;
mitha vaniꞌajahaki bana ida Maꞌonahai Jahaki kodijaꞌari-ra vaꞌora navaꞌisohivini hiki — vaꞌora niꞌaha ada Jesus.
Jesus Cristo kaijaꞌari Laodicéia sidajia vahojaki vakadimoni hida papira athini
14 Jesus Cristo kaijaꞌari Laodicéia sidajia vahojaki vakadimoni hida papira athini.
Jesus Cristo hora honariavini vaꞌora vakaꞌdaꞌdiki okajirihivini,
vaꞌora navaꞌisohira kaimoni hihida athia.
Jesus Cristo vaꞌora niꞌaha:
—Hovani oa ho.
Deus vara nina-ra okamithaꞌavini mani ida athi kaꞌoa hini onanamithavini hija.
Aꞌonira onavaꞌisohijahakiki ho nahina Deua binofikia.
Nahina aꞌonira onavaꞌisohihahavivini hiki namithaki bana.
Deus khama anakamaꞌdaꞌiki ida hahavi amonahaꞌiki.
15-16 Oogaki ida avakadihojai,
ni-ovajahaki.
Vaꞌora okavarajomiki adani ijaꞌari,
paha.
Paha afaki fori vihiki adani ijaꞌari hora vanofijahakiki.
Paha pahisiriki fori vihiki adani ijaꞌari hora avigariki.
Paha daradarahaki fori vihiki adani ijaꞌari hora vanofijahakivini-ra vakahiꞌbadaraki.
Aꞌonivani paha daradarahaki fori avihiki aꞌoni,
oniani ida aꞌonira okaꞌbivini hija bana.
Hora avanofijahakiravini mani ida aꞌonira onahokahivini hija bana.
Ovajahaki ida paha afaki.
Ovajahaki jaboni ida paha pahisiriki.
Paha daradarahaki vani hora naꞌbiaja.
17 Avavaꞌini bodinia avakhaniꞌbadaraki aꞌoni:
“Karaho ida akadinahina Deus viaha.
Jahakaꞌoaki ida akadihojai.
Ni-nahina-ra akainamoki.”
Avakhaniki aꞌoni.
Ni-avarigaki ida varani avihini asohiriki.
Hovani aꞌonira oniꞌaki ho:
Ijaꞌari khaii niriki avihiꞌoamanija!
Avakanahinariki aꞌoni.
Avakamaodorohaki fori avihiki aꞌoni.
Avarajorajoki fori avihiki aꞌoni jaboni.
18 Oniani ida aꞌonira onavaꞌisohivini hija.
Ouro kabodihadihariki fori hiki ida kodihojai jahani.
Kodiania vakapavakari bana ida ouro mahija avakanahinakarahoki fori avihini.
Kodiania vakapavakari jaboni bana ida makari vaforiki avakaimahaki kaimoni mahija avarajorajoni avavaꞌini-ra anaipahihijanaravini.
Kodiania vakapavakari jaboni bana ida nokhoi ꞌbaꞌdani kaihaini mahija avaribafivini,
vada avakhanini avakamaodorohajanarini.
Kodihojai jahaki fori hiki ida makari vaforiki,
nokhoi ꞌbaꞌdani kaihaini hiki.
19 Ijaꞌari-ra onakaidivahi;
vaꞌora okaabaniha.
Okaronahi ida vaꞌi ami inini kidiania,
bikavaꞌipahinikaꞌoaja kaimoni ida hojai Deua bivajahariki.
Aꞌonira ohonariavini hiki kodiania avarakaramisijahakini,
hora avanofidoroja kaimoni.
20 Mitha vaniꞌa!
Ohojaki ho ijaꞌari gorani banininia,
okasina-ra onofiki ho.
Kamithava,
nihahi:
“Ba okasi.”
Oniania,
oibaviki bana ho ijaꞌari kania,
oꞌbaiki bana ho kidiania,
ꞌbaiki ida ijaꞌari kodiania jaboni.
21 Ijaꞌari Jahari athi-ra kajoniki;
ni-hora kavaꞌipahinipaꞌitxiki,
ovaꞌahaki bana ida ijaꞌari vithirarini oꞌdihana kaꞌdaꞌdi kavithi ibavinia.
Hovani jaboni onaabahahaviki ida kodiabiꞌi athi,
ni-okavaꞌipahinipaꞌitxiki,
oniani ida kodiabiꞌi ꞌdihana hora navithija kaꞌdaꞌdi kavithi ibavinia.
22 Avamorobohahi;
mitha vaniꞌajahaki bana ida Maꞌonahai Jahaki kodijaꞌari-ra vaꞌora navaꞌisohivini hiki — vaꞌora niꞌaha ada Jesus.