Khai vakhaniki adani vajoroniki Deus viaha
4
Hari.
Oniaroa,
Jesus Cristo hora nanokiahiꞌianahi vadami fori hiki hoariha.
Okanokiki ida bakatha akarabikhajahaki Deus ibavi nama.
Okamithaꞌianahi ida athii ꞌbaraki,
trombeta ithoni fori hiki ida.
Vadami hoariha-ra onokibiininivini vani okamithaꞌiki ida athii vara hora niꞌaꞌiki:
—Okasi bana hida kodiania mahija ira onanokiahivini nahina namithaki kaimonia.
2 Oniaroa,
Maꞌonahai Jahaki ovaꞌi-ra nahonariahihiꞌaha.
Onokiꞌaha ada kaꞌdaꞌdi vakadikaꞌdaꞌdi Deus ibavia kaꞌdaꞌdi kavithi ibavinia vithina.
3 Vagaki ida nokho.
Jaꞌdi nokiani jahaki vagaki jaspe oniki,
jaꞌdi hoariha nokiani jahaki sardônio oniki fori hiki ida nokho vagani.
Kaꞌdaꞌdi vakadikaꞌdaꞌdi kavithi ibavinia kahojaribanaoniki ada katopahiari.
Jaꞌdi jahaki vagaki esmeralda oniki fori hiki ida katopahiari kavagana.
4 Kaꞌdaꞌdi vakadikaꞌdaꞌdi kavithi ibavinia roi khaniribanaoniki ida kaꞌdaꞌdi kavithi ibavini hoariha,
24 kihiki ida kaipohini.
Kaꞌdaꞌdi kavithi ibavini ipohikia vavithiha adani 24 vihiki kaꞌdaꞌdi vaipohina.
Vakaimahaki ida makari vaforiki,
vakaꞌdaꞌdia vakaimahaki ida ouro kakajamarihi kajahaki.
5 Kaꞌdaꞌdi vakadikaꞌdaꞌdi kavithi ibavini kania khaonaniha ada bahi banabanahaki.
Okamithaki jaboni ada bahi taararahaki,
athii ꞌbaraki hiki.
Kaꞌdaꞌdi vakadikaꞌdaꞌdi kavithi ibavini viahania hojaki ada ajava haꞌdiki 7 hiki ipohina.
Ajava haꞌdiki 7 ipohina vani fori hija ida 7 hiki Maꞌonahai Jahaki kahojai danoki.
6 Kaꞌdaꞌdi vakadikaꞌdaꞌdi kavithi ibavini viahania hojaki ida ꞌdako karaho,
vidro anokiajavarini fori hiki.
Jaꞌdi vagaki cristal oniki nokiani fori hiki ida ꞌdako kapahani.
Hari.
Kaꞌdaꞌdi vakadikaꞌdaꞌdi kavithi ibavini iꞌoarinia avakahojahaninikhamaki adani ijaꞌari fori vihiki vahokiki.
Avakoꞌbamahakhamaki adani.
Ipohiki ida vanokho ꞌbaꞌdani avanokhoꞌbaꞌdahaꞌdahamahanaki adani.
7 Leão nokiana fori hiki ada hoariha.
ꞌDaama kahidari nokiana fori hiki ada hoariha.
Makhira nokho nokiani fori hiki ada hoariha.
Majabiro raboki nokiani fori hiki ada hoariha.
8 Ijaꞌari fori vihiki vahokikia vavahojananaki ida 6 vabihi ipohini afohanana.
Kanokhoiꞌbaꞌdanihananaki ida vabihi namani hahavi,
naboꞌani hahavi hiki.
Mahi oadani,
joma oadani vaahiahaꞌoadahaki adani.
Vakadimoro kaathi hiki:
“Jahakaꞌoaki,
jahakaꞌoaki,
jahakaꞌoaki ada Deus,
kaꞌdaꞌdi vakadikaꞌdaꞌdi ada.
Bikaabokaki ida hahavi binofiki.
Nahina hojarini kari hojaki ada Deus ovari miroꞌa.
Asia hojaki ada Deus.
Ni-hoarihapaꞌitxiki ida hojana.
Khaki bana ada.”
9 Vaahiabakhiaki adani ijaꞌari fori vihiki vahokiki.
Khai vaniꞌaki ada vithiki kaꞌdaꞌdi kavithi ibavinia.
Vakadimoro kaathi hiki ida hokihahaꞌoadahaki jahana,
danona,
vagana.
Vaathi jahakia moroa vara vavaniꞌahi ida Deus vaꞌora vakaꞌdaꞌdivini-ra khai vaniꞌavini.
10 Vakadimoro kaathi-ra vakanakamaꞌdavini vani avaasiasiaonahaha adani 24 kaꞌdaꞌdi vaipohina kaꞌdaꞌdi vakadikaꞌdaꞌdi viaha.
Deu-ra vakanamasivivini vaniꞌaha:
—Deus,
ivani ijahakaꞌoaki i.
Vakanaibaviꞌihi ida vakadikajamari kajahaki kaꞌdaꞌdi vakadikaꞌdaꞌdi kavithi ibavini viahania.
Moro kaathi kakamaꞌdaꞌianana vani vakadihojai hiꞌianahi afobakhia.
11 Vakhanibakhiaha adani kaꞌdaꞌdi 24 vihiki vaipohina:
—Deus,
ivani akadikaꞌdaꞌdi i.
AkadiDeus i.
Ivani isohikaꞌoaki i.
Ivagani,
ijahani,
idanoni hikia akavaranina vani jahaja.
Vahoariha vaviaha kadahojai jahaki arafiania akavaranina.
Ivani inamonahaꞌiki ida hahavi hojaꞌiki.
Nahina amonahani-ra inofiꞌihi;
inamonahaꞌihi;
ianahokiꞌihi — vakhaniꞌaha.