Joãoa binokiki ida papira roaroaki
5
Hari.
Oniaroa,
Deus ibavia onokiki ida papira roaroaki.
Kaꞌdaꞌdi vakadikaꞌdaꞌdi kavithi ibavini vithikia bigathivini ida papira saꞌa kaꞌaniajania.
Jiriki ida papira hahavi namanija,
naboꞌania afohanana.
Akaraki ida papira roaroaki.
7 hiki ida papira roaroaki athanani.
2 Onokiꞌiki jaboni ada Deus ibavi kaijaꞌarini danoki.
Athi ꞌbarakia binanaꞌdohiꞌaha:
—Ada hojamaniha kaꞌdaꞌdi asohikaꞌoaki?
Kaꞌdaꞌdi sohikaꞌoana mani ida papira-ra anakaraki aniani-ra kaabokavini hija bana.
Ovari kaꞌoa bikaabokaki ida papira roaroaki arabikhajahani.
3 Hari.
Ni-hojaki ida ijaꞌari asohikaꞌoaki hoarani papira arabikhajahani-ra kaabokaki,
vada biniꞌaja kaimoni ida papira jirini.
Deus ibavi kania ni-hojaki.
Arabo hahavia ni-hojaki jaboni.
Ijaꞌari kohana vaibavia ni-hojaki jaboni.
4 Ni-vakaragaki ida ijaꞌari asohikaꞌoaki hoarani papira roaroaki arabikhajahani-ra kaabokaki.
Ni-nahina bikaabokaki ida papira athini-ra vada niꞌavini.
Vakaragaravini mani ida hora naasaraꞌahapikija.
5 Oniaroa,
kaꞌdaꞌdi hoarana hora niꞌaha:
—Hariꞌa asarajana.
Vada iniꞌa ada hoarana papira roaroaki-ra arabikhaivini-ra kaabokaki.
Leão danoki fori hiki ada.
Judá kohana kaijaꞌari namitharonisiagaki jaboni ada ovari.
Davi kohana kahanodi namitharonisiagaki ada ovari.
Bikaabokaki ida hahavi binofiki.
Binihimaꞌiki ida hahavi Jaharia binofiki bada biniꞌavini.
Ovaria bikaabokaki ida athanaki-ra anivini,
arabikhajahaja kaimoni ida papira roaroaki — hora niꞌaha ada kaꞌdaꞌdi.
6 Hari.
Onokiki ada Ovilia Dorona oniki,
kaꞌdaꞌdi vakadikaꞌdaꞌdi kavithi ibavini ꞌdihania gaakosoana.
Iꞌoaria avakahojahaninikhamaki adani ijaꞌari fori vihiki vahokiki avakoꞌbamahakhamaki.
Varoiribaniki jaboni adani kaꞌdaꞌdi 24 vihiki.
Onokiki ada Ovilia Dorona oniki vabodi pana.
Abiniꞌiki ada hoaranija,
ni-abinijanaki.
Bivahojaki ida 7 moroboi ꞌdakhaki.
Bivahojaki ida jaboni 7 nokhoi ꞌbaꞌdani.
7 moroboi ꞌdakhaki,
7 nokhoi ꞌbaꞌdani hiki vani fori hija ida Maꞌonahai Jahaki kahojai danoki kidiania hojaki.
Deua bikaronaki ada Maꞌonahai Jahaki arabo hahavi aadahaonina ijaꞌari vaibavia.
7 Kidivithi ibavinia vithiki ada Deus kaꞌdaꞌdi vakadikaꞌdaꞌdi hina.
Saꞌa kaꞌaniajania bivahojaki ida papira roaroaki.
Hari.
Ovilia Dorona onikia binamaakariꞌaha bigathaniꞌihi ida papira.
8 Papira-ra gathanivini naothinia,
ijaꞌari fori vihiki vahokiki avakoꞌbamahakhamaki Ovilia Dorona oniki viaha vakajoꞌatharariꞌaha.
Kaꞌdaꞌdi 24 vihiki vaipohina vakajoꞌatharariki jaboni viaha.
Vavahojahananaki ida harpa oniki,
ithohi kaimoni ida.
Vavahojahananaki jaboni ida ouro kabavihi incensoa dainanaki.
Mitxaki ida incenso.
Athii Deus kania kidijaꞌaria vakanikhariabakhiavini athini fori hiki ida incenso.
9-10 Moro kajaꞌdia vaahiaki adani:
“Ivani kaꞌdaꞌdi sohikaꞌoaki i.
Jahaki ida papira roaroaki-ra igathanivini,
ivani oa ikaabokaja ida athanaki aniani,
papira arabikhajahani hiki.
Ava akasanakhamakia ira vanaabiniꞌiki i.
Iamani ahovarini mani ida ijaꞌari-ra vaꞌora ikapavakarivini hija.
Arabo hahavi kaijaꞌarini vahararana vaꞌora ianagathogathonionivini.
Ibavi hahavi kaijaꞌarini vahararana kadaijaꞌari-ra
vaꞌora ianagathogathonionivini.
Nação hahavi vahararana kadaijaꞌari-ra
vaꞌora ianagathogathonionivini jaboni.
Vaathi kahoarihakhamaki adani.
Deus kaimoni adani ijaꞌari vaꞌora ikapavakariꞌiki iabininia.
Sasidotxi vaꞌora inihaꞌiki adani,
ijaꞌari-ra vaꞌora vavakaꞌdaꞌdiki kaimoni kadania.
Vakhanina vani,
Deus kabadani abono vihira adani,
bada vaniꞌahahaꞌoadahaki ida akadiDeua binofiki.
Vaꞌora vavakaꞌdaꞌdiki bana adani arabo hahavi
kaijaꞌarini.”
Khanimanira ada vakadimoro kaathi.
11 Oniaroa,
vada oniꞌianana,
vaꞌora onokiꞌaha adani Deus ibavi kaijaꞌarini vaipohiki,
vâipohina vâipohiꞌoamanira adani.
Ni-okaabokaki ida vaipohina orajomavini.
Kaꞌdaꞌdi vakadikaꞌdaꞌdi kavithi ibavini iꞌoarinia vahojaki adani ijaꞌari fori vihiki vahokiki avakoꞌbamahakhamaki.
Varoiribaniki adani kaꞌdaꞌdi 24 vihiki vaipohina.
Varoiribaniki adani Deus ibavi kaijaꞌarini vâipohiki jaboni.
12 Vaahiana vaꞌora okamithaki adani.
Athii ꞌbarakia vaahiaha:
“Sohikaꞌoaki ada Ovilia
Dorona oniki jahana
akavaranina vahoariha vaviaha.
Ijaꞌaria vanaabiniꞌiki ada ovari,
hokiki ada.
Danoki ada.
Bikaabokaki ida hahavi binofiki.
Kidimoni ida nahina hahavi hojaki.
Karaho ida kidiꞌogahai danoki.
Khai aniꞌaki ida jahana danona vagana.”
Nimania ida Deus ibavi kaijaꞌarini vakadimoro kaathi,
Jesus jahana vaabono vakanavaꞌisohikhamavini.
13 Oniaroa,
okamithaꞌiki ida Deus kamonahi hahavi vaahiana.
Vaahiaki adani nama vahojaki,
arabo hahavi vahojaki,
ijaꞌari kohana vaibavia vahojaki,
ꞌdako karaho kajokiraki afohahavi,
vainia afohahavi vahojaki jaboni,
hahavi hokiki Deua binamonahaki vaahiaki adani.
Khanimanira ada vakadimoro kaathi:
“Ivani kaꞌdaꞌdi vakadikaꞌdaꞌdi i.
Kaꞌdaꞌdi vakadikaꞌdaꞌdi kavithi ibavinia ihojaki i.
Ivani jaboni Ovilia Dorona ioniki i.
Avajahani,
avavagani,
avadanoni hikia akavaranina vani jahaja.
Mahi,
joma hahavia,
mahi anokhomirikia aꞌonira khai aniꞌavini afobakhia.”
14 Ijaꞌari fori vihiki vahokiki avakoꞌbamahakhamakia vaniꞌaha:
“Nimania ida Deua binofiki.”
Vakadimoro-ra avakananokhomivini vani avaasiasiaonahaꞌaha adani kaꞌdaꞌdi 24 vihiki vaipohina Deus Ovilia Dorona khama vaviaha,
vaꞌora vakanamasiviꞌaha jaboni.