—Khaꞌa!

2 Vada onina kabaꞌi,

khaꞌaha ada cavalo vaforiki.

Cavalo-ra vaadahakia bivahojaki ida kodahi.

Biagathaniki ida kajamari kajahaki kaꞌdaꞌdia biakaꞌdaꞌdihaki.

Ajihiꞌaha,

ibavi hahavi-ra anahoroahaꞌavini.

Vaꞌora avadadamiꞌaha adani nofina vihiriki,

avarakhaja kaimoni ida vakadisaꞌai,

vakadinahina hiki.

3 Naothinia,

Ovilia Dorona onikia bianiꞌianahi ida athanaki papira roaroani akarani hoariha.

Oniaroa,

okamithahi ida ijaꞌari fori hiki hokiki hoariha,

nihani:

—Khaꞌa!

4 Oniaroa,

khaꞌianaha ada cavalo hoariha,

nadaraki maina.

Cavalo-ra vaadahakia bigathaniꞌihi ida tarasara karaho fori hiki.

Bigathaniꞌihi jaboni ida Deus danona,

bikaabokaja kaimoni ida ijaꞌari vaabono vakodakhamavini arabo hahavia,

oniani ida ijaꞌari vaabono vakanaabinikhamavini hija.

5 Hari.

Ovilia Dorona onikia bianiꞌianahi ida papira roaroani akarani hoariha.

Oniaroa,

okamithahi ida ijaꞌari fori hiki hokiki hoariha,

nihani:

—Khaꞌa!

Vada onina kabaꞌi,

khaꞌaha ada cavalo pororoki maina.

Cavalo-ra vaadahakia saꞌa bivahojaki ida nahina khanaki karajomini.

6 Okamithahi ida athii ijaꞌari fori vihiki vahokiki avakoꞌbamahakhamaki vahararana.

Nihi ida athii:

—Trigo ꞌbaꞌdani bavini hoarani paꞌitxi kaidivani ida mahi hoarani ijaꞌari bada nini abosini.

Cevada ꞌbaꞌdani bavini hoarani karaho kaidivani ida mahi hoarani ijaꞌari bada nini abosini.

Kaidivaꞌoamanija ida kiivi paꞌitxi.

Hariꞌa vakanakabodi bana ida basina nahina hoariha.

Hariꞌa vanakabodi ida vinho jaboni — nimania ida athii okamithaꞌiki.

7 Naothinia,

Ovilia Dorona onikia bianiꞌianahi ida papira roaroani akarani hoariha.

Oniaroa,

okamithaki ida ijaꞌari fori hiki hokiki hoariha nihani:

—Khaꞌa!

8 Vada onina kabaꞌi,

khaꞌaha ada cavalo korikoriki maina.

Cavalo-ra vaadahaki onina Abini.

Abini onikia naothia kasiagaha ada hoariha.

Ovari onina Ijaꞌari Kohana Vaibavi.

Vagathiꞌihi ida danoi.

Arabo hahavi avikhaꞌaha,

ijaꞌari vaipohiki-ra vaꞌora vanaabinira kaimoni.

Vaabono vakanaabinikhamaki adani ijaꞌari vahoariha.

Vaiꞌami karaho vaꞌora nihimaki adani vahoariha.

Kavamoni ipohiki vaꞌora nihimaki adani vahoariha.

Igitha,

tapoꞌija hiki vaꞌora nihimaki adani vahoariha.

Vaabiniꞌina kabaꞌi adani ijaꞌari vaipohina arafiaki,

asia avaaniha adani ijaꞌari.

9 Hari.

Ovilia Dorona onikia bianiꞌianahi ida papira roaroani akarani hoariha.

Oniaroa,

Deu-ra vakanavaꞌigavini ibavini naboꞌania vaꞌora onokiki adani ijaꞌari vaabiniki vaabono.

Hivaꞌoani Jesus Cristo kaijaꞌari,

vaabinina viahania,

vahoariha vaꞌora vanajahariharivini kabaꞌi avanamonionibakhiaꞌiki ida Deus athi.

Ni-vakavaꞌipahinipaꞌitxiki ida Jesu-ra vavakaijokavini,

oniani ida vahoariha vaꞌora vanaabinivini hija.

10 Athii ꞌbarakia vakhaniꞌaha:

—Kaꞌdaꞌdi vakadikaꞌdaꞌdi i,

ivani ikaabokaki ida hahavi inofiki.

Ijahani arafiaki i.

Kaꞌoa hihahaviki ida iniꞌaki!

Mahi hana hini vani arabo hahavi kaijaꞌarini vakadihojai asohiriki abosini-ra ikaronaja vakadiania?

Mahi hana hini jaharikia vaꞌora iarakhaki bana adani ijaꞌari haria vanaabiniꞌiki?

— nimania hida ijaꞌari vaabiniki vaabono vaathi.

11 Hari.

Vagathanihananaki ida makari vaforiki.

Vaꞌora vaniꞌaha:

—Hariꞌa kaho bana!

Vaviahanokha paꞌitxi!

Aꞌonira vavajahariki asia vaꞌora vanaabiniki bana adani avaigamini vahoariha.

Vaꞌora vanaabiniki bana adani Deus kahonai abono vahoariha aꞌonira vanaabiniꞌiki fori vihiki.

Vahihavirina oadani adani vaabiniki kaimoni,

vaviahanokhaꞌa bana.

12 Hari.

Onokiki ada Ovilia Dorona onikia bianiꞌianavini ida papira roaroaki akarani hoariha.

Oniaroa,

hoꞌdohoꞌdodanokiki ida arabo.

Pororoꞌaha ada safini.

Ni-vagajanaki,

bakibakikaꞌoaꞌihi.

Nadaraki ada masiko,

ama nokiani fori hiki ada.

13 Vorovorohaki ada boviri nama hojaki araboa.

Sirisiriki danokia binahoꞌdohoꞌdoki fori hiki ida figira avani,

vorovorohaki ida ihiꞌai aꞌdiriki figo oniki,

onivani fori hira ada boviri vorovorohana.

14 Nama hahavi roaroaꞌiki,

avisoniꞌiki,

papira roaroaki fori hini.

Arabo namahiki hahavi akaraꞌoꞌihi ibavinia.

Kajoviri hahavi jaboni aakaraꞌoꞌiki.

15 Oniaroa,

ijaꞌari vaabono avanahojananaꞌaha,

vahoariha jaꞌdi kahodijamaꞌoki bodinia avahojaꞌiki,

vahoariha arabo namahiki kajaꞌdini naboꞌania avahojaꞌiki.

Arabo kaijaꞌarini vakadikaꞌdaꞌdi hahavi,

arabo hahavi kakarivani,

sorara vavakaꞌdaꞌdiva hahavi jaboni vaabono avanahojahananaꞌiki.

Ijaꞌari kanahinaꞌahapikiki hahavi vaabono avanahojahananaꞌiki jaboni.

Makhira ijaꞌari-ra vahonariafiahabakhiaki,

honai abono gathaki hahavi jaboni vaabono avanahojahananaꞌiki.

Ijaꞌari kanahinariki hahavi jaboni vaabono avanahojaꞌiki afohahavi.

16 Vatxararahana vaabono vavibaranahavini,

vara vaniꞌaki ida arabo namahiki,

jaꞌdi naꞌbahaki jaboni:

—Arabo namahiki,

jaꞌdi naꞌbahaki,

aadafani bana anamana mahija kaꞌdaꞌdi kavithi ibavinia vithiki haria nokijanaria kaimoni.

Haria vakavaꞌijokojokokarahoki adani kaꞌdaꞌdi vakadikaꞌdaꞌdi,

Ovilia Dorona oniki khama.

17 Hari.

Kamaꞌdaꞌihi ida Deus,

Ovilia Dorona oniki khama hojai asohiriki-ra vakavaꞌijokojokokarahovini-ra vananokiaꞌavini.

Vakaronaki ida hojai asohiriki abosini ijaꞌari vajahariki vakadiania.

Ni-ijaꞌaria bikaabokaki ida hojai asohiriki abosini Deua binoꞌavini hiki.

Ni-bikaabokaki ida abononi akavaꞌijoavini.