João vaꞌora nokiha adani Israel kaijaꞌarini 144 mil vihiki vaipohina
7
Hari.
Oniaroa,
vaꞌora onokiꞌaha adani Deus ibavi kaijaꞌarini avakoꞌbamahakhamaki avakakhaninihakhamana.
Araboa vaabono vakananapajahikhamavini vigaakosoana vahojaha.
Safini bivikhamananiki kaniaja hojaki ada hoarana.
Safini biavigariki kaniaja hojaki ada hoariha.
Safini biavigariki jasoja hojaki ada hoariha.
Safini biavigariki aniaja hojaki ada hoariha.
Vagathiki ida sirisiriki akoꞌbamahakhamaki araboa hojaki voovoojanaria kaimoni.
Ni-voovoojanaki ida sirisiriki arabo namania,
ni-voovoojanaki ꞌdako karaho kajokiraki namania,
ni-voovoojanaki ida sirisiriki ava kania.
2-3 Deus vaꞌora noꞌaki adani ibavi kaijaꞌarini avakoꞌbamahakhamaki danona vanajaharija kaimoni ida arabo,
ꞌdako karaho kajokiraki kapahani.
Hari.
Onokiki ida Deus ibavi kaijaꞌarini hoariha,
safini kakhamanani kaniaja khamananina.
Saꞌa bigathiki ida nahina ijaꞌari-ra kavarajomivini kaimoni Deus hokiki karajomia vakarajomira kaimoni.
Kidijaꞌari kaimoni adani ijaꞌari vaꞌora karajomiki.
Deus ibavi kaijaꞌarini vaꞌora niꞌaha adani hiꞌadani Deus ibavi kaijaꞌarini avakoꞌbamahakhamaki Deus danona-ra vagathaniꞌiki.
Athi ꞌbarakia vaꞌora niꞌaha:
—Hariꞌa kaho bana!
Hariꞌa vanajaharihari kaho ida arabo,
ꞌdako karaho,
ava hahavi hiki.
Jakaho vaꞌora akarajomiꞌimidiava adani akadiDeus kahonai abono vaatha.
4-8 Oniaroa,
hora vananamithaꞌaha nihafori vihina vaipohina adani ijaꞌari Deus karajomia vakarajomiꞌiki vaatha.
Ijaꞌari 144 mil vaipohina vavahojaki ida rajomi vaatha.
12 vihiki vaipohina adani Israel kohana kaisai.
Israel kaisai vanamitharonisiagaki hahavi vahararana vaꞌora vaaniha adani ijaꞌari 144 mil vaipohina Deus kaijaꞌari kaimoni.
Judá kohana kahanodi vanamitharonisiagaki vahararana vaꞌora vakarajomiha adani 12 mil vihiki vaipohina.
Rúben kohana kahanodi vanamitharonisiagaki vahararana vaꞌora vakarajomiha adani 12 mil vihiki vaipohina.
Gade kohana kahanodi vanamitharonisiagaki vahararana vaꞌora vakarajomiha adani 12 mil vihiki vaipohina.
Onivani fori vihira adani Israel kohana kaisai hahavi afohanana.
Aser,
Naftali,
Manassés,
Simeão,
Levi,
Issacar,
Zebulom,
José,
Benjamim vaoniki adani.
Vakadihanodi vanamitharonisiagaki vahararana vaꞌora vaaniꞌaha adani 12 mil vaipohina afohanana,
vaꞌora vakarajomira kaimoni,
Deus kaijaꞌari vihira kaimoni adani 144 mil vihiki vaipohina.
João vaꞌora nokiha adani ijaꞌari vaipohiki Deus ibavi kania
9 Hari.
Oniaroa,
Deus ibavi kania namajaja vada oniꞌianahi,
vaꞌora onokiki adani ijaꞌari vaipohiki,
vâipohina vâipohiꞌoamanira adani.
Ni-nahina bikaabokaki ida vaipohina nihafori vihina rajomani.
Arabo hahavi kaijaꞌarini adani,
nação hahavi adani jaboni,
tribo hahavi adani,
vaathi kahoarihakhamaki adani.
Vigaakosoaki adani kaꞌdaꞌdi vakadikaꞌdaꞌdi kavithi ibavini viahania,
Ovilia Dorona oniki viaha jaboni.
Vakaimahaki ida makari vaforiki,
vagathihananaki ida avaafani kahami afa fori hiki vakadikhaiini-ra vavajahavini kaimoni.
10 Athii ꞌbarakia vaniꞌaha:
“Kidivithi ibavinia vithiki ada Deus kaꞌdaꞌdi vakadikaꞌdaꞌdi hina.
Akadiꞌaihotahi abono ada.
Haria akavaꞌijoaꞌiki ada,
aokharia kaimoni Ibavi
Jaharikaꞌoakia.
Ovilia Dorona oniki jaboni haria akavaꞌijoaꞌiki,
akadiꞌaihotahi abono ada”
Vakhaniha adani ijaꞌari vâipohiki.
11 Deus ibavi kaijaꞌarini hahavi vigaakosoaki kaꞌdaꞌdi vakadikaꞌdaꞌdi kavithi ibavini iꞌoarinia.
Vabodi pana varoiribaniki adani kaꞌdaꞌdi.
Vabodi pana vahojaki jaboni adani ijaꞌari fori vihiki vahokiki avakoꞌbamahakhamaki.
12 Oniaroa,
avaasiasiaonahaha Deu-ra vakanamasivivini,
vaniꞌaha:
“Nimania hida Deua binofiki.
Jahaki ida akadiDeu-ra khai aniꞌavini.
Khai aniꞌaki ida jahana vagana.
Karahoki ida kidiꞌogahai.
Jahaki ida haria kajoamorabakhiavini,
vara avaniꞌava ida sohikaꞌoana.
Bikaabokaki ida hahavi binofiki.
Danoki ada.
Mahi hahavi mahi anokhomiriki Deu-ra akanamasivihaꞌoadahava.
Nimania ida Deua binofiki.”
Vakhaniha avaasiasiaonahana Deu-ra khai vaniꞌavini.
13 Hari.
Kaꞌdaꞌdi hoarana hora nanaꞌdohiha:
—Hana vihina adani ijaꞌari makari vaforiki-ra vakaimahara?
Hanaja vania vikhara adani?
14 Ogathaniꞌiki ida kidinaꞌdohi:
—Ni-oogaki.
Ivani iogaki.
Oniaroa,
hora niꞌaha:
—Deu-ra vanofiriki vaꞌora vanajahariharivini arafiaki adani,
kabaꞌi ni-Deu-ra vakavaꞌipahiniꞌiki.
Visokoꞌiki ida vakadimakari Ovilia Dorona oniki amana.
Abiniꞌiki ada Ovilia Dorona oniki vakadimoni hina,
oniani ida amana vakadimakari navaforini hija.
15 Deu-ra vakavaꞌipahinipaꞌitxiravini mani ida Ovilia Dorona oniki kavithi ibavini viahania vaꞌora nahojaja.
Mahi,
joma hiki Deus gorana bodinia vahojaki adani,
bada vaniꞌaja kaimoni ida Deua binofiki.
Kidivithi ibavinia vithiki ada Deus kaꞌdaꞌdi vakadikaꞌdaꞌdi hina.
Ovari vakadiania hojahahaꞌoadahana vaꞌora akadavaꞌaki,
vaꞌora naibavijahaki adani.
16 Ni-vavaiꞌamijanaki,
ni-vakanabidi akaaforajanaki.
Ni-safini afana vaꞌora nakhoroniki,
ni-nahina afaki hoariha vaꞌora nakaijanaki.
17 Kidivithi ibavinia vithiki ada Ovilia Dorona oniki kaꞌdaꞌdi vakadikaꞌdaꞌdi hina.
Ovari vaꞌora akadavaꞌaki adani.
Ovilia akadavaꞌava abono vaꞌora bananiki adani kidiꞌovilia paha jahaki kania.
Onivani fori hija ida Ovilia Dorona oniki kabadani.
Vaꞌora avikhaki adani kidijaꞌari paha ijaꞌari-ra nahokiki kania.
Deua binajohahi ida vanokho aꞌbani,
vaasarajanarara kaimoni.