Hari.

Oniania,

viso vakhaniha adani Deus ibavia vahojaki afoꞌimidia,

ni-vavaravaraki kaho.

Mitihini vaꞌora onokiꞌaha adani Deus ibavi kaijaꞌarini 7 vihiki vaipohina vigaakosoana Deus viaha.

Vagathanihananahi ida trombeta hoarahanana.

3 Khaha ada Deus ibavi kaijaꞌarini hoariha.

Ovaria bivahojaki ida ouro kabavihi.

Incenso bavini kaimoni ida bavi.

Deu-ra vakanavaꞌigavini ibavini ꞌdihania gaakosoaꞌaha ada Deus ibavi kaijaꞌarini onokiꞌiki.

Bigathanivini ida incenso karaho binakabodija kaimoni.

Binakabodivini ida incenso,

varania.

Hihida varani Deus kaijaꞌari hahavi Deu-ra vara vaniꞌavini kavaranihi hida.

Deu-ra vakanavaꞌigavini hiki ida incenso varania kabodihadihaki.

Kaꞌdaꞌdi vakadikaꞌdaꞌdi kavithi ibavini viahania hojaki ida Deu-ra vakanavaꞌigavini ibavini,

ouroa amonahaki ida.

4 Deus ibavi kaijaꞌarini Deus viaha hojakia bivahojaki ida bavi incenso daiki saꞌa.

Incenso ahaꞌdiki ojini okasiꞌiki nama kabodihadihani Deus kaijaꞌari hahavi Deu-ra vara vaniꞌavinia.

5 Oniaroa,

Deus ibavi kaijaꞌarinia bigathiꞌihi ida incenso bavini,

bianiꞌihi ida siho haꞌdini Deu-ra kanavaꞌigavini ibavini namania hojaki,

binajiꞌbiniꞌihi ida incenso bavini siho haꞌdinia.

Bihoarariꞌihi ida kidibavi daini arabo hahavi namania.

Oniaroa,

okamithaꞌaha ada bahi taararahaki.

Onokiki jaboni ada bahi banabanahaki.

Hoꞌdohoꞌdoꞌihi ida arabo.

Nimania ida onokiꞌiki,

okamithaꞌiki hiki.

6 Hari.

Deus ibavia vaꞌora onokiki adani Deus ibavi kaijaꞌarini vahoariha 7 vihiki vaipohina.

Vaabono vanaibavijahaki adani vaꞌithohara kaimoni trombeta-ra.

7 Hari.

Deus ibavia Deus ibavi kaijaꞌarini hoarana imidia binaꞌithohi ida trombeta.

Oniaroa,

kanokiahi ida siho kahaꞌdini,

bahi karaho danoki jaꞌdi itxani fori hiki ama kabodihadihaki ida siho,

araboa kharariki ida.

Oniaroa,

arabo pitani hoarani karaho ahaꞌdiki,

pitani ꞌbamiki karaho ni-ahaꞌdiki.

Ava,

hogoi itxani,

rakhajahi hiki pitani hoarani ahaꞌdiki jaboni.

8 Hari.

Oniaroa,

Deus ibavia Deus ibavi kaijaꞌarini hoariha maina binaꞌithohi ida trombeta hoariha.

Oniaroa,

nahina arabo karaho namahiki ahaꞌdiki nokiani fori hiki hokahiꞌiki ꞌdako karaho kajokiraki bodinia.

Oniaroa,

ꞌdako karaho kajokiraki pitani paꞌitxi ama ihiꞌiki.

Pitani karaho ni-ama ihiꞌiki kapahani.

9 Abiniꞌiki ada abaisana,

igitha hiki ꞌdako karaho pitani paꞌitxi hojaki.

Kaihimiki ida kanava kanaꞌbahaki kaadahaki ꞌdako karaho pitani paꞌitxi jaboni.

10 Hari.

Oniaroa,

Deus ibavia Deus ibavi kaijaꞌarini hoariha maina binaꞌithohi ida trombeta hoariha.

Oniaroa,

boviri karaho haꞌdiki siho akavoosiki fori hiki kafariꞌiki vaini ipohiki namania.

(Boviri onina pamoari athinia boviri arapaki.)

11 Vaini biavanokhomiki kapahani ipohiki namani kafariki jaboni ada boviri haꞌdiki.

Arapaꞌiki ida vaini kapahani pitani hoarani boviria bivikafariki kani.

Ni-arapaki ida vaini pitani ꞌbamiki hoariha kapahani.

Onivani fori hija ida arabo hahavi kavainini kapahani anokhomini.

Ijaꞌari vaipohikia viꞌavihi ida paha,

vaabiniꞌaha.

12 Hari.

Oniaroa,

Deus ibavia Deus ibavi kaijaꞌarini hoariha maina binaꞌithoꞌihi ida trombeta hoariha.

Binajahariki ada safini,

masiko,

boviri hiki.

Mahi bobini paꞌitxi ni-vagaki ada safini.

Mahi bobini paꞌitxi ꞌbamiki asia vagaki.

Joma bobini paꞌitxi ni-vagaki.

Joma bobini paꞌitxi ꞌbamiki asia vagaki.

Niki bana hida namithaki kaimoni.

13 Hari.

Onokiha ada kokoi naꞌbahaha raboki nama jararinia.

Athii ꞌbarakia niha:

—Abii,

ijaꞌari maha!

Ijaꞌari maha!

Ijaꞌari maha!

Ijaꞌari hahavi araboa vaibavikia vakamithaki bana ida trombeta ithoni hoariha Deus ibavi kaijaꞌarini avahoarabakosikia vanaꞌithoki bana.

Jaharini arafiaki ida ijaꞌari vakadimoni bana,

abii,

ijaꞌari maha!

— niha ada kokoi naꞌbahaha.