Onokiki ada boviri fori hiki arabo namania hojana.

Nama voroniꞌiki ada boviri.

Boviri fori hikia biagathaniki ida chave.

Jahari kahonai abono vanokiariki vaibavi kaathani kakachaveni ida.

Hodi bihiaki anokhomini nokiavahariki fori hiki ida vaibavi.

2 Boviri fori hikia biakarabikhaiꞌihi ida vaibavi kaathani.

Hodi bihiakia khaonaniki ida siho kaojini kakaraho.

Siho kaafani akarafiaki kaibavini fori hiki ida siho ahaꞌdiki kaojini.

Siho kaojinia binamokhiki ada safini,

ni-vagajahakijanaki,

oniani ida arabo-ra nabakibakija.

3 Siho kaojini kahararania vikhaonaniki adani omavari fori vihiki vâipohiki.

Vigarahanaꞌaha arabo namania.

Vagathanihi ida danona afohanana.

Akoro ijaꞌari-ra kohovini vani fori hija ida danona omavari fori hikia bigathaniꞌiki.

4 Kaꞌdaꞌdi vakadikaꞌdaꞌdi vaꞌora niꞌaha adani omavari fori vihiki:

—Hariꞌa vanajaharihari ida hogoi itxani,

ava itxani,

ava naꞌbahaki,

rakhajahi hiki.

Avikhaꞌa bana ijaꞌari vaatha Deus karajomi-ra vavahojariki vakadiania mahija vaꞌora avanaimaꞌbanavini.

5 Vaꞌora vakohonanaha.

Hariꞌa vaꞌora vanaabini bana.

5 masiko ipohina vani vaꞌora vanaimaꞌbanahanana karaho kaꞌoa bana — niha.

Omavari fori hiki ꞌbanana akoro ꞌbanana fori hiki.

6 Hari.

5 masiko ipohina vaꞌora vanaimaꞌbanakarahoki bana adani Deu-ra vanofiriki.

Vaabinina-ra vanofiki bana adani kohoi vihiki.

Ni-vaabiniki.

Vaabinina-ra vanofikarahovini kabaꞌi,

ni-vakaabokaki bana ida vaabinina.

7 Hari.

Cavalo nokiana fori vihiki adani omavari,

vaabono vanaibavijahaki ijaꞌari-ra vidara kaimoni.

Vakaꞌdaꞌdia vavahojaki ida ouro kakajamarihi fori kihiki kanokiani.

Vanokho makhira nokho nokiani fori hiki.

8 Vakaꞌdaꞌdi kaafani gamo kaꞌdaꞌdini kaafani kanokiani fori kihiki.

Vaino,

jomahi hiihiha inoni nokiani fori hiki adani.

9 Vamakhoꞌinia vakaimahaki ida makari ꞌdakhaki ferro amonahaki fori hiki.

Makari ꞌdakhakia biakaꞌoahaki ida sorara hoariha kasaꞌai bianakhararara kaimoni.

Onivani fori vihira adani omavari fori vihiki vakadimakari ꞌdakhaki onokiꞌiki.

Okamithaꞌiki ida omavari fori hiki vabihi ithoni ꞌbaraki,

cavalo vaipohiki carruage-ra vakarahokavini vakiꞌdarahaki vani vanamonahaja ida saani karaho.

Sorara vaabono vakodakhamavini vani cavalo vaipohiki ijaꞌari-ra vavakiꞌdarahaki fori vihiki.

10 Akoroa bivahojaki ida joꞌo ꞌbanani,

onivani fori hija ida omavari joꞌo ꞌbanani.

5 masiko ipohiki vani ijaꞌari-ra vaꞌora vanaimaꞌbanakarahora bana adani.

11 Hodi bihiaki anokhomini nokiavahariki akadavaꞌava abono vaꞌora vakaꞌdaꞌdiki adani omavari fori vihiki.

Hodi bihiaki akadavaꞌava abono onina hebreu athini Abadom,

onina grego athini Apolião.

(Pamoari athini onina nahina hahavi napohimajava abono.

Jahari kahonai abono ada.)

12 Radahaꞌiki ida nahina jahariki arafiaki hoarani ijaꞌari-ra vaꞌora naimahidaki.

Asia khaki bana ida nahina jahariki arafiaki ꞌbamiki ijaꞌari-ra vaꞌora naimahidaꞌianaki bana.

13 Hari.

Oniaroa,

Deus ibavia,

Deus ibavi kaijaꞌarini hoariha maina binaꞌithoꞌihi ida trombeta hoariha.

Okamithaki ida athii,

Deu-ra vakanavaꞌigavini ibavinia aakhaninihakhamaki khaonaniki ida athii.

Deus viaha hojaki ida Deu-ra vakanavaꞌigavini ibavini ouro amonahaki.

14 Athiia biniꞌaꞌaha ada Deus ibavi kaijaꞌarini trombeta-ra vahojaki:

—Vaꞌora kokhari bana adani Deus ibavi kaijaꞌarini avakoꞌbamahakhamaki vidabohaki Eufrates vaini maakarinia vahojaki,

vaꞌajihira kaimoni — nihi ida athii.

15 Deua bikanamahiꞌiki ida ibavi kaijaꞌarini avakoꞌbamahakhamaki avarakhana kamahini ibavi hahavia avikhara kaimoni.

Deus ibavi kaijaꞌarini avakoꞌbamahakhamakia vanaviahanokhaki ida ora,

mahi,

masiko,

badara hiki avikhara kaimoni,

vaꞌora vanaabinira kaimoni adani ijaꞌari vâipohiki arabo hahavia vahojaki.

Ni-ijaꞌari hahavi abiniꞌiaki kaho.

Vaipohiki asia avaaniki.

16 Okamithaki ida sorara vâipohiki vakadisaani khani.

Vaipohiꞌoamanira adani sorara cavalo-ra vavaadahaki.

200 milhões vaipohina onokiꞌiki.

17 Oniaroa,

vadami fori hikia vaꞌora onokiki adani cavalo,

cavalo-ra vavaadahaki khama.

Vamakhoꞌinia vakaimahaki ida makari ꞌdakhaki nadaraki.

Nadaraki,

koriki,

korikoriki ida makhoꞌini akaꞌoahani kakamakarini ꞌdakhaki.

Siho kahaꞌdini fori kihiki ida nadaraki,

jaꞌdi safira oniki fori hiki ida koriki,

enxofre oniki fori hiki ida vakadimakari ꞌdakhaki korikorini.

Jomahi hiihiha kaꞌdaꞌdini kanokiani fori hiki ida cavalo kaꞌdaꞌdi.

Cavalo fori hiki vabodia khaonaniki ida siho kahaꞌdini,

siho kaojini,

enxofre hiki.

18 Nahina vabodia khaonanikia vaꞌora vanaabiniki afoꞌiana adani ijaꞌari vâipohiki arabo hahavia vahojaki.

Ni-ijaꞌari hahavi abiniꞌiaki kaho.

Vaipohiki asia avaaniki.

19 Cavalo fori vihikia vavahojaki ida vadanona vabodia,

vamiia.

Makha ꞌdaꞌdi nokiani fori hiki ida cavalo mii.

Cavalo mii ijaꞌari-ra ananiki.

20 Cavalo fori hiki ni-vaꞌora vanaabiniki adani ijaꞌari hahavi.

Ijaꞌari asia vahokiki avaaniꞌiki,

ni-vakavaꞌipahiniki ida vakadihojai jahariki.

Asia vaꞌora vakanamasiviki adani Jahari kahonai abono vanokiariki.

Asia vaꞌora vakanamasiviki adani vakadideus amovana.

Vanamonahaki ida vakadideus amovana ouro,

prata,

bronze,

jaꞌdi,

ava hikia.

Vakadideus amovana ni-nahina-ra nokiki,

ni-athi-ra kamithaki jaboni,

ni-adahani-ra kaabokaki jaboni.

21 Ijaꞌari avaaniꞌikia ni-vakavaꞌipahinipaꞌitxiki ida jaboni vakadihojai jahariki hoariha.

Vakaabiniki adani.

Vahoariha-ra vakaijorahaki adani jaboni.

Makhira kidigamo hiriki khama vaabono vakaviꞌomakhamaki jaboni.

Vaboꞌdiabakhiaki ida hoariha kanahina.

Ni-vakavaꞌipahinipaꞌitxiki ida vakadihojai jahariki.