Joãoa binokiki ida papira roaroani paꞌitxi
10
Hari.
Oniaroa,
onokiki ida vadami fori hiki hoariha.
Onokiki ada Deus ibavi kaijaꞌarini hoariha danoki,
nama gariꞌina.
Kidimakari hiki bahi vaforiki.
ꞌDaꞌdi kanamania karoiribaniki ada katopahiari.
Safini vagana nokiani fori hiki ida nokho.
Siho akahaꞌdimananiki kanokiani fori hiki ida avana.
2 Bigathiki ida papira roaroaki paꞌitxi arabikhajahaki saꞌa.
Bikanaibavihi ida ꞌdama kakaꞌaniajanija ꞌdako karaho kajokiraki kapahani namania,
bikanaibavihi ida ꞌdama kakajasonija arabo namania.
3 Athi ꞌbarakia baranahaꞌaha.
Jomahi hiihiha ipohiki kaꞌaarorohi fori hiki ida Deus ibavi kaijaꞌarini athi ꞌbaraki okamithaꞌiki.
Baranahana naothinia,
bahi kahirarahi 7 hikia bigathanihi ida athi.
4 Hari.
Onajirivini onofiki ida bahi kahirarahi kavarani.
Oniaroa,
okamithaki ida athi khani nama,
hora niꞌaha:
—Hariꞌa inajiri bana ida bahi kahirarahi 7 hiki ipohini kavarani.
Hariꞌa bana inanamithaꞌa ida vakadivarani.
5 Oniaroa,
onokiꞌiki ada Deus ibavi kaijaꞌarini gaakosoana ꞌdama kapitani arabo namania,
kapitani kahoariha ꞌdako karaho kajokiraki kapahani namania,
bikanabiinimananiꞌihi ida saꞌa kakaꞌaniajani nama.
6 Nihaha:
—Hokihahaꞌoadahaki ada Deus.
Nama,
arabo,
ꞌdako karaho hiki-ra namonahaꞌiki ada.
Hahavi nama,
arabo,
ꞌdako karaho hikia hojaki-ra namonahaꞌiki ada.
Kaꞌoa hiki hida kodivarani.
Deus viaha varani kaꞌoa okavaraniꞌiki ho.
Kamahini ipohijanarihi bana ida namithaki kaimoni.
7 Deus ibavi kaijaꞌarini hoariha maina binaꞌithoki bana ida trombeta.
Namithaki bana ida athi Deus athi namoniva abono-ra vaꞌora navaꞌisohiꞌboꞌdavini hiꞌiki.
Kidihonai abono vihiki adani.
Ni-ijaꞌaria avigaꞌiaki kaho ida Deua binavaꞌisohijoravini hiki nahina hini — niha ada Deus ibavi kaijaꞌarini.
8 Oniaroa,
athii okamithaꞌiki nama khaꞌiki vara hora niꞌaꞌianahi:
—Okhaꞌa bana Deus ibavi kaijaꞌarini kania.
Ovari ꞌdama kakaꞌaniajani-ra ꞌdako karaho kajokiraki kapahani namania kanahojaꞌiki,
ꞌdama kajasonija arabo namania kahojaki.
Kidiania okhaꞌa bana mahija papira roaroaki paꞌitxi arabikhajahaki-ra ianikhavini — nihi ida athii.
9 Hari.
Ookhaꞌihi Deus ibavi kaijaꞌarini kania.
Okanikhariahi ida papira roaroaki paꞌitxi.
Oniaroa,
hora niꞌaha:
—Igathani bana hida papira roaroani paꞌitxi,
ihaꞌa bana!
Txinaki ida papira ibodinia,
bahina aꞌbana txinani fori hiki ida.
Txikaꞌdaki bana ida papira ivaꞌini bodinia — niha.
10 Oniaroa,
Deus ibavi kaijaꞌarini saꞌa ogathaniꞌihi ida papira roaroani paꞌitxi,
ohaꞌihi ida papira.
Obodia txinaki ida.
Okidafivini naothinia,
ni-txinajanaki ida papira roaroaki paꞌitxi.
Bianatxikaꞌdaki hida ovaꞌi.
11 Oniaroa,
hora vaniꞌaha:
—João,
ianamonioniꞌiana bana ida Deus athi.
Deus vara vaꞌora vaniꞌaki adani arabo hahavi kaijaꞌarini,
nação hahavi jaboni,
vaathi kahoarihakhamaki adani.
Deus vara vaꞌora vaniꞌaki adani arabo hahavi vakadikaꞌdaꞌdi vihiki jaboni.
Kidivarani hiki ida nahina namithaki kaimoni vakadiania.
Ianamonioniꞌiana bana hida varani vihina — hora vaniꞌaha.