Deus athi namoniva abono viꞌbamiki varani vihina
11
Hari.
Oniaroa,
onokiki ida vadami fori hiki hoariha.
Ogathaniꞌiki ida ava nahina oadani karajomini kaimoni.
Hora vaniꞌaha:
—Okhaꞌa bana mahija Deu-ra khai vaniꞌavini kagorani-ra irajomavini.
Irajoma bana ida Deu-ra vakanavaꞌigavini ibavini jaboni.
Vaꞌora rajoma jaboni bana adani ijaꞌari Deu-ra vakanamasiviki,
Deu-ra khai vaniꞌavini kagorani bodinia vahojaki,
nihafori vihina vaipohina.
2 Hariꞌa irajoma ida Deu-ra khai vaniꞌavini kagorani kavasiribanini ipohini,
oadani,
rabodini hiki.
Ijaꞌari Deu-ra avigariki vakadimoni bana ida gora kavasiribanini bodini.
Deu-ra avigarikia vakadaꞌahaꞌahaki ida Jerusalém sidaji.
42 masiko ipohina Jerusalém sidaji-ra vakaabokaki bana adani Deu-ra avigariki — vaniꞌaha.
3 Vara hora niꞌaꞌianaha:
—Vaꞌora okaronaki bana adani oathi namoniva abono viꞌbamiki.
Vakaimahaki ida makari jarojaroki.
Vananokiaki bana ida ijaꞌari kahojai asohiriki vaabono vakaꞌdaꞌdigariara kaimoni.
1 mil 260 mahi ipohini ijaꞌari-ra vaꞌora vakanamonibakhiavini hiki bana ida Deus athi.
4 Oliveira avani ꞌbamiki fori vihiki adani Deus athi namoniva abono viꞌbamiki.
Lamparina kaatiraki ꞌbamiki fori vihiki jaboni adani.
Hahavi vakaꞌdaꞌdiva viaha vigaakosoaꞌaha adani viꞌbamiki.
5 Vahoariha vakaijoꞌahi ida vaꞌora vanajahariharivini,
khaonanihi ida siho haꞌdini vabodia,
vaꞌora vanihimara kaimoni adani viꞌbamiki-ra vanofiriki.
Oniaroa,
ijaꞌari viꞌbamiki-ra vaꞌora najahariharivini-ra nofihi,
abinimaniꞌihi ida ijaꞌari — hora niꞌaha.
6 Deus vaꞌora noꞌaki bana adani viꞌbamiki danona.
Deus athia vaꞌora vakanamonivini oadani,
vakaabokaki ida bahi khararijanarina-ra vavahonariahivini.
Vakaabokaki ida jaboni paha hahavi-ra ama avanihavini.
Vakaabokaki ida jaboni arabo-ra vanapohimajavini.
Ipohiki ida pohimajahi.
Vaꞌora vanapohimajavini vaꞌora vanofibakhiaha,
vaꞌora vanapohimajamaniha.
7 Hari hiꞌihi ida viꞌbamiki vakadibadani,
Deus athi-ra vanamonivini.
Oniaroa,
hodi bihiaki anokhomini nokiavaharikia khaonaniki bana ada tapoꞌija,
makhira fori hiki ada.
Oniaro vaꞌora nigafaniki bana adani Deus athi namoniva abono viꞌbamiki,
vaꞌora naabiniꞌaha.
8 Oniaroa,
sidaji karaho kahagihini kania vanahojahaki bana ida vabaꞌona.
Sidaji karahoa abiniꞌboꞌdaꞌiki ada viꞌbamiki vakadikaꞌdaꞌdi ava akasanakhamakia.
Vajaharina arafiaki adani sidaji karaho kaijaꞌarini.
Sidaji karaho onini ꞌbamiki.
Onini hoarani Sodoma.
Onini hoariha Egito.
Jaharini arafiaki ida Sodoma sidaji kaijaꞌarini,
Egito kaaraboni kaijaꞌarini kohana vihiki vakadihojai,
oniani ida sidaji karaho onini-ra noꞌbamija.
9 Hari.
Ijaꞌari vâipohiki vaꞌora vanavanavanahaki bana adani viꞌbamiki vabaꞌona,
mahi ahoarabakosiki mahi pitani hikia.
Sidaji karaho kahagihinia vabaꞌona vada vaniꞌaki bana adani afohanana.
Ibavi hahavi kaijaꞌarini,
nação hahavi,
tribo hahavi vihiki.
Vaathi kahoarihakhamaki adani.
Ni-ijaꞌaria vavaꞌahaki ida vabaꞌona kaꞌdamahani.
10 Vaabinina viahania Deus athi namoniva abono viꞌbamiki vaꞌora vanapohimajakarahoꞌiki adani afobakhia arabo hahavi kaijaꞌarini,
oniani ida viꞌbamiki vaabinina ijaꞌari hahavia vavajahavini hija.
Khai vakhanikarahona mani ida ihinika-ra vanamonahavini hija,
vakadikhaiinia vaabono vakanavaꞌigakhamavini jaboni.
11 Mahi ahoarabakosiki,
mahi pitani hiki radahani naothinia,
Deus vaꞌora anahokiki bana adani viꞌbamiki.
Oꞌoiki bana ida viꞌbamiki vabaꞌona kania vaꞌi khami Deua bikaronaki.
Oniaroa,
avahokiki bana adani,
vigaamananiki bana adani.
Ijaꞌari hahavi vaꞌora vanokiki bana adani viꞌbamiki avahokiꞌina,
vaimahidakarahoki bana adani ijaꞌari.
12 Oniaroa,
Deus athi namoniva abono viꞌbamikia vakamithaki bana ida athii ꞌbaraki,
nama kamithavahaki ida athii vaꞌora niꞌaki bana:
—Vikasi bana hida!
Ijaꞌari vaꞌora vavajahariki vaꞌora vanokivini kabaꞌi,
avikasiki bana adani viꞌbamiki nama,
bahi hararana avikasiꞌina.
13 Oniaroa,
jorakia hoꞌdohoꞌdodanokiki bana ida arabo.
Binajahariki bana ida sidaji.
Gora ipohiki thararaꞌiki adarahaꞌiki ihimiꞌiki.
Ni-gora hahavi thararaꞌiki.
Ijaꞌari 7 mil vihiki vaipohina vaabiniꞌiki.
Ni-ijaꞌari hahavi vaabiniꞌiki.
Ijaꞌari avaaniꞌiki vaimahidakarahoki.
Oniaroa,
Deu-ra khai vaniꞌaha:
—Danoki ada Deus nama hojaki — vakhaniha.
14 Radahaꞌiki ida nahina jahariki ꞌbamiki ijaꞌari-ra vaꞌora naimahidaki.
Mitihini khaki bana ida nahina jahariki hoariha ijaꞌari-ra vaꞌora naimahidaꞌianaki kaimoni.
Deus ibavi kaijaꞌarini hoariha maina binaꞌithoki ida trombeta
15 Hari.
Oniaroa,
Deus ibavia Deus ibavi kaijaꞌarini hoariha maina binaꞌithoꞌihi ida trombeta hoariha.
Oniaroa,
nama Deus ibavia okamithaki ida athii ꞌbaraki,
vaniꞌaha:
“Jahari ni-vaꞌora vakaꞌdaꞌdijanariha adani arabo
hahavi kaijaꞌarini,
Deus kamonahi hahavi hiki.
Deus vani adani vaꞌora vavakaꞌdaꞌdira Cristo khama.
Deua binagathogathoꞌiki
ada Cristo,
ovari maina vaꞌora vakaꞌdaꞌdiki adani ijaꞌari hahavi.
Ni-anokhomirihi bana ida
hahavi-ra vakaꞌdaꞌdihahaꞌoadahavini
mahi hahavi.”
16 Oniaroa,
vaꞌora onokiꞌaha adani 24 vihiki vaipohina Deus viaha vahojaki.
Kaꞌdaꞌdi kavithi ibavinia vavithionahana avaasiasiaonahana,
Deu-ra vakanamasivivini,
17 vaniꞌaha:
“Ivani kaꞌdaꞌdi vakadikaꞌdaꞌdi i,
idanoki i.
Ikaabokaki ida hahavi inofiki.
Kanahinarini kari ihojaꞌboꞌdaꞌiki i.
Asia ihojaki i.
Ni-ahoarihapaꞌitxiki ida ihojani.
Avajahaki ida idanoni karaho haria inanokiahivini hiki.
Kamaꞌdaꞌiki ida arabo hahavi kaijaꞌarini-ra vaꞌora ivakaꞌdaꞌdivini.
18 Kaikahiki ida mahi ijaꞌari-ra vaꞌora inanokiahivini
hiki ida iihamahikarahoni kamahini.
Vavaꞌi jokojokokaꞌoaki bana adani ira vanofiriki.
Vakadihojai asohiriki inaabosivini mani ida vavaꞌi najokojokoni hija bana.
Vaꞌora inaabosiki bana
adani ijaꞌari kohana jaboni,
vagathanija kaimoni ida nahina jahariki vakadihojai asohiriki abosini.
Kaikahiꞌiki ida mahi kadaijaꞌari-ra vaꞌora inaabosivini kamahini.
Vaꞌora inaabosiki adani iathini namoniva abono,
kadahonai abono vihiki.
Vakadihojai jahaki inaabosivini kadanahina jahakia.
Vaꞌora inaabosiki bana jaboni adani iathini-ra vanaababakhiaki.
Vaꞌora inaabosiki jaboni bana adani kadaijaꞌari vakanahinaꞌahapikiki,
vakanahinariki vihiki jaboni.
Kaikahiꞌihi hida mahi vaꞌora inihimavini adani ijaꞌari hojai jaharikia vakahojaiki,
arabo hahavia kadamonahi-ra vanajahariharibakhiaꞌiki adani jaboni.”
Vakhaniha adani kaꞌdaꞌdi Deus viaha vahojaki.
19 Hari.
Oniaroa,
arabikhajahaki ida Deus gorana kaathani nama hojaki.
Deus gorana bodinia nokiaki ida ouro kacaixahi arca oniki.
Deus kavaꞌiponahi karajomihi hida.
Oniaroa,
araboja onokiki ida bahi banabanahana,
okamithaki jaboni ida athii,
okamithaki jaboni ida bahi tararahana.
Hoꞌdohoꞌdoki ida arabo.
Kharariki ada bahi karaho jaꞌdi itxani fori hiki araboa.
Niki bana hida namithaki kaimoni.