Nama nokiaki ada mabidiri fori hiki karahoda
12
Hari.
Oniaroa,
nama nokiaki ida nahina ogavahariki,
ijaꞌari-ra navaꞌibodivaranikarahoki.
Nokiaki ida gamo.
Abononi karafoavini hiki ada safini kidimakari hina.
Gamo ꞌdamani kanaboꞌania hojaki ada masiko.
Biakaꞌdaꞌdihaki ida kajamari kajahaki,
12 boviri ipohina hojaki kidikajamaria.
2 Kajahavidoki ida gamo.
Abononi vabarariariaki ida gamo.
3 Oniaroa,
nama nokiahi ida nahina hoariha ijaꞌari-ra vaꞌora navaꞌibodivaranikarahoki.
Nokiaki ada mabidiri fori hiki karahoda nadaraki.
Mabidiri fori hikia bivahojaki ida ꞌdaꞌdi 7 hiki ipohini.
Bivahojaki ida moroboi ꞌdakhaki 10 hiki ipohini.
Biakaꞌdaꞌdihaki bikavahojahananaki ida kajamari.
4 Mabidiri fori hikia miia biraꞌbaniki ada boviri nama pitani karahoa hojaki.
Biosonarariꞌaha araboja.
Pitani karaho ni-biraꞌbanirariꞌiki,
asia hojamaniha ada boviri nama.
Naothinia,
gamo kajahavidoki viahania daaniꞌaha ada mabidiri fori hiki.
Jorakia bihavini binofiki ada isai banini hiꞌiariki.
5 Oniaroa,
banini hiꞌaha ada isai,
makhira isani ada gamo kaisai.
Mabidiri fori hikia ni-bikaabokaki bihaꞌavini.
Deus ibavi kaijaꞌarinia bigathiꞌiki ada isai,
biavikasiꞌaha Deus ibavia Deus maakarina.
Kidivithi ibavinia vithiki ada Deus kaꞌdaꞌdi vakadikaꞌdaꞌdi hina.
Hiꞌada isai vaꞌora vakaꞌdaꞌdiki bana adani arabo hahavi kaijaꞌarini.
Ni-bivaꞌahaki kidihonari vakajonivini.
6 Oniaroa,
gafanahaꞌihi ida gamo amasia.
Deua bikaibavijahahijoraki ida gamo ibavi bivahojaki kaimonia.
Hojani oadani Deua bikaijahitaki ida gamo.
1 mil 260 mahi ipohini amasia hojaꞌihi ida gamo.
7 Oniaroa,
Deus ibavia vaabono vakodakhamaꞌaha adani Miguel,
mabidiri fori hiki khama.
Deus ibavi kaijaꞌarini danoki ada Miguel.
Ovari,
ipohina vihiki khama vaꞌora vidafiahaha adani mabidiri,
kidipohi vihiki.
Mabidiri fori hiki vaꞌora vidavini jaboni adani Miguel.
8 Mabidiri fori hiki ni-vaꞌora kaabokajanaki.
Miguel vadanona biaradamiki ada mabidiri fori hiki vadanona,
oniani ida Deua bivahojaki kania Miguel mabidiri fori hiki vahojana-ra vavaꞌahajanaravini hija.
9 Miguel kidipohi khama vanahokahiꞌaha ada mabidiri fori hiki karahoda araboa.
Hiꞌada mabidiri fori hiki hojaꞌboꞌdaꞌiki ada.
Onina hoariha Jahari,
onina hoariha Satanás.
Ovari vaꞌora korijanahaki adani arabo hahavi kaijaꞌarini.
Mabidiri fori hiki kidipohi khama vahokahina araboa,
ni-vahojajanaki Deus kania nama.
10 Oniaroa,
okamithaki ida athii ꞌbarakia nama,
nihani:
“Hidakabaꞌi Deus vaꞌora akavaꞌijoakaꞌoaki adani kidijaꞌari.
Deus ijaꞌari hahavi-ra vaꞌora nanokiahivini hihi ida danona.
Deus vaꞌora vakaꞌdaꞌdiki adani arabo hahavi kaijaꞌarini.
Cristo jaboni vaꞌora nanokiahiki adani danona.
Kamaꞌdaꞌiki ida arabo hahavi kaijaꞌarini-ra vaꞌora vakaꞌdaꞌdivini.
Jahari ni-hojajanaki Deus viaha,
Jesus kaijaꞌari-ra vaꞌora akaraganahabakhiaki kaimoni.
Mahi,
joma hiki Deu-ra navaꞌisohibakhiavini hiki ida arigamina kahojai asohirikia vakahojaina.
Hari.
Deus ibavia akaraꞌoꞌaha hada Jahari araboja.
11 Arigamina vavakaijokaki ida Ovilia Dorona oniki abiniꞌina vakadimoni hina,
oniani ida Ovilia Dorona oniki amana vakadisaꞌai fori nihani hija.
Kaꞌoa hiki ida Jesus monina-ra vanamonibakhiavini,
oniani ida Jesus athia vaꞌora kanasaꞌaiki fori nihaja.
Vahoariha vaꞌora vanaabinivini vaꞌora vanofivini kabaꞌi,
arigamina vaniꞌaha:
‘Haria vanaabiniha,
haria vanaabiniha,
ni-Jesu-ra akavaꞌipahinipaꞌitxirihi.’
Oniani ida mabidiri fori hiki vaꞌora kaabokajanaravini hija.
12 Hahavi Deus ibavia vahojaki,
khai vakhaniꞌa bana!
Arabo kaijaꞌarini,
aꞌonimaina,
jahariki-ra avagathanija bana!
ꞌDako karaho kajokirakia vahojaki jaboni,
aꞌonimaina,
jahariki-ra avagathanija bana.
Arabo kaijaꞌarini vakadiania gaariꞌaha ada Jahari.
Vaꞌi jokojokokarahoki ada.
Biogaki ida mahi ipohijanariki-ra vahojavini,
arabo kaijaꞌarini-ra vaꞌora napohimajara kaimoni,
oniani ida vaꞌi najokojokoni hija.”
Niki ida athii okamithaki nama.
13 Hari.
Mabidiri fori hikia bikavaꞌibodivaraniki ida hokahiꞌina araboa.
Oniaroa,
mabidiri fori hikia binajoikahiki ida gamo kidisai ꞌbanaꞌiki.
14 Oniaroa,
gamoa bigathaniꞌiki ida bihini ꞌbamiki kokoi naꞌbahaha bihini fori hiki,
aráboja kaimoni ida gamo amasia.
Ibavi Deua bikaibavijahahijoravinia okhaꞌihi ida gamo.
Badara ahoarabakosiki badara bobini paꞌitxi hiki hojaꞌihi ida gamo amasia.
Hojani oadani,
Deua bikaijahitaki ida.
Mabidiri fori hikia ni-bikaabokajanaki ida gamo-ra napohimajavini.
15 Oniaroa,
mabidiri fori hikia biakasohi ida paha karaho,
vaini ahapini fori hiki,
gamo naothinia,
paha biakarojaja kaimoni ida gamo.
16 Oniaroa,
jorakia arabikhajahahi ida arabo,
oꞌoihi ida paha mabidiria biakasoki.
17 Oniaroa,
mabidiri fori hiki bikavaꞌijokojokokarahoki ida gamo.
Oniaroa,
mabidiri fori hiki vaꞌora vidavini adani gamo kaisai vahoariha,
hiꞌadani Deus athi-ra vanaabajahakiki,
ni-vakavaꞌipahinipaꞌitxiki ida Jesus athi-ra vavakaijokavini.
Jesus monina-ra vanamonibakhiaki adani.
18 Oniaroa,
mabidiri fori hiki karahoda gaakosoaki ꞌdako karaho kajokiraki kakaasini pasapasania.