2 Jomahi hiihiha nokiani fori hiki o paha katapoꞌijani onokiꞌiki.

Urso ꞌdama kanokiani fori hiki ida paha katapoꞌijani ꞌdama.

Leão bodi nokiani fori hiki ida paha katapoꞌijani bodi.

Mabidiri karahoda fori hikia binoꞌaki ada paha katapoꞌijani kaꞌdaꞌdi kavithi ibavinia.

Binoꞌaki jaboni ada danona,

bikaabokaja kaimoni ida badani danoki,

mabidiri kabadani fori hiki.

Mabidiri fori hiki danona-ra gathanivini mani ida paha katapoꞌijani ijaꞌari-ra vakaꞌdaꞌdivini-ra kaabokavini hija.

3 Kaꞌdaꞌdi kahoarania hojaki ida siivi karaho kaakhaniꞌiki.

Karahoni arafiani kabaꞌi ida siivi,

ni-abiniꞌiki,

aihotaꞌiki ada.

Ijaꞌaria vanokiha;

vakavaꞌibodivaranikarahoꞌaha,

vaabono vara vakaniꞌakhamaꞌaha:

—Ni-abiniꞌiki ada paha katapoꞌijani,

danoki ida kidibadani — vakhaniha,

oniani ida arabo hahavi kaijaꞌarini tapoꞌija-ra vavaipohihavini hija.

4 Mabidiri karahoda fori hikia binoꞌaꞌiki ada paha katapoꞌijani danona vaꞌora vakaꞌdaꞌdira kaimoni adani arabo hahavi kaijaꞌarini.

Arabo hahavi kaijaꞌarinia vakanamasiviki ada mabidiri fori hiki,

onivani fori hija ida paha katapoꞌijani-ra vakanamasivivini jaboni.

Vavajahaki ida paha katapoꞌijani kavarani.

Vara vakhaniki adani ijaꞌari:

—Ni-hojaki ada hoariha hihada paha katapoꞌijani fori hiki.

Danoꞌoamanira ada.

Ni-nahina bikaabokaki hida hihada paha katapoꞌijani danona-ra nihimavini — vakhaniha.

5 Oniaroa,

Deua bivaꞌahaki ada paha katapoꞌijani Deu-ra kanavaranihavini,

varani jahariki arafiakia.

Arafiaki ida korijanahia kavaranina biniꞌaha:

—Hovani ojahakaꞌoaki ho,

ni-jahapaꞌitxiki ada Deus — niha ada paha katapoꞌijani.

Oniaroa,

Deua bivaꞌahaꞌihi ida paha katapoꞌijani arabo hahavi kaijaꞌarini-ra vaꞌora vakaꞌdaꞌdivini 42 masiko ipohina.

6 Paha katapoꞌijania bikanavaranihaꞌihi ida Deus onina,

Deus ibavi,

Deus ibavia vahojaki hiki.

Onivani fori vaꞌora nihaha adani Deus kania vahojaꞌiki.

7 Hari.

Paha katapoꞌijania bigathaniꞌihi ida danoi.

Deua bivaꞌahaꞌihi ida paha katapoꞌijani Deus kaijaꞌari-ra vaꞌora vidavini,

vaꞌora naabinivini.

Bivaꞌahavini mani ida arabo hahavi kaijaꞌarini-ra honariafiahavini-ra kaabokavini hija.

Vaꞌora kaabokaki adani tribo hahavi,

nação hahavi vihiki.

Vaathi kahoarihakhamaki adani.

Vaꞌora honariahahaviki adani.

8 Oniaroa,

ijaꞌari hahavi araboa vahojakia vakanamasiviha ada paha katapoꞌijani,

vavakaijokaki ada.

Vakadivaꞌibodivarani vaꞌora korijanahaꞌoamanira adani.

Deus vavanihaki ada paha katapoꞌijani.

Niki bana hida namithaki kaimoni.

Hari.

Hahavi amonahani kari Deua binajiriꞌiki ida kidijaꞌari vihiki kaimoni vaonina kidipapira kania.

Ovilia Dorona oniki kapapira ida.

Ovari abono-ra vaꞌahaꞌiki abinina kidijaꞌari vakadimoni.

Kidipapira kania hojahi ida ijaꞌari onini;

bivahojahi bana ida kidimahi anokhomiriki Deus kania.

Hojarihi ida ijaꞌari onini;

ni-bivahojaki bana ida kidimahi anokhomiriki Deus kania.

Hari.

Paha katapoꞌijani-ra vakanamasiviki adani ijaꞌari mahi anokhomiriki-ra vavahojariki.

9 Hari.

Avakamithavini avanofihi;

vakamithajahaki bana.

10 Deua bikavaꞌibodivaranijoraki ida hana hini ijaꞌari gathaki kaimoni.

Gathaki bana ida,

jokoa aihotarihi ida ijaꞌari.

Deua bikavaꞌibodivaranijoraki ida ijaꞌari hana hini sakahi hiki kaimoni tarasara.

Sakahi hini abiniki bana ida,

jokoa aihotarihi ida ijaꞌari.

Oniani ida Deus kidijaꞌari vaꞌora nagathogathoꞌiki-ra vaꞌora navaꞌisohivini hija:

—Vanaabajahaki hida oathi.

Aꞌonira vanajahariharivini kabaꞌi,

hariꞌa hora vakavaꞌipahinipaꞌitxi bana.

11 Hari.

Oniaroa,

onokiki ada tapoꞌija hoariha,

arabo katapoꞌijani ada.

Arabo imani bodinia okhaonaniki ada.

Bivahojaki ida moroboi ꞌdakhaki,

carneiro morobo ꞌdakhani fori hiki.

Mabidiri karahoda athi fori hiki ida arabo katapoꞌijani athi.

12 Bivahojaki ida danona,

paha katapoꞌijani danona fori hiki.

Arabo katapoꞌijani vaꞌora nanokiahiha adani ijaꞌari danona paha katapoꞌijani viaha.

Vaꞌora avadadamiki adani ijaꞌari hahavi araboa vahojaki,

vakanamasivira kaimoni ada paha katapoꞌijani.

Hiꞌada tapoꞌija ꞌdaꞌdia siina kaakhaniꞌiki abinira kaimoni,

ni-abiniꞌiki,

aihotaꞌiki ada.

13 Arabo katapoꞌijania bada biniꞌaki ida badani danoki ijaꞌaria vanokiꞌiariki,

vavaꞌi kaꞌbarani hiki kaimoni.

Ijaꞌari hahavia vanokivini oadani,

bikavahonariahiki ida siho kahaꞌdini nama kaagarini araboja.

14 Deua bivaꞌahaki ada arabo katapoꞌijani badani danoki ipohikia kabadanina paha katapoꞌijani viaha,

oniani ida arabo hahavi kaijaꞌarinia Deus vavanihavini hija.

Nimania ida vaꞌora korijanahavini.

Arabo katapoꞌijani vaꞌora vara niꞌaha adani arabo hahavi kaijaꞌarini:

—Vanamonaha bana ida paha katapoꞌijani amovana,

hiꞌada ꞌdaꞌdia siiꞌiki kaakhaniꞌiki,

ni-abiniꞌiki — niha ada arabo katapoꞌijani.

Oniaroa,

ijaꞌaria vanamonahaꞌihi ida paha katapoꞌijani amovana.

15 Arabo katapoꞌijania bigathaniꞌiki ida danoi paha katapoꞌijani amovana-ra nahokiki kaimoni.

Oniania,

paha katapoꞌijani amovana viridi biakaraboirariꞌaha,

kavaꞌikhamiꞌaha,

hokiꞌaha.

Varavarana-ra kaabokaꞌiki ada paha katapoꞌijani amovana.

Biniꞌaha:

—Onofiki ida ijaꞌari hahavi hora vakanamasivivini.

Ijaꞌari hora vakanamasivirihi;

onaabinihi — niha.

Oniaroa,

paha katapoꞌijani amovana vaꞌora naabiniꞌiki adani ijaꞌari kanamasivina vihiriki.

16 Paha katapoꞌijani amovana vaꞌora avadadamiꞌaha adani arabo hahavi kaijaꞌarini vasaꞌa kaꞌaniajani,

vaatha hiki,

vakarajomira kaimoni.

Vaꞌora avadadamiha adani kaꞌdaꞌdi vihiki,

honai abono vihiki jaboni.

Vakanahinaꞌahapikiki,

vakanahinariki,

honai abono gathaki,

honai abono gathariki vihiki vasaꞌa kaꞌaniajani,

vaatha hiki vakarajomina vaꞌora avadadamiha.

17 Karajomirihi ida ijaꞌari;

ni-abononi kavapavakarihavini-ra kaabokaki.

Ni-bikaabokaki ida kidinahina-ra pavakari nihavini jaboni.

Paha katapoꞌijani onina ida rajomi ijaꞌari vaatha,

vasaꞌa hikia hojaki.

Onina kanúmeroni ida rajomi jaboni.

18 Paha katapoꞌijania bivahojaki ida número onini 666.

Makhira onina karajomini ida número.

Ogahakia biogaki ida nahina nini ida paha katapoꞌijani kanúmerona.

Ogaharikia ni-biogaki.