2 Oniaroa,

okamithaꞌihi ida athii ꞌbaraki nama.

Paha karaho gororofoniki fori hiki ida athii ithoni,

bahi taararahaki fori hiki jaboni ida.

Ijaꞌari vakadiharpa ithoki fori hiki ida athii ithoni okamithaki.

3 Vigaakosoaki adani 144 mil ijaꞌari vaipohina kaꞌdaꞌdi vakadikaꞌdaꞌdi kavithi ibavini viahania.

Ijaꞌari fori vihiki vahokiki avakoꞌbamahakhamaki vaviaha,

kaꞌdaꞌdi 24 vihiki vaipohina vaviaha jaboni vigaakosoaki adani 144 mil ijaꞌari vaipohina.

Moro kajaꞌdia vaahiaki adani ijaꞌari vâipohiki.

Hiꞌadani 144 mil vihiki vaipohina kaꞌoa avakogaki ada moro.

Deus vaꞌora akavaꞌijoaki adani arabo hahavi kaijaꞌarini vahoariha vahararana,

vaꞌoaniaro kaꞌoa vakaabokaki ada moro kajaꞌdi-ra vakavaꞌojomoꞌihavini.

4 Hiꞌadani 144 mil vihiki vaipohina ni-vamakhaniki.

Vajahakaꞌoaki adani.

Imakhinava gamo-ra viꞌomaravini oadani fori vihiki adani.

Ovilia Dorona oniki-ra vavaipohihaꞌoadahaki adani.

Vagathogathoꞌimidiaki adani ijaꞌari Deus kaimoni arabo hahavi kaijaꞌarini vahararana.

Deus Ovilia Dorona oniki khama vaꞌora avakavaꞌijoaki adani kidijaꞌari vihira kaimoni,

oniani ida Ovilia Dorona oniki kania vaabono gahinai vanihavini hija.

5 Ni-hoaranija korijanahia vakavaraniki.

Vajahakaꞌoaki adani.

6 Hari.

Oniaroa,

onokiꞌaha ada Deus ibavi kaijaꞌarini hoariha.

Nama jararinia raboki ada.

Ibavi hahavia avanamonionihi ida moni jahaki anokhomiriki Deua bikaronaki arabo hahavi kaijaꞌarini vakadimoni.

Nação hahavi,

tribo hahavi vakadimoni,

vaathi kahoarihakhamaki vakadimoni ida.

Vakadiania okhaꞌiki bana ada.

Vaꞌora akanamonionivini hiki ida bana moni vakamithaja kaimoni.

7 Athii ꞌbarakia vaꞌora niꞌaha:

—Vifini bana ada Deus!

Danoki ada.

Asohikaꞌoaki ida kidihojai,

oniania khai vaniꞌa bana ada Deus.

Kaikahiꞌiki ida mahi Deus ijaꞌari hahavi-ra vaꞌora nasohivini kamahini.

Ijaꞌari hojai jahakia vakahojaikia vagathanihananaki bana ida vakadihojai jahaki abosini.

Ijaꞌari hojai jaharikia vakahojaikia vagathanihananaki bana ida vakadihojai jahariki abosini jaboni.

Vakanamasivi bana ada Deus,

ovaria binamonahaki ida nama,

arabo,

ꞌdako kajokiraki karaho,

vaini kamaꞌdani kapahani hiki.

8 Oniaroa,

onokiꞌaha ada Deus ibavi kaijaꞌarini hoariha.

Ovari vara niꞌimidiaki naothia kasiagaꞌiki ada.

Nihaꞌaha:

—Ihimiꞌiki ida Babilônia sidaji kaijaꞌarini vadanona.

Vinho fori hiki ida makhira kidigamo hiriki khama vaabono vakaviꞌomakhamavini.

Babilônia sidaji kaijaꞌarini vinho fori hikia vaꞌora vanoꞌavini hiki adani arabo hahavi kaijaꞌarini viꞌavija kaimoni.

Oniani ida arabo hahavi kaijaꞌarini-ra vaꞌora najaharikaꞌoaja.

Hari.

Vaihimiꞌiki adani ijaꞌari Babilônia sidaji kaijaꞌarini fori vihiki — niha ada Deus ibavi kaijaꞌarini.

9-10 Oniaroa,

onokiꞌaha ada Deus ibavi kaijaꞌarini hoariha.

Ovari vara niꞌimidiana naothinia kasiagaki ada.

Athii ꞌbarakia biniꞌaha:

—Vaꞌora onavaꞌisohiki adani ijaꞌari paha katapoꞌijani,

paha katapoꞌijani amovana hiki-ra vaꞌora vakanamasiviki.

Deus vaꞌora napohimajaki bana adani ijaꞌari.

Deus vaꞌora naimaꞌbanaki jaboni adani ijaꞌari paha katapoꞌijani onina vakarajomiki vaatha,

vasaꞌa.

Deus vaꞌora kavaꞌijokojokokarahoki adani ijaꞌari,

ni-vaꞌora vaꞌadipaꞌitxiki.

Vagathanihananaki ida vakadihojai asohiriki abosini.

Nahina jaharini arafiakia Deus vaꞌora arakhaki bana adani.

Vaꞌora nahokahiki bana adani siho kakaraho,

enxofre hiki haꞌdini ibavinia,

vakamithaki bana ida vaimana ꞌbanani arafiaki.

Deus ibavi kaijaꞌarini,

Ovilia Dorona oniki khama vada vaꞌora vaniꞌaha adani siho kabodinia vahojaki.

11 Aakasihi ida siho kaojini mahi hahavi,

joma hahavi.

Ni-kaihimiki ida siho.

Ni-ihimiki ida vakadimahi jaharini arafiaki.

Ni-fai nipaꞌitxiki ida vaimana ꞌbanani vakamithaki mahi,

joma hiki.

Vakhanimanira adani ijaꞌari paha katapoꞌijani-ra vakanamasiviki.

Vakhanimanira adani ijaꞌari paha katapoꞌijani amovana-ra vakanamasiviki jaboni.

Vakhanimanira adani ijaꞌari paha katapoꞌijani onina karajomihi-ra vavahojaki jaboni — niha ada Deus ibavi kaijaꞌarini.

12 Hari.

Deus kaijaꞌari arihina-ra akavaꞌibodivaraniva bana mahija Deu-ra akavaꞌipahinipaꞌitxiravini.

Anaabahahaꞌoadahava ida Deus athi.

Vahoariha haria vanajahariharivini kabaꞌi,

Jesu-ra avaipohihaꞌoadahava,

Jesu-ra avakaijokahaꞌoadahava.

13 Hari.

Oniaroa,

okamithaꞌihi ida athii khani nama.

Hora niꞌaha:

—Inajiri bana hida hihida athii:

Deus vaꞌora kajoamoraki bana adani kidijaꞌari vaabono vavaꞌahaki vaabinina,

bada vaniꞌavini oadani ida badani Deus vaꞌora honariavini hiki.

Oniaroa,

niha ada Maꞌonahai Jahaki:

—Haꞌa,

asohiki hida kadavarani.

Arabo vahojana oadani karahoki ida vakadibadani Jesus kaimoni.

Vaabinina naothinia avaakoiriki bana adani.

Vagathanihananaki ida vakadibadani jahaki abosini — niha ada Maꞌonahai Jahaki.

14 Hari.

Vada oniꞌianahi,

onokiꞌaha ada bahi vaforiki.

Bahi namana vithiꞌiki ada makhira nokiana fori hiki.

Biakaꞌdaꞌdihaki ida kajamari ouroa kakajamarihi kajahaki.

Saꞌa bigathiki ida kidisaꞌai tarasara vakoniki sajoki.

15 Oniaroa,

Deus gorana nama khaonaniki ada Deus ibavi kaijaꞌarini.

Athii ꞌbarakia vara biniꞌaha ada bahi vaforiki namana vithiki:

—Iavaꞌboahahavi bana ida rakhajahi bononi aꞌdiki ibavi hahavi,

arabo hahavi hojaki.

Kamaꞌdaki ida mahi aꞌboaja kaimoni ida arabo hahavi karakhajahini bononi aꞌdiki.

Rakhajahi bononi aꞌdiki fori vihiki adani ijaꞌari hojai asohirikia vakahojaiki araboa vahojaki.

16 Hari.

Bahi namana vithikia kiditarasara vakonikia biavaꞌboaꞌihi ida arabo hahavi karakhajahini bononi,

binajoroniꞌihi.

17 Hari.

Onokiꞌaha ada Deus ibavi kaijaꞌarini hoariha Deus gorana nama khaonanina.

Ovaria jaboni bivahojaki ida tarasara vakoniki sajoki.

18 Naothinia onokiꞌaha ada Deus ibavi kaijaꞌarini hoariha.

Siho kahaꞌdiki akadavaꞌava abono ada.

Ovaria biakadavaꞌaki ida siho kahaꞌdiki.

Incenso ahaꞌdini ibavini kania khaꞌaha.

Athii ꞌbarakia vara biniꞌaha ada Deus ibavi kaijaꞌarini tarasara vakoniki sajoki-ra gathiki:

—Khanokhanohaꞌa bana!

Iavaꞌboahahavi bana ida uva ꞌdaꞌdini vadinia hojaki.

Aꞌdiki ida uva bononi arabo hahavia.

Ijaꞌari kahojai asohirikia kahojaibakhiaki fori hiki ida uva aꞌdiki.

19 Oniaroa,

Deus ibavi kaijaꞌarinia biavaꞌboahahaviꞌihi ida uva ꞌdaꞌdini kiditarasara vakonikia.

Biosonaꞌihi ida uva hahavi bavi karaho bodinia uva-ra vakadaꞌahaꞌahavini hiki aꞌbani aniaja kaimoni.

Onivani fori hija bana ida namithaki ijaꞌari Deus athi-ra vanaabariki vakadiania.

Deus vaꞌora kavaꞌijokojokokarahovini mani ida hojai asohiriki abosinia vaꞌora noꞌavini hija bana.

20 Sidaji baninija hojaki ida uva-ra vakadaꞌahaꞌahavini bavini.

Jiꞌbiniꞌiki ida uva bavini uva aꞌbania.

Ahovarirakosiꞌiki ida uva aꞌbani.

Ijaꞌari Deus athi-ra vanaabariki kohana vaamana nokiani fori hiki ida uva aꞌbani.

Ni-paꞌitxiki ida ama khaonanini,

arafiaki ida.

300 quilômetros oadani ida ama,

vaini fori hiki ida.

Vaadi ꞌbamiki hiki ida bihiani ama.