João vaꞌora nokiꞌaha adani Deus ibavi kaijaꞌarini 7 vihiki vaipohina vahoariha
15
Hari.
Oniaroa,
onokiꞌihi ida rajomi hoariha Deus ibavia.
Ni-nahina hini ogavahaki.
Ijaꞌari-ra narapataki ida.
Vahojaki adani Deus ibavi kaijaꞌarini 7 vihiki vaipohina.
Vakadibadani hiki ida ijaꞌari-ra vanapohimajavini.
Deus ijaꞌari-ra vaꞌora kavaꞌijokojokokarahovini mani ida pohimajahi 7 hiki-ra karonavini hija ijaꞌari vakadiania.
7 pohimajahi ipohini radahani naothinia,
radahaꞌihi jaboni ida Deus ijaꞌari-ra kavaꞌijokojokovini.
2 Oniaroa,
onokiꞌihi ida ꞌdako karaho fori hiki kajokiraki.
Vidroa siho ahaꞌdikia kabodihadihaki anokiajavarivahaki fori hiki ida ꞌdako.
Vaꞌora onokiꞌiki jaboni adani Deus athi-ra vanaabahahaꞌoadahaki.
Paha katapoꞌijani vaꞌora kaboroborovini kabaꞌi,
ni-vakavaꞌipahinipaꞌitxiki ada Deus.
Ni-vakanamasiviki ada paha katapoꞌijani,
ni-vakanamasiviki jaboni ada paha katapoꞌijani amovana.
Ni-khai vaabono vavaniꞌaki paha katapoꞌijani onina-ra vakaathahavini vaatha.
Ni-khai vaabono vavaniꞌaki paha katapoꞌijani kanúmero-ra vakaathahavini vaatha jaboni.
ꞌDako kajokiraki karaho kapahani vidroa anokiajavarivahaki fori hikia vigaakosoaki adani Deus athi-ra vanaabaki.
Vakasaꞌahaki ida harpa Deus vaꞌora noꞌafiahavini hiki,
vanaꞌithoja kaimoni.
3 Oniaroa,
Deus kahonai abono Moisés kohana oniki kamoroa vaahiaꞌaha.
Ovilia Dorona oniki kamoroa vaahiaꞌaha jaboni.
Khaniki ida vakadimoro kaathi:
“Deus,
ivani kaꞌdaꞌdi vakadikaꞌdaꞌdi i.
Ivani ikaabokaki ida hahavi inofiki.
Danoki jahaki ida kadabadani.
Vaꞌora ivakaꞌdaꞌdiki adani arabo hahavi kaijaꞌarini.
Asohikaꞌoaki ida kadabadani ijaꞌari vakadiania.
Kaꞌoa hiꞌoamanija ida kadavarani jaboni.
4 Ivani kaꞌdaꞌdi vakadikaꞌdaꞌdi i,
ijaꞌari hahavi ira vifiniva bana.
Ijaꞌari hahavia vara vavaniꞌaki ida kadabadani danoki jahaki.
Ivani ijahakaꞌoaki i.
Arabo hahavi kaijaꞌarini iviahania avikhaki bana,
ira vakanamasiviki kaimoni.
Vanokiki ida kadabadani asohikaꞌoaki,
oniani ida ira vakanamasivivini hija bana.”
Khanimanira ada vakadimoro kaathi.
5 Hari.
Vaahiana naothinia,
onokiki ida Deus gorana nama.
Akarabikhajahaꞌiki ida gorana kaathani.
Gora bodinia hojaki ida makari kagorahi.
Deus ibavi ida.
6 Oniaroa,
Deus ibavi kaijaꞌarini 7 vihiki avikhaonaniꞌaha gora bodinia.
Vakaimahaki ida makari vaforiki,
jahaki,
vagaki.
Vakamakhoꞌinihaki ida ouro kacinturãohi.
Vakadibadani hiki ida ijaꞌari Deus athi-ra vanaabariki-ra vaꞌora vanapohimajavini.
7 Hari.
Ijaꞌari fori vihiki vahokiki avakoꞌbamahakhamaki hoarana vaꞌora noꞌahananaha adani Deus ibavi kaijaꞌarini 7 vihiki vaipohina ouro kabavihia.
Hihida ouro kabavihi Deus kavaꞌijokojokoi karahoa binajiꞌbiniki.
Arabo hahavi kaijaꞌarini vanamana ahovariki kaimoni ida bavi daini.
Hokihahaꞌoadahaki ada Deus,
ni-ihimiki ida kidimahi.
8 Deus jahana,
vagana,
danona hikia binajiꞌbiniki ida Deus gorana nama,
oji fori hiki ida gora-ra najiꞌbiniki.
Radaharini oadani ida pohimajai 7 hiki ipohini Deus ibavi kaijaꞌari 7 vihiki vaipohina vavahojaki,
ni-ijaꞌari Deus gorana oꞌoini-ra kaabokaki.