—Avikhaꞌa bana,

avanahoroa bana hida 7 bavi ipohini Deus kavaꞌijokojokoi karahoa binajiꞌbiniki.

Arabo hahavi kaijaꞌarini vanamana avahoari bana.

2 Hari.

Deus ibavia,

Deus ibavi kaijaꞌarini hoarana imidia kidibavi daiki-ra ahovariꞌiki arabo hahavi kaijaꞌarini vanamana.

Oniaroa,

vaabaijohaꞌiki adani ijaꞌari vakarajomiki paha katapoꞌijani karajomia vaatha,

paha katapoꞌijani-ra vakanamasiviki vihiki.

Naꞌbahaki ida vakadibaijo.

ꞌBanakarahoki ida.

3 Hari.

Deus ibavia,

Deus ibavi kaijaꞌarini hoariha maina ada bavi daiki-ra ahovariꞌaha ꞌdako karaho kajokiraki namania.

ꞌDako kapahani ijaꞌari abiniki amani fori nihaꞌiki.

Nahina hahavi hokiki paha bodinia hojaki abiniꞌiki.

4 Hari.

Deus ibavia,

Deus ibavi kaijaꞌarini hoariha maina kidibavi daiki-ra ahovariꞌaha.

Vaini kaꞌdaꞌdini hahavi kapahani,

arabo hahavi kavainini hikia biahoariꞌiki ida kidibavi daini,

oniani ida vaini kapahani-ra ama anihananaja.

5-6 Oniaroa,

okamithaꞌiki ada Deus ibavi kaijaꞌarini hoariha athi,

ovari paha hahavi-ra akadavaꞌaki.

Deu-ra vara niꞌaha:

—Sohikaꞌoaki hida kadabadani ijaꞌari vakadiania.

Sohikaꞌoaki ida kadabadani ijaꞌari-ra napohimajavini.

Ivani ijahakaꞌoaki i.

Kanahinarini kari ihojahahaꞌoadahaki i.

Asia ihojaki i.

Vaꞌora inapohimajaki adani iathini-ra vanaabariki vaipohiki.

Vaꞌora vanaabinihananaꞌiki adani iathini namoniva abono vaipohiki,

vaꞌora vanaabiniꞌiki adani kadaijaꞌari vahoariha jaboni.

Avahoariꞌiki ida kadaijaꞌari vaamana,

oniani ida vaꞌora inoꞌavini hija ama viꞌaviki kaimoni.

Vagathaniꞌiki ida vakadihojai jahariki abosini.

7 Oniaroa,

Deu-ra vakanavaꞌigavini ibavini kania okamithaꞌihi ida athii:

—Deus,

ivani kaꞌdaꞌdi vakadikaꞌdaꞌdi i.

Ikaabokaki ida hahavi inofiki.

Sohikaꞌoaki hida kadabadani ijaꞌari vakadiania.

Sohikaꞌoaki ida kadabadani ijaꞌari-ra napohimajavini.

Vagathaniꞌiki ida vakadihojai jahariki abosini.

8 Hari.

Deus ibavia,

Deus ibavi kaijaꞌarini hoariha maina kidibavi daiki-ra ahovariꞌiki safini namana,

oniani ida safini afana-ra anarafiaja,

ijaꞌari-ra vaꞌora nakhoroniꞌiki.

9 Safini afana vaꞌora nakhoronihananaꞌaha adani Deus athi-ra vanaabariki.

Kabaꞌi,

ni-vakavaꞌipahinipaꞌitxiki ida vakadihojai jahariki,

ni-Deus danona-ra khai vaniꞌapaꞌitxiriha adani.

Deus vani vaꞌora napohimajavini,

oniani ida Deus onina-ra vakanavaranihavini hija.

10-11 Hari.

Deus ibavia,

Deus ibavi kaijaꞌarini hoariha maina kidibavi daini-ra ahovariꞌaha paha katapoꞌijani kavithi ibavini namania.

Ahovariꞌiki ida bavi daini paha katapoꞌijani kidijaꞌari hahavi khama vakadiania,

oniani ida nabakibakini hija.

Vaimana ꞌbanani karaho-ra vakamithavini mani ida vaabani-ra vakharomisivini hija.

Vavahojahananaki ida baijo naꞌbahaki jaboni,

vakamithaki ida vaimana ꞌbanani arafiaki.

Deus vaꞌora vanaimaꞌbanakarahovini mani ida varani jaharikia Deus nama hojaki-ra vakanavaranihahaꞌoadahavini hija.

Ni-vakavaꞌipahinipaꞌitxiki ida vakadihojai jahariki.

12 Hari.

Deus ibavia,

Deus ibavi kaijaꞌarini hoariha maina kidibavi daini-ra ahovariꞌiki vaini karaho Eufrates oniki namania.

Aforaꞌiki ida vaini kapahani.

Aforani naothinia,

nokiahi ida arabo foraki avikafianira kaimoni adani arabo kaijaꞌarini vakadikaꞌdaꞌdi,

hiꞌadani safini bivikhamananiki kaniaja vikhaki.

13 Oniaroa,

vaꞌora onokiki adani maꞌonahai vajaharikaꞌoaki avahoarabakosiki.

Vakaramonavahaki adani.

Virakaꞌda nokiani fori vihiki adani.

Mabidiri karahoda fori hiki bodia khaonaniꞌiki ida hoarani,

arabo katapoꞌijani bodia khaonaniki ida hoariha,

Deus athi namoniva abono ꞌbadara bodia khaonaniki ida hoariha.

14 Vajahariꞌoamanira adani hiꞌadani maꞌonahai vajaharikaꞌoaki.

Badani danokia vakabadanibakhiaki,

oniani ida ijaꞌaria vakavaꞌibodivaranikarahovini hija.

Arabo hahavi kaijaꞌarini kania avaadahaoniki adani maꞌonahai vajaharikaꞌoaki,

vaꞌora vanajoronira kaimoni adani arabo kaijaꞌarini vakadikaꞌdaꞌdi,

vaꞌora vaniꞌaha:

—Avaabononi vakanajoronikhamaꞌa mahija Deus kidijaꞌari khama vaꞌora avidaꞌavini — vaꞌora niꞌaha.

Deus ijaꞌari-ra nasohivini kamahini,

Deua binanokiaki ida danona arafiaki.

Niki bana hida namithaki kaimoni.

15 Hari.

Oniaroa,

Jesus Cristo haria navaꞌisohiꞌiki:

—Mitha vaniꞌa.

Ojoiki bana ho.

Ijaꞌari hora vanokharavini kabaꞌi,

ojoiki bana ho vakadiania.

Boꞌdi abono kaikahina vani fori ohiki bana ho.

Avavaꞌini-ra okadihivini.

Hari.

Makari jahaki-ra vakaimahavini vani fori hiki ida hora vanokhahahaꞌoadahavini.

Khai vakhaniki bana adani hora vanaviahanokhaki.

Vakadimakari-ra avakadavaꞌajahakiki adani.

Okaikahina kamahini vakamakariki bana adani.

Ni-vabarobarona vahojaki vahoariha vaviaha,

oniani ida vavaꞌi anaipahini hirija bana — niha ada Jesus Cristo.

16 Hari.

Oniaroa,

maꞌonahai vajaharikaꞌoaki avahoarabakosiki vaꞌora vanajoroniꞌaha adani arabo hahavi kaijaꞌarini vakadikaꞌdaꞌdi.

Ijaꞌari ibavi hebreu athinia Armagedom onikia vajoroniꞌiki adani.

17 Hari.

Deus ibavia,

Deus ibavi kaijaꞌarini hoariha maina kidibavi daini-ra ahovariꞌiki sirisiriki namania.

Oniaroa,

Deus ibavia,

kaꞌdaꞌdi vakadikaꞌdaꞌdi kavithi ibavini kania kamithavahaki ida athii ꞌbaraki:

—Hari.

Namithahahaviꞌiki ida — nihahi.

18 Vara nina kabaꞌi,

nokiaki ada bahi banabanaki.

Kamithavahaki ida athii ipohiki,

bahi taararahaki hiki jaboni.

Oniaroa,

hoꞌdohoꞌdodanokiꞌihi ida arabo.

Deus ijaꞌari-ra namonahavini naothinia ni-niki namithaꞌiaki kaho.

Ni-namithaꞌiaki kaho ida arabo hoꞌdohoꞌdoni arafiaki,

ijaꞌari-ra naimahidaki hihida mahi fori hiki.

19 Thararaꞌiki ida sidaji karaho Babilônia oniki.

Oniaroa,

akapitakhamani ahoarabakosiꞌihi ida sidaji.

Ihimiꞌiki ida arabo hahavi kaijaꞌarini vakadisidaji hahavi.

Deua bikavaꞌihokiki ida Babilônia sidaji kaijaꞌarini fori vihiki vakadibadani jahariki,

oniani ida vaꞌora nihimavini hija.

Deus vaꞌora noꞌaki fori hiki adani sidaji kaijaꞌarini kidibavi vinho fori hikia binajiꞌbiniꞌiki,

viꞌavihahavija kaimoni.

Deus kavaꞌijokojokoi fori hiki ida vinho.

20 Oniaroa,

kajoviri hahavi akavisonihananaki,

arabo namahiki hahavi avisoniki jaboni.

21 Khanorariki ida jaꞌdi naꞌbahaki ijaꞌari vanamana bahi kharariki fori hini.

Karahoꞌoamanija ida jaꞌdi hoarahanana khanani 40 quilos hiki.

Deus vania binikhararija ida jaꞌdi naꞌbahaki ijaꞌari-ra napohimajakarahoki,

oniani ida varani jaharini arafiakia Deu-ra vakanavaranihavini hija.