Deus ijaꞌari kahojai sohiriki-ra kavarajomivini ida gamo hojai asohirikia kahojaiki
17
Hari.
Oniaroa,
Deus ibavi kaijaꞌarini hoarana khaꞌaha kodiania.
Onokibiininiꞌiki ada ovari 7 vihiki vaipohina vahararana,
7 bavi daiki ahoroani kari onokiꞌiki ada.
Hari.
Khaꞌaha ada ovari kodiania.
Hora niꞌaha:
—Hida khaꞌa bana.
Ira onanokiahivini hiki bana ida gamo makhira-ra odoraonibakhiaki.
Rajomi hiki ida gamo.
Deua bikavarajomiki ida gamo sidaji karaho kaijaꞌarini kajonina vihikia.
Vaini ipohiki maakarinia hojaki ida sidaji karaho.
Ira onanokiahivini hiki ida bana niha ninini Deus gamo kabadani asohirini arafiaki-ra naabosivini.
2 Vikhabakhiaki adani arabo hahavi kaijaꞌarini vakadikaꞌdaꞌdi gamo kania vakanabadanihaja kaimoni.
Gamo makhira-ra odoraonibakhiaki vaabono vakaviꞌomakhamavini vani fori hija ida vinho.
Arabo hahavi kaijaꞌarinia viꞌaviꞌiki ida gamo kavinho,
vakahanoki adani kidiania.
3 Hari.
Maꞌonahai Jahaki ovaꞌi-ra nahonariahihivini vani,
Deus ibavi kaijaꞌarini hora avikhaꞌihi amasia.
Amasia onokiki ida gamo tapoꞌija nadaraki namana vithini.
Tapoꞌija asafi namani-ra nahihaviki ida jirihi athini jahariki,
Deu-ra kanavaranihaki.
Bikavahojaki ida 7 kaꞌdaꞌdi kaipohini,
bivahojaki ida 10 moroboi ꞌdakhaki jaboni.
4 Gamo vania bikaimahaja ida makari nadaraki jahaki nokiani,
kaidivaki.
Bivahojaki ida kasoro kaꞌohihi,
ouroa amonahaki,
jaꞌdi kaidivakia amonahaki,
pérola oniki amonahaki hiki.
Bikavadihaki,
bikamorobohaki ida kidikasoro kaidivaki.
Bikasaꞌahaki ida vinho bavini badani karamonavahaki binajiꞌbiniki.
Deua bikavarajomivini ida gamo kahojai jaharikaꞌoaki kidivinho bavini daikia.
Gamo kidimakhira hirina kabaꞌi,
vaabono vakaviꞌomakhamabakhiaki fori hiki ida kidibavi daiki.
Nahina hahavi hoariha kaipahivahaki karamonavahaki hikia kabadanibakhiaki jaboni ida.
5 Athania hojaki ida onini jirini ogavahariki.
Gamo athania jiriki ida:
“Hovani Babilônia sidaji
karaho danoni arafiaki
kaamia ho.
Hovani gamo makhira-ra odoraoniki kaamia ho.
Onakamaꞌdaki ida hojai karamonavahaki ijaꞌari
kahojai jaharikia
vavajahaki.”
6 Kahanoki fori hiki ida gamo.
Deus kaijaꞌari vaamana binakahanoki ida.
Jesu-ra vakavaꞌipahinipaꞌitxiravini mani ida gamo vaꞌora naabinivini hija,
biꞌaviꞌiki fori hiki ida Deus kaijaꞌari vaamana.
Onokiꞌihi ida gamo,
oimahidakarahoꞌihi.
7 Oniaroa,
Deus ibavi kaijaꞌarini hora nanaꞌdohiꞌihi:
—Niha inimanija iimahidakarahoki?
Ogavahariki ida gamo,
ogavahariha ada tapoꞌija gamo-ra vajadojadoki nahina vihina.
Ira onavaꞌisohiki bana ho nahina fori vihiki adani gamo,
tapoꞌija khama.
Nahina fori hiki jaboni ida ꞌdaꞌdi 7 hiki ipohini,
moroboi ꞌdakhaki 10 hiki ipohini tapoꞌija bivahojaki.
8 Hiꞌo tapoꞌija inokiꞌiki hokiꞌiki mahi ꞌboꞌdakari.
Ni-hokijanaki araboja.
Hodi bihiaki anokhomini nokiavaharikia okhaonaniki bana ada tapoꞌija.
Okhaonanina naothinia,
nokiaꞌianaki ada araboja.
Oniani ida kidimahi Deua binihimavini hija bana Ibavi Jaharikaꞌoakia.
Arabo kaijaꞌarinia vada vaniꞌaha ada tapoꞌija,
vaꞌora naimahidaꞌaha.
Hari.
Deus hahavi-ra namonahavini viahania binajiriꞌiki ida ijaꞌari vaonina kidipapira mahi anokhomiriki-ra vavahojara kaimoni kidiania.
Hiꞌadani ijaꞌari tapoꞌija-ra vanokivini vani vaimahidaꞌaha.
Mahi ꞌboꞌdakari hokiꞌiki ada tapoꞌija,
ni-hokijanaki araboja.
Naothinia,
nokiaꞌianaki bana ada — hora niꞌaha.
9 Hari.
Vara hora niꞌaꞌianaha:
—Ogahai abonoa biogaki ida nahina hini,
ogaharikia ni-biogaki ida nahina hini.
Arabo namahiki 7 hiki ipohini fori hiki ida tapoꞌija kaꞌdaꞌdi 7 kihiki kaipohini.
Gamo kavithi ibavini ida arabo namahiki 7 hiki ipohini.
Arabo kakaꞌdaꞌdini 7 vihiki vaipohina fori hiki jaboni ida tapoꞌija kaꞌdaꞌdi 7 kihini kaipohini.
10 Biananokhomiꞌiki ida arabo kakaꞌdaꞌdini 5 vihiki vaipohina ijaꞌari-ra vaꞌora vakaꞌdaꞌdiki.
Hoarana asia ijaꞌari-ra vaꞌora vakaꞌdaꞌdiki.
Kaꞌdaꞌdi hoariha ni-kaikahiꞌiaki kaho.
Nokiana kamahini jorakia binanokhofiaki ida ijaꞌari-ra vaꞌora vakaꞌdaꞌdivini.
11 Hiꞌo tapoꞌija mahi ꞌboꞌdakari hokiꞌiki o,
ni-hokijanaki araboja.
Okhaonanina naothinia,
nokiaꞌianaki o araboja,
kaꞌdaꞌdi hoariha hina.
7 kaꞌdaꞌdi vahoariha vaipohina ada.
Ovari jaboni Deua kidimahi binihimaki bana ada Ibavi Jaharikaꞌoakia — Deus ibavi kaijaꞌarini hora niꞌaha.
12 Hari.
Vara hora niꞌaꞌianaha:
—Ira onavaꞌisohiki bana ho nahina fori hiki ida 10 moroboi ꞌdakhaki ipohini inokiꞌiki.
Arabo kakaꞌdaꞌdini 10 vihiki vaipohina fori hiki ida jaboni.
Ni-ijaꞌari-ra vavakaꞌdaꞌdiriha kaho adani.
Khaki bana ida mahi ijaꞌari-ra vavakaꞌdaꞌdivini kamahini,
vagathaniꞌihi ida danoi ijaꞌari-ra vavakaꞌdaꞌdira kaimoni.
Oniani ida tapoꞌija khama ijaꞌari-ra vaꞌora vavakaꞌdaꞌdivini hija.
Ni-mahi ipohiki ijaꞌari-ra vaꞌora vakaꞌdaꞌdiki.
Jorakia vananokhofiaki ida.
13 Hiꞌadani 10 vihiki kaꞌdaꞌdi vaipohina vaabono vakaaminakhamavini,
vanaabaja kaimoni ida tapoꞌija athi,
tapoꞌija vaꞌora honariara kaimoni.
14 Hiꞌadani 10 vihiki vaipohina vanigafaniꞌaha ada Ovilia Dorona oniki.
Ni-vakaabokaki ada Ovilia Dorona oniki-ra vanapohimajavini.
Kaꞌdaꞌdi vakadikaꞌdaꞌdi ada Ovilia Dorona oniki,
oniani ida tapoꞌija 10 vihiki vaipohina khama vaꞌora nihimavini hija bana.
Ni-vaꞌora vakaabokaki adani Ovilia Dorona oniki kidipohi khama.
Ovilia Dorona oniki ipohina vihiki adani Deus vaꞌora nagathogathoꞌiki.
Ni-vakavaꞌipahiniꞌiki ida athi vanaabavini — hora niꞌaha.
15 Hari.
Oniaroa,
Deus ibavi kaijaꞌarini hora niꞌaꞌianahi:
—Inokiꞌiki jaboni ida vaini ipohiki.
Paha namania vithiki ida gamo makhira odoraonibakhiava abono.
Vaini ipohiki fori vihiki adani arabo hahavi kaijaꞌarini,
nação hahavi vaathi kahoarihakhamaki adani.
Ibavi hahavi kaijaꞌarini vihiki fori hiki ida vaini kapahani inokiꞌiki.
16 Inokiꞌiki jaboni ida tapoꞌija morobo ꞌdakhaki 10 hiki ipohini.
Tapoꞌija,
10 vihiki vaipohina khama vakaimajahapaꞌitxirihi ida gamo makhira-ra odoraonibakhiaki.
Vaaniki bana ida gamo kanahina hahavi.
Barobaroni vanahojahaki bana ida.
Vanaabiniki bana ida,
vahaki bana ida gamo imani.
Siho kahaꞌdiki kania vanahokahiki bana ida gamo fori hiki.
17 Deus vania vavaꞌi bodini binahonariahihiki adani tapoꞌija,
10 vihiki vaipohina,
oniani ida vaabono vakaaminakhamavini hija.
Vaabono vakaniꞌakhamaꞌaha adani 10 vihiki vaipohina:
“Jahaki ida adanona tapoꞌija-ra anoꞌavini,
bikaabokaja kaimoni ida ijaꞌari hahavi-ra vaꞌora vakaꞌdaꞌdivini.”
Vakhaniha.
Nini vani Deua binofija ida athi bivavaꞌisohihijoraꞌiki namitharini oadani.
18 Inokiꞌiki ida gamo makhira-ra odoraonibakhiavini.
Onivani fori vihiki adani sidaji karaho kaijaꞌarini.
Hiꞌadani sidaji kaijaꞌarini vaꞌora vahonariafiahavini adani arabo hahavi kaijaꞌarini vakadikaꞌdaꞌdi — hora niꞌaha ada Deus ibavi kaijaꞌarini.