Deus vaꞌora napohimajaki adani Babilônia sidaji kaijaꞌarini
18
Oniaroa,
onokiki ada Deus ibavi kaijaꞌarini hoariha maina nama gaariꞌina.
Kaꞌdaꞌdi danoki ada.
Arabo hahavi ibavi hahavi-ra navagaki ida Deus ibavi kaijaꞌarini vagana.
2 Athii ꞌbarakia nihaha:
—Ihimikaꞌoaki ida sidaji karaho Babilônia oniki.
Ni-ijaꞌaria vavaibavijanaki ida sidaji kani.
Jahari kahonai abono vanokiariki kaꞌoa vavaibaviꞌiki ida.
Jahari kahonai abono vakaramonavahaki vavaibaviꞌiki hiꞌida sidaji.
Igitha raboki karamonavahaki kaꞌoa vagoraki hiꞌida sidajia.
3 Vinho fori hiki ida makhira kidigamo hiriki khama vaabono vakaviꞌomakhamavini.
Babilônia sidaji kaijaꞌarini vaꞌora vanoꞌabakhiaꞌiki adani arabo hahavi kaijaꞌarini vinhoa,
viꞌavivini vaꞌora avavadadamiꞌaha.
Vikhabakhiaki adani arabo hahavi kaijaꞌarini vakadikaꞌdaꞌdi Babilônia kasidajinia,
karamonavahakia vakabadanijabanara kaimoni.
Pavakarihi abono jaboni Babilônia sidajia vahojaki avanaꞌbaꞌdivini arafiaki ida vakadijiniro badani jaharikaꞌoaki-ra bada vaniꞌajabanavini sidaji kaijaꞌarini vakadiania — niha ada Deus ibavi kaijaꞌarini.
4 Oniaroa,
okamithaꞌiki ida athii hoariha nama,
nihani:
—Kodijaꞌari,
ai vihiꞌa bana hihida sidaji kaijaꞌarini vakadiania,
avakaraꞌoꞌa jorakia.
Deus vaꞌora napohimajaki bana adani sidaji kaijaꞌarini,
vakadihojai jahariki abosini.
Hariꞌa vakadihojai jahariki avavaꞌini-ra akaborova mahija Deus aꞌonira napohimajaravini vakadiania.
5 Jaharini arafiaki hida sidaji kaijaꞌarini vakadihojai.
Arabo namahiki nama-ra kaitoniavini fori hiki ida vakadihojai asohiriki ipohiki.
Deua bikavaꞌihokiki ida sidaji kaijaꞌarini vakadihojai asohiriki,
jaharikia vaꞌora arakhaki bana adani.
6 Kodijaꞌari,
ijaꞌari Babilônia sidaji kaijaꞌarini fori vihiki aꞌonira vanajahariharibakhiaꞌiki aꞌoni.
Aꞌonimaina bana,
avakaꞌdaꞌdini-ra avakanaabosija bana.
Vanakaraho bana ida vaꞌora avanaabosivini.
Aꞌonira vanoꞌavini hiꞌiki ida vinho fori hiki aꞌonira napohimajaja kaimoni.
Aꞌonimaina vaꞌora vanoꞌa kavi fori hikia.
Vanajiꞌbinivini vani fori vaniha bana ida vakadibavi vaꞌora napohimajavini arafiaki kaimoni.
7 Babilônia sidaji kaijaꞌarinia vanajoronivini vakadimoni hini ida nahina ahapini,
nahina kaidivani arafiaki,
nahina vaabono vavaboraborahavini hiki.
Aꞌonimaina bana.
Vanajoroni bana vakadimoni hini nahina vaimana naꞌbanani hiki,
nahina vavaꞌi namokarani hiki.
Vaabono vavaboraborahavini vaabono vaniꞌaha:
“Arabo hahavi kaijaꞌarini vakadikaꞌdaꞌdi hari.
Kaꞌdaꞌdi kavithi ibavini fori hiki hida akadisidaji.
Kaariha fori arihirihi.
Ni-nahina bikaabokaki ida haria napohimajavini.”
Vakhaniha adani sidaji kaijaꞌarini.
8 Oniania,
jorakia namithaki bana ida nahina jahariki vakadiania,
vapohimajaki bana adani.
Vakavamoniki bana adani,
vavaꞌi rogo inikarahoki bana adani,
vaiꞌami abani vihiki bana adani.
Avoosiki bana ida sidaji hahavi,
siho kakarahoa binihimaki ida.
Danoki ada Deus.
Jaharikia vaꞌora arakhaki ada.
Asohiki ida Deus kabadani,
binaabosivini hihida sidaji kaijaꞌarini vakadihojai jaharikaꞌoaki — nihi ida athii.
9 Arabo hahavi kaijaꞌarini vakadikaꞌdaꞌdia vada vaniꞌaki ida sidaji ahaꞌdiꞌiki ojini,
oniani ida vavaꞌi mokara niꞌakarahoni hija.
Arabo vakaꞌdaꞌdiva sidaji ihimini-ra vakaasaraꞌahapikivini,
ni-vakaabokajanaki ida vakadihojai karamonavahakia vakabadanijabanana.
10 Napaja vahojakia vada vaniꞌaki ida siho akahaꞌdiki sidaji-ra kanihimavini.
Deus vaꞌora napohimajavini-ra vifinivini mani ida napaja vaꞌora nahojaja.
Vakhaniki adani:
—Babilônia sidaji kaijaꞌarini maha.
Karahoꞌiki ida avakadisidaji.
Arabo hahavi kaijaꞌarini-ra vaꞌora avahonariaꞌavini.
Jahariki namithaꞌiki avakadimoni.
Avagathaniꞌiki ida avakadihojai jaharini arafiaki abosini.
Jorakia aꞌonira nihimaꞌiki ada Deus — vakhaniha.
11 Arabo hahavia pavakarihi abonoa vanokiꞌiki ida sidaji ahaꞌdini,
oniani ida vaꞌora nabarariariaꞌahapikija,
vavaꞌi mokara niꞌakarahoni hija.
Ni-nahina bikapavakarijanaki ida vakadinahina,
vakadinisika hiki.
12 Vakhaniꞌaha:
—Ni-nahina bikapavakarijanaki ida akadiouro,
prata,
jaꞌdi kaidivaki,
pérola hiki.
Ni-nahina bikapavakarijanaki ida makari jahaki,
linho oniki,
makari nadaraki hiki.
Ni-nahina bikapavakarijanaki ida makari jahaki hoariha seda oniki,
lã oniki hiki.
Ni-nahina bikapavakarijanaki ida akadiava kaidivaki mitxaki.
Ni-nahina bikapavakarijanaki ida akadinahina kaidivaki marfim onikia amonahaki.
Ni-nahina bikapavakarijanaki hida akadinahina ava kaidivakia amonahaki.
Ni-nahina bikapavakarijanaki ida akadinahina bronze oniki amonahaki,
ferro amonahaki,
jaꞌdi kaidivaki mármore onikia amonahaki jaboni hiki.
13 Ni-nahina bikapavakarijanaki ida akadicanela,
akadiꞌbai kakabodihini hiki.
Ni-nahina bikapavakarijanaki hida incenso,
miha,
misai hiki.
Ni-nahina bikapavakarijanaki ida akadivinho,
basina jahaki,
trigo khajahaki,
trigo ꞌbaꞌdani hiki.
Ni-nahina vaꞌora kapavakarijanaki adani ꞌdaama kahidari,
ovilia,
cavalo,
carruagem kihiki.
Ni-nahina bikapavakarijanaki ida ijaꞌari gathaki,
ijaꞌari vahoariha vihiki jaboni — nimania ida vakadiasara vakadiabarariri athini.
14 Pavakarihi abono vaꞌora niꞌaha adani sidaji kaijaꞌarini:
—Ihimiꞌiki ida nahina hahavi avakavaꞌinofinofiki.
Ihimiꞌiki ida avakadinahina ahapini,
avakadiꞌouro avavahojaꞌiki hiki.
Ihimikaꞌoaꞌiki ida,
ni-avakaragajanaki bana avakadiania — vakhaniha.
15 Hari.
Napaja vahojaki adani pavakarihi abono vakadibadani sidaji bodinia vaꞌora kananahinaꞌahapikiꞌiki.
Deus vaꞌora napohimajavini-ra vifinivini jaboni mani ida napaja vaꞌora nahojaja.
Vaasaraꞌahapikiki bana adani.
16 Vabarariariaꞌaha,
vakhaniꞌaha:
—Babilônia sidaji kaijaꞌarini maha.
Jahariki ida avakadimoni.
Avakaimahaꞌiki ida makari jahaki kaidivaki linho oniki,
makari nadaraki,
lã nadaraki hiki jaboni.
Avaabononi avanajahavini hiki ida kasoro kaidivaki ouroa amonahaꞌiki,
jaꞌdi kaidivaki,
pérola kaidivaki hiki,
ni-avavahojajanaki.
17 Jorakia ihimiꞌiki ida avakadinahina kaidivaki afohahavi — vakhaniha.
Napaja vahojaki adani kanava kakaraho kanasohiva abono afohahavi,
vakadihonai abono,
ijaꞌari vakadiania vaadahaki vihiki.
Kanava kakaraho kakakarivani jaboni napaja vahojaki.
18 Vada vakaniꞌahi ida siho akahaꞌdiꞌiki kaojini.
Vabarariariaꞌaha:
—Ni-anokiꞌiaki ida sidaji hoariha hihida sidaji fori hiki.
Avajahaꞌiki hida sidaji nokiani jahaki,
sidaji kaijaꞌarini vakadinahina kaidivaki hiki — vakhaniha.
19 Vavaꞌi mokara nikarahoni mani ida arabo khomakhomani-ra vaꞌdaꞌdi aꞌania vanaibavivini hija.
Vaasaraꞌahapikina,
vabarariariaha:
—Babilônia sidaji kaijaꞌarini maha.
Jahariki ida avakadimoni.
Mahi radahaꞌiki kanava kakaraho kanasohiva abono,
pavakarihi abono khama avanaꞌbaꞌdiꞌiki ida vakadinahina avakadiania.
Sidaji kaijaꞌarini,
avakapavakariꞌiki ida vakadinahina.
Jorakia ihimiꞌiki ida avakadinahina afohahavi — Babilônia sidaji kaijaꞌarini vaꞌora vaniꞌaha.
20 Oniaroa,
okamithaꞌiki ida athii,
nihi:
—Aꞌonivani nama avahojaki,
khai vakhaniꞌa bana!
Deus kaijaꞌari,
khai vakhaniꞌa bana jaboni!
Aꞌonivani Jesus athi avaadahaoniva abono,
khai vakhaniꞌa bana jaboni!
Aꞌonivani Deus athi namoniva abono,
khai vakhaniꞌa bana jaboni!
Aꞌonira vanajaharihariꞌiki adani Babilônia sidaji kaijaꞌarini,
oniani ida Deus vaꞌora nihimavini hija.
Vagathaniki ida vakadihojai asohiriki abosini.
Khai vaniꞌaꞌa bana ida sidaji ihimiꞌini!
— niha.
21 Hari.
Oniaroa,
onokiꞌiki ada Deus ibavi kaijaꞌarini danoki.
Binabiinihi ida jaꞌdi karaho arafiaki,
trigo kakhajahini ibavini fori hiki ida jaꞌdi karaho.
Biosonanaiꞌihi ꞌdako karaho kajokirakia,
kafariꞌihi,
niha:
—Hihida jaꞌdi karaho-ra onahokahivini vani fori vihira bana adani Babilônia sidaji kaijaꞌarini,
Deus vaꞌora nahokahikaꞌoavini.
Avavisoniꞌina,
ni-nokiajanaki bana ida sidaji,
ihimikaꞌoaꞌiki bana ida Babilônia sidaji.
22 Ni-kamithavahajanaki ida música ithoni Babilônia sidaji kahagihinia.
Ni-kamithavahajanaki ida harpa ithoni,
flauta ithoni,
trombeta ithoni hiki.
Ni-kamithavahajanaki ida ijaꞌari vakadiahi.
Badani abono afohahavi nahina kaidivaki-ra vanamonahaki ni-vahojajanaki,
avavisoniꞌiki adani.
Ni-kamithavahajanaki ida jaꞌdi trigo-ra vikhajavini ibavini ithoni.
23 Ni-nokiajanaki ida lamparina haꞌdini Babilônia sidaji bodinia.
Ni-kamithavahajanaki bana ida akarai kaihinikani khaiini maisa kidigamo khama vaabono vara vakaniꞌakhamavini.
Arafiaki ida pavakarihi abono vadanona Babilônia sidajia vahojaki.
Vahoariha-ra vakaijorahavini vakadinahina-ra avanaꞌbaꞌdira kaimoni,
oniani ida arabo hahavi kaijaꞌarini vaꞌora vakorijanahavini hija.
Deua binihimakaꞌoaki ida vakadinahina.
24 Babilônia sidaji kaijaꞌarini vaꞌora vanaabiniꞌiki adani Deus athi namoniva abono,
Deus kaijaꞌari vihiki.
Vaꞌora vanaabiniꞌiki jaboni adani ibavi hahavi kaijaꞌarini hoarahanana,
oniani ida Deus jaharikia vaꞌora arakhavini hiꞌia Babilônia sidaji kaijaꞌarini,
binaabosija kaimoni ida vakadihojai jaharini arafiaki — niha ada Deus ibavi kaijaꞌarini.