Deu-ra khai vaniꞌaki adani ijaꞌari
19
Hari.
Oniaroa,
okamithaꞌihi ida athii ꞌbaraki Deus ibavia.
Ijaꞌari vâipohiki vaathi fori hiki ida athii ꞌbaraki.
Vakhaniha:
“Deu-ra khai vaniꞌa bana!
Akadiꞌakavaꞌijoahi abono ada!
Jahaki,
vagaki,
danoki ada akadiDeus!
2 Sohikaꞌoaki ida Deus vaꞌora napohimajavini
vakadihojai asohiriki abosini hini,
Ibavi Jaharikaꞌoakia vaꞌora nahokahivini hiki.
Deus kahonai abono-ra vaꞌora vanaabinivini.
Gamo makhira-ra odoraonibakhiaki fori vihiki adani.
Hiꞌoni gamo vaꞌora kaboroꞌiki adani arabo hahavi kaijaꞌarini kidihojai kaipahivahakia.”
Niki bana hida namithaki kaimoni.
3 Hari.
Athii ꞌbarakia vakhanihaꞌianaha:
—Vakanamasiviꞌa bana ada Deus.
Haꞌdini ojihahaꞌoadahaki ida Babilônia sidaji.
Babilônia sidaji kaijaꞌarini Deus vaꞌora naimaꞌbanakarahohaꞌoadahavini mahi hahavi anokhomirikia.
4 Oniaroa,
hiꞌadani 24 kaꞌdaꞌdi vaipohina Deus viaha vakajoꞌatharariꞌaha.
Ijaꞌari fori vihiki vahokiki avakoꞌbamahakhamaki jaboni Deus viaha vakajoꞌatharariꞌaha,
Deu-ra vakanamasivivini.
Kidivithi ibavinia vithiki ada Deus kaꞌdaꞌdi vakadikaꞌdaꞌdi hina.
Vakhaniꞌaha:
“Deu-ra khai vaniꞌa bana!”
Nimania ida Deua binofiki.
Ovilia Dorona oniki akarai kaihinikani kamahini
5 Hari.
Oniaroa,
kaꞌdaꞌdi vakadikaꞌdaꞌdi kavithi ibavinia kamithavahaki ida athii,
nihani:
“Deu-ra khai vaniꞌa bana!
Aꞌonivani Deus kahonai abono hahavi aꞌoni,
Deus jahana-ra khai vaniꞌa bana!
Aꞌonivani ijaꞌari hahavi Deu-ra khai vaniꞌa bana!
Aꞌonivani avakanahinaꞌahapikiki,
aꞌonivani avakanahinariki avihiki jaboni,
Deu-ra khai vaniꞌa bana!
Aꞌonivani athi avanaabaꞌiki,
Deu-ra khai vaniꞌa bana!”
Vakhaniha.
6 Hari.
Oniaroa,
okamithaki ida ijaꞌari vaipohiki vaathi ꞌbarani fori hiki.
Paha karaho gororofoniki fori hiki ida athii ithoni.
Bahi taararahaki fori hiki ida athii.
Nihi ida athii:
“Deu-ra khai vaniꞌa bana!
Danoki ada Deus,
bikaabokaki ida hahavi
binofiki.
Kaꞌdaꞌdi vakadikaꞌdaꞌdi ada!
7 Khai akhaniva,
avaꞌi jahajahava.
Deus jahana danona-ra
khai aniꞌava.
Kaikahiꞌihi ida maisa Ovilia Dorona oniki akarai kaihinikani kamahini.
Abononi nabarohi ida gamo kidimaisa
kaikahina viahania.
8 Kidigamo kaimonia bigathaniꞌiki ida makari jahaki kaidivaki,
vaforiki,
linho oniki,
bikaimahaja kaimoni.
Vagaki hida hihida linho,
makamakapaꞌitxirihi hida.
Makari vaforikaꞌoaki fori hiki ida Deus kaijaꞌari kahojai jahani.”
9 Oniaroa,
Deus ibavi kaijaꞌarini hora niꞌaha:
—Inajiri bana hida hihida:
“Deus vaꞌora kajoamoraki hadani ijaꞌari vaꞌora nagathogathoꞌboꞌdaꞌiki,
Ovilia Dorona oniki akarai kaihinikani kamahini
vahojara kaimoni.”
Asia vara niha ada Deus ibavi kaijaꞌarini:
“Nimania ida Deus athi
ira onavaꞌisohivini hiꞌiki kaꞌoa hini.”
10 Deus ibavi kaijaꞌarini viaha okajoꞌatharariꞌihi,
okanamasivira kaimoni.
Oniaroa,
hora niꞌaha:
—Hariꞌa oviaha kajoꞌatharari!
Deus ohirina mani ida hora ikanamasivivini-ra onofiravini hija.
Deus kahonai abono ho.
Ifori ohiki ho,
avaigamini vaipohina ho.
Hivaꞌoani Jesus athi kaꞌoa-ra vanaabajahakiki,
ni-vanahoarihaki ida athi,
ni-vakavaꞌipahiniꞌiki ida athi Jesus vaꞌora navaꞌisohivini hiki.
Vaꞌoaniaro fori ohiki ho.
Deu-ra kanamasivi bana!
Maꞌonahai Jahaki vaꞌora nanamithavini hiki adani Deus athi namoniva abono Jesus athi kaꞌoa hinia avanamoniꞌianaja kaimoni — Deus ibavi kaijaꞌarini hora niꞌaꞌaha.
Onokiꞌiki ada makhira cavalo vaforiki namana
11 Hari.
Oniaroa,
onokiꞌiki ida Deus ibavi arabikhajahani.
Nokiavahaꞌaha ada cavalo vaforiki.
Cavalo-ra vaadahaki onina:
“Okavaꞌipahinipaꞌitxiriki ada Deus.”
Onina hoariha:
“Kaꞌoa ohiki ho.”
Asohikaꞌoaki ida kidibadani.
Vaꞌora naabosiki bana adani hojai asohirikia vakahojaiki nahina jaharikia.
12 Vagaki ida nokho ꞌbaꞌdani,
siho kahaꞌdini fori hiki ida.
Kaꞌdaꞌdia bikavahojaki ida ouroa kakajamarihi kaipohiki kajahaki.
Arabo hahavi kakaꞌdaꞌdini danoki kakajamari ida biakaꞌdaꞌdihaja.
Vaatha hojaki ida onina hoariha jiriki.
Ovari kaꞌoa biogaki ida onina nahina hini.
Vahoariha ni-avigaki.
13 Kaamaki ida kidikarahobi kanamajaki bikaimahaki.
Onina hoariha:
“Deus athi.”
14 Deus kaijaꞌari kidiania vahojaki avikasiagaki.
Cavalo vaforiki vaꞌora vavaadahaki jaboni adani.
Vakaimahananaꞌiki ida makari jahaki kaidivaki vaforiki,
linho oniki.
Ni-makamakapaꞌitxirihi hida.
15 Hari.
Bodia khaonaniki hida kidisaꞌai sajoki.
Arabo hahavi kaijaꞌarini-ra vaꞌora kavasaꞌaivini kaimoni.
Binihimaki ida Deus athi-ra vanofiriki vadanona.
Deua bikaabokahahaviki ida binofiki.
Vaꞌora vakaꞌdaꞌdiki bana adani arabo hahavi kaijaꞌarini.
Vaꞌora avadadamiki bana adani athi vanaabara kaimoni.
Deus vaꞌora kavaꞌijokojokokarahoꞌaha.
Hari.
Ijaꞌari uva-ra kadaꞌahaꞌahavini aꞌbani aniaja kaimoni,
onivani fori hira ada cavalo-ra vaadahaki kabadani,
vaꞌora kadaꞌahaꞌahaki fori vihiki adani Deu-ra vanofiriki.
Ahovarikarahohi ida vaamana,
uva aꞌbani khaonanini fori hiki ida.
Nini vani binanokiaja ida Deus kavaꞌijokojokoi.
16 Kidikarahobi,
kabaha kanamania hojaki ida onina jiriki,
nihi ida onina:
“Kaꞌdaꞌdi vakadikaꞌdaꞌdi ho,
arabo hahavi kaijaꞌarini vakadikaꞌdaꞌdi ho.”
17 Hari.
Oniaroa,
onokiꞌaha ada Deus ibavi kaijaꞌarini safini namana gaakosoana.
Athii ꞌbarakia vara vaꞌora niꞌaha adani igitha varaboki nama:
—Aꞌonivani,
igitha raboki,
baimana-ra avavajahaki aꞌoni,
vajoroni bana hida.
Deua bihonariaꞌiki ida ihinika karaho koꞌbaini avakadimoni.
18 Hida vikhaꞌa bana.
Vajoroniꞌa mahija ijaꞌari hahavi Deus athi-ra vanaabariki vaimana-ra avahavini.
Avahaki bana ida arabo kakaꞌdaꞌdini vaimana,
sorara vavakaꞌdaꞌdiva,
sorara vihiki vaimana,
cavalo imana,
cavalo vaadahava vaimana.
Avahaki bana ida honai abono gathaki,
honai abono gathariki vaimana.
Avahaki bana ida ijaꞌari kanahinaꞌahapikiki vaimana,
ijaꞌari vakanahinariki vaimana hiki jaboni.
Hiꞌadani ijaꞌari afohahavi Deus athi-ra vanaabariki vaimana-ra avahaki bana aꞌoni.
19 Hari.
Oniaroa,
vaꞌora onokiki adani paha katapoꞌijani,
arabo hahavi kaijaꞌarini vakadikaꞌdaꞌdi,
vakadisorara vihiki.
Vajoroniꞌaha adani arabo hahavi kaijaꞌarini vakadikaꞌdaꞌdi paha katapoꞌijani kania.
Vaꞌora vanigafanivini vaꞌora vanofiki adani cavalo vaforikia vaadahaki,
kidipohi vihiki.
Ni-vakaabokaki ida vaꞌora vanapohimajavini.
20 Cavalo vaadahaki vaꞌora vagathiꞌaha adani paha katapoꞌijani,
Deus athi namoniva abono ꞌbadara khama.
Hiꞌada Deus athi namoniva abono ꞌbadara,
bada biniꞌaꞌboꞌdaꞌiki ida badani danoki paha katapoꞌijani viaha.
Badani danoki-ra bada niꞌavini mani ida ijaꞌari vaipohiki-ra vaꞌora korijanahavini hija.
Ijaꞌari tapoꞌija karajomihi-ra vavahojaꞌikia vakajariꞌdariki ida Deus athi namoniva abono ꞌbadara athi.
Vakanamasiviki jaboni ada paha katapoꞌijani.
Vakanamasiviki jaboni ada paha katapoꞌijani amovana.
Vahokahiꞌaha adani Deus athi namoniva abono ꞌbadara,
paha katapoꞌijani khama ibavi enxofre kaꞌdakoni haꞌdiki bodinia.
Vahokina kabaꞌi vahokahiꞌaha siho kakaraho kahaꞌdiki kabodinia.
Kaafaꞌoamanija ida siho.
21 Hiꞌo cavalo vaforiki namana adahakia bivahojahi ida kidisaꞌai bodia khaonaniki.
Vaꞌora kavasaꞌaiki adani tapoꞌija kasorara,
vaꞌora naabiniꞌiki adani.
Igitha rabokia vahaꞌiki ida sorara vaimana,
vavaꞌi naꞌbiꞌiki adani igitha.