2 Deus ibavi kaijaꞌarinia bigathiꞌaha ada mabidiri karahoda fori hiki.

Onina hoariha Jahari.

Onina hoariha Satanás.

3 Bigathiꞌaha,

bidabohaꞌaha correntea,

naothinia binahokahiꞌaha ada Jahari hodi bihiani anokhomini nokiavaharikia.

Deus ibavi kaijaꞌarinia bikanaꞌboꞌiki ida hodi bihiaki kaathani.

Athanaꞌihi jaboni ida hodi bihiaki.

Mil badara hiki ipohini hojaki ada Jahari.

Ni-khaonanina-ra kaabokaki.

Mil badara ipohini arabo hahavi kaijaꞌarini-ra ni-vaꞌora kaboroborojanavini-ra kaabokaki.

Mil badara ipohini radahani naothinia,

Deua bivaꞌahaki ada Jahari hodi bihiakia okhaonaniꞌina,

ijaꞌari vakadiania hojaꞌianara kaimoni mahi ipohirikia.

4 Oniaroa,

onokiki ida kaꞌdaꞌdi kavithi ibavini kaipohiki.

Kanamania vavithihananaha adani kaꞌdaꞌdi.

Deus vaꞌora noꞌavini hiki danona vakaabokaja kaimoni ida ijaꞌari vakadihojai-ra vanaabosivini.

Vaꞌora onokiki jaboni adani ijaꞌari vaabiniki vaabono.

Vaꞌora onokiki adani Jesus Cristo kaijaꞌari avajaꞌdina.

Hivaꞌoani,

vajahariharina kabaꞌi,

vanamonibakhiaki ida Deus athi.

Vakavaꞌipahinipaꞌitxiriha ada Jesus Cristo,

oniani ida vahoariha vakaꞌdaꞌdi avakavaꞌboavini hiꞌia.

Ni-paha katapoꞌijani-ra vakanamasiviki.

Ni-tapoꞌija amovana-ra vakanamasiviki jaboni.

Ni-vagathaniꞌiki jaboni ida paha katapoꞌijani karajomi vaatha,

vasaꞌa hiki.

Avahokiꞌaha adani hiꞌadani Jesus Cristo kaijaꞌari kohana.

Kaꞌdaꞌdi kavithi ibavinia vavithiki adani.

Deus vaꞌora noꞌaꞌiki adani danona.

Cristo khama vaꞌora vavakaꞌdaꞌdiki adani arabo hahavi kaijaꞌarini mil badara ipohini.

Vaꞌoaniaro miroꞌa Deus vaꞌora anahokiꞌiki bana.

5 Vakhanina vani Deus vaꞌora anahokira adani kidijaꞌari kohana Jesus Cristo-ra vakavaꞌipahinipaꞌitxiriki.

Deus ni-vaꞌora anahokiꞌiaki kaho adani ijaꞌari kohana vahoariha.

Mil badara hiki ipohini radahani naothinia,

Deus vaꞌora anahokiki bana adani.

6 Hari.

Khai vakhaniki adani hiꞌadani ijaꞌari vaꞌoaniaro miroꞌa Deus vaꞌora anahokiꞌiki.

Vaꞌora kajoamoraki adani.

Ni-Ibavi Jaharikaꞌoaki kania Deus vaꞌora arakhariha adani.

Deus kanikhariava abono sasidotxi vihiki adani,

Deu-ra vaakodiavini,

Cristo-ra vaakodiavini jaboni,

vakadihonai abono vihiꞌina.

Jesus Cristo khama vaꞌora vavakaꞌdaꞌdiki adani arabo hahavi kaijaꞌarini mil badara hiki ipohini.

7 Hari.

Mil badara hiki ipohini radahani naothinia,

Deua bivahonariahiꞌaha ada Jahari arakhana,

gathajanarara kaimoni.

Oniaroa,

kasiribaniꞌaha hodi bihiaki anokhomini nokiavaharikia,

ijaꞌari vakadiania hojaꞌianaha.

8 Oniaroa,

aadahaoniꞌianaha ada Jahari ibavi hahavia,

vaꞌora korijanahaꞌianara kaimoni adani arabo hahavi kaijaꞌarini.

Hivaꞌoani Gogi kaaraboni kaijaꞌarini vaoniki,

Magogi kaaraboni kaijaꞌarini vaoniki vaꞌora korijanahaki ada Jahari.

Vaipohiꞌoamanira adani.

Kaasi ꞌbaꞌdani ipohini fori vihiki adani.

9 Vaibavi hahavia avaadahaoniꞌaha adani Jahari kaijaꞌari,

vahojaribanaonina Deus kaijaꞌari vaibavi,

vaꞌora vidara kaimoni.

Vavahojaribanaoniki ida jaboni Jerusalém sidaji Deua bivajahaki.

Jahari kaijaꞌari vaꞌora vanaabinivini vaꞌora vanofiki adani Jerusalém sidaji kaijaꞌarini.

Oniaroa,

Deua biakaronaki ida siho kahaꞌdini,

nama kagaarini,

vaꞌora nihimahahaviꞌiki adani Jahari kaijaꞌari.

10 Jahari vaꞌora korijanahabakhiaꞌiki adani ijaꞌari.

Deua binahokahiꞌaha ada ovari ibavi enxofre kaꞌdakoni haꞌdiki bodinia.

Paha katapoꞌijani,

Deus athi namoniva abono ꞌbadara khama vaꞌoaniaro miroꞌa Deus vaꞌora nahokahiꞌiki adani ibavi enxofre kaꞌdakoni siho haꞌdiki bodinia.

Vaimana ꞌbanani karaho-ra vakamithahahaꞌoadahaki adani.

Mahi,

joma hikia ni-ihimiki ida vaimana ꞌbanani arafiaki.

11 Hari.

Oniaroa,

onokiki ida kaꞌdaꞌdi vakadikaꞌdaꞌdi kavithi ibavini karaho,

vaforiki.

Ovari vithiꞌina viahania jorakia avisoniꞌiki ida arabo,

nama jararini hiki.

Ni-anokiabakhiavahaki.

12 Oniaroa,

vaꞌora onokiki jaboni adani ijaꞌari kohana.

Kaꞌdaꞌdi vihiki,

kaꞌdaꞌdi vihiriki jaboni,

Deus kavithi ibavini viahania vigaakosoana afohanana.

Oniaroa,

Deus ibavi kaijaꞌarinia biarabikhaihi ida ijaꞌari onini kapapirani ipohiki.

Deua binajiriꞌiki ida ijaꞌari mahi anokhomirikia gahinaki kidiania vaonina kapapirani.

Deus ibavi kaijaꞌarinia biarabikhaihi ida papira hoariha.

Papira jiriki kania hojaꞌiki ida ijaꞌari vakadihojai,

vakadivarani,

vakadibadani hiki hahavi vanamonahaꞌiki vaabinirina oadani,

oniani ida hojai abosini-ra vagathanihananavini hija.

13 ꞌDako karaho kajokirakia viꞌdorimamananiki bana adani ijaꞌari kohana hahavi paha bodinia vakaꞌdamahaꞌiki fori vihiki.

Abinia oniki kania vikhaonaniꞌiki adani ijaꞌari kohana.

Ijaꞌari kohana vaibavi oniki kania vikhaonaniꞌiki adani ijaꞌari kohana hahavi nami bodinia vakaꞌdamahaꞌiki.

Deus viaha avikhahahaviki adani ijaꞌari kohana.

Deua binaabosihananaki ida ijaꞌari kohana hahavi vakadihojai.

14 Oniaroa,

Deua binahokahiki ida abinia oniki ibavi enxofre kaꞌdakoni haꞌdiki bodinia.

Binahokahiki jaboni ida ijaꞌari kohana vaibavi enxofre kaꞌdakoni haꞌdiki bodinia.

Ijaꞌari-ra vaꞌora naabiniꞌianaki fori kihiki hida enxofre kaꞌdakoni haꞌdiki.

Vakamithahahaꞌoadahaki kaimoni ida vavaꞌi rogo inini,

ni-Deus kani jahakia avikhaki.

15 Hari.

Oniaroa,

vada biniꞌahi ida papira Deua binajiriꞌiki ijaꞌari mahi anokhomirikia vagahinaki vaonina kapapirani.

Ijaꞌari vaonina hojahi;

Deus kania avikhaha.

Ijaꞌari vahoariha vaonina hojarihi;

enxofre kaꞌdakoni haꞌdiki kania vahokahiha.