2 Onokiki ida Sidaji Jahakaꞌoaki Jerusalém sidaji jaꞌdini oniki.

Deus kania nama gaariꞌihi araboa.

Imaꞌinavi kidimakhira kaikahina viaha abononi nabaroki fori hiki ida sidaji nokiani jahani.

3 Okamithaki ida athii ꞌbaraki kaꞌdaꞌdi vakadikaꞌdaꞌdi kavithi ibavini kania:

—Vada vaꞌora vaniꞌa,

ibaviki ada Deus ijaꞌari vakadiania.

Ijaꞌari Deus kania vaibaviki kidijaꞌari vihiki.

Ovani oa vakadiDeus hira ada.

Vahararana hojaki bana ada.

4 Deua binajohahi ida vanokho aꞌbani vaasarajanarara kaimoni.

Ni-ijaꞌari abinijanaki bana.

Ni-ijaꞌari vavaꞌi mokara nijanaki bana,

ni-ijaꞌari asarajanaki bana,

ni-ijaꞌaria bikamithaki bana ida imai ꞌbanani.

Hahavi Deua binamonahabiininiꞌiki ni-hojajanaki,

ihimiꞌiki ida.

Jaꞌdini maina ida Deua binamonahaꞌia.

5 Kaꞌdaꞌdi vakadikaꞌdaꞌdi kavithi ibavinia vithikia biniꞌaha:

—Oanajaꞌdihahaviki ida kodiamonahi — niha.

Oniaroa,

nahina hoariha hora niꞌahi jaboni:

—Inajiri bana hida oathi.

Namithahahaviki bana hida ira onanokiahijoravini hiꞌiki.

Kaꞌoa hini mani ida ivakaijokavini najahani hija.

6 Asia vara niki ada:

—Hari.

Namithaꞌiki ida hahavi ira onanokiahijoravini hiꞌiki.

Kanahinaꞌiarini kari ohojahahaꞌoadahaki ho.

Hahavi ihimini naothinia asia ohojaki bana ho,

ni-ihimiki ida kodimahi.

Hovani onakamaꞌdaꞌiki ida hahavi hojaki.

Hovani oananokhomiki jaboni ida.

Ijaꞌari vakanabidi akaaforaki paha ijaꞌari kamahi anokhomirikia vaꞌora onoꞌaki bana ho.

Ni-abosiki ida paha okavagahinaiki.

Vaini kaꞌdaꞌdinia kamaꞌdaki ida paha vaꞌora onoꞌavini hiki.

7 Mahi jahaki anokhomirikia vaꞌora onoꞌaꞌiki adani kodijaꞌari Jahari athi-ra vakajoniki,

hora vakavaꞌipahinipaꞌitxiriki.

Hovani vakadiDeus ho,

kodijaꞌari vihiki adani.

8 Vahoariha ibavi enxofre kaꞌdakoni haꞌdiki bodinia vaꞌora onahokahiki bana adani.

Hiꞌadani ni-vanaabajahakiki ida oathi.

Ijaꞌari vahoariha vaꞌora vanajahariharivini mani ida vaꞌora vifinivini hija,

oniani ida hora vakavaꞌipahinivini hija.

Hiꞌadani vanahoarihaki ida oathi kaꞌoa,

kaꞌoa hijanaria kaimoni.

Deus kaijaꞌari ꞌbadara ibavi enxofre kaꞌdakoni haꞌdiki bodinia vaꞌora onahokahiki bana adani.

Hiꞌadani hojai jaharikia vavaꞌi binahonariahihiki jaboni,

kaabiniki jaboni,

hiꞌadani makhira kidigamo hiriki khama vaabono vakaviꞌomakhamavini.

Hiꞌadani vakaijorahaki jaboni,

hiꞌadani deus amovana-ra vakanamasiviki jaboni,

korijanahi abono jaboni.

Hivaꞌoani afohahavi vaꞌora onahokahiki ibavi enxofre kaꞌdakoni haꞌdikia.

Mahi,

joma hiki hahavi vahojaki,

ni-vikhaonanijanaki.

Vaꞌora onahokahihahavivini vakamithahahaꞌoadahaki ida vavaꞌi rogo inini.

Ibavi enxofre kaꞌdakoni haꞌdiki bodinia abiniꞌianaki fori vihiki adani — hora niꞌaha ada kaꞌdaꞌdi vakadikaꞌdaꞌdi.

9 Hari.

Oniaroa,

Deus ibavi kaijaꞌarini hoarana khaki kodiania.

Onokibiininiꞌiki ada ovari 7 vaipohina vahararana,

7 bavi daiki ahoroaꞌini kari onokiꞌiki ada.

Khaꞌaha ada ovari kodiania.

Hora niꞌaha:

—Hida kha bana.

Ira onanokiahivini hiki bana ida imaꞌinavi fori hiki Ovilia Dorona oniki kagamo kaimoni — hora niꞌaha.

10 Oniaroa,

Maꞌonahai Jahaki hora navaꞌihonariahihivini.

Oniania,

Deus ibavi kaijaꞌarini hora avikhahi arabo nâmahikia.

Hora nanokiahiha Sidaji Jahakaꞌoaki Jerusalém onikia.

Deus kania nama gaariꞌihi ida sidaji.

11 Vagaki ida sidaji,

Deus jahana vagana binavagaki ida sidaji.

Jaspe jaꞌdi jahaki vagaki nokiani fori hiki ida sidaji.

Cristal jaꞌdi jahaki anokiajavarivahaki nokiani fori hiki jaboni ida.

12 Namahiki karahoki ida sidaji kavasiribanini.

Kavasiribaninia kahojaki ida bakatha 12 kihiki kaipohini.

Deus ibavi kaijaꞌarini 12 vihiki vaipohina vahojananaki bakatha kania avakadavaꞌaja kaimoni ida sidaji.

Israel kaisai 12 vihiki vaipohina vaonina jiriki,

12 bakatha kaipohini kanamania hojahananaki.

13 Kahojaki ida bakatha akahoarabakosiki safinia bivikhamananiki kaaniaja.

Kahojaki ida kahoariha akahoarabakosiki safini aagari kaaniaja.

Kahoariha akahoarabakosiki safini vaꞌdori aniaja.

Kahoariha akahoarabakosiki safini vaꞌdori kajasonija.

14 Sidaji kavasiribanini naboꞌania hojahi ida jaꞌdi kaaraki 12 hiki ipohini.

Jaꞌdi namania jirihananaki ida Ovilia Dorona oniki athi avaadahaoniva abono 12 vihiki vaipohina vaonina.

15 Deus ibavi kaijaꞌarini hora vara niꞌakia bivahojaꞌiki ida ava kaꞌouroki,

birajomaja kaimoni ida sidaji,

sidaji kabakathani,

sidaji kavasiribanini hiki.

16 Sohifiahanaki ida sidaji rabodini,

oadani hiki.

Deus ibavi kaijaꞌarinia bigathiꞌiki ida kidiava,

birajomaꞌiki ida sidaji.

Dois mil e duzentos quilômetros oadaki ida sidaji.

Dois mil e duzentos quilômetros rabodini jaboni,

dois mil e duzentos (2.200) quilômetros hiki jaboni namahini ida.

17 Deus ibavi kaijaꞌarinia birajomaki jaboni ida sidaji kavasiribanini.

64 metros hiki kavasiribanini rabodini.

Ijaꞌaria birajomaki ida rajomahia.

Onivani fori hiki ida Deus ibavi kaijaꞌarini karajomahia onokiki birajomaki ida sidaji.

18 Jaꞌdi jahaki vagaki kaidivaki jaspe oniki amonahaki ida sidaji kavasiribanini.

Ouro kabodihadihaki vidro vagaki anokiajavariki amonahaki nokiani fori hiki ida sidaji.

19-20 Sidaji kavasiribanini kajaꞌdini kaarakia hojaki ida jaꞌdi kaidivaki jahaki ipohiki,

binajahaja kaimoni ida sidaji kavasiribanini.

Sidaji kavasiribanini kajaꞌdini kaaraki hoarani jaspe oniki;

jaꞌdi hoariha vagaki koriki nama korini fori hiki safira oniki;

jaꞌdi hoariha vagaki koriki avaꞌafani korini fori hiki ágata oniki;

jaꞌdi hoariha vagaki koriki avaꞌafani hoariha korini fori hiki esmeralda oniki;

jaꞌdi hoariha vagaki nadaraki sardônio oniki;

jaꞌdi hoariha vagaki nadaradaraki sárdio oniki;

jaꞌdi hoariha,

crisólito oniki;

jaꞌdi hoariha vagaki korikoriki berilo oniki;

jaꞌdi hoariha topázio oniki;

jaꞌdi hoariha crisópraso oniki;

jaꞌdi hoariha jacinto oniki;

jaꞌdi hoariha ametista oniki.

Nadaraki,

nadaradaraki,

koriki,

korikorini hiki ida jaꞌdi vagaki kaidivaki afohanana.

21 Jaꞌdi jahaki kaidivani arafiaki pérola onikia kamonahaki ida bakatha 12 kihiki kaipohini.

Pérola hoarani kaꞌoa kamonahaki ida bakatha kahoarahanana.

Jahaki ida sidaji kahagihini ouro kabodihadiharikia amonahaki ida sidaji kahagihini.

Vidro vagaki fori hiki nokiani ida sidaji kahagihini.

22 Ni-onokiki ida Deu-ra khai vaniꞌavini kagorani hoarani sidaji bodinia.

Deus danona arafiaki,

Ovilia Dorona oniki khama vahojahahaꞌoadahaki adani sidaji bodinia,

oniani ida ijaꞌari Deu-ra khai vaniꞌavini hija Deus viaha ibavi hahavia hojaki hihida sidaji bodinia.

23 Deus jahana binavagaki ida sidaji,

oniani ida safini,

masiko hiki-ra nahojajanarija.

Ovilia Dorona onikia binavagaki jaboni ida sidaji.

Deus vagana oavania vagaꞌia ida.

24 Arabo hahavi kaijaꞌarini vavaadahaki ida sidaji vagani kani.

Arabo hahavi kaijaꞌarini vakadikaꞌdaꞌdi vavikhaki ida vakadinahina kaidivaki sidaji kania.

25 Mahi oadani arabikhajahaki ida sidaji kabakathani.

Ni-hojaki ida joma,

oniani ida bakatha-ra kanaꞌborija.

26 Arabo hahavi kaijaꞌarinia vavikhaki ida vakadinahina jahaki kaidivaki sidaji bodinia.

27 Ni-aviꞌoiki adani ijaꞌari sidaji bodinia badani Deua bikaramonakia vakabadaniki.

Ni-aviꞌoiki adani ijaꞌari sidaji bodinia nahina kaipahivahakia vakabadaniki.

Korijanahi abono ni-aviꞌoiki jaboni.

Sidaji aviꞌoiki kaꞌoa hiꞌadani ijaꞌari vaonina Deua binajiriꞌiki papira kania,

hahavi kamaꞌdani viahania.

Ovilia Dorona oniki kapapira ida.