2 Sidaji kahagihini bodi pania radahaki ida vaini kapahani.

Vaini vadinia akhaninikhamaki ida ava.

Kakanobaniakhamaki ida ava abinirikia oniki.

Bonoki ida ava.

Badara hoarani ihiꞌai bononi 12 hiki ipohini.

Masiko hoarahanana bonoki ida.

Afani arabo hahavi kaijaꞌarini-ra vaꞌora anaihotaki kaimoni ida bana.

3 Sidaji bodinia ni-hojaki ida nahina hoarani Deua bivajahariki.

Sidajia hojaki bana ida Deus kavithi ibavini.

Deu-ra khai vaniꞌahahaꞌoadahaki adani kidihonai abono.

4 Vaꞌoaniaroa vanokiki bana ida Deus nokho.

Deus onina jirihananaki bana vaatha.

5 Hihida sidajia ni-hojajanaki ida joma,

oniani ida ijaꞌari vakadilamparina-ra avanahaꞌdijanaravini hija.

Ni-hojajanaki ada safini jaboni ijaꞌari-ra navagaki kaimoni.

Deus vagana binavagahaꞌoadahaki ida kidihonai abono kamahi.

Kaꞌdaꞌdi vihiki bana adani afohaꞌoadaha mahi anokhomirikia.

6 Hari.

Oniaroa,

Deus ibavi kaijaꞌarini hora niꞌaha:

—Kaꞌoa hida oathi,

nahina hahavi ira onavaꞌisohijoravini hiki namithaki bana,

oniani ida oathi-ra ikajariꞌdaravini-ra najahaja.

Deus Maꞌonahai Jahaki-ra karonaki athi namoniva abono vakadiania.

Bikaronaꞌiki jaboni ada Deus ibavi kaijaꞌarini kidihonai abono vakadiania,

vaꞌora nanokiahijoravini hiki ida nahina namithaki kaimoni.

Mahi ipohirikia namithaki bana ida — Deus ibavi kaijaꞌarini hora niꞌaha.

7 Oniaroa,

Jesua biniꞌaha:

—Vakamithajahakiꞌa bana!

Jorakia ojoiki bana ho avakadiania!

Deus vaꞌora kajoamoraki bana adani oathi-ra vanaabajahakiki vaꞌora onavaꞌisohijoraꞌiki,

hihida papira hojakia — niha ada Jesus Cristo.

8 Hovani João,

okamithaꞌiki onokiꞌiki hida hihida hahavi.

Onajiriꞌiki hida nahina Deus ibavi kaijaꞌarini hora nanokiahijoravini hiꞌiki.

Naothinia,

Deus ibavi kaijaꞌarini viaha okajoꞌatharariꞌihi,

okanamasivira kaimoni.

9 Oniaroa,

hora niꞌaha:

—Hariꞌa oviaha kajoꞌatharari!

Deus ohirina mani ida hora ikanamasivivini-ra onofiravini hija.

Deus kahonai abono ho.

Ifori ohiki ho,

avaigamini vaipohina ho,

Deus athi namoniva abono vaipohina ho jaboni.

Jesus athi-ra vanaabajahakiki,

vaꞌoaniaro fori ohiki ho.

Deu-ra kanamasivi bana!

— Deus ibavi kaijaꞌarini hora niꞌaha.

10 Asia vara niha ada Deus ibavi kaijaꞌarini:

—Inanamitha bana hida papira athini Deus ira navaꞌisohijoravini hiki.

Maakariki ida mahi namithahahaviki kaimoni hida inokiꞌiki.

11 Ijaꞌari hojai jaharikia kahojaiki,

bada biniꞌava bana ida kidihojai jahariki.

Ijaꞌaria bada biniꞌaki ida hojai Deua bikaramonaki,

bada biniꞌava bana ida kidihojai karamonavahaki.

Ijaꞌari hojai jahakia kahojaiki,

bada biniꞌava bana ida kidihojai jahaki.

Jahakaꞌoahi ida ijaꞌari,

jahakaꞌoahaꞌoadahava bana — hora niꞌaꞌaha ada Deus ibavi kaijaꞌarini.

12 Oniaroa,

Jesua biniꞌaha:

—Vakamithajahakiꞌa bana!

Jorakia ojoiki bana ho!

Ojoina kamahini onaabosihananaki ida ijaꞌari hahavi vakadihojai.

Ijaꞌari hojai jahakia vakahojaiki vaꞌora onaabosiki bana nahina jahakia.

13 Kanahinaꞌiarini kari ohojahahaꞌoadahaki ho.

Hahavi ihimini naothinia asia ohojaki bana ho,

ni-ihimiki ida kodimahi.

Hovani onakamaꞌdaꞌiki ida hahavi hojaki.

Hovani oananokhomiki jaboni ida.

Hovani ookhananavaki ho.

Hovani ookasiagaki ho jaboni.

14 Deus vaꞌora kajoamoraki adani ijaꞌari vakadimakari-ra visokoki fori vihiki.

Visokovini mani ida vaꞌora najahaja.

Deus vaꞌora vaꞌahaki adani ijaꞌari ihiꞌai ava abiniriki oniki bononi hojaki-ra vahavini.

Deus vaꞌora vaꞌahaki jaboni adani ijaꞌari sidaji kaathania aviꞌoina.

15 Hari.

Sidaji banininija vahojaki adani ijaꞌari hojai jaharikia vavaꞌi binahonariahihivini-ra vanofiki.

Baniniaja vahojaki jaboni adani ijaꞌari,

ijaꞌari vahoariha-ra vakaijorahaki jaboni.

Baniniaja vahojaki jaboni adani makhira kidigamo vihiriki khama vaabono vakaviꞌomakhamaki.

Baniniaja vahojaki jaboni adani vakaabiniki,

deus amovana-ra vakanamasiviki jaboni.

Baniniaja vahojaki adani korijanahi abono,

ijaꞌari-ra vanavaꞌiponiꞌimariniki,

ijaꞌari vaꞌini-ra vavajahaꞌimariniki vihiki jaboni.

Ni-Deus vaꞌora vaꞌahaki adani ijaꞌari hojai jaharikia vakahojaiki sidaji bodinia avikhajakosina.

16 Asia vara niha ada Jesus:

—Hovani Jesus ho.

Okaronaꞌiki ida Deus ibavi kaijaꞌarini avakadiania kodijaꞌari vajoroniki-ra vaꞌora nanamithajoravini hiki kaimoni ida nahina namithaꞌiariki.

Davi kohana ijaꞌari-ra vaꞌora vakaꞌdaꞌdivini fori ohiki ho,

kidihanodi namitharonisiagaki ho.

Boviri karaho vagaki vagavagani nokiavahaki fori ohiki ho — niha ada Jesus Cristo.

17 Hari.

Maꞌonahai Jahaki,

Deus kaijaꞌari khama vaniꞌaha:

—Hida khaꞌa bana akadiania!

—Hida kha bana akadiania!

Hari.

Ijaꞌari hana hini kanabidini akaaforahi,

khava bana kodiania mahija paha-ra iꞌavivini.

Ijaꞌari hana hinia binofihi;

bigathaniki ida paha abosiriki.

Ijaꞌari kamahi ananokhomijanariki fori hiki hida hihida paha onoꞌavini hiki.

18 Hovani João,

onajiriꞌia hida papira athini Deus hora nanamithavini hiꞌiki.

Vaꞌora onavaꞌisohiki bana adani ijaꞌari vakamithaꞌiki hida hihida varani Deua bivavaꞌisohihijoraki.

Ijaꞌari-ra okaabaniki bana ho:

Ijaꞌaria bianaipohiki bana hida varani Deus kavarani hirikia,

Deua bianaipohiki jaboni bana ida ijaꞌari imai ꞌbanani hihida papira jirini athinia hojaꞌiki.

19 Ijaꞌaria bianivini bana hida varani pitani Deua bivavaꞌisohihijoravini hiki,

Deua bianivini ida nahina jahaki bivavaꞌisohihijoraꞌiki jaboni,

ni-vaꞌora vaꞌahaki adani ijaꞌari ihiꞌai ava abiniriki oniki bononi-ra vahavini.

Ni-vaꞌora vaꞌahaki bana jaboni adani hiꞌadani ijaꞌari Sidaji Jahakaꞌoakia aviꞌoina.

20 Hiꞌada hora nanokiahiꞌiki ada namithaꞌiarikia niha:

—Jorakia ojoiki bana ho.

Kaꞌoa hiki hida hihida papira athini,

ijaꞌari-ra onavaꞌisohijoravini hiki — niha.

Jesu-ra oniꞌahi:

—Jesus,

ivani kaꞌdaꞌdi i,

akadiania joi bana!

Nimania ida onofiki.

21 Onofiki ida Jesus Cristo aꞌonira kajoamorahaꞌoadahavini.

Hari ida vani oamani.

Nimania ida Joãoa binokijoraꞌiki varani hini anokhomiꞌini.