5 Tu naifa ane ne kemere Krit sahe arunati. Ane ne kemere Krit maꞌe arunati su, ane ne maꞌe apou eiye, “Ne wiyawi notosi lo au fareraiyere. Ane ne arunati su, wiyawi notosi lo taꞌane tepaꞌasi taꞌame ne. Serai ne wiyawi notosi lo taꞌane tepaꞌasire. Ne omo werese sahe lu tamo ariariyere.” Lu ape mo Owane Sitewi lo wiyawi werese au noweinoweiyei. Ane ne tu au teꞌe tepaꞌasiye. 6 Ne lu tamo yo seni apou ape se ariariyere. Meni ta lo yo seni waraꞌi aꞌi irosiya. Le tani taꞌi aꞌi naiture. Eimane werese lo Jisas lo peri pei wanu tote tawesi umasinamire. Eimane werese lowe lo yo seni luwaru aꞌi owe ape irote. Lowe tai mai lo peri owe ape wanu arisite.^c 7 Meni ape, Owane Sitewi lo wiyawi au noweinoweiyei ape, yo seni aseyaro irote. Le marepi topo lo aꞌi owe ape tote umasite. Le ai marepi witane aꞌi owe ape au teꞌe tiyatite. Le meremereye saꞌi owe ape are. Le lu taune maꞌe ai atuwei lo yo seni owe ape ai atu tiyatite. Le maꞌaru lo marepi ne owe ape tote tawesinamite. 8 Ahowa, le meni isafi aꞌi ne. Le yo seni werese wisere aꞌi marepi erasi aꞌi fa totete. Le Owane Sitewi lo wiyawi au noweinoweiyei su, le marepi waraꞌi aꞌi irote. Owane Sitewi lo nihe se meni ape lo yo seni waraꞌi aꞌi ne. Le lu taune lo yo seni marepi wisere aꞌi se siye eti hesi ereire. Le Owane Sitewi maꞌe au teꞌe wisereyeyei su, le marepi wisere aꞌi se au teꞌe wisereyete. Yo seni topo lo kairefi aꞌi se teite. Le yo seni lo yo hesi aꞌi ape owe ape umasite. Le Owane Sitewi lo peri werese aꞌi siye etite. Le Owane Sitewi lo peri wanu tote tawesi umasinamite. 9 Owane Sitewi lo peri, nomo ne maꞌe au atuatunamiteye ape, lu ape mo peri ape fu wanu tote tawesi umasite. Le Owane Sitewi lo peri wiyeme aꞌi siye etite. Lu tamo Owane Sitewi lo peri wawero aꞌi au teꞌe fiyariyei su, le peri lowe lo au teꞌe fareraiyeyei. Serai le faraꞌu Owane Sitewi lo peri fu au teꞌe fareraiyete.

10 Kemere Krit sahe lu tomu neꞌese lowe Owane Sitewi lo peri arisiteye. Lu tomu neꞌese peri ahi aꞌi au teꞌe teꞌeteye. Lu tomu neꞌese peri ta au teꞌe areareteye. Juda lo lu tomu neꞌese yo seni ape mo umasinamiteye.^d 11 Lu werese ape mo peri wawero ape mo au teꞌeyei su, lowe nohuweripi awaripi werese lo marepi au luwaruweyei. Lowe peri wawero towafi lowe lo au teꞌe atuatuteyei su, lowe maꞌaru aniyei ne toteyei. Ne lu ape mo ahi lowe lo einamite.^e 12 Meni ta lu tewi ape maꞌe fai. Le au teꞌe siye meni towafi lowe lo apou au teꞌeye, “Fene lu taune, kemere Krit maꞌe fai ape, fene werese peri wawero au teꞌenamisiya. Fene werese yo seni luwaru aꞌi ironamisiya. Fene werese aiwawe aꞌi onotaꞌano aꞌi ne. Fene ayei ahi aꞌi ne. Fene saꞌi eifariyai wou aꞌi ne.” 13 Peri ape wiyeme aꞌi tene? Serai ne Jisas lo lu feni yo seni apou ape siyeyei su, ne lowe maꞌe apou au teꞌe fiyarire, “Fene, yo seni luwaru werese aꞌi fene lo meꞌiyeni maꞌe atati arute.” Lowe peri no wanu tote tawesi umasiyei su, lowe yo seni aseyaro irowei.^f 14 Lowe yo seni aseyaro umasiyei su, lowe Juda lo yaꞌariyei lo peri owe ape totete. Aiwawe aꞌi lowe lu tamo tereꞌe lo peri wawero aꞌi owe ape wanu umasite. Lu tereꞌe ape mo peri wiyeme aꞌi meꞌiyeni maꞌe atati aruwei. Lu tamo ape yo seni luwaru aꞌi maꞌe marepi lowe lo tatai aniyei.^g 15 Lu taune Jisas lo yo seni umasinamiteye ape, marepi lowe lo aseyaro aꞌi henerai. Owane Sitewi lai marepi lowe lo ne apou aꞌi totesiya, “Etiri werese aseyaro aꞌi ne.” Ahowa, lu taune werese, Jisas lo peri arisinamiteye ape, marepi lowe lo unou aꞌi ne. Etiri werese lowe lo unou aꞌi tene. Owane Sitewi lo nihe se, marepi werese lowe lo unou aꞌi ne. Marepi Hepene lowe lo aiwawe aꞌi unou aꞌi ne. Serai Owane Sitewi lai lowe meꞌiyeni maꞌe atati aruwei. 16 Lowe lu taune werese maꞌe ahi aꞌi se apou au teꞌesiya, “Nomo Owane Sitewi soꞌoruwenamisiya.” Ahowa, lowe wiyawi lowe lo au taꞌanenamisiya su, lowe Owane Sitewi lo marepi umasi taꞌame. Lowe Owane Sitewi lo peri werese arisinamisiya. Lowe Owane Sitewi maꞌe meꞌiyeni maꞌe atati aruwe. Lowe ai marepi Owane Sitewi maꞌe lu taune aiwawe aꞌi totenamisiya. Ahowa, lowe Owane Sitewi lo peri werese arisinamisiya. Lowe wiyawi wisere aꞌi tamo irorowata.^h