Ane ne maꞌe, Taitus, au teꞌesiya, ne, nomo aiwawe aꞌi, Owane Sitewi lo peri wiyeme aꞌi tote tawesi umasisiya. Serai ne lu taune werese maꞌe Owane Sitewi lo peri wiyeme aꞌi au teꞌe fiyariyei su, ne lowe maꞌe apou au teꞌeyei, “Fene Owane Sitewi lo peri umasiyei su, fene yo seni aseyaro aꞌi fa ironamite.” 2 Ne lu owane maꞌe apou au teꞌere, “Fene meremereye saꞌi owe ape ate. Fene yo seni aseyaro aꞌi irote. Fene wiyawi taꞌaneyei su, fene marepi wisere aꞌi se au irowei. Fene Owane Sitewi lo marepi kairefi aꞌi se umasinamite. Fene lu taune werese marepi erasi aꞌi tote wawesiyenamite. Marepi orese aꞌi fene maꞌe heneraiyei su, fene kairefi aꞌi se teinamite. Serai fene marepi orese aꞌi ape hi ani ararowei.” 3 Ne taune naihe owane maꞌe au teꞌere. Fene aiwawe aꞌi yo seni werese fene lo aseyaro irote. Fene marepi luwaru aꞌi peri ahi aꞌi se owe ape au teꞌete. Fene aiwawe aꞌi meremereye saꞌi owe ape ate. Ahowa etiri werese ape mo fene owe ape umasinamite. Fene etiri werese wisere aꞌi taune tereꞌe maꞌe au teꞌe atuatunamite.^a 4 Serai lowe menitani ta meni heꞌi naituwei ape, lowe apou au teꞌe atuatute, “Ne meni no maꞌe marepi erasi aꞌi tote wawesiyenamite. Ne aiwawe aꞌi eimane werese maꞌe marepi erasi aꞌi au tote wawesiye noweinoweinamite. 5 Lowe marepi wisere aꞌi totenamite. Yo seni lowe lo ne, lowe lai aseyaro aꞌi ironamite. Lowe wesi towafi lowe lo sahe wiyawi ani tohotere. Lowe lu taune werese maꞌe marepi wisere aꞌi au atuatu irote. Menitani lai meni ape lo peri wanu umasinamite. Menitani yo seni aseyaro umasinamiteyei su, lu taune tereꞌe Owane Sitewi lo peri wiyeme aꞌi au luwaruwerowata.”^b 6 Aiwawe aꞌi ne yoꞌorei lu maꞌe apou au teꞌere, “Fene werese marepi momotei aꞌi se tote irote. 7 Wiyawi werese no sahe, ne yo seni aseyaro aꞌi no au atuatunamite. Lu taune wiyawi werese no siyeyei su, lowe Owane Sitewi lo yo seni marepi no papu siyenamiyei. Ne wiyawi aseyaro ironamiyei su, ne Owane Sitewi lo peri farere aꞌi umasinamiyei. Ne lu taune maꞌe au teꞌe atuatuwei su, ne marepi kairefi aꞌi se au teꞌe atuatute.”^c 8 Ane ne maꞌe, Taitus, au teꞌesiya. Ne peri aseyaro aꞌi lu taune maꞌe au teꞌere. Ne peri ape au teꞌeyei su, lu taune peri no ne luwaru aꞌi au teꞌerowata. Ne peri aseyaro aꞌi au teꞌeyei su, lu werese ai peri ne maꞌe itiyaꞌu au teꞌerowata. Serai lowe peri no ne neritase aꞌi teriteyei. Lowe nomo ne peri luwaru aꞌi au teꞌenamirowata.^d 9 Taitus, ne wiyawi yahowaꞌi taꞌane siye lu werese maꞌe apou aꞌi au teꞌere. “Wiyawi yahowaꞌi taꞌane siye lu, Jisas lo peri umasinamisiya ape, fene wiyawi meni owane fene lo etiri werese ne lowe lo umasinamite. Fene wiyawi meni owane fene lo maꞌe marepi wisere aꞌi au totete. Fene ai peri werese lowe maꞌe itiyaꞌu owe ape au teꞌete tiyatite.”^e 10 Fene wiyawi meni owane fene lo etiri werese lowe lo fene owe ape taꞌareite. Ahowa, fene yo seni aseyaro aꞌi iroteyei su, lu taune werese Owane Sitewi lo peri ne apou eiyei, “Owane Sitewi lo peri wiyeme aꞌi tene! Le aꞌi lai marepi hepene heꞌi aꞌi lu taune werese maꞌe aurowa.” 11 Owane Sitewi lai lu taune werese maꞌe ferafereiyei lo au atuatu hesi erei tepaꞌasiye. Serai lu taune werese aꞌi peri lo wanu umasinamiyei su, Owane Sitewi aꞌi lai lu taune werese aꞌi maꞌe marepi hepene heꞌi aꞌi aurowa. 12 Nowe ape se le lai nomo maꞌe apou au atuatunamisiya, nomo yo seni luwaru werese aꞌi meꞌiyeni maꞌe pei atati arunatire. Nomo awei lo marepi werese aꞌi meꞌiyeni maꞌe pei atati arunatite. Nomo yo seni aseyaro pei ironamite. Nomo marepi wisere aꞌi se yo seni nomo lo pei irote. Nomo Owane Sitewi maꞌe marepi erasi aꞌi au totenamiyei. Serai yo seni nomo lo aseyaro aꞌi heneraiyei.^f 13 Jisas Krais nomo maꞌe, marepi hepene heꞌi auwe ape, le Owane Sitewi wiyeme erasi aꞌi nomo lo ne. Tu naifa le nomo maꞌe au teꞌe eti naneiteye. Le apou au teꞌe eti naneiteye, “Ane mi erasi se si tame itorairowa.” Serai nomo marepi erasi aꞌi se tote ninawenamisiya. 14 Tu naifa le nomo ne temeniyeye. Le nomo ne temeniyeye su, le yo seni luwaru werese aꞌi nomo lo si tame ete hene aniyewe, au pamowe sasarisawi. Le marepi hepene nomo lo aseyaro aꞌi au irorowa. Serai nomo werese aꞌi marepi hepene aꞌi aseyaro aꞌi henerai tepaꞌasiye ape, nomo Owane Sitewi lo lu taune aseyaro heneraiyei. Serai nomo wiyawi wisere aꞌi taꞌane tohoteyei.^g 15 Etiri werese ane ne maꞌe au leseteye ape, ne lu taune maꞌe kairefi aꞌi se au teꞌete. Lowe Owane Sitewi lo marepi pei umasite. Ne lu taune maꞌe yo seni luwaru aꞌi ironamiteye ape, ne yo seni luwaru aꞌi lowe lo au fareraiyere. Ne kairefi aꞌi teite. Lu taune tamo peri no ape arisirowata.^h