Ne, Taitus, lu taune maꞌe apou au teꞌere, “Fene awei pani lu owane werese lo peri wanu umasinamite. Lu tereꞌe etiri fene lo, au noweinoweinamiteye ape, fene aiwawe aꞌi peri lowe lo wanu tote umasinamite. Fene mi mi werese marepi kairefi aꞌi se wiyawi wisere aꞌi ne au taꞌanenamite.”^a 2 Ne lowe maꞌe au teꞌere, “Fene lu taune werese maꞌe peri luwaru aꞌi owe ape au teꞌere. Fene ai marepi lu taune maꞌe owe ape tote tiyatinamite. Lu taune werese maꞌe marepi fetane aꞌi au irote. Lu taune werese maꞌe marepi wisere aꞌi au atuatunamite.” 3 Ne awei lu taune werese ne owe ape au teꞌe luwaruwete! Piyene awere? Tu naifa nomo aiwawe marepi meremereye aꞌi totenamiteye. Nomo Owane Sitewi lo peri arisinamiteye. Sepei Satan lai marepi nomo lo tatai aniyei ne totesiya. Awei lo yo seni werese ne nomo iro umasinamiteye. Nomo taune tamo siye wisereyenamiteye. Marepi werese nomo lo mi mi apou totenamiteye. Ai peri teꞌe tiyatinamiteye, etiri tamo siye wisereyenamiteye, lu taune maꞌe ai marepi totenamiteye, nomo ai marepi mi mi werese totenamiteye.^b 4 Ahowa, Owane Sitewi Tai Pefine aꞌi, nomo maꞌe, marepi hepene heꞌi auwei ape, le yo seni luwaru werese aꞌi nomo lo hi maꞌe siyeye. Le marepi erasi aꞌi nomo maꞌe tote wawesiyenamiteye. Le marepi wisere aꞌi lo nomo maꞌe au atuatu ironamiteye su, 5 le yo seni luwaru aꞌi nomo lo au sasari ani pamoweye. Nomo yo seni luwaru aꞌi mi mi werese totenamiteye, nomo yo seni wisere aꞌi ironamirowata. Nomo Moses lo yo peri umasinamiteye su, Owane Sitewi lai marepi hepene heꞌi nomo maꞌe aurowata. Ahowa, le marepi ferafereiyei lo yo seni luwaru aꞌi nomo lo, le yo seni luwaru aꞌi nomo lo aseyaro aꞌi au ironamiteyei. Le aꞌi lai Hepene Waraꞌi aꞌi lo nomo maꞌe yo seni luwaru aꞌi au huwei ne eimawesai. Hepene Waraꞌi aꞌi lo marepi hepene heꞌi aꞌi nomo maꞌe aunamiye.^c 6 Owane Sitewi lai, Jisas Krais lo iyape se, nomo maꞌe marepi hepene heꞌi aꞌi auwe ape, le Hepene Waraꞌi aꞌi lo nomo maꞌe ani terosowe. Nomo werese maꞌe erasi aꞌi napetuwe.^d 7 Serai Owane Sitewi lai nomo siyeyei su, le yo seni luwaru aꞌi nomo lo siye taꞌame. Ahowa, le Jisas lo fisaꞌi siyeyei. Owane Sitewi lo ferafereiyei se marepi hepene nomo lo au fareraiyeyei ne heneraiyei. Serai nomo Jisas Krais lo marepi umasiteyei su, nomo eimane lo heneraiyei. Serai le nomo maꞌe Owane Sitewi lo etiri werese au hese ani erei isafiyeyei. Nomo Owane Sitewi lo eimane henerai ape, nomo mi mi pasi pasi ironamitorowa. Serai nomo marepi wisere aꞌi se ninawenamisiya. 8 Peri ano ne maꞌe au teꞌesiya ape, wiyeme aꞌi tene. Peri werese ape ne, ane ne maꞌe au teꞌesiya su, ne marepi kairefi aꞌi se au teꞌe fiyarite. Lu taune Owane Sitewi lo peri werese wanu tote tawesinamiteye ape, lowe marepi erasi aꞌi se apou toteyei. Lowe wiyawi wisere aꞌi lu taune maꞌe au taꞌanenamiyei. Lowe wiyawi wisere aꞌi taꞌaneyei su, wiyawi ape marepi lowe lo au kairefiyenamiyei. 9 Lu tamo peri ahi aꞌi ne maꞌe au teꞌeteyei. Ne peri ahi aꞌi ape mo meꞌiyeni maꞌe atati arute. Ne yaꞌariyei lu tewi lo iyape werese owe ape totete. Lu taune tamo ne maꞌe ai peri au teꞌe teꞌe tiyatiyei. Ne aiwawe aꞌi meꞌiyeni maꞌe atati arute. Lowe Owane Sitewi lo yo peri ne, Moses leseteye ape, lowe Owane Sitewi lo yo peri ahi aꞌi se au teꞌeteyei. Ne peri lowe lo owe ape wanute. Etiri werese ape lu taune lo marepi au luwaruweyei. Serai ne peri lowe lo ne marepi owe ape totete.^e 10 Meni ta lu taune werese maꞌe ai marepi erasi aꞌi au teꞌe tiyatiyei ne. Ne nowe hesi aꞌi au teꞌe fareraiyeteyei. Meni ape peri no wanu umasi taꞌame su, ne faraꞌu meꞌiyeni maꞌe atati arure.^f 11 Meni ape lo marepi luwaru wiyeme aꞌi ironamiteye. Marepi lo luwaru aꞌi ne. Marepi apou ape lo lai, le yehe omo maꞌe eimawesawiyei.